Ili Nzapa la Yehova, ila ni alengbi ti fangɔ ya, “Lo ndo li yako ati.” Yehova du Nzapa mɛ nvɛ̃ ngunu zu, lo nga la li aye zu. Lo na ngunu ti lingɔ ye zu mɛ bɛ lo ye.

Na yanga ti Ebreo, ando su ili Nzapa na agɛrɛ mbeti siɔ. Na Ngbandi agɛrɛ mbeti ni lo, YHWH bere YHVH. Kaya Ngbangɔ ti uzu mɛndó asu na yanga ti Ebreo, e tã ili Nzapa fãni bere 7 000. Na lɛ gegi zu azi ndo di, ndo su ili Yehova na ndenge gba nga na se mɛ ala mɛsɛnɛ na ni na yanga tɛ ala.

▸ Shap. 1, par. 15

Nzapa la nvɛ̃ Ngbangɔ, kanda lo hɛ̃ndó kwa ti sungɔ ni hɛ̃ azi. A du nga mabere bange kɔi mɛ ayɔ ka ti nyi lo kɔi ya lo su hɛ̃ ni mbeti. Na lége ti nyingɔ vurú tɛ lo, Nzapa hɛ̃ndó azi kɔdɛ tɛ lo ti nɛngɔ ya, ala su na dangɔ bɛ tɛ ni. Nyingɔ vurú ndo lindó kwa ka tɛ awa sungɔ Ngbangɔ na lége ndɛ̃́ ndɛ̃́ ndɛ̃́, ambanga asundó aye mɛ ala hũ na lɛ la bere na ya suma.

▸ Shap. 2, par. 5

A du bɛta tɛnɛ ti ya Ngbangɔ mɛ ndo kambisa lo kɔi mɛ ngbondoni. E ba lɛlo olo: ndia mɛ pa ya, “siɔ le kɛkɛ ndo gbɛ̃ nzɔ̃ le kɛkɛ” ndia ni ko ndo ha na e ya, azi mɛ e na ala e ndo du ndoni kɔi ngoi zu ala lengbi ti lingɔ ya, e ti anzɔ̃ azi bere a siɔ azi. (1 Kɔrinto 15:33) Ndia mɛ atɛnɛ ya, “le tɛ ko la zo alu ko, le tɛ mɛ nga lo na kɔngɔ la,” ni ndo ha na e ya, ta e na kpɛngɔ kɔngɔ le kɛkɛ ti kwa tɛ e ma.​—Galatia 6:7.

▸ Shap. 2, par. 12

A du tɛnɛ mɛ alo ka tɛ Nzapa. Alengbi ti kambisangɔ dangɔ bɛ tɛ lo bere hangɔ lo kɔi ngaso, ndia bere fangɔ ngbanga. Alengbi ti dungɔ tɛnɛ mɛ aba kpale mɛ na lingɔ tɛrɛ lo na bi mɛ na gangɔ. Atɛnɛ gba mɛ Ngbangɔ apiandó tɛnɛ ati na seni wɛ.

▸ Shap. 2, par. 13

Ti ndo Yezo ndó la atɛnɛ gba mɛ Ngbangɔ apia tɛnɛ mɛ aba mɛsia ati na seni. Ba lɛ kpongbo “ Atɛnɛ ti ya Ngbangɔ mɛ aba mɛsia.”

▸ Shap. 2, par. 17, tgp. (tɛnɛ ti gbɛnda pajɛ)

Yehova lindó sese ya adu paradizo, wa bo azi ko la ndo ye lo la, adu ka da. Ta dangɔ bɛ tɛ lo agbinyangbi ma. Angbã dã lo onzi siɔ kpale ko, lo hɛ̃ dungɔ lɛ ngɛ̃́ ti bwai hɛ̃ awa kwa tɛ lo.

▸ Shap. 3, par. 1

Satana du angelo mɛndó atonda tɔmbɔkɔngɔ tɛrɛ Yehova. A ili lo ya Satana, afa ya “Wa kula,” na lo mɛ ya lo ndo kɛ̃ nyɔ̃ Nzapa. A ndo ili nga lo ya Zabulu, afa ya “Wa pangɔ nvɛ̃nɛ,” na lo mɛ ya lo ndo tɛnɛ nvɛ̃nɛ na ndo Nzapa, wa lo ndo handa nga azi.

