Se du ya, kpale ti terorismɛ ali tɛrɛ lo, mɔ lengbi ti hũndangɔ tɛrɛ mɔ na ndo mɛ: ‘Nzapa ndo da bɛ lo nvɛ̃ni na e? Nda mɛ akpale ti ngaso ndo li tɛrɛ lo nɛ? Terorismɛ na wɛngɔ a gbanda la kɔi? Ngasia la mbi lengbi ti hãngɔ mbɛtɔ mɛ mbi ndo du na ni na lo ti Terorismɛ nɛ?’ Ngbangɔ hɛ̃ gbinya ti ahũnda ni.

 Nzapa ndo kɛ̃ na bɛ lo kɔi mobulu ná terorismɛ. (Nzembo 11:5; Masese 6:16, 17) Yezo mɛ nyi Nzapa, apamelandó ava lo na ngoi mɛndó ala ye lingɔ mobulu. (Matie 26:50-52) Abɛse ateroristɛ ndo tɛnɛ ya, ani ndo li mobulu na lo tɛ Nzapa ko, ta Nzapa la hɛ̃ lége ti lingɔ akpale ti ngaso ma. Ta Nzapa ndo ma nga sambela tɛ la ma.​—Yisaya 1:15.

 Nzapa ndo kpã lɛ lo na ndo azi zu mɛ ndo hũ pɛnɔ, abɛse azi mɛ atengbi na kpale ti terorismɛ. (Nzembo 31:7; 1 Petro 5:7) Ngbangɔ pa ya, Nzapa na onzingɔ akpale ti mobulu zu ge lɛ sese.​—Yisaya 60:18.

 Ngbangɔ kambisa hɛ̃ e nda mɛ terorismɛ amu ndo ndɛ, ni pa ya: “Zo le gbia na ndo fɔ̃ lo zo ti hɛ̃ngɔ lo pɛnɔ.” (Mosakoli 8:9) Na ya tɛnɛ mɛ aba dungɔ lɛ ngɛ̃́ tɛ azi ko, azi gba mɛ ndo du agbia, ndo salela lo-lengɔ gbia tɛ lo so hɛ̃ngɔ azi mɛndɛ̃ pɛnɔ. Na lo mɛ ya, azi gba ndo hũ pɛnɔ ko, ni la ala ndo hɛ̃ tɛrɛ la na ya kpale ti terorismɛ so diringɔ na siɔ kpale na ndo siɔ kpale.​—Mosakoli 7:7.

 Nzapa ko kapa ti onzingɔ akpale zu mɛ ndo hɛ̃ azi mbɛtɔ nga na akpale ti mobulu. Wa lo na kpãngɔ siriri ge lɛ sese. (Yisaya 32:18; Mika 4:3, 4) Ba aye mɛ lo na lingɔ lo mɛ:

•   Lo na hãngɔ aye mɛ ndo li ya, terorismɛ du da. Nzapa na hãngɔ lo-lengɔ gbia tɛ azi wa lo na kpãngɔ Lo-lengɔ Gbia mɛ na lengɔ gbia bwai na bwai ge lɛ sese zu. Yezo mɛ na dungɔ Gbia ti Lo-lengɔ Gbia ni, lo na lingɔ hɛ̃ azi kpale na mbilimbili zu, wa lo nga na hãngɔ aye zu mɛ ndo li ya, azi hũ pɛnɔ ná kpale ti mobulu. (Nzembo 72:2, 14) Na ngoi niko gbanda ko, ta zo kɔi na lingɔ terorismɛ ma. Azi na “sepalangɔ nvɛ̃ni nga na siriri zu.”​—Nzembo 37:10, 11.

•   Lo na hãngɔ aye zu ti pɛnɔ mɛ terorismɛ si na ni. Nzapa na onzingɔ akpale zu ti siɔni mɛ terorismɛ asi na ni na ndo azi, na lo ti sãte nga na bingangɔ li tɛ ala. (Yisaya 65:17; Emoniseli 21:3, 4) Lo ko kapa ya, azi zu mɛ akpili ko, ni na songɔ na ala, ti nɛngɔ ya ala diri lɛ la ngɛ̃́ na ya gigi kɔi ti siriri.​—Yoanɛ 5:28, 29.

 Ngbangɔ kambisa hɛ̃ e aye mɛ alengbi ti tongɔ e ya, e ye da ya, angbã dã Nzapa na kokisangɔ akpale ni. Mɔ lengbi ti hũndangɔ tɛrɛ mɔ ya: Nda mɛ ta Nzapa onzi terorismɛ ndo gã ma nɛ?’ Ti nɛngɔ ya mɔ lua gbinya ko, ba video mɛ Mpo na nini Nzambe atiki nzela na bampasi?