Na lo mɛ ya, bulu ti 2023 abanda ko, e zu e ndo kũ ya, aye ti nzɔ̃ni asi na e nga na azi ti ndasewa tɛ e. Nda mɛ elengbi ti dungɔ na dangɔ bɛ ti ngaso nɛ?

 Ngbangɔ pa ya, akpengba kpale zu mɛ ndɛ e ndo tengbi na ni ko, ni du ti pɛ ndunu ngoi, wa angbã yekere ni wɛ. Ngbangɔ tɛnɛ ya, “atɛnɛ zu mɛ asu ka ya Buku tɛ Nzapa gã ko, asu ni ya,. . . aha e na ló, wa dila e lɛndɛrɛ Nzapa [bere e du na nzɔ̃ dangɔ bɛ].”—Roma 15:4.

•   Ti nɛngɔ ya, mɔ hĩnga akpale gba mɛ Ngbangɔ tɛnɛ ni na lo ti nzɔ̃ dangɔ bɛ ko, di bɛli tɛnɛ mɛ, “Elikya ya solosolo mpo na mikolo ezali koya.”

 Nzɔ̃ dangɔ bɛ ti ya Ngbangɔ alengbi ti dungɔ nga ma “nwa mɛ ndo gbɔ̃ masuwa kpengbani.” (Aebreo 6:19) Nga ma se ko la nwa mɛ ndo gbɔ̃ masuwa ndo li ya, ni dɔ lo kpengbani ko, nzɔ̃ dangɔ bɛ tɛ e alengbi ti lingɔ ya, e du kpengbani wa e gbe bɛ e na ya akpengba kpale mɛ ndɛ e ndo tengbi na ni, e du na bingangɔ li ti nzɔ̃ni, wa e du nga na bɛta dengɔ bɛ mɛ ndo ninga. Na ndakisa:

•   Ba se mɛ nzɔ̃ dangɔ bɛ ti ya Ngbangɔ aza kɔli kɔi mɛndó ahɛ̃ tɛrɛ lo gba na nyɔngɔ manga ná samba. Ba video mɛ bɛli tɛnɛ ni tɛnɛ ya, Nalɛmbaki bomoi oyo nazalaki na yango.

•   Ba se mɛ nzɔ̃ dangɔ bɛ ti ya Ngbangɔ alengbi ti zangɔ e, na ngoi mɛ zo tɛ e kɔi akpi. Ba video Lisalisi na lo tɛ azi mɛ zo kpi ti la.

 Azi gba ndo du na dangɔ bɛ ya, akpale ti nzɔ̃ni na lingɔ tɛrɛ lo, kanda ta ala lengbi ti hĩngangɔ bere ni na lingɔ tɛrɛ lo biani ma. Ta adu ngaso na lo ti akapa ti ya Ngbangɔ ma. Na lo nɛ? Na lo mɛ ya, akapa ti ya Ngbangɔ alo ka tɛ Yehova Nzapa a zo mɛ ta “ndopa nvɛnɛ ma.” (Tito 1:2) Bo Yehova kɔi la, na ngunu ti lingɔ aye zu mɛ lo ko kapa ni; lo lengbi ti lingɔ “aye zu mɛ bɛ lo ye.”—Nzembo 135:5, 6.

 E yɔ ka ti mɔ ya, mɔ lua anzɔ̃ kpale na lo ti nzɔ̃ dangɔ bɛ ti ya Ngbangɔ. Mɔ lengbi ti lingɔ ya, nzɔ̃ dangɔ bɛ tɛ mɔ ati kpengbani na ‘mandangɔ Ngbangɔ na seni nvɛ̃ni.’ (Aw 17:11) Banda mandangɔ Ngbangɔ ti nɛngɔ ya, mɔ hĩnga ni. Banda bulu ti 2023 na nzɔ̃ dangɔ bɛ na lo ti bi mɛ na gangɔ!