▸ Shap. 3, par. 4

Yehova lindó aangelo gã uzu ti lo lingɔ lɛ sese. A lindó ala ti nɛngɔ ya, ala du ka ndozu. Aangelo gba, ɔngɔ miliɔ̃ 100. (Danyele 7:10) Angelo kɔi kɔi na ili lo nga na aliye tɛ lo, aangelo ti mbilimbili ndo zu na tɛrɛ la ka tɛ Nzapa, ala ndo kɛ̃ ya azi asambela ani. Aangelo mɛndɛ̃ na akwa gba aɔ afɔ̃ la. Akwa ni mabere, lingɔ kwa so gbɛlɛ kiti ti Lo-Gbia tɛ Yehova, pangɔ nyɔ̃ lo, batangɔ nga na fangɔ ava lo na lége ge lɛ sese, hɛ̃ngɔ tumbu tɛ Nzapa bere hɛ̃ngɔ ti la na ya kwa ti fangɔ tɛnɛ. (Nzembo 34:7; Suma 14:6; 22:8, 9) Ala na tiringɔ to ndoni kɔi na Yezo na ngoi ti to ti Armagedona.​—Suma 16:14, 16; 19:14, 15.

▸ Shap. 3, par. 5; Shap. 10, par. 1

A du ye zu mɛ aga kaya bingangɔ li tɛ e bere e li ni, mɛ ta amangbi na gwɛ̃ tɛ Yehova ma. Siɔ kpale ndo gbɛ̃ mangbi tɛ e na Yehova, na lo ni la, ti nɛngɔ ya ta e li siɔ kpale ma ko, lo hɛ̃ e ndia ti nɛngɔ ya a za e. Na ebandeli aye zu mɛndó Yehova li a dundó ti lengbingɔ, kanda na ngoi mɛndó Adamu na Eva akɛ̃ tɔndɔngɔ Yehova ko, ala lindó siɔ kpale, ta ala dɛndó na tɛrɛ ti lengbingɔ ma. Ala tindó abange, ala kpili ngandó, e tinga awa siɔ kpale na lo tɛ Adamu, ndani la, e ndo ti nga abange e ndo kpili nga.

▸ Shap. 3, par. 7; Shap. 5, par. 3

A du to tɛ Nzapa mɛ na gbɛ̃ngɔ Satana, gegi tɛ lo nga na siɔ kpale.

▸ Shap. 3, par. 13; Shap. 8, par. 18

A du guvɛrnɛma mɛ Yehova kpã ka ndozu. Yezo Kristo la du gbia ti Lo-Gbia ni. Na lége ti Lo-Gbia ni, Yehova na onzingɔ siɔ kpale zu. Lo-Gbia tɛ Nzapa na lengɔ gbia na ndo lɛ sese zu.

▸ Shap. 3, par. 14

Nzapa lindó Yezo uzu ti lingɔ aye mɛndɛ̃ zu. Yehova tondó Yezo ge tise ti nɛngɔ ya lo kpi na lo tɛ azi zu. Na pɛ kwá tɛ lo, Yehova asondó na lo. Yezo na olo Gbia ti Lo-Gbia tɛ Nzapa, lo ndo le gbia ka ndozu.

▸ Shap. 4, par. 2

Ngbangɔ apiandó tɛnɛ ngoi mɛ mɛsia na gangɔ na ni. Na ndangba ngoi ti pɔsɔ 69, ni bandandó na buru ti 455 U.N.E. (Uzu ti Ngoi tɛ E) awɛndó na buru ti 29 N.E. (ti Ngoi tɛ E).

