DU NA KPENGBA LƐ!
Kpɔngɔ azi na tawa ndo mu ndo na ndo lɛ gigi zu—Tɛnɛ mɛ Ngbangɔ tɛnɛ nɛ?
Na ya nzɛ ti Mbala mbala 2022, na ndo lɛ gigi zu, akpɔ azi gba nvɛ̃ni na tawa na ya ando ndɛ̃ ndɛ̃ ndɛ̃:
“Se mɛ aho na zo kɔi ti politikɛ ti Japon mɛ na ndima gba [l’ex-Premier ministre Shinzo Abe] ahɛ̃ mbalasi azi ti kɔdɔrɔ niko pɛnɔ mawoma, wa ni hɛ̃ azi ti lɛ sese zu mbɛtɔ na lo mɛ ya, ta kpale ti mobulu ndo du ka Japon gba ma, wa andia tɛ leta na omɛ aba kpale niko ndo du kpengbani mawoma.”—10/07/2022, The Japan Times.
“Se mɛ kɔli kɔi akpɔ mbalasi azi taa kaya butikɛ kɔi ti kotani ti Copenhague ahɛ̃ mbalasi azi ti Danemark pɛnɔ mawoma.”—04/07/2022, Reuters.
“Ka Soweto mɛ ka Sud Afrike, akpɔ mbalasi azi 15 na tawa kaya bar bere da ti nyɔngɔ samba kɔi.”—10/07/2022, The Guardian.
“Ka États-Unis azi akpɔ mbalasi azi ɔngɔ 220 na tawa na ya pɔsɔ ti 04/07.”—05/07/2022, CBS News.
Elengbi ti dungɔ na dangɔ bɛ ya, akpale ti mobulu ti ngaso na wɛngɔ gbanda lá kɔi? Tɛnɛ mɛ Ngbangɔ tɛnɛ nɛ?
Mobulu na wɛngɔ
Ngbangɔ ndo ili ngoi mɛ e na ni ya, ‘ndangba bi’ ngoi kɔi mɛ azi na lingɔ aye na sãna, na zaga nga aye ti yawili. (2 Timote 3:1, 3) Akpale ti mobulu niko zu ndo hɛ̃ azi mbɛtɔ. (Luka 21:11) Kanda Ngbangɔ ko kapa ya, lá kɔi gbanda ko, ta kpale ti mobulu na dungɔ da ma, ‘wa azi na dungɔ na siriri, kaya ada ti nzɔ̃ni, nga kaya ndo ti wɛngɔ na tɛrɛ mɛ na siriri.’ (Yisaya 32:18) Ngasia la, mobulu na wɛngɔ nɛ?
Nzapa na kpɔngɔ azi ti mobulu zu, wa lo nga na gbɛ̃ngɔ anwã ti to zu.
“Na kpɔngɔ azi ti siɔni zu ge lɛ sese.”—Masese 2:22.
“[Nzapa] na onzingɔ ato tee ka nda gigi zu. Lo ndo kala ya anwã ti to; lo ndo zɔlɔ akamiɔ̃ (chars) ti to na wá.”—Nzembo 46:9.
Nzapa na onzingɔ aye mɛ ndo si na mobulu, wa lo nga na hangɔ na azi se ti dungɔ na siriri.
“Ta ala na lingɔ ye kɔi ti siɔni ma, wa ta ala na gbɛ̃ngɔ ye kɔi ka ndo ngomba tɛ mbi mɛ santo ma, na lo mɛ ya, hĩngangɔ ndo ti mbilimbili tɛ Yehova na mungɔ lɛ sese nga ma se mɛ ngu ndo sĩ ka lɛ tɛ.”—Yisaya 11:9.
Bandangɔ ndɛ, Nzapa ndo ha na azi ti lɛ sese zu ya, ala zia mobulu, wa ala li ya, ‘tawa tɛ la ati aye ti gɛ̃ngɔ na sese’.—Mika 4:3.
Ti nɛngɔ ya, mɔ hĩnga akpale gba mɛ aba prɔfesi ti ya Ngbangɔ mɛ atɛnɛ ya, azi na dungɔ na siriri ge lɛ sese ko, di tɛnɛ mɛ: Affranchis de la peur: est-ce possible?
Ti nɛngɔ ya, mɔ hĩnga ye mɛ na hozingɔ mobulu ti bwai na bwai ko, di tɛnɛ mɛ “Enfin la paix sur la terre!”
