Bɛ azi mɛ ndo de ma wo ma lo nɛ? Lo mɛ ya ala ka ya kota bombi tɛ e kɔi. Awandó awa kwa tɛ Nzapa ti uzu ya, ala bombi tɛrɛ la fani taa ya buru kɔi, e yenga lingɔ kwɛ́ kɔi ma se tɛ́ la ngoi mɛ́ e ndo gwe akota bombi. (Kolimbola Mibeko 16:16) Buru na buru e ndo du na akota bombi otaa: akota bombi sɛ ndo du ti kɛlɛ kɛlɛ ndo du bo bi kɔi. Na kota bombi ti bi taa. Mbana gɛrɛ mɛ e ndo lwa ka ya akota bombi niko nɛ?

Ni ndo kpengba na yengbingɔ tɛ awa Kristo. Ma se kondó aya Izrayɛlɛ ndo sepala na vɔrɔngɔ Yehova ka ya “akota bombi” ko, endo sepala nga vɔrɔngɔ Yehova ka ya kota bombi. (Nzembo 26:12; 111:1) Abombi niko ndo du nzɔ̃ ngoi ti tengbingɔ bere dungɔ ndoni kɔi na Atɛmwɛ ti abombi bere ti kɔdɔrɔ mɛ ndɛ. Na midi, e ndo sepala tɛngɔ ye ndoni kɔi na akwa e ka ndo ti kota bombi nvɛ̃ni, ngoi niko ndo hɛ dengɔ bɛ ma wo ma. (Awa Pangɔ Kwa 2:42) Kai la e ndo hũ na lɛ e nvɛ̃ni songo mɛ “bombi tɛ e ayata kwɛ́” na ni ge lɛ gégi.Italie​—1 Petro 2:17, NW.

Ni ndo za e ti maingɔ ka ya nyingɔ. Aya Izrayɛlɛ ndo lwa nga ndó mbana gɛrɛ ‘ti gbɔ̃ngɔ nda tɛnɛ’ tɛ Nzapa mɛ ndó ndo kambisa ndani hɛ la. (Nehemia 8:8, 12) E ndo sepala nga na awangɔ ti Ngbangɔ mɛ e ndo má ka kota bombi tɛ e. Bɛli tɛnɛ ti kota bombi kɔi kɔi ndo lo ka ya Ngbangɔ. Na lége ti adiskur, asymposium, nga na mbɛni alo mɛ ndó ayata tengbi na ni ndo za e ti lingɔ na se bɛ Nzapa ge ya du tɛ e. Mangɔ tɛnɛ ti se mɛ ayata ndo nwɔ̃ na akpengba lo mɛ ala ndo tengbi na ni na lo mɛ ya ala ndo tɔndɔ ndia tɛ Nzapa na ngoi ti pɛnɔ ndo kpengba na e ma ya ma. Na kota bombi ti bi taa, ando li ateyatrɛ ti Ngbangɔ mɛ azi ni ndo yu bɔngɔ ma se tɛ azi ti uzu bere ti ngoi tɛ e, ndo za e ti hũngɔ se mɛ ndó apandɛ mɛ ndɛ a ɔ na ni, e ndo lwa nga awangɔ ka yani ma wo ma. Azi ndo mu batisimɔ na ngoi ti kota bombi zu, so fangɔ ya ani hɛ tɛrɛ ani hɛ Nzapa.

• Nda mɛ akota bombi ndo du ngoi ti dengɔ bɛ nɛ?

• Se mɔ gwe kota bombi kɔi ko mbana gɛrɛ mɛ mɔ lwa nɛ?