Na bi kwa kɔi, bi nzɛ ti 06/02/2023 ko, yengingɔ ti sese ti kpengbani ali tɛrɛ lo ka kɔdɔrɔ ti Turquie ná ti Syrie.

•   “Na bi kwa kɔi, yengingɔ ti sese ti kpengbani agbɛ̃ ambanga ndo ti kɔdɔrɔ ti Turquie nga na ti Syrie, ni li ya, azi ɔngɔ 3 700 akpili. Ni li tɛrɛ lo na ngoi mɛ dé ndo ya kpengbani nvɛ̃ni kaya akɔdɔrɔ niko, dé niko adi kpã dungɔ lɛ ngɛ̃́ tɛ azi mɛ da tɛ la agbɛ̃ bere ala hɔ̃ kã na lo ti yengingɔ ti sese na ya kaka ti kpengbani. Ni li nga ya, adu pɛnɔ gingɔ azi mɛ aso kwá na lo ti yengingɔ ti sese ni.”​—Reuters 06/02/2023.

 E ndo ma vundu ti kpengbani na ngoi mɛ e ndo ma atɛnɛ ti ngaso. Na ya angoi ti ngaso ko, elengbi ti kpãngɔ bɛ e ka tɛ Yehova mɛ lo du “Nzapa mɛ ndo sa nguru bɛ azi ngoi zu.” (2 Kɔrinto 1:3) Lo ndo ‘sa ngunu bɛ e na lége ti Tɛnɛ tɛ lo, ti nɛngɔ ya, e du na nzɔ̃ dangɔ bɛ.’​—Roma 15:4.

 Ngbangɔ kambisa hɛ̃ e:

•   Akpale mɛndó Ngbangɔ pia tɛnɛ na lo ti yengingɔ ti sese.

•   Ye mɛ lengbi ti wambangɔ bɛ e, nga na ndo mɛ elengbi ti luangɔ nzɔ̃ dangɔ bɛ.

•   Se mɛ Nzapa na onzingɔ na pɛnɔ.

 Ti nɛngɔ ya, mɔ hĩnga tɛnɛ mɛ Ngbangɔ tɛnɛ na lo ti akpale niko ko, di abɛli tɛnɛ mɛ:

•   “Les grands tremblements de terre: Qu’a prédit la Bible ?”

•   “L’espoir: Où le trouver ?”

•   “Etikali moke Nzambe asilisa bampasi nyonso”