Abɛse du ya mɔ ndo ye Yehova gba wa mɔ ndo li kpengbani ya ta mɔ hɛ̃ lo pɛnɔ ma ko, na ya ngoi mɛndɛ̃ mɔ lengbi ti yungɔ ndo. Kanda ambanga asiɔ kpale ndo du kotani ɔngɔ asiɔ kpale mɛndɛ̃. (1 Kɔrinto 6:9, 10) Se mɔ li siɔ kpale mɛ kotani ko, ta mɔ ti na dangɔ bɛ ya Yehova kɛ̃ mɔ ma; lo na sepalangɔ ti kangɔ lɛ lo ndo siɔ kpale tɛ mɔ wa lo nga na zangɔ mɔ.

1. Ye mɛ mɔ li ti nɛngɔ ya Yehova ka lɛ lo ndo siɔ kpale tɛ mɔ nɛ?

Azi ko la ndo ye Yehova ndo ma vundu gba na ngoi mɛ ala li siɔ kpale ti kotani. Kanda kapa mɛ Yehova ko hɛ̃ awakwa tɛ lo ndo hɛ̃ la ngunu: “Abɛse du ya asiɔ kpale tɛ ĩ ati bengbani ngasia ko, ni na tingɔ mbufuni nga mabere mbi ndã.” (Yisaya 1:18) Se lo gbinya bɛ lo nvɛ̃ni ko, Yehova na kangɔ lɛ lo ndo siɔ kpale mɛ lo li. Zo lengbi ti fangɔ ya lo gbinya bɛ lo ngasia? Se du ya lo ma vundu wa lo mu ekateli ti ziangɔ siɔ kpale tɛ lo wa lo yɔ ka ti Yehova ya lo ka lɛ lo ndo siɔ kpale tɛ ni. Na gesi, lo lengbi ti ziangɔ siɔ dangɔ bɛ nga na aseliye ti siɔni mɛ to lo ya lo li siɔ kpale ni wa lo li nga kpengbani ti dungɔ na dɔngɔ nɔ ti vuruni mɛ amangbi na ndia tɛ Yehova.​—Di Yisaya 55:6, 7.

2. Ngasia la Yehova ndo salela abiazi ya ala za e na ngoi mɛ e li siɔ kpale mɛ kotani nɛ?

Se e li siɔ kpale mɛ kotani ko, Yehova tɛnɛ hɛ̃ e ya e “ili [abiazi] ti [bombi].” (Di Zaki 5:14, 15.) Abiazi ndo ye Yehova, ala ndo ye nga e. Ala hĩnga ye mɛ ala li ti nɛngɔ ya ala za zo mɛ li siɔ kpale ya lo diri na mangbi ti nzɔ̃ni na Yehova.​—Galatia 6:1.

Ngasia la abiazi alengbi ti zangɔ zo mɛ li siɔ kpale mɛ kotani nɛ? Abiazi sɛ bere taa alengbi ti zangɔ zo na lége ti Ngbangɔ ti nɛngɔ ya lo hũ ya ye mɛ ni li adu siɔni. Ala lengbi nga ti hɛ̃ngɔ lo wangɔ mɛ aza lo ya ta lo diri li siɔ kpale niko fãni mɛndɛ̃ ma. Ala lengbi nga ti tɛnɛngɔ hɛ̃ lo ya ta lo na lingɔ ambanga kwa mɛndɛ̃ ti ya bombi ma tee nga ka lo diri na mangbi ti nzɔ̃ni na Yehova. Se du ya wakristo mɛ li siɔ kpale mɛ kotani kɛ̃ gbinyangɔ bɛ lo ko, ala lengbi ti bingɔ lo gigi ti bombi ti nɛngɔ ya ala bata azi mɛndɛ̃ ti ya bombi vuruni.

 GI HĨNGANGƆ LO MƐNDƐ̃

3. Kambisangɔ siɔ kpale mɛ e li ndo za e

E ndo hɛ̃ Yehova pɛnɔ na ngoi mɛ e li siɔ kpale, adu nzɔ̃ni ya e kambisa hɛ̃ lo siɔ kpale mɛ e li. Di Nzembo 32:1-5, wa na pɛni hɛ̃ gbinya ti hũnda olo mɛ:

• Nda mɛ adu nzɔ̃ni kambisangɔ hɛ̃ Yehova siɔ kpale mɛ e li na se lɛ hɔndɛngɔ ni nɛ?

 4. Bingɔ zo gigi ti bombi ndo hɛ̃ anzɔ̃ lo gba

Se zo li siɔ kpale mɛ kotani wa lo kɛ̃ tɔndɔngɔ ndia tɛ Yehova ko, ta lo lengbi ti ngbãngɔ kaya bombi ma. Na bingɔ lo gigi ti bombi, wa e fa mangbi na lo, ta e tɛnɛ nga tɛnɛ na lo bɛ yakere ma. Di 1 Kɔrinto 5:6, 11 nga na 2 Yoanɛ 9-11, wa na pɛni hɛ̃ gbinya ti ahũnda olo mɛ:

• Se akpã lévirɛ kaya farinɛ, ye mɛ ni li nɛ? Wa ye mɛ siɔ kpale tɛ zo mɛ kɛ̃ gbinyangɔ bɛ lo lengbi ti lingɔ na ndo azi ti bombi nɛ?

 NA NDUNI NI

Se e li siɔ kpale mɛ kotani, e ma vundu na lo ni wa e kɛ̃ diringɔ lingɔ ni fãni mɛndɛ̃ ko, Yehova na kangɔ lɛ lo ndo siɔ kpale tɛ e.

Bozongeli

• Nda mɛ adu nzɔ̃ni ya e kambisa siɔ kpale mɛ e li hɛ̃ Yehova nɛ?

• Ye mɛ e li ti nɛngɔ ya Yehova ka lɛ lo ndo siɔ kpale tɛ e nɛ?

• Se du ya e li siɔ kpale mɛ kotani, nda mɛ adu nzɔ̃ni ya e yɔ wangɔ ka ti abiazi nɛ?