Yehova du “Nzapa ti dengɔ bɛ.” (1 Timɔte 1:11, NWT) Lo na gwɛ̃ ya e du na dengɔ bɛ, wa e sepala nga na dungɔ lɛ ngɛ̃́. Lo ndo ma dengɔ bɛ na ngoi mɛ e ndo mu mbó na pɛ kwa. Na ya wangɔ mɛ e na hũngɔ ndenge mɛ e salela ngoi tɛ e ti mungɔ mbó na se mɛ alengbi ti hɛ̃ngɔ Yehova dengɔ bɛ.

1. Ye mɛ ayɔ ya ta bɛ e li na ni ma na ngoi mɛ e ndo pɔna wele kɔi nɛ?

Wele mɛ mɔ ndo ye lɛngɔ ni na ngoi mɛ mɔ ndo mu mbó nɛ? Ambanga azi ndo ye dingɔ buku, mangɔ miziki, bangɔ filmɛ bere lingɔ kaya intɛrnɛt. Azi mɛndɛ̃ ndo ye dɔngɔ dɔ ndoni kɔi na afɔ̃ la, lɛngɔ wele kaya ngu bere awele mɛndɛ̃. Abɛse du ya e ndo sepala na wele ni nɛ ko, ayɔ ya ni du wele mɛ “ndode bɛ Gbia.” (Efɛzɛ 5:10) Adu ngbondoni e hĩnga ya azi gba ndo ye lɛngɔ wele mɛ bɛ Yehova ndo kɛ̃: mabere wele ti to, ti pite bere kwa tɛ asiɔ nyingɔ. (Di Nzembo 11:5.) Ye mɛ za e ya e pɔna wele ti nzɔ̃ni nɛ?

Se e pɔna akwa mɛ ndo ye Yehova ko, ala na zangɔ e ya e ye Yehova wa e pɔna wele ti nzɔ̃ni. Nga ma se mɛ e manda na ni kaya wangɔ 48 ko, “zo ko la ndo dɔ nɔ̃ na awa ndara ko, lo nga na tingɔ wa ndara.” Kanda azi ko la ndo du ndoni kɔi ngoi zu na azi mɛ ta ndo ye ndia tɛ Yehova ma ko ala na “sukangɔ siɔni.”​—Masese 13:20.

2. Nda mɛ du ngbondoni ya e kpã ngoi mɛ e lekisa na lɛngɔ wele nɛ?

Abɛse du ya wele mɛ e pɔna du nzɔ̃ni ko, ta e zi lége ya atɛ ngoi tɛ e ma. Se ta e li ngaso ma ko, ta e na luangɔ ngoi ti lingɔ na aye mɛ ɔ ngbondoni ma. Ngbangɔ pa hɛ̃ e ya e “salela ngoi tɛ [e] na ndenge ti nzɔ̃ni.”​—Di Efɛzɛ 5:15, 16, NWT.

 4. Salela ngoi tɛ mɔ na ndara

5. Pɔna wele mɛ nzɔ̃ni

Yehova ndo sepala na awele gba, kanda ta lo ndo sepala na wele zu ma. Di Mosakoli 8:15 nga na Filipɛ 4:8, wa na pɛni hɛ̃ gbinya ti hũnda olo mɛ:

• Wele ti nzɔ̃ni mɛ mɔ ndo sepala na ni nɛ?

 NA NDUNU NI

Gwɛ̃ tɛ Yehova du ya e pɔna wa e sepala nga na wele mɛ nzɔ̃ni.

Bozongeli

• Wele mɛ ngasia la ayɔ ya awakristo kɛ̃ ni nɛ?

• Nda mɛ ayɔ ya e keba na ngoi mɛ e ndo lekisa na lɛngɔ wele nɛ?

• Nda mɛ mɔ ye pɔnangɔ wele mɛ ndo hɛ̃ Yehova dengɔ bɛ nɛ?