Na lá yenga bi nzɛ ti 20/11/2022, agbia ti ndo lɛ gigi ali mbalasi Conférence des Nations unies COP27 na lo ti gbinyangbingɔ ti klima. Abɛse du ya, ala mangbi mbalasi so hɛ̃ngɔ falanga gba hɛ̃ akɔdɔrɔ ti yɛrɛ ti nɛngɔ ya, ala tiri to na kpale mɛ aba gbɛ̃ngɔ ti klima ko, azi gba atɛnɛ ya, ta ni la na onzingɔ kpale ti gbɛ̃ngɔ ti klima ma.

•    António Guterres sekrɛtɛrɛ general ti Nations unies tɛnɛ ya, “Bɛ mbi de gba na ndenge mɛ e mangbi ya, e hɛ̃ falanga hɛ̃ akɔdɔrɔ mɛ ndo hũ pɛnɔ na lo ti gbinyangbingɔ ti klima, abɛse ngaso ko, ta falanga niko na lengbingɔ ma . . . Lɛ sese bo na ya kpengba kpale nvɛ̃ni.”—19/11/2022.

•    Mary Robinson mɛndó lo du prezidã ti Irland nga gbia ti Nations unies na ya kpale mɛ aba ndia ti dungɔ lɛ ngɛ̃́ tɛ azi (droits de l’homme) atɛnɛ ya, “Lɛ gigi bo dã na kpale mɛ aba gbɛ̃ngɔ ti klima.”—20/11/2022.

 Apalanga gba ndo du na songɔ bɛ na lo ti lɛ sese mɛ e da. Kanda, agbia ti gigi alengbi ti bombingɔ nda la, wa ala onzi kpale mɛ aba gbɛ̃ngɔ ti klima? Tɛnɛ mɛ Ngbangɔ tɛnɛ nɛ?

 Ngbangɔ tɛnɛ ya, abɛse ge ge ge nga na kwa ti kpengbani mɛ agbia ti gigi ndo li na nzɔ̃ bɛ zu ko, ngunu tɛ la na ya kpale mɛ aba onzingɔ kpale mɛ aba gbɛ̃ngɔ ti klima na dungɔ bo na maka, na lo ti aye sɛ:

•    “Ye mɛ asã wɛ ko, ta zo lengbi ti lonzingɔ ni ma.”—Mosakoli 1:15.

   Afa nɛ: Ta agbia ti gigi alengbi ti onzingɔ ni ma na lo mɛ ya, ta alindó zo na makoki ti nɛngɔ ya, lo le gbia na ndo tɛrɛ lo ma. (Yirimia 10:23) Abɛse du ya, agbia ti lɛ gigi zu abombi nda la ndoni kɔi ko, ta ala na kokangɔ onzingɔ akpengba kpale ti lɛ gigi ma, abɛse du ya, ala li ngasia.

•    “Azi adu gbanda awa kiya, awa gwɛ̃ faranga, . . . [Azi mɛ ta ala ndo mangbi na afɔ̃ la ma].”—2 Timɔte 3:2, 3.

   Afa nɛ: Ngbangɔ tɛnɛ yangondo ya, na ngoi mɛ ndɛ e na ni ko, azi gba na dungɔ azi mɛ kota bɛ nga awa gwɛ̃ faranga, ta la nga na mangbingɔ na azi mɛndɛ̃ ma.

 Ta nzɔ̃ kpale na lo ti lɛ sese mɛ e da aba ge ge ge tɛ agbia ti lɛ gigi olo ma. Nzapa kpã Gbia kɔi ti ngbondoni, Yezo Kristo. Na lo tɛ Gbia niko ko, Ngbangɔ tɛnɛ ya:

•    “Lo-lengɔ Gbia ba dungɔ na ndo gɔ̃ lo. Na ilingɔ lo ya, Bɛta wa hɛ̃ngɔ wangɔ, Nzapa ti Ngunu, To ti bwai, Gbia ti siriri.”—Yisaya 9:6.

 Yezo la du Gbia ti Lo-lengɔ Gbia tɛ Nzapa bere Lo-lengɔ Gbia ti ndozu. (Matie 6:10) Lo na ngunu, na ndara, nga na gwɛ̃ kpengbani ti batangɔ sese. (Nzembo 72:12, 16) Na gbɛ Lo-lengɔ Gbia tɛ lo ko, Lo-lengɔ Gbia niko ti ndozu na gbɛ̃ngɔ azi zu mɛ ndo ‘gbɛ̃ lɛ sese’ wa ni nga na lɛkɛngɔ lɛ sese.—Suma 11:18, Yisaya 35:1, 7.

 Ti nɛngɔ ya, mɔ hĩnga ye mɛ na onzingɔ kpale ti gbɛ̃ngɔ ti klima ko, di bɛli tɛnɛ mɛ: “Les changements climatiques et notre avenir: qu’en dit la Bible?.”