DU NA KPENGBA LƐ!
Tɛnɛ mɛ Ngbangɔ tɛnɛ na omɛ aba kpɔngɔ ayangambi ka da kalasi nɛ?
Na bi nzɛ ti 24/05/2022, kpale kɔi ti siɔni nvɛ̃ni ali mbalasi tɛrɛ lo kaya nyi kɔdɔrɔ ti Uvalde ti Texas mɛ ka États-unis. Na bangɔ tɛnɛ tɛ azi mɛ ndo pa tɛnɛ (The New York Times) ko, “zo kɔi akpɔ mbalasi ayangambi 19 ná awa hangɔ ala na mbeti sɛ . . . ka da kalasi ti primɛrɛ ti Robb.”
Na vundu zu, akpale ti siɔni ti ngaso ndo li tɛrɛ lo ngoi gba. Azi mɛ ndo pa tɛnɛ (USA Today) apa ya, bo so ya kɔdɔrɔ ti Etats-unis ko, “na ya bulu mɛ aɔ akpɔ ayangambi kaya da kalasi fãni 249 ɔngɔ abulu mɛndɛ̃ zu mɛ aɔ bandangɔ na bulu ti 1970.”
Nda mɛ akpale ti siɔni ndo li tɛrɛ lo ngaso nɛ? Ye mɛ na zangɔ e ya, e gbe bɛ e na ya akpale ti ngaso nɛ? Akpale ti mobulu na wɛngɔ gbanda lá kɔi? Ngbangɔ hɛ̃ gbinya ti ahũnda niko.
Nda mɛ lɛ gigi sĩ na mobulu nɛ?
Ngbangɔ ndo ili ngoi mɛ e na ni ya, ‘ndangba bi,’ ngoi mɛ ta azi gba na ‘yengɔ tɛrɛ afɔ la ma,’ ala dungɔ awa “zaga,” mɛ ta ndo ma vundu tɛ azi ma, wa ala nga na lingɔ akpale ti mobulu gba. Azi mɛ na aseliye niko ko, ala na “gwengɔ bo uzu uzu na lingɔ siɔ ye.” (2 Timɔte 3:1-5, 13) Ti nɛngɔ ya, mɔ hĩnga akpale mɛndɛ̃ gba ko, di bɛli tɛnɛ mɛ: “Biblia esakolaki makambo oyo bato bazali kokanisa mpe kosala lelo oyo?”
Azi gba ndo hũnda tɛrɛ la ya, ‘Nda mɛ ta Nzapa ndo gbanzi akpale ti siɔni mɛ ngaso ma nɛ?’ Ti nɛngɔ ya, mɔ lua gbinya ti hũnda niko ko, di tɛnɛ mɛ: “Mpo na nini makambo mabe ekómelaka bato malamu?”
Ye mɛ lengbi ti zangɔ e na ya akpale ti siɔni ngaso nɛ?
“Atɛnɛ zu [mɛndó] asu kaya Buku tɛ Nzapa gã ko, [asundó] ni ya, aha e na lo . . . [Ni] ndosa nguru bɛ zo . . . ando li nga ya, zo gbe bɛ lo.”—Roma 15:4.
Awangɔ ti ya Ngbangɔ alengbi ti zangɔ mɔ ya, mɔ gbe bɛ mɔ na ya kpale ti mobulu ti lɛ gigi olo. Ba Lamuka! mɛ bɛli tɛnɛ ni pa ya, “La violence cessera-t-elle un jour?” ti nɛngɔ ya, mɔ hĩnga akpale mɛndɛ̃.
Ti nɛngɔ ya, awa dũngɔ ayangambi ahĩnga se mɛ ala lengbi ti zangɔ ayati la na omɛ aba mobulu mɛ ala ndo hũ, wa ala ndo landa nga ni kaya televisiɔ̃ ná radio ko, di bɛli tɛnɛ mɛ: “Enfants et actualités troublantes.”
Ta akpale ti mobulu na wɛngɔ ngbanda lá kɔi ma?
“Lo na hãngɔ ala kaya kpale ti pɛnɔ ná ti mobulu.”—Nzembo 72:14.
“Ala na lingɔ ya, zama tɛ la, ati nwa ti gɛ̃ngɔ na sese, wa zabɛ tɛ la ati ye ti sɛ̃ngɔ na sã. Ta kɔdɔrɔ kɔi na diringɔ bingɔ to tɛrɛ akɔdɔrɔ mɛndɛ̃ ma, ta ala nga na mandangɔ to fãni mɛndɛ̃ ma.”—Mika 4:3.
Nzapa na lingɔ aye mɛ ta azi na ngunu ti lingɔ ni ma. Lo-lengɔ Gbia tɛ lo ti ndozu na onzingɔ zaga ná mobulu. Ti nɛngɔ ya, mɔ hĩnga akpale gba mɛ Lo-lengɔ Gbia tɛ Nzapa na lingɔ ko, di bɛli tɛnɛ mɛ: “Na Bokonzi ya Nzambe ‘kimya ekokóma mingi.’”