E hĩnga ngasia ya ni wɛndó na buru ti 29 N.E. nɛ? Apɔsɔ 69 abandandó na buru ti 455 U.N.E. na ngoi mɛndó Nehemia adiri ka Yerusalɛmɛ, wa lo bandandó kĩngɔ kɔdɔrɔ ni. (Danyele 9:25; Nehemia 2:1, 5-8) Pɔsɔ kɔi ndo li bi 7 kanda, na ya tɛnɛ ti Ngbangɔ mɛ, ta adu apɔsɔ ti bi 7 ma. Se e ba tɛnɛ ti ya Ngbangɔ mɛ atɛnɛ ya, “bi kɔi alengbi na bulu kɔi” ko, ta adu pɔsɔ ti bi 7 ma. Kanda pɔsɔ kɔi a du ti bulu 7. (Mitango 14:34; Ezekiele 4:6) Aye fangɔ ya, pɔsɔ kɔi ndo li bulu 7, wa pɔsɔ 69 ali bulu 483 (69 x 7). Se e banda dikɔngɔ bulu 483 bandangɔ na bulu 455 U.N.E. e na singɔ na bulu 29 N.E. Ni du biani bulu mɛndó Yezo mu na batisimɔ, lo tingandó mɛsia la!​—Luka 3:1, 2, 21, 22.

 Nga bo tɛnɛ ni ko ti ya Ngbangɔ adiri tɛnɛ ya, na dungɔ na pɔsɔ mɛndɛ̃ kɔi ka ndo lɛ ni, afa ya bulu 7. Bo na ngoi ni ko, na bulu ti 33 N.E., na hongɔ mɛsia, wa bandangɔ na bulu ti 36 N.E., na pangɔ nzɔ̃ pa ti Lo-lengɔ Gbia tɛ Nzapa ka tɛ azi ti kɔdɔrɔ zu, ta bo ka tɛ ayuda ma.​—Danyele 9:24-27.

▸ Shap. 4, par. 7

Ngbangɔ ndo ha ya, Yehova la ali aye zu, lo lingandó Yezo uzu ti aye zu. (Kɔlɔsɛ 1:15, 16) Ta Yezo du Nzapa mɛ nvɛ̃ ngunu zu ma. Ta lo tɛnɛ bɛndó fãni kɔi ya, ni na Nzapa ani lengbi ma. Kanda lo tɛnɛ tɛ lo ndó ya: “To mbi aɔ mbi.” (Yoanɛ 14:28; 1 Kɔrinto 15:28) Kanda ambanga sambela ndo tɛnɛ tɛ la ya, Nzapa kɔi na azi taa: Nzapa To, Nzapa Nyi, nga na Nzapa tɔrɔ santo. Ta tɛnɛ ti “Nzapa kɔi na azi taa (trinité)” kaya Ngbangɔ ma. Ni du tɛnɛ ti nvɛ̃nɛ.

Nyingɔ vurú a du ngunu tɛ Nzapa mɛ ta ando hũ ni ma, lo ndo li na kwa na se mɛ bɛ lo ye. Ta ni du zo ma. Awakristo “asĩndó na nyingɔ vurú,” la Yehova tɛnɛndó ya: “Mbi sa gbanda ndambu ti nyingɔ vurú tɛ mbi ndo azi ndɛ̃́ ndɛ̃́ ndɛ̃́.”​—Awa Pangɔ Kwa 2:1-4, 17, NWT.

▸ Shap. 4, par. 12; Shap. 15, par. 17

Nda mɛ ta abɛta awakristo ndo vɔrɔ Nzapa na kulusi ma nɛ?

1.  Asambela gba ti nvɛ̃nɛ abandandó lingɔ kwa na kulusi gã. Ndó gã ala ndo lindó ni na kwa ti sambelangɔ aye mɛ Nzapa li, nga na ya sambela tɛ apaganɔ mɛ aba bombingɔ tɛrɛ tɛ kɔli na wali. Na ya bulu 300 na pɛ kwá tɛ Yezo ta awakristo ndo vɔrɔndó Nzapa na lége ti kulusi ma. Na gesi, Constantin gbia ti Roma alindó ya kulusi ati ye tɛ awakristo ti vɔrɔngɔ na Nzapa. Lo lindó ngaso ti nɛngɔ ya, sambela tɛ awakristo a hĩngangbi gba. Kanda ta kulusi bɛ na mangbi yakere na Yezo Kristo ma. Buku kɔi (New Catholic Encyclopedia) akambisa ya: “azi ndo lindó kwa na kulusi uzu ti dũngɔ Yezo bɛse ka ndo mɛ ta a hĩnga Yezo ma.”

