Na ndo lɛ gigi zu, e na azi bere 70 miliɔ̃ mɛ ala du abábá, wa gba ka popo tɛ ala ndo tɛnɛ tɛnɛ na lége ti yanga ti jɛstɛ ɔngɔ 200. Kpale ti vundu du ya, azi ndo hɛ̃ abábá pɛnɔ ndɛ gba. Ba ambanga aye mɛ afa ni:

•   “Na ndo lɛ gigi zu, ta azi ndo tɔndɔ droit tɛ azi mɛ abábá ma.”—Bombi tɛ abábá ti ndo lɛ gigi zu (État-unis).

•   “Abábá mɛ ndo du ka gbata (ville) ko, ala ndo du nvɛ̃ni awa yɛrɛ, ando du pɛnɔ ya, ala li kalasi, ala lua kwa, bere ala ndo ma nga tɛnɛ ti akpale mɛ ndo ɔ so ya kɔdɔrɔ.”—Linɔ mɛ ndo ba kpale tɛ abábá ti ndo lɛ gigi zu.

 Nzapa ndo ba azi mɛ abábá ngasia? Tɛnɛ mɛ Ngbangɔ tɛnɛ na lo ti dungɔ bábá nɛ? Ngasia la Atɛmwɛ tɛ Yehova ndo za abábá ndɛ nɛ?

Se mɛ Nzapa ndo ba na abábá

 Ngbangɔ tɛnɛ yangondo ya, Yehova a Nzapa ndo kpã lɛ lo ndo na azi mɛ abábá. Lo ye ya, ando li kpale tɛrɛ la na ndenge ti nzɔ̃ni, wa ala lua nga anzɔ̃ kpale ti hangɔ lo mɛ lo ndo ha na azi zu.

 Vɛrse: “Ta mɔ lengbi ti dɛngɔ ba hɛ̃ zo mɛ ta lo ndo ma ndo ma.”​—Balevi 19:14.

 Vɛrse: “Ta Nzapa ndo pɔna lɛ azi ma.”—Awa Pangɔ Kwa 10:34, NWT.

 Vɛrse: ‘Yezo gwe na ndo kɔdɔrɔ zu. . . , lo pa nzɔ̃ pa ti Lo-lengɔ Gbia tɛ Nzapa.’​—Matie 9:35.

 Vɛrse: Yezo sarandó ‘awa kpua, ala ma ndo, wa abuburu atɛnɛ nga tɛnɛ.’—Marko 7:37.

 Vɛrse: “Ma azi mɛ ta ala ndo ma ndo ma na zingɔ.”—Yisaya 35:5.

 Alengbi na nɛ? Yehova kokapa ya, ma abábá na zingɔ, wa la na mangɔ ndo.—Yisaya 29:18.

Atɛmwɛ tɛ Yehova ndo za abábá ndɛ ngasia

 Atɛmwɛ tɛ Yehova ndo pa nzɔ̃ pa ti nzɔ̃ dangɔ bɛ hɛ̃ abábá ti ndo lɛ gigi zu. Aye mɛ e ndo li ti nɛngɔ ya, e pa hɛ̃ la nzɔ̃ pa ni nɛ? E ndo si na Ngbangɔ nga na avideo ti mandangɔ Ngbangɔ na yanga tɛ abábá na yanga ɔngɔ 100. E ndo manda nga na ala Ngbangɔ na yanga tɛ la, wa e ndo li nga abombi na yanga ni. E ndo li aye niko zu gɛgɛrɛ. Na lo nɛ? Yezo pandó ya: ‘Ahɛ̃ ĩ ni gɛgɛrɛ, ĩ hɛ̃ nga ni hɛ̃ azi gɛgɛrɛ.”—Matie 10:8.

 Mɔ lengbi ti hũngɔ aye niko se mɔ li kaya site bere application mɛ:

 JW.ORG. Pɛtɛ na ndo mɛ asu ayanga, ti nɛngɔ ya, mɔ hũ aye mɛ e si na ni na yanga tɛ abábá.

 Application JW Library Sign Language. Mu application mɛ gɛgɛrɛ ti nɛngɔ ya, mɔ ba bere mɔ mu avideo mɛ e si na ni na yanga tɛ abábá.

