Zo kɔi kɔi na se tɛ lo ti yungɔ bɔngɔ nga na lɛkɛngɔ tɛrɛ lo. Se e landa ndia ti ya Ngbangɔ ko, elengbi ti pɔnangɔ bɔngɔ mɛ bɛ e ndo ye mɛ ndo hɛ̃ nga Yehova dengɔ bɛ. Wa e ba ambanga ndia ni.

1. Andia ti ya Ngbangɔ mɛ za e ya e yu bɔngɔ ti nzɔ̃ni wa e lɛkɛ nga tɛrɛ e nzɔ̃ni nɛ?

Ayɔ ya e yu “bɔngɔ na se mɛ alengbi nga na se mɛ nzɔ̃ni, ale [e] yu bɔngɔ na se [mɛ ndo fa ya, e na bingangɔ li ti nzɔ̃ni, NWT]” wa e du vuruni lá kwɛ ti nɛngɔ ya azi mɛndɛ̃ hũ ya e ndo “tɔndɔ Nzapa.” (1 Timɔte 2:9, 10) E ba alo siɔ mɛ atɛnɛ tɛnɛ ni so ya ndia niko: (1) Ayɔ ya e yu bɔngɔ na se mɛ “alengbi.” Nga ma se mɛ mɔ ndo hũ na ni ka bombi, ta e Atɛmwɛ tɛ Yehova e ndo yu bɔngɔ lɛ ni kɔi ma, kanda yungɔ bɔngɔ tɛ e nga na se mɛ e ndo lɛkɛ na tɛrɛ e ndo fa ya e ndo hɛ̃ Nzapa tɛ e ndima. (2) Yungɔ bɔngɔ “na se ti nzɔ̃ni,” afa ya ta elengbi ti yungɔ bɔngɔ mɛ ndo ndũ gwɛ̃ ti bombingɔ tɛrɛ bere omɛ gbɔ lɛ sa tɛrɛ e ma. (3) E na fangɔ ya e na “bingangɔ li ti nzɔ̃ni” se du ya e ndo kɛ̃ abɔngɔ nga na se ti lɛkɛngɔ tɛrɛ mɛ azi gba ndo ye ni ndɛ. (4) Se tɛ e ti yungɔ bɔngɔ alengbi ti fangɔ ya e ndo “tɔndɔ Nzapa,” afa ya e ndo vɔrɔ bɛta Nzapa.​—1 Kɔrinto 10:31.

2. Yungɔ bɔngɔ tɛ e nga na se ti lɛkɛngɔ tɛrɛ e alengbi ti lingɔ nɛ na mbage tɛ ayata e awakristo nɛ?

Elengbi ti yungɔ bɔngɔ zu mɛ bɛ e ye, kanda ayɔ ya e gbɔ̃ li e na ndo ye mɛ ni lengbi ti lingɔ na mbage tɛ azi mɛndɛ̃. E li zu ti nɛngɔ ya ta e hɛ̃ afɔ̃ e sɔngɔ bɛ ma, kanda zo kɔi kɔi ali “ya bɛ fɔ̃ ni ade, aza fɔ̃ lo, akpengba nga na lo yengɔ tɛ lo.”​—Di Roma 15:1, 2.

3. Ngasia la se tɛ e ti yungɔ bɔngɔ alengbi ti tongɔ azi mɛndɛ̃ ya ala ga ge ya bɛta sambela nɛ?

E ndo li zu ti nɛngɔ ya e yu bɔngɔ na ndenge ti nzɔ̃ni, e ndo li ni gba na ngoi mɛ e ye gwengɔ bombi, bere kaya kwa ti fangɔ tɛnɛ. Ta ayɔ ya bɔngɔ mɛ e yu a hã likebi tɛ azi ndo nzɔ̃ pa mɛ e ndo pa ma. Kanda gwɛ̃ tɛ e du ya abenda azi ge ya mbilimbili wa ali ya “agonda lo tɛ Nzapa mɛ e ndoha.”​—Tito 2:10.