2.  Ta Yezo kpindó ka ndo kulusi ma. Tɛnɛ ti Grɛkɛ mɛ agbinyangbi na “kulusi” alengbi na “ngbo mɛ alo  mbilimbili,” “mabaya,” bere “kɛkɛ.” Buku kɔi (The Companion Bible) atɛnɛ ya: “Kaya Ngbangɔ ti uzu mɛ asu na yanga ti Grɛkɛ, ta ye mɛ afa ya adundó kɛkɛ 2 da ma.” Yezo kpindó ka ndo kɛkɛ kɔi mɛ alo mbilimbili.

3.  Ta Yehova ndo ye ya, e vɔrɔ ni na lége ti ngbilondo bere yikayika ma.​—Kobima 20:4, 5; 1 Kɔrinto 10:14.

▸ Shap. 5, par. 12

Yezo hɛ̃ndó ava lo ndia ya, ala ndo da bɛ la na bi ti kwá tɛ ni. Ala ndo li ni bulu zu na bi ti 14 Nisana, bi nzɛ mɛndó aya Izraɛlɛ ndo li na Pasika. Ando ɔ na mapa na vinyɔ̃ mɛ afa mi na mɛnɛ tɛrɛ Yezo ka tɛ azi zu mɛ aga ti dangɔ bɛ la na bi ti kwá tɛ Yezo. Azi zu ko la na lengɔ gbia ndoni kɔi na Yezo ka ndozu ala ndo nyɔ̃ vinɔ ndo tɛ nga mapa ni. Azi zu ko la na nzɔ̃ dangɔ bɛ ti luangɔ dungɔ lɛ ngɛ̃́ ti bwai ge lɛ sese, ala ndo gwe ti hɛ̃ngɔ ndima na bi ti kwá tɛ Yezo, kanda ta ala ndo tɛ mapa bere ndo nyɔ̃ vinɔ ma.

▸ Shap. 5, par. 21

Ngbangɔ Libongoli ya Mokili ya Sika, ndo tɛnɛ tɛnɛ mɛ “nyingɔ tɛrɛ” ti fangɔ (1) zo, (2) sa, bere (3) dungɔ lɛ ngɛ̃́ tɛ zo bere tɛ sa. E ba ambanga lɛlo ni:

• Zo. “Na ngoi tɛ Noa . . . Bo azi yakere, afa ya, [anyingɔ tɛrɛ, NWT] 8, ndó la aso kwá na ngoi ti ngu.” (1 Petro 3:20) So ndo mɛ “nyingɔ tɛrɛ” ndo fa zo​—Noa na ya lo, na ayati lo 3 ti kɔli na awoti la.

• Sa. “Nzapa tɛnɛndó ya: ‘Zia ya ngu sĩ na anyingɔ ti dungɔ lɛ ngɛ̃́, wa zia nga ya aye mɛ ndo hulu, ahulu ka ndo lɛ sese nga ka ndozu.’ Nzapa di tɛnɛ nga ya: ‘Zia ya sese sĩ na anyingɔ ti dungɔ lɛ ngɛ̃́ na bangɔ ale tɛ ala, sa ti kɔdɔrɔ,  azɔzɔ, na asa ti gbɛndo na bangɔ ale tɛ ala.’ Ni li tɛrɛ lo bondó ngaso.”​—Ebandeli 1:20, 24.

• Dungɔ lɛ ngɛ̃́ tɛ zo bere tɛ sa. Yehova tɛnɛndó hɛ̃ Mɔizɛ ya: “Azi zu kondó la ndo gi nyingɔ tɛrɛ mɔ ko, ala kpili wɛ.” (Kobima 4:19) Ngoi mɛndó Yezo ge lɛ sese lo tɛnɛndó ya: “Mbi nga ma nzɔ̃ wa batangɔ angasã ngbaga; nzɔ̃ wa batangɔ angasã ngbaga ndoka [nyingɔ, NWT] tɛrɛ lo so angasã ngbaga tɛ lo.”​—Yoanɛ 10:11.

  Ngoi mɛ zo ali ye na “[nyingɔ, NWT] tɛrɛ lo,” ni fa ya lo li ni na bɛ lo kɔi nga na ngunu tɛ lo zu. (Matie 22:37; Kolimbola Mibeko 6:5) Tɛnɛ mɛ “nyingɔ tɛrɛ“ alengbi ti fangɔ gwɛ̃ ti kpengbani mɛ ye kɔi ti dungɔ lɛ ngɛ̃́ na ni. Alengbi nga ti ilingɔ zo bere sa mɛ kpi yako nyingɔ mɛ kpi.​—Mitango 6:6; Masese 23:2; Yisaya 56:11; Hagai 2:13.

