Na ndo lɛ gigi zu, kpale ti politikɛ ndo kpã nvɛ̃ni kangbi na popo tɛ azi. Na bangɔ bolukiluki mɛ azi ti Pew Research Center ali na ya akɔdɔrɔ ndɛ̃ ndɛ̃ ndɛ̃ 19 na bulu ti 2022 ko, “65% tɛ azi mɛ ati akpangba apa ya, zangangɔ mangbi ti kpengbani ndo du na popo tɛ azi ti kɔdɔrɔ tɛ la mɛ ndo hɛ̃ ti la na ya aparti ti politikɛ mɛ akɛsenɛ.”

 Ka ndo mɛ mɔ ndo du na ni, mɔ hũ nga ya, kpale ti polikɛ ndo kangbi popo tɛ azi ngaso? Na lo nɛ la politikɛ ndo kangbi popo tɛ azi nɛ? Ye mɛ alengbi ti onzingɔ ni da? Zia e ba tɛnɛ mɛ Ngbangɔ tɛnɛ.

 Ngbangɔ piandó tɛnɛ ya, na “ndangba bi,” afa ngoi mɛ ndɛ e na ni, azi gba na dungɔ na seliye mɛ na lingɔ ya, ta ala du na mangbi ma.

•   ‘Na ndangba bi, ngoi adu gbanda ngoi ti pɛnɔ na lo mɛ ya, azi adu gbanda azi mɛ ndo ye tɛrɛ la nvɛ̃ni, . . . azi mɛ ta ndo ye dungɔ na mangbi ma.’—2 Timɔte 3:1-3.

 Abɛse azi gba ndo li kpengbani ya, kpale ti aguvɛrnɛma alonga ko, ta ando lengbi bo ma. Azi mɛndɛ̃ mɛ na dangɔ bɛ mɛ aɔngbi na tɛ guvɛrnɛma ndo hũ ya, lingɔ kwa ndoni kɔi so onzingɔ akpale adu kpengbani nga ye mɛ ta alengbi ti lingɔ tɛrɛ lo ma. Ni ndo kokisa akpale mɛndó Ngbangɔ pia tɛnɛ gã.

•   “Zo ndo le gbia na ndo fɔ̃ lo zo, bo so hɛ̃ngɔ lo pɛnɔ.”—Mosakoli 8:9.

 Abɛse ngaso ko, Ngbangɔ tɛnɛ tɛnɛ ti ye mɛ na onzingɔ ni—ye ni adu guvɛrnɛma kɔi mɛ zo mɛ gbia ni na ngunu ti onzingɔ akpale mɛ ndo li ya, ta mangbi adu na popo tɛ azi ma.

 Ngbangɔ tɛnɛ tɛnɛ tɛ gbia kɔi mɛ lo na makoki ti onzingɔ aye mɛ ndo kpã kangbi: Yezo Kristo. Yezo na ngunu, lo na lo-gbia, nga na gwɛ̃ kpangbani ti kpãngɔ mangbi ná siriri na ndo lɛ gigi zu.

•   “Ka gbɛ lo-gbia tɛ lo ko, azi ti mbilimbili na mungɔ ndo zu, wa siriri na dungɔ mawoma.”—Nzembo 72:7.

•   “Azi ti lɛ sese zu na lingɔ kwa hɛ̃ lo.”—Nzembo 72:11.

 Yezo du nzɔ̃ gbia na lo mɛ ya, lo ndo gi nzɔ̃ kpale tɛ azi mɛndɛ̃, wa lo ye nga zangɔ ala, gba ni azi mɛ ali kpale ti zangangɔ mbilimbili tɛrɛ la.

•   “Lo na zangɔ wa yɛlɛ mɛ ndo to to ya, aza lo, nga azi zu ko la na pɛnɔ, wa ta zo ti zangɔ ala da ma. Lo na mangɔ vundu tɛ azi mɛ na vundu, wa lo na sarangɔ dungɔ lɛ ngɛ̃́ tɛ awa yɛrɛ. Lo na hãngɔ ala na ya kpale ti pɛnɔ nga na ti mobulu.”—Nzembo 72:12-14.

 E yɔ ka ti mɔ ya, mɔ manda akpale gba mɛ aba Lo-lengɔ Gbia tɛ Nzapa, guvɛrnɛma mɛ Yezo la gbia ni. Gi hĩngangɔ se mɛ mɔ lengbi ti luangɔ anzɔ̃ kpale ti Lo-lengɔ Gbia ni nga na se mɛ mɔ lengbi ti hɛ̃ngɔ ti mɔ hɛ̃ Lo-lengɔ Gbia ni.

•   Ba video Bokonzi ya Nzambe ezali nini?

•   Di tɛnɛ mɛ: “Bokonzi ya Nzambe​—Guvɛrnema oyo ezangi kanyaka.”