Azi mɛ li libala fãnani ndo da bɛ la ya, dengɔ bɛ mɛndó ala na ni na lá ti libala tɛ la na ngbãngɔ bwai na bwai. Alengbi ti lingɔ tɛrɛ lo. Awakristo mɛ li libala gã mɛ ndo kpã awangɔ ti ya Ngbangɔ na kwa ko, ala hĩnga ya se mɛ ndo du na ni la.

1. Wangɔ mɛ Ngbangɔ hɛ̃ kɔ wali nɛ?

Yehova hɛ̃ kɔ wali kumba ti dungɔ gbia ti ndasewa. (Di Efɛsɛ 5:23.) Yehova yɔ ka ti lo ya lo mu ekateli ti nzɔ̃ni na lo tɛ azi ti ndasewa tɛ lo. Ngbangɔ tɛnɛ hɛ̃ akɔ wali ya: “Ĩ ye awe ĩ.” (Efɛsɛ 5:25) Ni ye tɛnɛngɔ ya nɛ? Kɔli mɛ ndo ye ya lo ndo li ye tɛrɛ lo na songo abɛse na ngoi mɛ ala sɛ bere na ngoi mɛ ala na popo tɛ azi gba. Lo ndo bata ya lo, lo ndo kokisa gwɛ̃ tɛ lo, wa lo ndo li nga ya lo du na dengɔ bɛ. (1 Timɔte 5:8) Omɛ ɔ ngbondoni du ya lo ndo li zu ti nɛngɔ ya, ya lo du na mangbi ti kpengbani na Yehova. (Matie 4:4) Na ndakisa, lo lengbi ti lingɔ sambela nga na dingɔ Ngbangɔ ndoni kɔi na ya lo. Kɔli lengbi ti dungɔ na nzɔ̃ mangbi na Yehova se du ya lo ndo kokisa gwɛ̃ tɛ ya lo.​—Di 1 Petro 3:7.

2. Wangɔ mɛ Ngbangɔ hɛ̃ akɔli nɛ?

Tɛnɛ tɛ Nzapa tɛnɛ ya “ale ya kɔli atɔndɔ kɔ lo.” (Efɛsɛ 5:33) Ni ye tɛnɛngɔ ya nɛ? Wali lengbi ti hĩngangɔ aseliye tɛ kɔ lo ti nzɔ̃ni nga na ge ge ge mɛ kɔ lo ndo li ti kokisangɔ na gwɛ̃ tɛ lo nga na tɛ ayati la. Lo lengbi ti fangɔ ya lo ndo tɔndɔ kɔ lo, na tɛnɛngɔ hɛ̃ lo tɛnɛ na tɔndɔngɔ nga na hɛ̃ngɔ ti lo ti kokisangɔ ekateli mɛ lo mu abɛse du ya ta kɔ lo ndo vɔrɔ Yehova ma.

3. Ngasia la kɔli na wali mɛ li libala lengbi ti lingɔ ya mangbi tɛ la ati kpengbani nɛ?

Ngbangɔ tɛnɛ hɛ̃ kɔli na wali mɛ li libala ya: “Ala zu sɛ ati bo zo kɔi.” (Matie 19:5) Ni ye tɛnɛngɔ ya, ala lengbi ti lingɔ zu ti nɛngɔ ya ta kangbi si ka popo tɛ la ma. Ala lengbi ti lingɔ ni se du ya ala ndo lekisa ngoi ndoni kɔi ngoi zu, tɛnɛngɔ tɛnɛ yangondo nga na songo ka popo tɛ la wa zo kɔi kɔi kambisa se mɛ lo ndo ma na tɛrɛ lo hɛ̃ fɔ̃ lo. Hãngɔ Yehova zingɔ, ta zo bere ye kɔi lengbi ti dungɔ ngbondoni ɔngɔ libala tɛ la ma. Ale ala du na kpengba lɛ ya, ta ala ti na mangbi ti kpengbani na zo mɛndɛ̃ ma.

 GI HĨNGANGƆ LO MƐNDƐ̃

4. Kɔ wali, ye ya mɔ wa kokisa nga gwɛ̃ tɛ lo

5. Ya kɔli, ye kɔ mɔ wa tɔndɔ nga lo

Ngbangɔ yɔ ka ti awe ya ala tɔndɔ akɔ la abɛse du ya ta akɔ la ndo vɔrɔ Yehova ma. Di 1 Petro 3:1, 2, wa na pɛni hɛ̃ gbinya ti hũnda olo mɛ:

• Se du ya ta kɔ mɔ ndo vɔrɔ Yehova ma ko, ta kitɛ da ma gwɛ̃ tɛ mɔ du ya lo ti wakwa tɛ Yehova. Mɔ da bɛ mɔ ya ye mɛ na zangɔ lo nɛ, hangɔ lo na tɛnɛ tɛ Yehova ngoi zu bere dungɔ na seliye ti nzɔ̃ni nga na tɔndɔngɔ lo? Na lo nɛ?

Na ya ngoi gba kɔli na wali mɛ li libala ndo mu ekateli ti nzɔ̃ni  ndoni kɔi. Kanda na ya ngoi mɛndɛ̃ ta wali lengbi ti yengɔ ekateli mɛ kɔ lo mu ma. Se du ngaso ko, ayɔ ya wali kambisa dangɔ bɛ tɛ lo na ndenge ti nzɔ̃ni nga na tɔndɔngɔ, lingɔ ngaso afa ya lo ndo hĩnga ya Yehova hɛ̃ kɔ lo kumba ti mungɔ ekateli ti nzɔ̃ni na lo ti ndasewa tɛ la. Ayɔ ya lo li zu ti hɛ̃ngɔ ti lo na ya ekateli mɛ kɔ lo ye mungɔ. Se wali li ngaso ko, ni fa ya lo ndo hɛ̃ ti lo ya ndasewa tɛ la du na dengɔ bɛ. Di 1 Petro 3:3-5, wa na pɛni hɛ̃ gbinya ti hũnda olo mɛ:

• Yehova ndo ma ngasia na ngoi mɛ wali ndo tɔndɔ kɔ lo nɛ?

6. Mɔ lengbi ti nwɔ̃ngɔ akpengba kpale ti libala tɛ mɔ

 NA NDUNU NI

Kɔli na wali mɛ li libala lengbi ti dungɔ na dengɔ bɛ se du ya ala ndo yengbi, ndo du na tɔndɔngɔ wa ala ndo kpã nga awangɔ ti ya Ngbangɔ na kwa na ya libala tɛ la.

Bozongeli

• Ngasia la kɔli lengbi ti lingɔ ya libala tɛ la du na dengɔ bɛ nɛ?

• Ngasia la wali lengbi ti lingɔ ya libala tɛ la du na dengɔ bɛ nɛ?

• Se du ya mɔ li libala, andia ti ya Ngbangɔ mɛ lengbi ti zangɔ mɔ ti nɛngɔ ya libala tɛ mɔ du na dengɔ bɛ nɛ?