▸ Shap. 6, par. 5; Shap. 15, par. 17

Tɛnɛ ti Ebreo nga na ti Grɛkɛ mɛ angbinyangbi ni na “nyingɔ” na ya Ngbangɔ​—Libongoli ya Mokili ya Sika ni ndo kambisa aye gba. Ngoi gba ni ndo kambisa ye mɛ ta azi lengbi ti hũngɔ ma, mabere yá, mbo tɛ azi bere tɛ asa. Ni lengbi nga ti fangɔ aangelo bere Nyingɔ vurú, mɛ adu ngunu tɛ Nzapa. Ta Ngbangɔ ndo ha ya, na pɛ kwá tɛ zo, ye kɔi ndo si kaya tɛrɛ zo ndo gwe du ka ndo mɛndɛ̃ ma.​—Kobima 35:21; Nzembo 104:29; Matie 12:43; Luka 11:13.

▸ Shap. 6, par. 5; Shap. 15, par. 17

Gɛhɛna adu ili du kɔi mɛndó dã na kɔdɔrɔ ti Yerusalɛmɛ mɛndó ando zɔ na aye ti siɔni. Ta ye kɔi mɛ afa ya, na ngoi tɛ Yezo ko, ando hɛ̃ndó azi bere asa pɛnɔ, bere ando zɔndó ala lɛ la ngɛ̃́ ka ndoni ko da ma. Ni la, ta Gɛhɛna adu ndo ti yikayika mɛ ando zɔrɔ azi mɛ kpili bere ando hɛ̃ ala pɛnɔ bwai na bwai ma. Ngoi mɛndó Yezo ndo tɛnɛ tɛnɛ tɛ azi mɛ  na sangɔ ala ka Gɛhɛna ko, lo ndo tɛnɛndó tɛnɛ ti kpingɔ kwá ti bwai.​—Matie 5:22; 10:28.

▸ Shap. 7, par. 20

A du sambela mɛndó Yezo ha na ava lo na ngoi mɛndó lo fa na ala se ti vɔrɔngɔ na Nzapa. Ando ili ni ya, To e mɛ ka ndozu bere se ti nzɔ̃ni ti lingɔ sambela. Yezo ha na e ya e li sambela ngaso mɛ:

• “Azi atɔndɔ bɛ ili mɔ mɛ santo ma ke!”

  E ndo li sambela ya Yehova ali ya ili lo ati vuluni na akpale zu ti nvɛ̃nɛ. Ti nɛngɔ ya aye zu mɛ ka ndozu na omɛ ge tise agonda, ahɛ̃ nga ndima hɛ̃ ili Nzapa.

• “Mɔ ga bɛ mɔ le gbia na ndo azi zu ma ke!”

  E ndo li sambela ti nɛngɔ ya Lo-Gbia tɛ Nzapa aga aho siɔ gigi mɛ tɛ Satana, ko ni le gbia na ndo lɛ sese, wa ni li ya sese ti paradizo.

• “Azi li bɛ ye ge tise na se bɛ mɔ ma ke!”

  ndo li sambela ti nɛngɔ ya se bɛ Nzapa ati na seni ge lɛ sese na lo tɛ azi ti mbilimbili, azi ti tɛrɛ ti lengbingɔ na dungɔ bwai na bwai ka paradizo, mabere se kondó Yehova aye na ni ngoi mɛndó lo li azi.

▸ Shap. 8, par. 2

Yehova tɔ̃ndó azi ti singɔ na ala ka gbɛ siɔ kpale na kwá. Tɔ̃ngɔ azi adu nga ma falanga mɛ ahɛ̃ ti vɔ̃ngɔ fãni mɛndɛ̃ dungɔ lɛ ngɛ̃́ ti lengbingɔ mɛ Adamu agbɛ̃ nga na diringɔ na nzɔ̃ mangbi na popo tɛ azi na Yehova. Nzapa tondó Yezo ge lɛ sese ti nɛngɔ ya lo kpi na lo tɛ awa siɔ kpale zu. Na lo ti kwá tɛ Yezo azi zu alua lége ti luangɔ dungɔ lɛ ngɛ̃́ ti kaka nga na tɛrɛ ti lengbingɔ.

