Bulu zu, amiliɔ̃ tɛ azi ndo kpili na lo ti nyɔngɔ drɔgɛ ti kpengbani. Na ngoi ti siɔ gã ti COVID-19, azi gba di bandandó nyɔngɔ drɔgɛ. Wangɔ ti Ngbangɔ zandó azi gba ya ala zia nyɔngɔ drɔgɛ. Se du ya, mɔ ndo tiri to ti ziangɔ dungɔ mbɛ ti drɔgɛ ko, ndara mɛ lengbi ti zangɔ mɔ nga na wangɔ mɛ so ya tɛnɛ mɛ. a

Na ya tɛnɛ mɛ e na bangɔ

•  Ngbangɔ lengbi ti zangɔ mɔ ya mɔ zia dungɔ mbɛ ti drɔgɛ ngasia?

•  Awangɔ siɔ ti ya Ngbangɔ mɛ lengbi ti zangɔ mɔ ya mɔ lo ka gbɛ mbɛ ti drɔgɛ mɔ si

•  Avɛrse ti ngbondoni ti ya Ngbangɔ mɛ mɔ lengbi ti salelangɔ ni ti nɛngɔ ya mɔ zia dungɔ mbɛ ti drɔgɛ

•  Tɛnɛ mɛ azi mɛndó azia dungɔ mbɛ ti drɔgɛ atɛnɛ: Ngbangɔ zandó ani ti nɛngɔ ya ani zia dungɔ mbɛ ti drɔgɛ

•  Ngbangɔ gbanzi lisalisi tɛ mɔnganga mɛ asalela ni na drɔgɛ?

•  Ngbangɔ gbanzi salelangɔ drɔgɛ ti nɛngɔ ya, zo sara na tɛrɛ lo?

 Azi ti kɔdɛ tɛnɛ ya, dungɔ mbɛ ti drɔgɛ ni mangbi na mangɔ mabere zo ngbã na bɛ lo, dungɔ na sɔngɔ bɛ, bere ngángɔ ti li. Ngbangɔ lengbi ti zangɔ mɔ ya, mɔ kpã bɛ mɔ na ndo aye mɛ mɔ na gwɛ̃ ni ti nɛngɔ ya mɔ zia dungɔ mbɛ ti drɔgɛ. Ni kambisa ye mɛ e li ti nɛngɔ ya e du na mangbi ti nzɔ̃ni na Nzapa. (Nzembo 25:14) Na lisalisi tɛ Yehova, ĩ lengbi ti nwɔngɔ akpengba kpale mɛ ta ĩ ndo koka onzingɔ ni na bɛ ĩ ma.—Marko 11:22-24.

1.  1. Manda hĩngangɔ Yehova. b (Yoanɛ 17:3) Lo du wa lingɔ ye zu, ta ngunu tɛ lo na maka ma. Omɛ ɔ ngbondoni, lo du to mɔ ti ndozu wa lo ndo ye mɔ gba. Lo ye lɛkɛngɔ mangbi ti nzɔ̃ni ka popo tɛ mɔ na lo, wa lo nga na salelangɔ ngunu tɛ lo ti nɛngɔ ya ni za mɔ. (Yisaya 40:29-31; Zaki 4:8) Lo bata nzɔ̃ du hɛ̃ azi mɛ ndo ye tingɔ akwa lo.—Yirimia 29:11; Yoanɛ 3:16.

2.  2. Hũnda Yehova ya lo za mɔ. Li sambela hɛ̃ Yehova, wa yɔ ka ti lo ya, lo za mɔ ya, mɔ zia dungɔ mbɛ ti drɔgɛ ti nɛngɔ ya mɔ ti [vuruni].” (Roma 12:1) Na lége ti Nyingɔ vuru tɛ lo, bere ngunu mɛ lo ndo li na kwa, lo na hɛ̃ngɔ mɔ “ngunu mɛ aɔ.” (2 Kɔrinto 4:7; Luka 11:13) Ngunu ni na zangɔ mɔ ya, mɔ zia nyɔngɔ drɔgɛ, wa mɔ mu “ du ti fãnani ” mɛ amangbi na se bɛ Nzapa.—Kɔlosɛ 3:9, 10.

3.  3. Li ya bingangɔ li tɛ mɔ amangbi na tɛ Nzapa. (Yisaya 55:9) Nzapa na zangɔ mɔ ya, “mɔ gbinyangbi dangɔ bɛ tɛ mɔ ti nɛngɔ ya, amangbi na dangɔ bɛ tɛ lo,” afa gbinyangbingɔ se tɛ mɔ ti bingangɔ li, ni na zangɔ mɔ ya, mɔ lo ka gbɛ mbɛ ti drɔgɛ mɔ si. Efɛzɛ 4:23) Dangɔ bɛ tɛ Nzapa kaya Ngbangɔ; adu nvɛ̃ni ngbondoni ya, e ndo di Ngbangɔ ngoi zu. (Nzembo 1:1-3) Azi gba ndo hũ nzɔ̃ni ya, aza ani ti nɛngɔ ya ani hĩnga Ngbangɔ nzɔ̃ni. (Awa Pangɔ Kwa 8:30, 31) Atɛmwɛ tɛ Yehova ndo manda na azi Ngbangɔ gɛgɛrɛ. E yɔ ka ti mɔ ya, mɔ ga bombi tɛ e ndo mɛ e ndo manda ye mɛ Ngbangɔ ndo hã, nga se mɛ elengbi ti kpãngɔ awangɔ ni na kwa naya dungɔ lɛ ngɛ̃́ tɛ e.

