Na bulu ti 2024 na ya akɔdɔrɔ gba ti ndo lɛ gigi azi na lingɔ vɔ̃ti so pɔnangɔ zo mɛ ala ye ya lo du gbia tɛ ala. Abɛse ngaso ko, ta azi gba ndo kpã bɛ ala ndo azi niko ti politikɛ ma.

•   Alindó ãkɛte kɔi na 19/9/2023 ka kɔdɔrɔ ti États-Unis, wa azi ti kɔdɔrɔ niko tɛnɛndó ya “azi gba ti politikɛ ndo gi bo nzɔ̃ kpale tɛ ala nvɛ̃ni” na selɛ gingɔ nzɔ̃ kpale tɛ azi mɛ ala ndo le gbia ndo ala. a—Pew Research Center.

 Ta apalanga gba ndo kpã bɛ ala ndo azi ti politikɛ ma.

•   “Apalanga mɛ ndo tɛnɛ ya ani na gwɛ̃ ti lɛkɛngɔ akpale gba ti siɔni ti kɔdɔrɔ ko, ta ala ndo kpã bɛ ala ndo aza ti politikɛ ma.”—The New York Times, 29/01/2024.

•   “Na bangɔ ãkɛte kɔi, apalanga ndo kpã bɛ ala gba ndo azi mɛ ndo li avideo ka Youtube na selɛ kpãngɔ bɛ ala ndo azi ti politikɛ.”—The Korea Times, 22/01/2024.

 Elengbi ti kpãngɔ bɛ e ndo kapa mɛ azi ti politikɛ ndo ko ya ala na lingɔ aye ti nzɔ̃ni na ndo bi mɛ na gangɔ? Zo mɛ elengbi nvɛ̃ni ti kpãngɔ bɛ e ndo lo na?

 Adu ye ti ndara ya ta mɔ kpã bɛ mɔ ndo azi zu ma. Ngbangɔ tɛnɛ ya “Zo mɛ zanga kɔdɛ ndo ye atɛnɛ zu, kanda zo mɛ na kpengba lɛ ndo binga li lo uzu ti lingɔ ye kɔi.”—Masese 14:15.

•   Ti nɛngɔ ya mɔ hĩnga bere tɛnɛ kɔi mɛ atɛnɛ hɛ̃ mɔ adu nvɛ̃nɛ bere adu tɛnɛ mɛ mɔ lengbi ti kpãngɔ bɛ mɔ ndoni ko, di bɛli tɛnɛ mɛ “Ngasia la mbi lengbi ti batangɔ tɛrɛ mbi na tɛnɛ ti nvɛ̃nɛ nɛ.”

 Hãngɔ ni zingɔ, abɛse azi ti politikɛ mɛ ala mbilimbili wa ala nga na dangɔ bɛ ti nzɔ̃ni ko, ta ala ndo du na likoki ti lingɔ aye zu mɛ ala ndo du na gwɛ̃ ni ma. Ni la Ngbangɔ tɛnɛ ya:

•   “Ta ĩ kpã bɛ ĩ hɛ̃ agbia bere aya zi ma, na lo mɛ ya ta ala lengbi ti hɛ̃ngɔ dungɔ lɛ ngɛ̃́ ma.”—Nzembo 146:3.

 Ngbangɔ kambisa ya Nzapa kpã gbia mɛ lo na ngunu wa elengbi nga ti kpãngɔ bɛ e ndo lo, gbia ni du: Yezo Kristo. (Luka 1:32, 33) Yezo du Gbia ti Lo-lengɔ Gbia tɛ Nzapa mɛ na dungɔ ka ndozu wa ni na lengɔ gbia ge lɛ sese.—Matie 6:10.

•   Ti nɛngɔ ya mɔ manda hĩngangɔ nda mɛ mɔ lengbi ti kpãngɔ bɛ mɔ ndo Yezo nga na ndo aye zu mɛ lo na lingɔ so onzingɔ akpale ti pɛnɔ mɛ e ndo tengbi na ni ko, di bɛli tɛnɛ mɛ “Nani azali Mokonzi ya Bokonzi ya Nzambe?” nga na “Bokonzi ya Nzambe ekosala makambo nini?”