▸ Shap. 8, par. 21; Shap. 9, par. 13

Tɛnɛ mɛ Ngbangɔ apia tɛnɛ mɛ kaya Danyele shapitrɛ 4 ndo ha na e ya, Nzapa kpandó Lo-Gbia tɛ lo na bulu ti 1914.

Tɛnɛ mɛ Ngbangɔ apia tɛnɛ: Yehova fandó na gbia Nebukadanezarɛ kaya suma kota kɛkɛ kɔi mɛ adɛ ni abi tise. Na ya suma ni, agbe gunda kɛkɛ ni na kpu ti nwã nga na kpu ti kwivrɛ ti nɛngɔ ya ta gunda kɛkɛ ni di tɔ̃ ma na pɛ “ngoi mbalambala.” Na gesi kɛkɛ ni lengbi ti diringɔ tɔ̃ngɔ fãni mɛndɛ̃.​—Danyele 4:1, 10-16.

Nda tɛnɛ ni na lo tɛ e: Kɛkɛ ni ndo fa Lo-lengɔ Gbia tɛ Nzapa. Abulu gba Yehova ndo kpandó agbia ka Yerusalɛmɛ ti lengɔ gbia na ndo kɔdɔrɔ ti Izraɛlɛ. (1 Ntango 29:23) Kanda ta agbia ni di dɛndó mbilimbili ma, ni la lo-lengɔ gbia tɛ ala awɛndó. A gbɛ̃ndó Yerusalɛmɛ na bulu ti 607 U.N.E. Ngoi “mbalambala” abandandó so ndoko. (2 Bakonzi 25:1, 8-10; Ezekiele 21:25-27) Ngoi mɛndó Yezo tɛnɛ ya, “ako gbanda ndo awa Yeruzalɛmɛ ngbĩi ka bi mɛ Nzapa ako hɛ̃ la alengbi” ko, lo ndo tɛnɛndó tɛnɛ na ndo “ngoi mbalambala.” (Luka 21:24) Kanda ta “ngoi mbalambala” awɛndó ngoi mɛ Yezo adɛ ge lɛ sese ma. Yehova kondó kapa ya, ni na kpãngɔ gbia na ndangba “ngoi mbalambala.” Lo-lengɔ Gbia tɛ fãna Gbia, Yezo, na hɛ̃ngɔ anzɔ̃ sulu hɛ̃ awakwa tɛ Nzapa zu mɛ ge lɛ sese ti bwai na bwai.​—Luka 1:30-33.

“Ngoi mbalambala” alindó bulu kɛ̃: “Ngoi mbalambala” lindó bulu 2 520. Se e banda dikɔngɔ bulu 2 520 bandangɔ na bulu ti 607 U.N.E., ni na wɛngɔ na bulu ti 1914. Ni la adu bulu mɛ Yehova kpãndó Yezo Mɛsia, Gbia ti Lo-Gbia tɛ lo ka ndozu.

 E lua bulu 2 520 ngasia? Ngbangɔ tɛnɛ ya, ngoi taa na ndambu alengbi na bi 1 260. (Suma 12:6, 14) Ni la “ngoi mbalambala” adu bi 1 260 fãni sɛ (1 260 × 2) bere bi 2 520. Bi 2 520 alengbi na bulu 2 520 se e landa se mɛ Ngbangɔ ndo dikɔ na bi, “bi kɔi alengbi na bulu kɔi.”​—Mitango 14:34; Ezekiele 4:6.

▸ Shap. 8, par. 23

Ngbangɔ tɛnɛ tɛnɛ na ndo gbia tɛ aangelo kɔi mɛ ili lo la Mikaɛlɛ.​—Danyele 12:1; Yudɛ 9.