4.  4. Pɔna nzɔ̃ni akwa mɔ. Akwa mɔ lengbi ti hɛ̃ngɔ mɔ awangɔ ti nzɔ̃ni bere ti siɔni na ngoi mɛ mɔ ndo li ge ge ge ti nɛngɔ ya, mɔ zia nyɔngɔ drɔgɛ. (Masese 13:20) Nzapa na hɛ̃ngɔ mɔ akwa ti nzɔ̃ni ka popo tɛ azi mɛ ndo vɔrɔ lo, wa ala na lingɔ ya mɔ ma tɛrɛ mɔ nzɔ̃ni. (Nzembo 119:63; Roma 1:12) Pɔna nzɔ̃ni awele mɛ mɔ ye lengɔ, ma sangã ma, mɔ na lekisangɔ ngoi gba ndoni kɔi na akwa mɔ mɛ ala ndo ye bangɔ, ndo ye mangɔ, nga na dingɔ aye mɛ mɔ ndo ye. Zia lingɔ ye zu mɛ na gbanzingɔ mɔ ya, mɔ zia lingɔ aye ti nzɔ̃ni.—Nzembo 101:3; Amosa 5:14.

 Filipɛ 4:13: “Na ya kpale zu, mbi ndo lua ngunu na lisalisi tɛ Nzapa, zo mɛ ndo hɛ̃ mbi ngunu.”

 “Mbi hĩnga ya, ta mbi na kokangɔ ziangɔ drɔgɛ na ngunu tɛ mbi nvɛ̃ni ma, ni la mbi lindó sambela hɛ̃ Yehova ya lo za mbi. Wa lo hɛ̃ndó mbi ngunu mɛ mbi na gwɛ̃ ni.”

 Adundó Joseph Ehrenbogen ka kɔdɔrɔ mɛ ando li mobulu ka da gba.Lo tindó mbɛ ti samba, ti nyɔngɔ manga, nga ti nyɔngɔ bangɛ. Ngoi zu, mbi ndo yɔndó ni gba ti nɛngɔ ya, mbi wala kwá ni kpi. Lo di ndó vɛrse kɔi ti ya Ngbangɔ mɛ gbɔ̃ bɛ lo, mɛ ayɔ ya lo gbinyangbi dungɔ lɛ ngɛ̃́ tɛ lo. Di tɛnɛ ti dungɔ lɛ ngɛ̃́ tɛ lo kaya artiklɛ mɛ “Mbi manda tɔndɔngɔ awali nga tɔndɔngɔ tɛrɛ mbi nvɛ̃ni.”

 Ge ge ge mɛndó Dmitry Korshunov ndo li ti nɛngɔ ya, lo zia nyɔngɔ samba ko, ngoi gba lo ndo dirindó ndo mɔmɛsɛnɔ tɛ lo ti gã ti nyɔngɔ samba. Ba video ta mbi ndo koka ndó gbengɔ bɛ mbi na ndo se ti dungɔ lɛ ngɛ̃́ tɛ mbi ma, wa hũ ye mɛ za lo ya lo nwɔ dungɔ mbɛ ti drɔgɛ.

 Ipɔ. Ngbangɔ ye ni: “Ta azi mɛ na sãte ti nzɔ̃ni ndo du na gwɛ̃ tɛ mɔnganga ma, kanda azi mɛ tɛrɛ la ndo sɔ la ndo du na gwɛ̃ tɛ mɔnganga.” (Matie 9:12 WNT) Kwɛ kɔi, kalasi kɔi ti américain mɛ ndo ba kpale ti drɔgɛ tɛnɛ ya: “Dungɔ mbɛ ti drɔgɛ adu siɔni, wa ziangɔ ni ndo yɔ ya zo du na bingangɔ li, nga na dangɔ bɛ ti nzɔ̃ni.” Ni du bɛta tɛnɛ, wangɔ mɛ Yehova ndo hɛ̃ e adu nzɔ̃ni nvɛ̃ni ɔngɔ dangɔ da bɛ tɛ zo. Kanda, azi gba ko la Ngbangɔ za la ya, ala lo ka gbɛ mbɛ ti drɔgɛ si ko, ala nga na gwɛ̃ tɛ mɔnganga. c Kpale mɛndó asi na Allen la. Lo ndo dandó bɛ lo na ngoi mɛndó lo ndo gi ya, ni zia nyɔngɔ samba, lo mandó tɛrɛ lo siɔni nvɛ̃ni se ta lo nyɔ samba ma. Mbi hũndó ya mbi na gwɛ̃ ti lisalisi tɛ mɔnganga nga ma se mɛ mbi ndo du na gwɛ̃ ya ayata za mbi na ya tɛnɛ ti ya Ngbangɔ.”

 Ipɔ. Kutu, Ngbangɔ tɛnɛ tɛnɛ ti samba mabere yɔrɔ ti salangɔ na tɛrɛ, bere zungɔ na pɛnɔ tɛ zo mɛ longa kpi. (Masese 31:6; 1 Timɔte 5:23) Adu bɛta ni ya, zo lengbi ti salelangɔ samba, bere drɔgɛ ti nɛngɔ ya azu na pɛnɔ ka tɛrɛ lo, kanda ni lengbi ti singɔ na akpale gba, mabere tingɔ mbɛ ti samba, bere drɔgɛ. Ni ayɔ ya, mɔ hĩnga kpengba kpale mɛ na singɔ, wa mɔ du na kpengba lɛ na ngoi mɛ mɔ ndo salela ni mabere yɔrɔ.—Masese 22:3.