Ge lɛ gigi, na ya akɔdɔrɔ gba, azi ndo hũ pɛnɔ̃ na lo ti ngu mɛ ndo mu akɔdɔrɔ. Ba arapɔrt mɛ:

•   “Na ya abi mɛ alo ti ɔngɔ, ngu ti kpengbani ani ka kɔdɔrɔ ti Chine bandangɔ na lá pɔsɔ tee bi kwa taa, ni mundó ndo na ndenge ti kpɛ̃nɛ wa ni mandó tee na . . . amilimɛtrɛ 744.8. Ni la du ngu mɛ ani kpengbani ɔngɔ angu mɛndɛ̃ zu mɛndó ndo ni na ya abulu 140 mɛ aɔ”—AP News, 2/08/2023.

•   “Kpengba yá mɛ ili ni laTyphoon Khanun ali ya ngu ti kpengba yá ni ka sudi ti Japon bandangɔ ndapelele tee ndɔ ti bi kwa taa na bi kwa siɔ, akpɔndó azi sɛ. . . . Ni ndo fa ya, kpengba yá niko na lingɔ ya ngu ti kpengba yá ni ka kɔdɔrɔ ti Taiwan, gbata mɛ na angomba.”—Deutsche Welle, 03/08/2023.

•   “Ngu mɛndó amu ndo na bi ti lá pɔsɔ na lá yenga [ka Nouvelle-Ecosse] ni londó ndo ngu mɛndó ani kaya kɔdɔrɔ ti Canada atlantique, ni dundó ngu mɛ ni kpengbani ɔngɔ angu zu mɛndó ni na ya abulu 50 mɛ alo ti ɔngɔ.”—BBC News, 24/07/2023.

 Tɛnɛ mɛ Ngbangɔ tɛnɛ na ndo alo ti ngaso nɛ?

 Ngbangɔ ili ngoi mɛ e da ya “ndangba bi.” (2 Timɔte 3:1, NWT) Yezo piandó tɛnɛ ya, na ya ngoi mɛ e da ko, e na hũngɔ “akota ye,” bere aye mɛ ndo sa mbɛtɔ bɛ zo. (Luka 21:11 NWT) Gbinyangbingɔ ti klima ali ya akpengba yá nga na akpengba ngu ti siɔni nvɛ̃ni ani gba.

 Ngbangɔ pa hɛ̃ e ya, alo ti kpɛ̃nɛ mɛ ndo li ndɛ ta alengbi bo ti hɛ̃ngɔ e mbɛtɔ ma, kanda ni lengbi nga ti hɛ̃ngɔ e nzɔ̃ dangɔ bɛ. Na lo nɛ? Yezo tɛnɛndó ya: “Se ĩ hũ aye olo asi ko, ale ĩ hĩnga ya lo Lɛngɔ Gbia tɛ Nzapa adoli wɛ la.”—Luka 21:31; Matie 24:3.

 Alo mɛ ndo li tɛrɛ lo ndɛ ge lɛ gigi, ndo fa ya angbã dã Lo-lɛngɔ Gbia tɛ Nzapa na dungɔ na ngunu ndo aye mɛ Nzapa li, nga mabere ngu.—Yobo 36:27, 28; Nzembo 107:29.

 Ti nɛngɔ ya mɔ hĩnga se mɛ Lo-lɛngɔ gbia tɛ Nzapa na lɛkɛngɔ alo ge lɛ sese ko, ba tɛnɛ mɛ “Qui sauvera la terre?”