Mikaɛlɛ adu gbia ti linɔ ti to tɛ aangelo ti mbilimbili tɛ Nzapa. Suma 12:7 atɛnɛ ya: “Mikaɛlɛ mɛ gbia tɛ aangelo, na aangelo tɛ lo abombi atiri to na sa ti kpɛ̃nɛ mɛ nga ma ngunde na aangelo tɛ lo.” Mbeti ti Suma atɛnɛ ya Yezo la gbia ti linɔ tɛ aangelo tɛ Nzapa, afa ya, Mikaɛlɛ adu ili Yezo mɛndɛ̃.​—Suma 19:14-16.

▸ Shap. 9, par. 4

Tɛnɛ mɛ ndo fa ngoi mɛ akpale ti kpengbani na lingɔ ge lɛ sese uzu ti nɛngɔ ya Lo-Gbia tɛ Nzapa aga gbɛ̃ lɛ gigi mɛ tɛ Satana. Ngbangɔ ndo tɛnɛ ambanga tɛnɛ mɛndɛ̃ mabere “ngoi ti sese wɛngɔ” nga “ngoi ti gangɔ tɛ mɔ,” ti fangɔ bo ngoi niko. (Matie 24:3, 27, 37) “Ndangba bi” abandandó na ngoi mɛ Lo-Gbia tɛ Nzapa abandandó lengɔ Gbia ka ndozu na 1914, ni na wɛngɔ na ngoi mɛ na gbɛ̃ngɔ lɛ gigi mɛ tɛ Satana na to ti Armagedona.​—2 Timɔte 3:1; 2 Petro 3:3.

▸ Shap. 9, par. 5

A du ngoi mɛ Nzapa adiri na zo mɛ kpi lɛ lo ngɛ̃́ fãni mɛndɛ̃, ni la ndo ili ni ya songɔ na pɛ kwá. Ngbangɔ tɛnɛ tɛnɛ ti songɔ kwá tɛ azi 9. Eliya, Elisha, Yezo, Petro, na Polo ala sondó na azi kaya kwá. Ala lindó kpale niko ti kpɛ̃nɛ na ngunu tɛ Nzapa. Yehova ko kapa ya ni na songɔ na “azi ti mbilimbili na azi mɛ zanga mbilimbili” lɛ la ngɛ̃́ ti nɛngɔ ya ala du ge lɛ sese. (Awa Pangɔ Kwa 24:15) Ngbangɔ tɛnɛ nga tɛnɛ ti songɔ kwá ti gwengɔ ka ndozu. Ni na lingɔ na ngoi mɛ azi mɛ Nzapa pɔna ala bere lo hĩni ala na kpɔ̃ na songɔ ti gwengɔ dungɔ ka ndozu ndoni kɔi na Yezo.​—Yoanɛ 5:28, 29; 11:25; Filipɛ 3:11; Suma 20:5, 6.

▸ Shap. 9, par. 13

Adu siɔ kwa ti gingɔ tɛnɛngɔ tɛnɛ mbala kɔi na asiɔ nyingɔ bere na lége tɛ zo mɛndɛ̃, nga ma wa biando, bere zo ti maji. Azi ndo li kwa tɛ asiɔ nyingɔ na lo mɛ ya, ala ndo ye tɛnɛ ti nvɛ̃nɛ mɛ ndo pa ya, nyingɔ tɛ azi mɛ kpili ndo ngbã lɛ la ngɛ̃́ ka ndo mɛndɛ̃, wa anyingɔ ni ndo ti anyingɔ ti ngunu gba. Ademo ndo gi nga lége ti nɛngɔ ya ani to azi mɛndɛ̃ ya, ala akɛ̃ vɔrɔngɔ Nzapa. Akpale ni mabere gingɔ nda lo mɛ na gangɔ, kambisangɔ nda lo mɛ aɔndɛ tɛrɛ lo, maji, biando, yengɔ lo ti wawa wawa, kwa ti bi, kambisangɔ nda suma. Abuku, azulunalo, gingɔ hĩngangɔ alo mɛ na gangɔ na lége ti atongolo, afilmɛ, alimɔ mɛ ndo kambisa kwa ti maji, abia mɛ ndo kambisa tɛnɛ tɛ ademo, bere asuma mɛ ndo si mabere ta adu siɔ ni ma. Akpale gba mɛ azi ndo li na ngoi mɛ zo kpi, mabere sangɔ ye ka ndo sɛndɛ, akpale mɛ ndo li tɛrɛ lo uzu ti hɔngɔ kinda, dangɔ bɛ na bi ti kwá tɛ zo, kpongɔ mwã, ambanga ye mɛndɛ̃, ni na mangbi na kwa tɛ asiɔ nyingɔ.  Azi gba ndo li yɔlɔ ti nɛngɔ ya ani li kwa na ngunu tɛ ademo.​—Galatia 5:20; Suma 21:8.

