Kanyaka tɛ akota agbia adu akpengba kpale gba ge ndo lɛ gigi. a Na ndakisa, na ngoi ti siɔ gã ti Covid-19 ko, ka ya akɔdɔrɔ gba akambandó agbia gba ya, ala ndo salela falanga mɛndó ebongiseli ti lɛ gigi hɛ̃ ya, aza azi na lo ti gã ti corona. Kanyaka ni lindó ya, ta azi gba amu yɔrɔ na ndenge mɛ alengbi ma, wa azi gba kpilindó na ngã ni ti corona.

 Ye mɛndó si na ndo kanyaka tɛ azi ti guvɛrnɛma ko, ni du biani. David mɛndó ministre ti gã ti kɔdɔrɔ ti britannique tɛnɛ ya: “Kanyaka du nga ma danvɛ̃nɛ mɛ azi zu ti lɛ gigi ndo bata na tɛrɛ la.”

 Abɛse ngaso ko, elengbi ti yengɔ na bɛ e kɔi ya, angbã yakere kanyaka ti lo lengɔ gbi tɛ azi na wɛngɔ. Na lo nɛ? Ba ye mɛ Nzapa na lingɔ mɛ lo tɛnɛ tɛnɛ ni kaya Ngbangɔ.

 Ngbangɔ tɛnɛ na lo tɛ Nzapa ya: “Mbi, Yehova, mbi ndo ye mbilimbili; Mbi kɛ̃ nzĩngɔ zĩ nga na zangangɔ mbilimbili.” b (Yisaya 61:8) Ngoi mɛ azi ndo hũ pɛnɔ na lo ti kanyaka ko, Nzapa ndo hũ ni. (Masese 14:31) Lo ko kapa ya: “Na lo mɛ ya azi ti pɛnɔ ndo hũ pɛnɔ ko, . . . Mbi na longɔ ndozu ti nɛngɔ ya, mbi li kpale kɔi.”—Nzembo 12:5.

 Ye mɛ Nzapa na lingɔ nɛ? Ta lo na lɛkɛngɔ guvɛrnɛma tɛ azi ma, kanda lo na hãngɔ lo-lengɔ gbia tɛ azi wa na pandani, Lo na kpãngɔ Lo-lengɔ Gbia ti ndozu mɛ ando ili ni ya “Lo-lengɔ Gbia tɛ Nzapa.” (Marko 1:14, 15; Matie 6:10) Ngbangɔ tɛnɛ ya: “Nzapa ti ndozu na kpãngɔ Lo-lengɔ Gbia kɔi mɛ na . . . Karangɔ alo-lengɔ gbia zu wa bo Lo-lengɔ Gbia tɛ Lo kɔi la na ngbãngɔ ti bwai na bwai.” (Daniel 2:44) Nzapa na onzingɔ kpale mɛ aba kanyaka mɛ e ndo hũ ni ndɛ.

 Nda mɛ elengbi ti yengɔ na bɛ e kɔi ya, ta Lo-lengɔ Gbia tɛ Nzapa, guvɛrnɛma tɛ lo, na dungɔ na kanyaka ma nɛ? Na lo ti arɛzɔ̃ mɛ:

1.  1. Ngunu mɛ lo na ni. Ngunu ti Lo-lengɔ Gbia ni na longɔ ka tɛ Nzapa mɛ nvɛ̃ ngunu zu.—Suma 11:15.

    Ɔngbi mɛ ka popo ni nɛ? Ndɛ lo mɛ, ti nɛngɔ ya lo lengɔ gbia tɛ azi ali kwa ko, ala ndo kpã bɛ la na ndo falanga tɛ azi, ye mɛ ndo to ala ya, ali kanyaka, ala nzĩ nzĩ, wa ala hɛ̃ nga azi pɛnɔ la. Kanda Lo-lengɔ Gbia tɛ Nzapa mɛ nvɛ̃ ngunu zu, na dungɔ bo ngoi zu na likoki ti kokisangɔ gwɛ̃ tɛ azi, wa ta ni nga na kpãngɔ bɛ lo na ndo falanga tɛ azi ma.—Nzembo 145:16.

2.  2. Zo mɛ na tambwisangɔ kpale ni. Nzapa kpã Yezo ya lo du wa tambwisangɔ Lo lengɔ Gbia tɛ lo. Danyele 7:13, 14.

    Ɔngbi mɛ ka popo ni nɛ: Azi mɛ ndo tambwisa lo-lengɔ gbia ti lɛ gigi olo na ndenge ti nzɔ̃ni na ngoi mɛndɛ̃ ko, ala ndo li nga siɔ kpale. (Mosakoli 7:20) Kanda ɔngbingɔ na Yezo ko, lo fandó ya ta ni ndo li siɔ kpale ma. (Matie 4:8-11) Lo ndo du lá kwe na songɔ ti mbilimbili, lo ndo ma nga vundu tɛ azi.—Nzembo 72:12-14.

3.  3. Andia tɛ lo. Andia ti Lo-lengɔ Gbia tɛ Nzapa adu ti lengbingɔ, wa ni nga nzɔ̃ni.—Nzembo 19:7, 8.

    Ɔngbi mɛ ka popo ni nɛ? Ta andia tɛ azi ndo du bo lá kwɛ nzɔ̃ni ma, wa ta elengbi ti kpãngɔ bɛ e ndoni ma, na lo mɛ ya, ni ndo longisa kanyaka. Ɔngbingɔ na ndia tɛ azi ko, ta ndia tɛ Nzapa ndo du kpengbani ma, wa ni ndo hɛ̃ nzɔ̃ kpale. (Yiasya 48:17, 18) Ta e ndo ngbã bo na mangɔ andia ni na ma e ma, kanda e ndo kpã nga ni na kwa. (Matie 22:37, 39) Na lo mɛ ya, Nzapa ndo hĩnga bɛ e ko, lo lengbi ti salelangɔ ndia tɛ lo na bɛ ti vundu.—Yirimia 17:10.

 Mɔ na gwɛ̃ ti hĩngangɔ alo gba mɛ ba kapa mɛ Ngbangɔ ko na lo ti guvɛrnɛma mɛ azanga kanyaka?

•   Di bɛ li tɛnɛ mɛ “Bokonzi ya Nzambe—Guvɛrnema oyo ezangi kanyaka” ti nɛngɔ ya mɔ hĩnga aye taa mɛ ndo fa ya, ta Lo-lengɔ Gbia tɛ Nzapa na dungɔ na kanyaka ma.

•   Ba video Bokonzi ya Nzambe ezali nini? Ti nɛngɔ ya mɔ hĩnga akpale gba mɛ aba guvɛrnɛma tɛ Nzapa, nga na aye mɛ lo na lingɔ ge lɛ sese.

•   Gi lége ti mandangɔ Ngbangɔ gɛgɛrɛ ka tɛ Atɛmwɛ tɛ Yehova ti nɛngɔ ya mɔ hũ se mɛ akapa ti ya Ngbangɔ lengbi ti zangɔ mɔ.