Nzapa ndo ili azi ti kɔdɔrɔ zu ya, ala hi tɛrɛ la dã na ni na lége ti sambela. (Nzembo 65:2) Ta lo ndo ye bere lo ndo ma asambela zu ma. Lɛlo kɔi, ta Nzapa ndo ma sambela tɛ kɔli mɛ wa zaga ma. (1 Petro 3:7) Ngoi mɛ ndó aya Izrayɛlɛ ababa lingɔ siɔ ye ko, Nzapa kɛndó mángɔ sambela tɛ la. Biani, sambela adu nzɔ̃ tangɔ li gɛrɛ. A bɛ se so ko, Nzapa na yengɔ sambela tɛ wa lingɔ siɔ ye se lo gbinya bɛ lo ti biani nvɛ̃ni.​—Di Yisaya 1:15; 55:7.

Ba video Nzapa ndo ma asambela zu?

Sambela adu kɔi ka popo se ti vɔrɔngɔ na Nzapa, ni la elengbi ti sambelangɔ bo wa lingɔ e kɔi, Yehova. (Matie 4:10; 6:9) Edu azi mɛ ta elengbi ma, na lo ni la elengbi ti sambelangɔ na ili Yezo na lo mɛ ya lo kpindó na lo ti siɔ ye tɛ e. (Yoanɛ 14:6) Ta Yehova ye ya e di sambela mɛ asu tɛnɛ ni ka ya mbeti bere e gbɔ̃ tɛnɛ ni ka yali e ma. Lo ye ya ale sambela ndo lo bo ka bɛ e.​—Di Matie 6:7; Filipɛ 4:6, 7.

Wa lingɔ e lengbi ti mangɔ sambela mɛ zo ndo li ka bɛ lo. (1 Samwele 1:12, 13) Lo ndo ili e ya e ndo sambela ni ngoi zu, na nda pelele nga na ngoi ti sengɔ tise, na ngoi ti tɛngɔ tɛ nga na ngoi mɛ e tengbi na akpengba lo.​—Di Nzembo 55:22; Matie 15:36.

Ta adu woni ti hingɔ tɛrɛ dã na Nzapa ma na lo mɛ ya e du ka popo tɛ azi mɛ ta ndo ye Nzapa ma, ala ndo he nga kapa mɛ Nzapa ko ti kpãngɔ siriri ge tise na ngia. (2 Timɔte 3:1, 4; 2 Petro 3:3, 13) Na lo ni la e na gwɛ̃ ya afɔ̃ e awa Kristo akpengba na bɛ e ko e kpengba nga na bɛ ala.​—Di Aebreo 10:24, 25.

 Bombingɔ tɛrɛ na azi mɛ ndo ye Nzapa ndo za e ya e hi tɛrɛ e dã na Nzapa. Bombi tɛ Atɛmwɛ tɛ Yehova ndo du nzɔ̃ ngoi mɛ loyengɔ tɛ afɔ̃ e ndo za e.​—Di Roma 1:11, 12.

Mɔ lengbi ti hingɔ tɛrɛ mɔ dã na Yehova na bingangɔ limɔ na ndo ye mɛ mɔ manda ka ya Ngbangɔ. Bingangɔ li na ndo aye mɛ lo li, na ndo awangɔ tɛ lo nga na akapa mɛ lo ko. Bingangɔ li nga so ndo ni kɔi na sambela na tongɔ e ya e hɛ̃́ Nzapa sia kɔli na losongo tɛ lo nga na ndara tɛ lo.​—Di Yosua 1:8; Nzembo 1:1-3.

Mɔ lengbi ti hingɔ tɛrɛ mɔ dã na Nzapa se mɔ kpã bɛ mɔ ndo lo, se mɔ du na loyengɔ na lo tɛ lo. Kanda loyengɔ adu ma bere ye mɛ lɛ ni ngɛ̃́ mɛ ndo yɔ tɛ. Ale mɔ hɛ̃́ loyengɔ tɛ mɔ tɛ lá kwɛ́ na bangɔ gu gɛrɛ aye mɛ mɔ ndo ye.​—Di Matie 4:4; Aebreo 11:1, 6.

Yehova ndo bata azi mɛ ndo ye lo. Lo lengbi ti batangɔ ala ka ya alo zu ko la alengbi ti gbɛ̃ngɔ loyengɔ tɛ la nga na nzɔ̃ dangɔ bɛ ti du ti kaka mɛ ala na ni. (Nzembo 91:1, 2, 7-10) Lo ndo ko kɛkɛ lɛ e na ndombali a lége mɛ alengbi ti gbɛ̃ngɔ tɛrɛ e, alengbi nga ti gbanzingɔ e na dengɔ bɛ. Yehova ndo ha na e se ti dungɔ nzɔ̃ni.​—Di Nzembo 73:27, 28; Zaki 4:4, 8.