WANGƆ 47

Mɔ lengbi ti mungɔ batisimɔ?

Na ya mandangɔ Ngbangɔ tɛ mɔ, mɔ manda aye gba na ndo Yehova. Zangangɔ kitɛ mɔ gbinyangbi kpale mɛndɛ̃ ti ya dungɔ lɛ ngɛ̃́ tɛ mɔ ti nɛngɔ ya mɔ hɛ̃ lo dengɔ bɛ. Kanda alengbi ti dungɔ ya mɔ na ambanga lo mɛndɛ̃ mɛ ndo gbanzi mɔ ya ta mɔ hɛ̃ dungɔ lɛ ngɛ̃́ tɛ mɔ hɛ̃ Yehova wa mɔ mu batisimɔ ma. Wangɔ mɛ na zangɔ mɔ ya mɔ hĩnga akpengba lo mɛ azi mɛndɛ̃ atengbi na ni nga na se mɛndó ala nwɔ̃ na ni.

1. Ayɔ ya mɔ hĩnga tɛnɛ zu mɛ kaya Ngbangɔ uzu ti mungɔ batisimɔ?

Uzu ti nɛngɔ ya mɔ mu batisimɔ ko, ayɔ ya mɔ “hĩnga nga bɛta lo.” (1 Timɔte 2:4) Ni fa ya, ta ayɔ ya mɔ hĩnga agbinya ti ahũnda zu ti ya Ngbangɔ uzu ti nɛngɔ ya mɔ mu batisimɔ ma. Abɛse du awakristo mɛndó mu batisimɔ gã ko, ala dɛ bo manda ye. (Kɔlɔsɛ 1:9, 10) Kanda ayɔ ya mɔ gbɔ̃ nda alo ti ngbondoni mɛ kaya Ngbangɔ. Abiazi ti ya bombi na zangɔ mɔ ti nɛngɔ ya mɔ hĩnga bere mɔ lengbi ti mungɔ batisimɔ.

2. Aye mɛndɛ̃ mɛ ayɔ ya mɔ li uzu ti mungɔ batisimɔ nɛ?

Uzu ti mungɔ batisimɔ ko, ayɔ ya mɔ “gbinya bɛ [mɔ] . . . [mɔ] diri ka tɛ Nzapa.” (Di Awa Pangɔ Kwa 3:19.) Ni ye tɛnɛngɔ ya, ale mɔ ma vundu ti siɔ kpale tɛ mɔ wa mɔ yɔ ka ti Yehova ya lo ka lɛ lo ndo ni. Ni ye nga tɛnɛngɔ ya mɔ ye ziangɔ aseliye tɛ mɔ zu ti siɔni wa mɔ ye nga bandangɔ lingɔ ye mɛ ndo hɛ̃ Nzapa dengɔ bɛ. Hãngɔ oko zingɔ, ayɔ nga ya mɔ hɛ̃ ti mɔ kaya kwa zu ti bombi na gwengɔ bombi zu nga na fangɔ tɛnɛ mabere wa fangɔ tɛnɛ mɛ ta dɛ mu batisimɔ ma.

3. Nda mɛ ta ayɔ ya mɔ zi lége ya mbɛtɔ diri na mɔ gesi ma nɛ?

Azi mɛndɛ̃ ndo ma mbɛtɔ na lo mɛ ya ta ala na kokangɔ kokisangɔ kapa mɛ ala ko hɛ̃ Yehova ma. Adu biani ya mɔ na bandangɔ yungɔ ndo nga ma se mɛndó akɔli na awali mɛ Ngbangɔ tɛnɛ tɛnɛ tɛ la ali. Kanda ta Yehova yɔ ka ti mɔ ya mɔ du zo ti lengbingɔ ma. (Di Nzembo 103:13, 14.) Ye mɛ du ngbondoni ka tɛ Yehova adu ya mɔ li zu ti nɛngɔ ya mɔ hɛ̃ lo dengɔ bɛ! Lo na zangɔ mɔ. Ngbangɔ ko kapa ya “ta ye kɔi alengbi ti gbanzingɔ Nzapa ya lo zia yengɔ e ma.”—Di Roma 8:38, 39.

GI HĨNGANGƆ LO MƐNDƐ̃

Gi hĩngangɔ se ti nwɔ̃ngɔ kpengba kpale mɛ lengbi ti gbanzingɔ mɔ ya ta mɔ mu batisimɔ ma, wa gi nga hĩngangɔ Yehova nzɔ̃ni nga na se mɛ lo lengbi ti zangɔ mɔ.

4. Gi hĩngangɔ Yehova nzɔ̃ni

Aye mɛ ayɔ ya mɔ hĩnga ni uzu ti nɛngɔ ya mɔ mu batisimɔ nɛ? Uzu ti nɛngɔ ya mɔ ye lo wa mɔ li ye mɛ ndo hɛ̃ lo dengɔ bɛ ko, ayɔ ya mɔ hĩnga lo nzɔ̃ni. Ba VIDEO ti nɛngɔ ya mɔ hĩnga se mɛ awa mandangɔ Ngbangɔ ti lɛ gigi zu alongandó lingɔ ni. Wa na pɛni hɛ̃ gbinya ti hũnda olo mɛ.

VIDEO: Makambo oyo ememaka na batisimo (3:56)

Na ya video mɛ, ye mɛndó za ayata kɔli na ayata wali ya ala mu batisimɔ nɛ?

Di Roma 12:2, wa na pɛni hɛ̃ gbinya ti ahũnda olo mɛ:

Mɔ na ambanga lo mɛndɛ̃ mɛ Ngbangɔ ndo ha mɛ ta mɔ ndo ye lo ni nvɛ̃ni ma?
Se du ngaso, ye mɛ mɔ li nɛ?

