NGOI mɛ mɔ ndo mɔ di azulunalo, mɔ ndo ba televiziɔ, mɔ ndo ma nga radio ko, mɔ ndo hũ, mɔ ndo ma nga akpale ti zaga, to, na kpɔngɔ azi. Ngoi mɛndɛ̃ tɛrɛ mɔ nvɛ̃ni ndo sɔ bere zo mɛ mɔ ndo ye lo gba akpi.

Mɔ ndo hũnda tɛrɛ mɔ na ndo:

• Nzapa ye ya du tɛ mbi na tɛ azi ti ndasewa tɛ mbi adu ngaso?

• Ndo mɛ mbi lengbi ti luangɔ na wangɔ mɛ lengbi ti zangɔ mbi ya, mbi gbe bɛ mbi na ya pɛnɔ tɛ mbi wa?

• Siriri na dungɔ gbanda ge lɛ sese?

Ngbangɔ hɛ̃ agbinya ti nzɔ̃ni ndo ahũnda ni.

• Ta azi adiri hũ pɛnɔ ma, ta ala diri ti abange ma, ta ala di kpili nga gbanda ma.​—Suma 21:4

• “Awa ngbengule na tɛndɛngɔ mabere tɛ ba.”​—Yisaya 35:6

• “Lɛ awa ziba na zingɔ.”​—Yisaya 35:5

•  Azi mɛ kpili na diringɔ lɛ la ngɛ̃́.​—Yoanɛ 5:28, 29

• Ta tɛrɛ zo kɔi na sɔngɔ ma.​—Yisaya 33:24

• Azi zu na dungɔ na tɛ ti tɛngɔ mawoma.​—Nzembo 72:16

Mɔ lengbi ti dangɔ bɛ mɔ ya, aye mɛ mɔ di kaya pajɛ ti 4 na 5 a du bo suma gɛgɛrɛ. Kanda Nzapa kokapa ya, angbã dã ni gbinyangbi akpale niko ge lɛ sese, Ngbangɔ kambisa se mɛ lo na lingɔ na ni.

Ta Ngbangɔ adɔ bo lo so ndoko ma, akambisa hɛ̃ e aye mɛ elengbi ti hĩngangɔ ti nɛngɔ ya e du na dengɔ bɛ, wa e du na dungɔ lɛ ngɛ̃́ ti nzɔ̃ni bandangɔ ndɛ. Binga li mɔ na ndo aye mɛ alengbi ti hɛ̃ngɔ mɔ vundu. Alengbi ti dungɔ zangangɔ falanga bere kpale ti ndasewa, ngã, bere kwá tɛ zo mɛ mɔ ndo ye. Ngbangɔ lengbi ti zangɔ mɔ ti nɛngɔ ya mɔ gbe bɛ mɔ na ndo alo niko, ni lengbi nga ti sangɔ ngunu bɛ mɔ na agbinya ti ahũnda olo:

• Nda mɛ e ndo hũ pɛnɔ nɛ?

• Ngasia la elengbi ti gbengɔ bɛ e na ya apɛnɔ nɛ?

• Ndasewa tɛ e lengbi ti dungɔ na dengɔ bɛ?

• Se zo kpi ko, lo ndo gwe wa?

• E na hũngɔ gbanda ayata e mɛ akpili fãni mɛndɛ̃?

• Nda mɛ elengbi ti kpãngɔ bɛ e ya, Nzapa na lingɔ aye zu mɛ lo ko kapa ni nɛ?

 Ngoi mɛ mɔ ndo di buku olo, mɔ ndo fa ya, mɔ ye hĩngangɔ tɛnɛ mɛ Ngbangɔ ndo ha. Buku mɛ na zangɔ mɔ gba. Paragrafɛ kɔikɔi na ahũnda mɛ na zangɔ mɔ ya mɔ gbɔ̃ nda atɛnɛ ti ya Ngbangɔ nzɔ̃ni. Azi gba ndo ye tɛnɛngɔ tɛnɛ ti ya Ngbangɔ na Atɛmwɛ tɛ Yehova. E da bɛ e ya, mɔ nga na lingɔ ngaso. Zia ya, Nzapa sulu mɔ na ngoi mɛ mɔ ndo gi hĩngangɔ tɛnɛ mɛ Ngbangɔ ndo ha!