Azi ti ONU ahɛ̃ rapɔrt mɛ:

•   Bandangɔ na bi ti 7 tee bi ti 23 nzɛ ti 10/2023 ko, to mɛ ka popo tɛ azi ti Israele ná Gaza ali ya, azi 6 400 akpili wa ni li nga ya, azi 15 200 atengbi na akpengba lo, gba ni ka popo tɛ la adu azi mɛ ta ala asoda ma (asivile). Hãngɔ ni zingɔ, amiliɔ̃ tɛ azi kpɛlɛ kɔdɔrɔ tɛ ala.

•   Na bi nzɛ ti 24/2023, to mɛ ka popo tɛ azi ti Russie ná Ukraine ali ya, asivile 9 701 akpili wa 17 748 a hɔ̃ kã ka kɔdɔrɔ niko ti Ukraine.

 Nzɔ̃ dangɔ bɛ mɛ Ngbangɔ hɛ̃ na lo tɛ azi mɛ ndo hũ pɛnɔ na lo ti to nɛ?

 Ngbangɔ ko kapa ya, “Nzapa na onzingɔ to zu ge lɛ sese.” (Nzembo 46:9) Ti nɛngɔ ya lo li niko, Nzapa na salelangɔ guvɛrnɛma bere Lo-lengɔ Gbia ti ndozu mɛ na mungɔ pɛnda aguvɛrnɛma zu tɛ azi. (Danyele 2:44) Lo-lengɔ Gbia tɛ Nzapa na onzingɔ pɛnɔ tɛ azi zu ge lɛ gigi.

 Ba ambanga ye mɛ Yezo, Gbia ti Lo-lengɔ Gbia tɛ Nzapa na lingɔ:

•   “Lo na zangɔ awa yɛlɛ mɛ ndo yɔ lisalisi ka ti lo, lo nga na zangɔ zo mɛ gɛgɛrɛ, nga na azi mɛ ta ala na azi ti la ma. Lo na mangɔ vundu tɛ azi mɛ azanga tina, nga na awa yɛlɛ, wa lo na batangɔ dungɔ lɛ ngɛ̃́ tɛ awa yɛlɛ. Lo na sarangɔ ala na ya kpale ti pɛnɔ ná mobulu.”—Nzembo 72:12-14.

 Nzapa na salelangɔ Lo-lengɔ Gbia tɛ lo ti nɛngɔ ya, lo onzi apɛnɔ zu mɛ to na mobulu tɛ azi asi na ni.

•   “Lo mbo gbanda ngulɛ zu ka lɛ la lo zi. Ta azi ti kpili gbanda ma, ta azi ti lɛ gbanda muã ma, ta azi ti dema gbanda tɛrɛ la ma, ta azi ti hũ nga gbanda pɛnɔ ma. Angbina ye amina nga gbanda.”—Suma 21:4.

 Angbã yakere Lo-lengɔ Gbia tɛ Nzapa na gbinyangbingɔ akpale gba ge lɛ sese. Ngbangɔ piandó tɛnɛ ya, e na mangɔ tɛnɛ mɛ aba ‘to nga na apandɛ ti to’. (Matie 24:6) Akpale mɛ nga na akpale mɛndɛ̃ zu mɛ e ndo hũ ko, ndo fa ya e na ndangba bi ti lo-lengɔ gbia tɛ azi.—2 Timɔte 3:1.