▸ Shap. 10, par. 10; Shap. 16, par. 4

Yehova du Nzapa mɛ nvɛ̃ ngunu zu, lo la lo li aye zu mɛ ka ndozu na omɛ ge sese. (Suma 15:3) Ndani la aye zu adu tɛ lo, bo lo kɔi la na ngunu ti lengɔ gbia na ndoni. (Nzembo 24:1; Yisaya 40:21-23; Suma 4:11) Lo kpã ndia ndo aye zu mɛndó lo li. Bo lo la lengbi ti pɔnangɔ azi mɛndɛ̃ ti nɛngɔ ya ala le gbia. E ndo hɛ̃ ti e na lo lengɔ Gbia tɛ Nzapa na ngoi mɛ e ndo ye lo, e ndo tɔndɔ nga lo.​—1 Ntango 29:11.

▸ Shap. 11, par. 10

Hãngɔ ngɔ a du hongɔ nyingambi mɛ kaya ta lo. Adu hongɔ zo na sãna, kanda ta adu ye mɛ asi na bɛ lo ma. Na ngoi mɛ wali ndo du na ngɔ ko, ta nyingambi ndo du ye kɔi ti tɛrɛ lo ma, kanda lo du zo mɛndɛ̃ nga na bɛ lo.

▸ Shap. 13, par. 5

Adu se ti sarangɔ na tɛrɛ mɛ amɔnganga ndo li mɛ ndo yɔ mungɔ mɛnɛ bere ye siɔ ti ngbondoni mɛ ndo du kaya mɛnɛ, alengbi ti dungɔ mɛnɛ tɛ zo nvɛ̃ni bere tɛ zo mɛndɛ̃ mɛ abata ni ka ndo kɔi ngaso mɛ. Angbondo ye niko siɔ lo mɛ plasma, globules rouges, globules blancs, na plaquettes.

▸ Shap. 13, par. 13

Kaya Ngbangɔ ta “disiplini” adu bo hɛ̃ngɔ tumbu ma. Na ngoi mɛ ahɛ̃ e disiplini ko, a ha e na lo, alonzi e, alɛkɛ e. Ta Yehova ndo du siɔ zo bere wa zaga na ngoi mɛ lo ndo hɛ̃ azi disiplini ma. (Masese 4:1, 2) Yehova du nzɔ̃ lɛlo ka tɛ awa dungɔ ayangambi. Lo ndo hɛ̃ disiplini ti nzɔ̃ni mɛ ndo to zo ti nɛngɔ ya lo ye disiplini ni. (Masese 12:1) Yehova ndo ye ava lo, lo ndo lɛkɛ nga ala. Lo ndo fa ala na lége ti nzɔ̃ni ti zangɔ ala ya, ala zia bingangɔ li ti siɔ ni, wa ala du na bingangɔ li ti nzɔ̃ni, ti nɛngɔ ya ala li ye mɛ ndo de na bɛ lo. Ka tɛ awa dũngɔ ayangambi, disiplini adu fangɔ na ayangambi nda mɛ ala lengbi ti dungɔ na tɔndɔngɔ. Ni fa nga hangɔ na ayangambi yengɔ Yehova na tɛnɛ tɛ lo Ngbangɔ nga na hĩngangɔ andia ti ya Ngbangɔ nzɔ̃ni.

▸ Shap. 14, par. 13

Ala du asiɔ aangelo mɛ na ngunu aɔ azi mɛ ta e ndo hũ ala ma. Ala tindó siɔni na ngoi mɛndó ala kɛ̃ nyɔ̃ Nzapa, ala tinga awakula tɛ lo. (Ebandeli 6:2; Yudɛ 6) Ala tindó ndali Satana ala tɔmbɔkɔ tɛrɛ Yehova.​—Kolimbola Mibeko 32:17; Luka 8:30; Awa Pangɔ Kwa 16:16; Zaki 2:19.

▸ Shap. 16, par. 4