Azi gba ndo tɛnɛ ya, zo mɛ ndo du na sɔngɔ bɛ, a adu zo mɛ ndo du na mbɛtɔ, zo mɛ ta lo ndo koka zingɔngɔ na ndãtu ma bere zo mɛ ndo tɛnɛ bo ngoi zu tɛnɛ ti sɔngɔ bɛ tɛ lo.

 Adu biani, azi mɛndɛ̃ ndo du ngaso na ngoi mɛ ala ndo du na sɔngɔ bɛ. Kanda bolukiluki tɛnɛ ya azi mɛndɛ̃, gba ni akɔli, ta ala ndo du ngaso ma. Ankɛtɛ kɔi tɛnɛ ya, akɔli gba “ndo nyɔ samba bere ala ndo nyɔ drɔgɛ ti nɛngɔ ya, ahonzi sɔngɔ bɛ tɛ la. Ngoi gba akɔli ndo du na ngɔnzɔ bere ala ndo tiri alo mɛ nda mi da ma, na ngoi mɛ ala ndo du na sɔngɔ bɛ.”

 Ta kitɛ da ma ya, ta akɔli zu ndo du ngaso ma. Abɛse ngaso ko, sɔngɔ bɛ ati gba na “ngoi olo ti pɛnɔ nga ti kpengba kpale.” (2 Timɔte 3:1) Wa se mɔ du na sɔngɔ bɛ ko, Ngbangɔ lengbi ti zangɔ mɔ ngasia?

 Ngbangɔ na awangɔ gba mɛ elengbi ti kpãngɔ bɛ e ndo ni, mɛ alengbi ti zangɔ e na ngoi mɛ e ti na sɔngɔ bɛ. Zia e ba awangɔ taa ka popo ni.

1.  1. “Ta bɛ ĩ asɔ na lo ti lá ti ndã ma, na lo mɛ ya, lá ti ndã na gangɔ nga na pɛnɔ tɛ lo nvɛ̃ni. Bi kɔi kɔi na pɛnɔ tɛ lo.”—Matie 6:34.

    Ni lengbi na nɛ? Ta e du na sɔngɔ bɛ mɛ aɔ maka na lo ti akpale mɛ na gangɔ ma, na lo mɛ ya, ta e hĩnga bere ni na lingɔ tɛrɛ lo bere ta ni na lingɔ tɛrɛ lo ma. Ngoi gba akpale mɛ e ndo du na sɔngɔ bɛ na lo ni ko, ta ni ndo li tɛrɛ lo na ndenge mɛ e da na bɛ e ma. Wa na ngoi mɛndɛ̃ e ndo kamwã na ngoi mɛ e ndo hũ ya kpale aɔ nzɔ̃ni nvɛ̃ni.

    Mɛka lingɔ ngaso: Da bɛ mɔ na dungɔ lɛ ngɛ̃ tɛ mɔ ti gã na ngoi mɛndó mɔ ndo kanisa ya, kpale kɔi ti siɔni na singɔ na mɔ, kanda ta kpale ni lindó tɛrɛ lo mabere se mɛndó mɔ ndo kanisa na ni ma. Na gesi, mu ngoi ti gbɔ̃ngɔ li mɔ na ndo akpale mɛ mɔ ndo tengbi na ni, wa ba ni na ndenge mɛ alengbi ti zangɔ mɔ ya mɔ hũ bere kpale ni lengbi ti singɔ na kpengba kpale ti kotani.

2.  2. “Nwa ndo li ya, nwa mɛndɛ̃ ahɔ̃, se mɛ zo ndo za nga fɔ̃ lo ya, lo gwe uzu la.”—Masese 27:17.

    Ni lengbi na nɛ? Azi mɛndɛ̃ alengbi ti zangɔ e ya e nwɔ sɔngɔ bɛ tɛ e se e ye ya, ala za e. Ala lengbi ti hɛ̃ngɔ e awangɔ ti nzɔ̃ni mɛndó za la na ya dungɔ lɛ ngɛ̃́ tɛ la na bangɔ akpale mɛndó ala tengbi na ni. Abɛse ngasia, ala lengbi ti zangɔ e ya, e ba kpale ni na ndenge ti nzɔ̃ni wa ni nga na hɛ̃ngɔ e nzɔ̃ dangɔ bɛ.

    Mɛka lingɔ ngaso: Gi zo kɔi ka popo tɛ azi mɛ mɔ hĩngangbi na ala mɛ lo lengbi ti hɛ̃ngɔ mɔ wangɔ, na ndakisa, kwa mɔ mɛ lo ndo tengbi na kpengba kpale mɛ mɔ ndo tengbi nga na ni. Hũnda lo na aye mɛ za lo nga na aye mɛ ta za lo ma.

3.  3. “Ĩ bi asɔngɔ bɛ tɛ ĩ zu hɛ̃ lo na lo mɛ ya, lo ndo kpã lɛlo na ndo ĩ.”​—1 Petro 5:7.

    Ni lengbi na nɛ? Nzapa ndo kpã lɛ lo ndo azi mɛ ndo hũ pɛnɔ. Lo yɔ ge ti e ya, e zi bɛ e, wa e kambisa hɛ̃ lo akpale zu mɛ ndo hɛ̃ e pɛnɔ na ya sambela.

    Mɛka lingɔ ngasɔ: Li listɛ ti akpale mɛ ndo hɛ̃ mɔ pɛnɔ. Na gesi li sambela hɛ̃ Nzapa na lo ti akpale ni, kambisa kpale kɔi wa yɔ ka ti lo ya, lo za mɔ, mɔ nwã kpale ni.

 Ngbangɔ hɛ̃ e awangɔ gba mɛ ba se ti nwɔngɔ sɔngɔ bɛ tɛ e. Kanda ni kokapa ya, angbã yakere ta akpale mɛ ndo hɛ̃ e pɛnɔ na dungɔ da fãni mɛndɛ̃ ma. Ni na lingɔ tɛrɛ lo ngasia?

 Lo-lengɔ Gbia tɛ Nzapa na onzingɔ apɛnɔ tɛ e zu. (Suma 21:4) Ka gbɛ Lo-lengɔ Gbia tɛ Nzapa, ta e na dangɔ bɛ e fãni mɛndɛ̃ akpale ti gã ma, ta pɛnɔ na dungɔ nga fãni mɛndɛ̃ da ma.—Yisaya 65:17.

 Ni la adu dungɔ lɛ ngɛ̃́ mɛ “Nzapa mɛ wa hɛ̃ngɔ siriri” ye na lo tɛ mɔ. (Roma 16:20) Lo sa ngunu bɛ e na ngoi mɛ lo pa ya: “Mbi hĩnga nzɔ̃ni dangɔ bɛ mɛ mbi na ni na lo tɛ ĩ, adu dangɔ bɛ ti siriri, ta ti pɛnɔ ma, ti nɛngɔ ya, mbi hɛ̃ ĩ dungɔ lɛ ngɛ̃́ ti nzɔ̃ni na bi mɛ na gangɔ nga na nzɔ̃ dangɔ bɛ.”—Yirimia 29:11.