Na ya bulu ti 2022 ko, guvɛrnɛma ti lɛ gigi zu asalela 2.240 miliard ti dollars. Mɛ adu ngenza gba nvɛ̃ni ɔngɔ ti uzu ti nɛngɔ ya, avɔ̃ na anwa ti to, ala si na ngenza niko, gba ni na ngoi mɛ Russie gwe ti tiringɔ to ná Ukraine. Na nzɛ ti 04/2023 ko, ebongiseli kɔi mɛ ili ni la, Institut international de recherche sur la paix de Stockholm (SIPRI) asindó na rapɔrt kɔi na lo ti kpale mɛndó ali tɛrɛ lo na 2022.

•   Falanga mɛ azi ti Poto asi na ni na lo ti kpale niko ko, “aɔ madãma (13%) ngenza mɛndó ala si na ni bandangɔ bulu ti 1991 na ngoi ti to mɛndó ali tɛrɛ lo na popo tɛ azi ti Est ná ti Ouest ti Poto.”

•   “Ngenza mɛ kɔdɔrɔ ti Russie asi na ni ti vɔ̃ngɔ na anwa ti to ko, ni ma na 9.2%. Ni li ya, lo lo ka ndo ti kũ, lo ti na olo na ndo ti taa ti kɔdɔrɔ ti lɛ gigi zu na omɛ aba singɔ na ngenza gba na lo ti vɔ̃ngɔ na anwa ti to.”

•   États-Unis la adu kɔdɔrɔ ti uzu ti lɛ gigi zu, na lo mɛ ya, “lo ndo si na 39% ti falanga mɛ aɔ afalanga zu mɛ akɔdɔrɔ ti lɛ gigi ndo si na ni na lo ti vɔ̃ngɔ anwa ti to.”

 Dɔktɛrɛ Nan Tian mɛ ndo ba kpale ti ngele, lo nga kɔi tɛ azi mɛ asu rapɔrt SIPRI atɛnɛ ya, “na ya bulu mɛ aɔ ko, hũngɔ se mɛ aguvɛrnɛma ti lɛ gigi ndo si na falanga gba so vɔ̃ngɔ anwa ti to ko, ni ndo fa ya, e na olo na ya gigi ti siɔni.”

 Ngbangɔ tɛnɛ ya, na ngoi tɛ e, agbia ti gigi mɛ na ngunu mawoma na gbangbingɔ tɛrɛ la. Kanda ni fa nga na e ye kɔi mɛ na kpãngɔ bɛta siriri.

•   Ngbangɔ ndo ili ngoi mɛ ndɛ e na ni ya “ngoi ti ndani.”—Danyele 8:19.

•   Mbeti ti Danyele kambisa ya, na ngoi niko ko, akɔdɔrɔ ti ngunu ti lɛ gigi na gbangbingɔ tɛrɛ la. Akɔdɔrɔ niko na tiringɔ to ti nɛngɔ ya, ani ɔ afɔ̃ ni na ngunu, to mɛ na tiringɔ ka popo tɛrɛ akɔdɔrɔ niko na lingɔ ya, “asi na falanga bere wɔlɔ gba”.—Danyele 11:40, 42, 43.

 Ti nɛngɔ ya, mɔ hĩnga akpale gba na ndo aprɔfesi ti ya Ngbangɔ ko, ba video mɛ bɛli tɛnɛ ni tɛnɛ ya, Esakweli moko ezali kokokisama: Danyele mokapo 11.

•   Ngbangɔ pa ya, Nzapa na hãngɔ lo-lengɔ gbia tɛ azi. Lo na “kpãngɔ Lo-lengɔ Gbia kɔi mɛ ta ni na gbɛ̃ngɔ ma. Ta zo mɛndɛ̃ na mungɔ Lo-lengɔ Gbia ni ma. Ni na kalangɔ nga na gbɛ̃ngɔ alo-lengɔ gbia mɛ zu, wa ni na ngbãngɔ ti bwai na bwai.”—Danyele 2:44.

•   Angbã yakere Yehova a Nzapa na lingɔ ye mɛ ta azi na likoki ti lingɔ ma. Lo na kpãngɔ bɛta siriri mɛ na ngbãngɔ bwai na bwai. Lo na lingɔ ni ngasia? Lo-lengɔ Gbia tɛ lo mɛ ka ndozu na onzingɔ ato zu, ni nga na onzingɔ akpale ti mɔbulu zu.—Nzembo 46:8, 9.

 Ti nɛngɔ ya, mɔ hĩnga akpale mɛndɛ̃ mɛ Lo-lengɔ Gbia tɛ Nzapa na lingɔ ko, di bɛli tɛnɛ mɛ “Na Bokonzi ya Nzambe ‘kimya ekokóma mingi.’”