Na bi nzɛ ti 19/05/2022, azi ti ndima ti ya Conseil de sécurité des Nations unies ɔngɔ 75 atɛnɛ ya: “zangangɔ tɛ ti tɛngɔ na ndo lɛ gigi zu mɛ alo na ndo siɔ ngã ti covid-19 nga na gbinyangbingɔ ti klima adi ti kpengbani nvɛ̃ni na ndo lɛ gigi zu na lo ti to mɛ ndo tiri ka Ukraine, ni lengbi ti lingɔ ya, kpengba gwɛ̃ aya na ya akɔdɔrɔ mɛndɛ̃.” Ngoi yakere so pɛ ni, Azi mɛ ndo ba kpale ti ekɔnɔmi atɛnɛ ya: “to ndo bakisa pɛnɔ na ndo pɛnɔ tɛ azi, na ya gigi mɛ ti pɛnɔ mɛ asĩ na akpengba akpale, ni ndo li ya, azi gba azanga tɛ ti tɛngɔ.” Ngbangɔ piandó tɛnɛ ya, zangangɔ tɛ ti tɛngɔ na lingɔ tɛrɛ lo na ngoi tɛ e, kanda ni tɛnɛ nga tɛnɛ ti aye mɛ alengbi ti zangɔ e ya, e gbe bɛ e na ya kpale niko.

•    Yezo pandó ya: “Azi ti mbanga kɔdɔrɔ na afɔ̃ la ti kɔdɔrɔ mɛndɛ̃ atiri gbanda to, ambanga agbia abi gbanda to tɛrɛ afɔ̃ la. Gwɛ̃ aya nga gbanda.”​—Matie 24:7.

•    Mbeti ti Suma tɛnɛ tɛnɛ tɛ akɔli siɔ ti yika yika mɛ ala ndo kpɛ na punda. Kɔi ka popo tɛ awa kpɛngɔ na punda niko ndo fa to. O mɛndɛ̃ mɛ ndo landa lo, ando fa gwɛ̃, luangɔ tɛ ti tɛngɔ na dungɔ kpengbani, wa azi na vɔ̃ngɔ ni na ngele mɛ aɔ maka. “Mbi ba ndo, ko mbi hũ [punda] mɛ tɛrɛ lo vukɔni, wa kpɛngɔ na [punda] ni agbɔ̃ kilo so ti lo. Mbi ma ye nga ma legɔ̃ zo . . . Apa ya, ‘Ngere ti kilo ti le tɛ mɛ ili ni la ble alengbi na falanga mɛ andofuta na zo na lo ti kwa tɛ lo ti lá kɔi zu. Ngere ti kilo [taa] ti le tɛ mɛ ili ni la ɔrgɛ alengbi na falanga mɛ andofuta na zo na lo ti kwa tɛ lo ti lá kɔi zu.’”​—Suma 6:5, 6.

 Aprɔfesi ti ya Ngbangɔ mɛ aba zangangɔ tɛ ti tɛngɔ ko, ando ti ndɛ na seni na ya ngoi mɛ e da mɛ Ngbangɔ ndo ili ni ya, ‘ndangba bi.’ (2 Timote 3:1) Ti nɛngɔ ya, mɔ hĩnga akpale gba na ndo ‘ndangba bi’ nga na lo tɛ awa kpɛngɔ na punda siɔ mɛ mbeti ti Suma tɛnɛ tɛnɛ tɛ la ko, ba video Mokili ebongwani banda na mobu 1914 wa di nga bɛli tɛnɛ mɛ: “Batambwisi-mpunda minei yango bazali banani?”

•    Ngbangɔ na awangɔ ti nzɔ̃ni mɛ alengbi ti zangɔ e ya, e gbe bɛ e na ya ngoi ti pɛnɔ, zangangɔ tɛ ti tɛngɔ nga na mangɔ ti ngele ti aye ti tɛngɔ. Ba ambanga wangɔ ni kaya bɛli tɛnɛ mɛ: “Okosala nini soki ozali lisusu na mbongo mingi te?”

•    Ngbangɔ ko nga kapa hɛ̃ e ya, akpale na dɛ̃ngɔ. Ni ko kapa ya, la kɔi ngbanda ko, “ale tɛ ti tɛngɔ na dungɔ mawoma ge lɛ sese” wa azi zu na tɛngɔ ye na ndenge ti nzɔ̃ni. (Nzembo 72:16) Ti nɛngɔ ya, mɔ hĩnga akpale gba na ndo akapa ti ya Ngbangɔ na lo ti bi mɛ na gangɔ nga na nda mɛ mɔ lengbi ti kpãngɔ bɛ mɔ na ndo ni ko, di tɛnɛ mɛ: “Elikya ya solosolo mpo na mikolo ezali koya.”