 GI HĨNGANGƆ LO MƐNDƐ̃

4. Lɛkɛngɔ tɛrɛ nzɔ̃ni ndo hɛ̃ Yehova ndima

Nda mɛ e ndo lɛkɛ tɛrɛ e nzɔ̃ni nɛ? Di Nzembo 47:2, wa na pɛni hɛ̃ gbinya ti ahũnda olo mɛ:

• Ili Yehova mɛ e yɔ, alengbi ti lingɔ nɛ na se tɛ e ti yungɔ bɔngɔ nɛ?

• Mɔ da bɛ mɔ ya adu nzɔ̃ni ya mɔ gi hĩngangɔ dangɔ bɛ mɛ azi na dungɔ na ni ndo mɔ na ngoi mɛ mɔ ka bombi bere mɔ ka kwa ti fangɔ tɛnɛ? Na lo nɛ?

 5. Ye mɛ za e ya e pɔna bɔngɔ ti nzɔ̃ni mɛ e yu nga na se ti lɛkɛngɔ na tɛrɛ e

Ba VIDEO.

Ye mɛ ngbondoni du ya bɔngɔ tɛ e du ngoi zu vuruni wa amangbi nga na kwa mɛ e ndo e li, kanda ta du bɔngɔ mɛ e vɔ̃ na falanga gba ma. Di 1 Kɔrinto 10:24 nga na 1 Timɔte 2:9, 10. Na pɛni ĩ tɛnɛ tɛnɛ na ndo nda mɛ ayɔ ya e kɛ̃ yungɔ abɔngɔ mɛ . . .

• wawa wawa nga omɛ avu.

• gbɔ̃ zo, omɛ ndo fa tɛrɛ zo yangondo, nga omɛ ndo ndũ gwɛ̃ ti bombingɔ tɛrɛ.

Ta awakristo dɛ ka gbɛ ndia tɛ Moize ma, kanda ni ndo fa dangɔ bɛ tɛ Yehova. Di Kolimbola Mibeko 22:5, wa na pɛni hɛ̃ gbinya ti hũnda olo mɛ:

• Nda mɛ ayɔ ya e kɛ̃ yungɔ bɔngɔ bere se ti lɛkɛngɔ tɛrɛ mɛ ndo li ya ahũ kɔli ma wali bere wali ma kɔli nɛ?

Di 1 Kɔrinto 10:32, 33 nga na 1 Yoanɛ 2:15, 16, wa na pɛni hɛ̃ gbinya ti ahũnda olo mɛ:

• Nda mɛ ayɔ ya e gi hĩngangɔ bere se tɛ e ti lɛkɛngɔ tɛrɛ ndo gia bingangɔ li tɛ azi mɛ so gunda e bere ayata ti ya bombi nɛ?

• Ka ndo mɛ mɔ da, azi ndo yu bɔngɔ bere ndo lɛkɛ tɛrɛ la ngasia?

• Mɔ da bɛ mɔ ya awakristo alengbi nga ti yungɔ bɔngɔ zu mɛ ala ndo yu? Na lo nɛ?

 NA NDUNU NI

Na ngoi mɛ e ndo li zu ti nɛngɔ ya e lɛkɛ tɛrɛ e na ndenge ti nzɔ̃ni ko, e ndo hɛ̃ Yehova na azi mɛndɛ̃ ndima.

Bozongeli

• Nda mɛ yungɔ bɔngɔ nga na se tɛ e ti lɛkɛngɔ tɛrɛ e adu ngbondoni ka lɛ Yehova nɛ?

• Andia ti ya Ngbangɔ mɛ lengbi ti zangɔ mɔ ya mɔ pɔna bɔngɔ nga na se ti lɛkɛngɔ tɛrɛ na ndenge ti nzɔ̃ni nɛ?

• Se ti lɛkɛngɔ na tɛrɛ e lengbi ti tongɔ azi mɛndɛ̃ ya ala ba sambela ti mbilimbili ngasia?