Ye mɛ ndo ga na ya bingangɔ li tɛ mɔ na ngoi mɛ mɔ ndo ma tɛnɛ mɛ “wɛngɔ ti gigi” nɛ? Na ngoi mɛndɛ̃ mɔ ndo da bɛ mɔ ya, adu kota pɛnɔ mɛ na kpɔngɔ azi zu ge lɛ gigi. Na ngoi mɛ ala ndo ma tɛnɛ mɛ ndo ɔ kaya televiziɔ̃, aradio nga na omɛ ala ndo di kaya ambeti ko, azi mɛndɛ̃ ndo da bɛ la ya, angbã yakere kpale niko ali tɛrɛ lo. Ala ndo di atɛnɛ ngama omɛ:

•   “To ti nucléaire na bandangɔ mbala kɔi, zangangɔ ya, azi hĩnga ni, na lo mɛ ya, ta azi ndo mangbi ma.” Bulletin of the Atomic Scientists.

•   “Na ya bulu 10 mɛ alo ti ɔngɔ ko, aye nga ma, ayá ti kpengbani, gbíngɔ ti ngɔngɔ, zangangɔ ngu, gbɛ̃ngɔ ti atɛ, gbingɔ ti kpengbani nga na sĩngɔ ti ngu, akpale niko zu agbɛ̃ lɛ sese nvɛ̃ni—National Geographic.

•   “Ali ndɛ abulu gba, akalagba ndo gbɛ̃ tɛ ti yaka ka Afrika.”— The Associated Press.

 Afa ya, lɛ gigi mɛ na gbɛ̃ngɔ na ndo aye niko zu? Ngbangɔ pa ya nɛ?

 Ipɔ. Ngbangɔ mɛ Tɛnɛ tɛ Nzapa , ndo zu na bɛ e ya, ta sese mɛ na gbɛ̃ngɔ ti bwai na bwai ma. (Mos 1:4) Ta Nzapa na gbɛ̃ngɔ lɛ sese mɛndó lo lɛkɛ ni ma, kanda lo “na kpɔngɔ azi mɛ ndo gbɛ̃ lɛ sese” ni.—Suma 11:18.

 Na ngoi mɛndɛ̃, Ngbangɔ ndo salela tɛnɛ mɛ “sese” so fangɔ azi mɛ ta ala ndo tɔndɔ Nzapa ma, wa azi ni ndo gi bo nzɔ̃ kpale tɛ la nvɛ̃ni. Nga ma se mɛ lo lindó na ni na ngoi tɛ Noa ko, Nzapa nga na gbɛ̃ngɔ “lɛ sese mɛ ta ndo tɔndɔ lo ma.”—2 Petro 2:5; 3:7.

 Mbeti ti 1 Yoanɛ 2:17 apa ya, “sese olo na wɛngɔ, ko aye ti lɛ sese zu mɛ azi ndo du na gwɛ̃ ni nga na wɛngɔ.” Vɛrse mɛ ndo fa ya, ta Nzapa na gbɛ̃ngɔ lɛ sese ma, kanda lo na gbɛ̃ngɔ asiɔ azi mɛ ta ala ndo tɔndɔ lo ma.

 Ta Ngbangɔ kambisa hɛ̃ e bi mɛ Nzapa kpã ti gbɛ̃ngɔ lɛ sese mɛ ma. (Matie 24:36) Kanda ni kambisa aye mɛ afa ya, nda gi gi mɛ adɛ dã ti wɛngɔ. Ngbangɔ pa ya:

•   To na tiringɔ tɛrɛ lo, gwɛ̃ na yangɔ ka ndo lɛ sese zu, angã na dungɔ ndɛ̃ ndɛ̃ ndɛ̃, wa sese nga na yengingɔ na “ndo ndɛ̃ ndɛ̃ ndɛ̃.”—Matie 24:3, 7, 14; Luka 21:10, 11; Suma 6:1-8.

•   Azi gba na gingɔ bo nzɔ̃ kpale tɛ la nvɛ̃ni. Na ndakisa, azi na dungɔ azi mɛ na “gwɛ̃ falanga,” “azi mɛ ta ahĩnga gbanda nzɔ̃ lo mɛ afɔ̃ la li tɛrɛ la ma,” nga“azi mɛ ta ndo fɔ̃ bɛ la ma.”—2 Timɔte 3:1-5.

 Bandangɔ na 1914 ko, Azi gba aye ya, kpale ti lɛ sese ndo li tɛrɛ lo ngama se mɛ Ngbangɔ tɛnɛ na ni na lo ti ndangba bi. Ti nɛngɔ ya mɔ hĩnga akpale mɛndɛ̃ mɛ aba ndangba bi ko, ba tɛnɛ mɛ “Badati ya Biblia emonisi nini mpo na mobu 1914?” nga na bɛ li tɛnɛ mɛ “Elembo ya ‘mikolo ya nsuka,’ bere ‘ntango ya nsuka’ ezali nini’?”

 Kaya Ngbangɔ tɛnɛ ti Grɛkɛ mɛ agbinyangbi ni na “suma” afa “kambisangɔ nda tɛnɛ mɛ ta azi ahĩnga ma” bere “singɔ na nda tɛnɛ kɔi mɛ aɔndɛ ni ɔndɛngɔ.” Fãni gba, agbinyangbi tɛnɛ ni na, singɔ na tɛnɛ kɔi mɛ ɔndɛ ni ɔndɛngɔ yangondo. Ngbangɔ di tɛnɛ ya ‘Suma tɛ Gbia tɛ e Yezo,’ omɛ ndo fa ya, Yezo na ngunu ti onzingɔ apɛnɔ zu nga hɛ̃ngɔ mbana gɛrɛ na azi mɛ ndo tɔndɔ Nzapa.—2 Tɛsalɔnikɛ 1:6, 7; 1 Petro 1:7, 13.

 Ando ili mbeti ti ndani ti Ngbangɔ ya Apokalupsis, bere Suma, na lo mɛ ya, ni kambisa akpale mɛ na lingɔ tɛrɛ lo na bi mɛ na gangɔ. (Suma 1:1) Mbeti ni na anzɔ̃ kapa nga na apandɛ ti kpãngɔ bɛ na ndoni. (Suma 1:3) Ni kambisa ya, Nzapa na onzingɔ akpale zu mɛ azanga mbilimbili wa lo nga na gbinyangbingɔ lɛ sese mɛ na tingɔ Paradizo. Na ngoi ni ko gbanda ko, ta azi na hũngɔ pɛnɔ ma, ta ala nga na kpilingɔ ma—Suma 21:3, 4.

 Mɔ na yengɔ mandangɔ nga hĩngangɔ anzɔ̃ kapa mɛ kaya Ngbangɔ? Atɛmwɛ tɛ Yehova ndo ha na azi Ngbangɔ gɛgɛrɛ mɛ ni lengbi nga ti zangɔ mɔ. Nda mɛ ta mɔ lengbi ti ilingɔ Atɛmwɛ tɛ Yehova ya, ala manda na mɔ Ngbangɔ ma nɛ?