Na ya bulu ti 2023, azi mɛ ndo ba kpale ti sãte atɛnɛ ya, azi gba ndo ma tɛrɛ la ya, ani ngbã na bɛ ani, wa ni ti ngã ti siɔni mɛ ayɔ ya, e kpã lɛ e na ndo ni. Kpale niko na wɛngɔ gbanda lá kɔi?

•   Dɔktɛrɛ Vivek Murthy mɛ ndo ba kpale ti sãte tɛ azi ka kɔdɔrɔ ti États-Unis atɛnɛ ya: “Mangɔ tɛrɛ ya, zo ngbã na bɛ lo adu ye ti siɔni nvɛ̃ni mɛ alengbi ti gbɛ̃ngɔ dengɔ bɛ ná sãte tɛ zo.” Lo di tɛnɛ nga ya: “E na ye mɛ alengbi ti onzingɔ ni.” Ngasia? “Adu na lingɔ bi zu aye ti yakere yakere ti nɛngɔ ya, e ti na mangbi ti nzɔ̃ni na azi mɛndɛ̃.” a

 Ta zo lengbi bo ti hũngɔ ya, ni ngbã na bɛ ni se lo du lo kɔi ma. Azi mɛndɛ̃ lengbi ti mangɔ tɛrɛ la ya, ani ngbã na bɛ ani abɛse ala ndo du ndoni kɔi na azi gba. Ngbangɔ lengbi ti zangɔ e abɛse du ya, e ndo hũ ya, e ngbã na bɛ e na lo ti nɛ. Ni ndo hɛ̃ awangɔ mɛ alengbi ti zangɔ e ya, e ti na mangbi ti kpengbani na azi mɛndɛ̃, wa ta e hũ ya, e ngbã na bɛ e ma.

 Mandɔ tɛnɛngɔ tɛnɛ na azi na ndenge ti nzɔ̃ni. Ta mɔ ngbã bo na kambisangɔ hɛ̃ azi mɛndɛ̃ se mɛ mɔ ndo ma na tɛrɛ mɔ ma, kanda ndo ma nga ala na ngoi mɛ ala ndo kambisa se mɛ ala ndo ma na tɛrɛ la hɛ̃ mɔ. Se mɔ ndo kpã tɛrɛ mɔ na ndo tɛ azi mɛndɛ̃ ko, mangbi tɛ ĩ na tingɔ kpengbani.

•   Wangɔ ti ya Ngbangɔ: ‘Ta ĩ gi bo nzɔ̃ kpale tɛ ĩ nvɛ̃ni ma, kanda ale ĩ ndo gi nga nzɔ̃ kpale tɛ azi mɛndɛ̃.”​—Filipɛ 2:4.

 Du na akwa ndɛ̃ ndɛ̃ ndɛ̃. Ye dungɔ kwa azi ti ale ndɛ̃ ndɛ̃ ndɛ̃, yanga ndɛ̃ ndɛ̃ ndɛ̃ nga azi ti kɔdɔrɔ mɛ aɔngbi na tɛ mɔ.

•   Wangɔ ti ya Ngbangɔ: “Ĩ zi bɛ ĩ.”​—2 Kɔrinto 6:13.

 Ti nɛngɔ ya, mɔ hĩnga akpale gba na ndo se mɛ mɔ lengbi ti tingɔ na mangbi ti nzɔ̃ni na azi mɛndɛ̃ ko, di bɛli tɛnɛ mɛ “Comment combler notre besoin d’amitié.”