DU NA KPENGBA LƐ!
2022: Bulu mɛ asĩ na kpengba kpale ná pɛnɔ—Tɛnɛ mɛ Ngbangɔ tɛnɛ nɛ?
Na ya bulu ti 2022, akpale ti siɔni mabere to, zangangɔ falanga nga na apɛnɔ mɛ ndo si na lége ti yengingɔ ti sese bere kpengba yá aɔ ndoni. Bo Ngbangɔ la akambisa nda mɛ akpale ti ngaso ndo li tɛrɛ lo.
Nda mɛ akpale ti siɔni aɔ ndoni na ya bulu ti 2022 nɛ?
Akpale mɛ ali tɛrɛ lo na ya bulu mɛ alo ti ɔngɔ aza e, e hũ yangondo ya, e na dungɔ lɛ ngɛ̃́ na ya ngoi mɛ Ngbangɔ ili ni ya, “ndangba bi.” (2 Timɔte 3:1, NWT) Ngoi niko ti ndangba bi abandandó na bulu ti 1914. Akpale mɛ alo ti lingɔ tɛrɛ lo na ya abi mɛ aɔ amangbi na tɛnɛ mɛ Ngbangɔ piandó tɛnɛ na lo ti ngoi mɛ ndɛ e na ni:
‘Ato.’—Matie 24:6.
“Bulu ti 2022 adu bulu ti siɔni nvɛ̃ni mɛ to adiri banda tiringɔ ka Europe.” a
Ba bɛli tɛnɛ mɛ “Russie ezali kobundisa Ukraine.”
“Gwɛ̃.”—Matie 24:7.
“Bulu ti 2022 adu bulu mɛ gwɛ̃ aya na ndo lɛ gigi aɔ abulu mɛndɛ̃ zu.” b
Ba bɛli tɛnɛ mɛ “To mɛ ka Ukraine ali ya, azi gba azanga tɛ ti tɛngɔ.”
‘Asiɔ ngã.’—Luka 21:11.
“Se mɛ ngã ti buka buka (polio), ngã ti kolokoto (Variol) nga na ngã ti COVID-19 adɛ bo kpɔ azi ko, ali ya, e hũ yangondo se mɛ dungɔ lɛ ngɛ̃́ tɛ azi ati na ya kaka na lo ti ngã mɛ ndo gbɔ̃ azi gba na mbala kɔi.” c
Ba bɛli tɛnɛ mɛ “Azi bere miliɔ̃ mana akpili na lo ti siɔ ngã ti COVID-19.”
“Aye mɛ ndo sa mbɛtɔ bɛ zo.”—Luka 21:11.
“Ta bɛ e na lingɔ na se mɛ aye mabere kpengba lá, gbingɔ ti kpengbani, bulu ti kpengbani, kpengba wá mɛ ndo gbili na gbɛ ndo, nga na inondasiɔ̃ agbɛ̃ aye tɛ azi gba, akala ada tɛ la, wa ali nga ya, amiliɔ̃ tɛ azi akpili na ndo lɛ gigi zu na ya bulu ti 2022 ma.” d
Ba bɛli tɛnɛ mɛ “Gbingɔ ndo ti bo kpengbani nvɛ̃ni na ndo lɛ gigi.”
“Azi mɛ ndotɔmbɔkɔ [bere, “kpale ti mɔbulu.”].”—Luka 21:9.
“Na ya bulu ti 2022 azi tɔmbɔkɔ na lo ti kpale mɛ aba falanga ti kɔdɔrɔ fãni gba, ni li ya amanifetasiɔ̃ ali tɛrɛ lo na ya bulu niko aɔ abulu mɛndɛ̃ zu.” e
Ba tɛnɛ mɛ “Ngele ti aye ndo ma na ndo lɛ gigi zu.”
Aye mɛ na lingɔ tɛrɛ lo na ya bulu mɛ na gangɔ nɛ?
Ta zo kɔi ahĩnga nzɔ̃ni aye mɛ na lingɔ tɛrɛ lo na ya bulu ti 2023 ma. Ye mɛ e hĩnga adu ya, angbã yakere Lo-lengɔ Gbia tɛ Nzapa na gbinyangbingɔ akpale gba mɛ aba sese. (Danyele 2:44) Lo-lengɔ Gbia niko na onzingɔ aye mɛ ndo hɛ̃ azi pɛnɔ ge lɛ sese, wa ni nga na lingɔ ya, dangɔ bɛ tɛ Nzapa ali tɛrɛ lo ge lɛ sese.—Matie 6:9, 10.
E yɔ ka ti mɔ ya, mɔ landa wangɔ tɛ Yezo mɛ apa ya, “du na kpengba lɛ” na ndo se mɛ aprɔfesi ti ya Ngbangɔ ndo ti na seni. (Marko 13:37) Se mɔ ye, to mbeti hɛ̃ e ti nɛngɔ ya, mɔ hĩnga se mɛ Ngbangɔ lengbi ti zangɔ mɔ ndɛ, nga na se mɛ ni lengbi ti hɛ̃ngɔ mɔ ná azi ti ndasewa tɛ mɔ nzɔ̃ dangɔ bɛ na lo ti bi mɛ na gangɔ.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.
Ba nga atɛnɛ mɛ
AYE MƐNDƐ̃
Bɛta nzɔ̃ dangɔ bɛ na lo ti bi mɛ na gangɔ
Nda mɛ akapa mɛ kaya Ngbangɔ aɔngbi na akapa mɛ azi ndo ko nɛ?
