Lo-lengɔ Gbia tɛ Nzapa adu lo-gbia ti ndozu. Ni na mungɔ ndo ti a lo-gbia mɛ ndɛ̃́ kwɛ́, na lingɔ ya a li se bɛ Nzapa ka yayu nga ge tise. Pa ti Lo-lengɔ Gbia tɛ Nzapa adu nzɔ̃ni. Angbã yakere Lo-lengɔ Gbia tɛ Nzapa na onzingɔ sɔngɔ bɛ mɛ azi na ni na lo ti nzɔ̃ lo-gbia. Na bombingɔ azi zu mɛ ge tise ndo ni kɔi.​—Di Danyele 2:44; Matie 6:9, 10; 24:14.

Lo-lengɔ gbia ndo du na gbia tɛ lo. Yehova kpɔ ti lo ndo nyĩ lo, Yezo Kristo ya, lo du Gbia ti Lo-lengɔ Gbia tɛ ni.​—Di Suma 11:15.

Ba video Lo-Gbia tɛ Nzapa a du nɛ?

Nyĩ Nzapa adu bɛta Gbia mɛ alengbi na lo mɛ ya lo du dede zo, lo nga nzɔ̃ zo, lo ye nga ye mɛ nzɔ̃ni. (Yoanɛ 1:14) Lo na nguru ma wo ma ti zangɔ na azi, na lo mɛ ya lo na lengɔ gbia ndo lɛ sese, abɛ se lo du ka ndozu. Na pɛ songɔ kwá tɛ lo ko, lo masindó ka ndo kɔti ti Yehova. (Aebreo 10:12, 13) Na pɛni Nzapa hɛ̃ndó lo nguru ti lengɔ na gbia.​—Di Danyele 7:13, 14.

Li nɔ tɛ azi mɛ ndo ili ala ya “asanto” la na lengɔ gbia ndoni kɔi na Yezo ka ndozu. (Danyele 7:27) Asanto ti kɔzoni adundó aapɔstrɔ tɛ Yezo ti mbili mbili. So pɛni Yehova ndo sala nga asanto mɛ ndɛ̃́ ka popo tɛ akɔli na awe ti mbili mbili, tee ndɛ na lá olo, ala ndo so na tɛrɛ ti nyingɔ nga ma se tɛ Yezo.​—Di Yoanɛ 14:1-3; 1 Kɔrinto 15:42-44.

 Azi kɛ̃ la na gwengɔ ndozu nɛ? Yezo ilindó ala ya “kɛtɛ linɔ tɛ ngasã ngbaga.” (Luka 12:32, NW) Na ndani ala na dungɔ azi 144 000. Ala na lengɔ gbia ndo lɛ sese ndoni kɔi na Yezo.​—Di Suma 14:1.

Lo-lengɔ Gbia tɛ Nzapa to nda kwa ndó na 1914. * Kɔzo kwa tɛ Yezo ngoi mɛ lo tonda lengɔ gbia adu sangɔ mɛ ndó lo sa na Satana na asiɔ nyingɔ tɛ lo tise. Satana tindó na ngɔnzɔ kpengbani lo banda nga singɔ na akakulu lo ge tise. (Suma 12:7-10, 12) Longɔ na ngoi ni tee ndɛ ko, akpengba lo tɛ azi ndo ma bo mangɔ. To, gwɛ̃, ngã mɛ ndo sɛkpɛ nga na yengingɔ ti sese kwɛ́ ndoni kɔi ka ya “lo” mɛ ndo fa ya Lo-lengɔ Gbia tɛ Nzapa na mungɔ kpale ti lɛ sese ka yamba ti lo.​—Di Luka 21:7, 10, 11, 31.

Lo-lengɔ Gbia tɛ Nzapa apia ndɛ ndo bombi azi butu butu na lége ti kwa ti fangɔ tɛnɛ tɛ Nzapa ge lɛ sese zu. Amiliɔ tɛ azi ti zungɔ na tɛrɛ ati ava Yezo. Lo-lengɔ Gbia tɛ Nzapa na batangɔ ala ngoi mɛ asiɔ zi na kpilingɔ, ngoi mɛ Lo-lengɔ Gbia tɛ Nzapa a onzi asiɔ ngbina lo mɛ na ngoi mɛ. Ale zo manda dungɔ va Yezo mɛ ndo ma nyɔ̃ lo wa se mɛ lo lwa nzɔ̃ lo ti Lo-lengɔ Gbia tɛ Nzapa la.​—Di Suma 7:9, 14, 16, 17.

Na ya buru 1 000, Lo-lengɔ Gbia tɛ Nzapa na lingɔ ye mɛ ndó Nzapa ye kɔzoni na lo tɛ azi. Lɛ sese zu na tingɔ paradizo. Na ndani, Yezo na diringɔ na Lo-lengɔ Gbia hɛ̃́ to lo. (1 Kɔrinto 15:24-26) Mɔ hĩnga mbɛni zo kɔi mɛ mɔ lengbi ti pangɔ hɛ̃́ lo tɛnɛ ti Lo-lengɔ Gbia tɛ Nzapa?​—Di Nzembo 37:10, 11, 29.