Aye mɛ e si na ni so hangɔ na abábá tɛnɛ tɛ Nzapa

 Ngbangɔ na yanga tɛ abábá. Ngbangɔ—Libongoli ya Mokili ya Sika, adu Ngbangɔ ti uzu mɛndó asi na ni na mobimba na yanga tɛ abábá ti Anglais. Ndɛ lo mɛ ko, elengbi ti luangɔ Ngbangɔ Libongoli ya Mokili ya Sika na eteni bere na mobimba ni na yanga tɛ abábá, wa e ndo si na ni bulu zu. (Ti nɛngɔ ya, mɔ hũ ayanga ni bere mɔ ba nga avideo ko, ba ãkadre “ Ngbangɔ—Libongoli ya Mokili ya Sika na yanga tɛ abábá.”)

•   Ba video La Traduction du monde nouveau en entier est maintenant disponible en langue des signes américaine ti nɛngɔ ya, mɔ hĩnga kwa mɛ e li so singɔ na Ngbangɔ niko.

•   Mu application JW Library Sign Language. Application niko na zangɔ mɔ ya, mɔ di verse kɔi na yanga tɛ abábá.

•   Dmytro ná Vita adu azi mɛ ta ala ndo ma ndo ma, kanda ala na ayangambi mɛ ndo ma ndo. Ba se mɛ ala lua anzɔ̃ kpale gba na bangɔ avideo ti Ngbangɔ na yanga tɛ abábá.

 Avideo mɛ za azi ya, ala hĩnga tɛnɛ ti Ngbangɔ. Atɛmwɛ tɛ Yehova asi na avideo mɛ aza azi gba mɛ ta ala ndo ma ndo ma ya, ala gbɔ̃ nda wangɔ ti ya Ngbangɔ, wa ala kpã ni na kwa na ya kpale mɛ . . .

•   Libala ná ndasewa

•   Apalanga ná akangba

•   Ayangambi

 Mandangɔ na zo Ngbangɔ. Manda tɛnɛ ti ya Ngbangɔ na ngoi mɛ bɛ mɔ ye na yanga tɛ abábá, zo kɔi na zangɔ mɔ ya, mɔ manda ni. Ba se mɛ ni ndo li tɛrɛ lo.

 Jeson Senajonon ndo du ka Philippines. Ba se mɛ mandangɔ Ngbangɔ mɛ e ndo li ni ndoni kɔi na azi, aza ala ya, ala ti na mangbi ti kpengbani na Nzapa.

 Mario Antúnez pastɛrɛ ka Honduras. Ba se mɛndó lo lua gbinya ti ya Ngbangɔ na ndo hũnda mɛndó lo ndo hũnda na tɛrɛ lo. Ba pandɛ ti dungɔ lɛ ngɛ̃́ tɛ lo “Nazalaki na mituna mingi kasi ezangaki biyano.”

 Abombi nga na akota bombi. E na abombi nga na agrupɛ ti bombi ti yanga tɛ abábá na ndo lɛ gigi zu, ndo mɛ ala ndo tengbi pɔsɔ zu so vɔrɔngɔ Nzapa. Bulu zu, e ndo li kãpanyɛ ti kotani so fangɔ tɛnɛ na azi mɛ ta ala ndo tɛnɛ tɛnɛ ma. Ka kota bombi nga na abombi tɛ e ko, e ndo za azi mɛ abábá nga awa ziba ya, ala gbɔ̃ nda tɛnɛ mɛ ndo ha. E ndo si nga na mbeti na lo tɛ azi mɛ ta ala ndo hũ ndo ma.

•   Gi bombi mɛ so dã na mɔ.

•   Gi hĩngangɔ akpale na ndo akota bombi mɛ e ndo li bulu zu.

•   Ga bombi ti dangɔ bɛ na bi ti kwa tɛ Yezo, bombi mɛ ngbondoni nvɛ̃ni na lo tɛ e na ya bulu.

 José Luis Ayala ndo du ka Mexique. Adũndó lo bábá, na gesi, lo tindó wa ziba. Ba se mɛ lo manda tingɔ zo mɛ ahĩnga hangɔ tɛnɛ nzɔ̃ni.