Agbia ti lɛ gigi nga na awa lɛkɛngɔ kpalɛ ti gigi mɛ ta ala ndo koka bɛ ti kpãngɔ siriri ge lɛ gigi ma. Ndɛ lo mɛ ko, na lo ti to ti sɛ mɛndó atiri na ndo lɛ gigi zu ko, ato di ti gba ɔngɔ se mɛndó ni da uzu. Azi bere miliare sɛ afa nɔmbrɛ tɛ azi ti lɛ gigi zu, se akangbi ya ni na siɔ ko, azi niko ndo du ka ndo mɛ ato niko ndo tiri ka da.

 Nda mɛ ta azi ndo koka kpãngɔ siriri ma nɛ? Tɛnɛ mɛ Ngbangɔ tɛnɛ nɛ?

1.  1. Azi ndo fa aseliye mɛ ndo gbanzi la ya, ta ala kpã siriri ma. Ngbangɔ piandó tɛnɛ ya, na ngoi tɛ e ko, “azi [na dungɔ] azi mɛ ndo ye bo tɛrɛ la nvɛ̃ni, awa gwɛ̃ ti falanga, awa gwalo, awa yakɛ, . . . Azi mɛ azanga mbilimbili, . . . Ta ala ndo ye kpãngɔ mangbi ma, . . . Azi mɛ azanga gbanzingɔ tɛrɛ, azi ti sãna, . . . Awa kpengba li, azi mɛ ndo yakɛ tɛrɛ la sĩ.”​—2 Timote 3:2-4.

2.  2. Ta azi na likoki ti onzingɔ apɛnɔ tɛ la zangangɔ lisalisi tɛ wa lingɔ la Yehova a Nzapa ma. Ngbangɔ pa ya “ta du tɛnɛ tɛ zo mɛ ndo nɔ nɔ ya lo nvɛ̃ni lo tambwisa gɛrɛ lo ma.”​—Yirimia 10:23.

3.  3. Satana Zabolo mɛ siɔ gbia la ndo tambwisa lɛ gigi mɛ, wa “lo ndohanda azi ti lɛ sese zu.” (Suma 12:9) Ngoi zu mɛ “lɛ gigi zu dɛ ka yambati siɔ zo ko,” ta mɔbulu ná to na wɛngɔ ma.​—1 Yoanɛ 5:19.

 Ngbangɔ ko kapa hɛ̃ e ya, siriri na dungɔ da, ta na lo ti ge ge ge tɛ azi ma, kanda na ngunu tɛ Nzapa.

•   “‘Mbi hĩnga nvɛ̃ni nzɔ̃ni dangɔ bɛ mɛ mbi na ni na lo tɛ ĩ,’ Yehova la tɛnɛ ngaso, ‘dangɔ bɛ ti siriri, kanda ta ti pɛnɔ ma, ti nɛngɔ ya, mbi hɛ̃ ĩ dungɔ lɛ ngɛ̃́ ti nzɔ̃ni na bi mɛ na gangɔ nga na nzɔ̃ dangɔ bɛ.’”​—Yirimia 29:11.

 Nzapa na kokisangɔ kapa niko ngasia? “Nzapa mɛ ndo li ya, bɛ azi du pii ko, lo na nwɔngɔ Satana.” (Suma 16:20) Nzapa na salelangɔ guvɛrnɛma kɔi ka ndozu mɛ Ngbangɔ ili ni ya “Lo-lenngɔ Gbia tɛ Nzapa,” ti kpãngɔ siriri na ndo lɛ sese zu. (Luka 4:43) Na lége tɛ Yezo Kristo mɛ Gbia ti Lo-lengɔ Gbia niko ko, azi na mandangɔ se ti dungɔ na siriri.​—Yisaya 9:6, 7.

•   Ti nɛngɔ ya, mɔ hĩnga alo mɛndɛ̃ ko, di tɛnɛ mɛ “ye mɛ Lo-lengɔ Gbia tɛ Nzapa na lingɔ nɛ?”