Akpale ti kakuluni tɛ azi ti politikɛ amu le gigi zu.

•   Na bulu ti 2023-2024 ka Mexique, akpɔndó azi ti politikɛ 39 wa akpale mɛndɛ̃ ti kakuluni alindó tɛrɛ lo na ngoi ti lingɔ vɔ̃tɛ ti kɔdɔrɔ niko.

•   Na ya bi mɛ aɔ, ka Europe akpale ti kakulu ni tɛ azi ti politikɛ alindó tɛrɛ lo mawoma. Kɔi ti kakulu lo ni du ya, ala gindó lége ti hongɔ premier ministre ti kɔdɔrɔ ti Slovaquie na lá ti 15/05/2024.

•   Na lá ti 13/07/2024 ka États-Unis, kpale kɔi ti kakulu ni lindó tɛrɛ lo wa agindó lége ti hongɔ Donald Trump mɛndó uzu gbia ti kɔdɔrɔ niko.

 Nda mɛ akpale ti kakulu ni ti politikɛ ndo li tɛrɛ lo so nɛ? Ni na wɛngɔ lá kɔi? Tɛnɛ mɛ Ngbangɔ tɛnɛ nɛ?

 Ngbangɔ pa ya na ngoi tɛ e mɛ ando ili ni ya “ndangba bi” ko, azi gba na tingɔ na seliye mɛ ndo li ya kakulu lo du da nga seliye mɛ ndo kpã kangbi.

•   “Na ngoi ti ndani ko, mbanga ngoi adu gbanda ngoi ti pɛnɔ. Azi adu gbanda . . . azi mɛ ta ndo hĩnga nzɔ̃ lo mɛ ali tɛrɛ ala ma, azi mɛ azanga mbilimbili, . . . azi mɛ ta ndo ma vundu tɛ zo ma, . . . awa sãna, . . . awa kangɔ afɔ̃ ala, awa kpengba li, azi mɛ ndo yakɛ tɛrɛ la sĩ.”—2 Timɔte 3:1-4.

 Ngbangɔ piandó tɛnɛ ya, akpale ti mobulu mabere tɔmbɔgɔngɔ na akakulu lo ti kpale ti politikɛ na lingɔ tɛrɛ lo na bi niko. (Luka 21:9, tɛnɛ ti gbɛnda pajɛ) Kanda, ta kakulu lo tɛ azi ti politikɛ ná kangbi na ngbãngɔ ti bwai ma.

 Ngbangɔ pa ya, Nzapa na hãngɔ alo-lengɔ gbia zu tɛ azi zingɔ wa na se lɛ ni, lo na kpãngɔ Lo-lengɔ Gbia tɛ lo nvɛ̃ni ti ndozu.

•   “Nzapa ti ndozu na kpãngɔ Lo-lengɔ Gbia kɔi mɛ . . . na karangɔ nga na onzingɔ alo-lengɔ gbia mɛ zu wa lo-lengɔ gbia tɛ lo nvɛ̃ni na ngbãngɔ bwai na bwai.”—Daniel 2:44.

 Lo-lengɔ Gbia tɛ Nzapa na kpãngɔ bɛta mangbi na popo tɛ azi nga siriri na ndo lɛ gigi zu.

•   Ando ili Yezo Kristo mɛ Gbia ti Lo-lengɔ Gbia ni ya, “Gbia ti siriri,” wa lo na kpãngɔ “siriri mɛ ta na wɛngɔ ma.”—Yisaya 9:6, 7.

•   Abɛse ndɛ, elengbi ti mandangɔ alo na ndoni elengbi ti dungɔ na siriri ngasia. Ni la, Ngbangɔ pa ya: “Ala na lingɔ ya zabe tɛ ala ati ye ti gɛ̃ngɔ na sese, ató tɛ ala na tingɔ bá ti sɛ̃ngɔ na sã. Ta kɔdɔrɔ kɔi na yangɔ zabe tɛ lo so tiringɔ to na kɔdɔrɔ mɛndɛ̃ ma, ta ala na mandangɔ nga to ma.”—Yisaya 2:3, 4.

 Ti nɛngɔ ya mɔ manda aye mɛndɛ̃ ko, ba bɛli tɛnɛ mɛ“ Bokonzi ya Nzambe ekosala nini?” wa ba nga video mɛ Bokonzi ya Nzambe ezali nini?