5. Nwɔ̃ alo zu mɛ lengbi ti gbanzingɔ mɔ ya ta mɔ mu batisimɔ ma

Ngoi mɛ zo ndo mu ekateli ti hɛ̃ngɔ dungɔ lɛ ngɛ̃́ tɛ lo hɛ̃ Yehova nga na mungɔ batisimɔ ko, lo ndo tengbi na akpengba lo. Ti nɛngɔ ya mɔ hũ ndakisa kɔi ko, ba VIDEO, wa na pɛni hɛ̃ gbinya ti ahũnda olo mɛ.

VIDEO: Kolinga Yehova esalisaka biso tólonga mikakatano (5:22)

Akpengba lo mɛndó Narangerel nwɔ̃ ti nɛngɔ ya lo li kwa hɛ̃ Yehova nɛ?
Ngasia la songo mɛ lo na ni ka mbage tɛ Yehova zandó lo ya lo nwɔ̃ akpengba kpale mɛndó lo ndo tengbi na ni nɛ?

Di Masese 29:25 nga na 2 Timɔte 1:7, wa na pɛni hɛ̃ gbinya ti hũnda olo mɛ:

Ye mɛ ndo hɛ̃ e ngunu ti nɛngɔ ya e nwɔ̃ kpengba lo nɛ?

6. Kpã bɛ mɔ ndo Yehova

Yehova na zangɔ mɔ ya mɔ li ye mɛ lo ndo sepala na ni. Ba VIDEO, wa na pɛni hɛ̃ gbinya ti ahũnda olo mɛ.

VIDEO: Yehova Nzambe akosalisa yo (2:50)

Na ya video mɛ, ye mɛndó ndo gbanzi wa mandangɔ Ngbangɔ kɔi ya ta lo mu batisimɔ ma nɛ?
Ye mɛndó za lo ya lo kpã bɛ lo ndo Yehova nɛ?

Di Yisaya 41:10, 13, wa na pɛni hɛ̃ gbinya ti hũnda olo mɛ:

Nda mɛ ayɔ ya mɔ du na loyengɔ ya mɔ na kokisangɔ kapa mɛ mɔ ko hɛ̃ Yehova na ngoi ti batisimɔ tɛ mɔ nɛ?

7. Hɛ̃ Yehova siakɔli na lo ti songo tɛ lo

Na ngoi mɛ mɔ ndo gbɔ̃ li mɔ na ndo songo tɛ Yehova ka mbage tɛ mɔ ko, mɔ na hɛ̃ngɔ lo siakɔli wa mɔ nga na tingɔ na gwɛ̃ ti vɔrɔngɔ lo bwai na bwai. Di Nzembo 40:5, wa na pɛni hɛ̃ gbinya ti hũnda olo mɛ:

Anzɔ̃ sulu tɛ Yehova mɛ mɔ ndo sepala na ni gba nɛ?

Prɔfɛta Yirimia ndo yendó Yehova nga na Tɛnɛ tɛ lo gba, lo ndo hɛ̃ndó siakɔli gba hɛ̃ Yehova na lo ti ili lo mɛ lo yɔ. Lo tɛnɛ ya: “Tɛnɛ tɛ mɔ asĩ ge ya bɛ mbi na dengɔ bɛ na lo mɛ ya mbi yɔ ili mɔ, Oo Yehova Nzapa.” (Yirimia 15:16) Hɛ̃ gbinya ti ahũnda olo mɛ:

Nda mɛ du ye ti ndima dungɔ Tɛmwɛ tɛ Yehova nɛ?
Mɔ na gwɛ̃ ti mungɔ batisimɔ ti nɛngɔ ya mɔ ti Tɛmwɛ tɛ Yehova?
Ye mɛ ndo gbanzi mɔ ya ta mɔ mu batisimɔ ma nɛ?
Ye mɛ ayɔ ya mɔ li ti nɛngɔ ya mɔ mu batisimɔ nɛ?

AZI MƐNDƐ̃ NDO TƐNƐ YA: “Mbi ndo kpɛ mbɛtɔ ti mungɔ batisimɔ, na lo mɛ ya ta mbi na kokangɔ lingɔ aye zu mɛ mbi na kongɔ kapa ni hɛ̃ Yehova ma.”

Dangɔ bɛ mɛ mɔ nga na ni la?

NA NDUNU NI

Yehova lengbi ti zangɔ mɔ ya mɔ nwɔ̃ akpengba kpale mɛ ndo gbanzi mɔ ya ta mɔ mu batisimɔ ma.

Bozongeli

Aye mɛ ayɔ ya mɔ hĩnga ni uzu ti nɛngɔ ya mɔ mu batisimɔ nɛ?
Aye mɛ ayɔ ya mɔ gbinyangbi ni na ya dungɔ lɛ ngɛ̃́ tɛ mɔ uzu ti nɛngɔ ya mɔ mu batisimɔ nɛ?
Nda mɛ ta mɔ lengbi ti zingɔ lége ya mbɛtɔ diri na mɔ gesi ma nɛ?

Datɛ mɛ mɔ onzi na eteni mɛ:

Ye mɛ mɔ na lingɔ ni

Diri mɔ ba kambisangɔ nda tɛnɛ “Mbi lengbi ti bandangɔ fangɔ tɛnɛ ndoni kɔi na ayata ti ya bombi?” nga na “Mbi lengbi ti mungɔ batisimɔ?” mɛ ka nda Eteni 4.

Aye mɛndɛ̃:

Your other goal