DU NA KPENGBA LƐ!
Sese ndo gbɛ̃ bo gbɛ̃ngɔ—Tɛnɛ mɛ Ngbangɔ tɛnɛ nɛ?
Na bangɔ rapɔrt tɛ azi mɛ ndo ba kpale ti gbɛ̃ngɔ ti klima na ndo lɛ gigi zu mɛ mbalasi asi na ni na bi nzɛ ti 04/04/2022 ko, António Guterres mɛ sekrɛtɛrɛ general ti ONU atɛnɛ ya, “Azi ndo li aye mɛ na lingɔ ya, kpale ti siɔni nvɛ̃ni asi na sese. Ni na lingɔ ya ngu agbɔ akɔdɔrɔ gba. Gbingɔ na dungɔ da gba nvɛ̃ni ɔngɔ omɛndó da gã. Akpengba yá na lingɔ tɛrɛ lo. Azi na zangangɔ ngu ti nzɔ̃ni. Amiliɔ̃ ti ale kɛkɛ ná ti asa na minangɔ. Ta adu ye mɛ e na hũngɔ ni kaya filmɛ ma, ta adu nga ya, e tɛnɛ tɛnɛ mɛ aɔ nyɔ kpɔ̃ ni ma. Adu aye mɛ azi ti siãsɛ apa ya, ni na singɔ se ta aguvɛrnɛma agbinyangbi se tɛ la ti salelangɔ énergie ma.”
Na bi nzɛ ti 15/06/2022 azi ti The New York Times atɛnɛ na ya bɛli tɛnɛ, (Flooding Chaos in Yellowstone, a Sign of Crises to Come) ya: “Azi ti siãsɛ apia tɛnɛ ya, na ya abulu mɛ na gangɔ aye ti siɔni nvɛ̃ni na singɔ na aparkɛ 423 ti États-unis, na lo ti gbinyangbingɔ ti klima. Na lo mɛ ya, aparkɛ niko lengbi ti gbɛ̃ngɔ na lo ti gbingɔ mɛ ando ti bo kpengbani. Aye ti siɔni mɛ na singɔ na dungɔ mabere aye ti siɔni mɛ Ngbangɔ tɛnɛ tɛnɛ ni: Kpengba wá (incendie), nga na ngu mɛ ndo sĩ kpengbani (inondation), aglase mɛ ndo mu ndo gba, sĩngɔ ti atɛ nga na gbingɔ mɛ ndo ti bo kpengbani.”
Kpale mɛ aba gbɛ̃ngɔ ti sese na wɛngɔ gbanda lá kɔi? Zo mɛ na onzingɔ ni na? Zia e ba tɛnɛ mɛ Ngbangɔ tɛnɛ.
Ngbangɔ piandó tɛnɛ tɛnɛ ti gbɛ̃ngɔ ti sese
Ngbangɔ tɛnɛ ya, Nzapa na “kpɔngɔ azi ko la ndo gbɛ̃ lɛ sese.” (Suma 11:18, NWT) Tɛnɛ niko ti ya Ngbangɔ aza e ya, e gbɔ̃ nda aye taa:
1. Aye mɛ azi ndo li na gbɛ̃ngɔ nvɛ̃ni sese.
2. Gbɛ̃ngɔ ti sese na wɛngɔ.
3. Nzapa la na onzingɔ kpale zu ti siɔni mɛ asi na sese, kanda ta azi la na lingɔ ni ma.
Sese na dɛ̃ngɔ gbanda fãni mɛndɛ̃
Ngbangɔ tɛ nɛ ya, “sese na ngbãngɔ bwai na bwai.” (Mosakoli 1:4) Azi na dungɔ ge lɛ sese ti bwai na bwai.
“Azi ti mbilimbili na mungɔ lɛ sese, wa ala na dungɔ da bwai na bwai.”—Nzembo 37:29.
Lɛ sese na diringɔ tingɔ fãni mɛndɛ̃ nzɔ̃ni.
“Bɛ nyama ná ndo mɛ ngu ahulɛ da zu na dungɔ na dengɔ bɛ gba nvɛ̃ni, wa kpɛngbɛlɛ [ndo kpakpa] mɛ ka bɛ nyama na dungɔ na dengɔ bɛ wa ni na singɔ afɛlɛlɛ gba nvɛ̃ni.”—Yisaya 35:1.
