1. Ndɛ lo mɛ ko, ye mɛ azi gba ndo kpã lɛ la da nɛ?

 NGOI mɛndɛ̃ mɔ hũ ya, ndɛ lo mɛ ko azi gba ndo kpã lɛ la na ndo nzɔ̃ kpale tɛ la nvɛ̃ni, kanda ta ala ndo kpã lɛ la na ndo nzɔ̃ kpale tɛ afɔ̃ la ma? Na ndakisa, kaya sitɛ ti tɛnɛngɔ na tɛnɛ ko, azi gba ndo benda likebi na ndo ala nga na ndo aye mɛ ala ndo li na ndenge ti siɔni. Kanda ndɛ lo mɛ ko, bo azi yakere la ndo hɛ̃ Yehova Nzapa gonda. Na ya tɛnɛ mɛ e na bangɔ bere hɛ̃ngɔ Yehova gonda alengbi na nɛ nga na ye mɛ alengbi ti tongɔ e ya, e li ni. E nga na bangɔ se mɛ elengbi ti hɛ̃ngɔ Nzapa gonda mɛ alengbi na ili lo nga na se mɛ lo nvɛ̃ni na hɛ̃ngɔ ili lo gonda na bi mɛ na gangɔ.

HƐ̃NGƆ GONDA HƐ̃ YEHOVA ALENGBI NA NƐ?

2. Ngasiandó la Yehova fa gonda tɛ lo ka ndo ngomba ti Sinai nɛ? (Ba nga limɔ ti koko mbeti.)

² Hɛ̃ngɔ gonda alengbi na nɛ? Kaya Ngbangɔ tɛnɛ mɛ “gonda” ndo fa ya, Yehova du Nzapa ti kpɛ̃nɛ. Ngoi yakere na pɛ singɔ na aya Izraɛlɛ ka gbɛ mbɛ ka Ezipito ko, Yehova fandó gonda tɛ lo na ndenge ti kpɛ̃nɛ. E ba kpale mɛ, butu butu tɛ aya Izraɛlɛ abombindó tɛrɛ la ka dã na ngomba ti Sinai ti nɛngɔ ya ala ma tɛnɛ mɛ Nzapa na tɛnɛngɔ hɛ̃ la. Mbindã vĩndó ngomba niko zu, sese yengindó kpengbani wa gulu ná wá ndo londó kaya ngomba niko ndo si nga na makɛlɛlɛ ti kpengbani. (Kob. 19:16-18; 24:17; Nz. 68:8) Da bɛ mɔ na se mɛndó aya Izraɛlɛ ndo kamwa na kpale niko ti kpɛ̃nɛ na ngoi mɛndó Yehova fa ngunu ti gonda tɛ lo.

3. Hɛ̃ngɔ Yehova gonda alengbi na nɛ?

³ Wa e tɛnɛ ya nɛ na lo tɛ azi nɛ? Elengbi nvɛ̃ni  ti hɛ̃ngɔ Yehova gonda? Ĩĩ, elengbi ti lingɔ ni. Lége kɔi mɛ elengbi ti hɛ̃ngɔ Yehova gonda adu na ngoi mɛ e ndo kambisa hɛ̃ azi mɛndɛ̃ ngunu tɛ lo ti kamwangɔ nga na aseliye tɛ lo ti sangɔ ngunu bɛ. E ndo hɛ̃ lo gonda na ngoi mɛ lo ndo za e na ya kpale zu mɛ e ndo li. (Yis. 26:12) Gbia Davidi dundó se lɛlo kɔi ti nzɔ̃ni na omɛ ba hɛ̃ngɔ Yehova gonda. Ka gbɛlɛ aya Izraɛlɛ Davidi tɛnɛndó hɛ̃ Nzapa kaya sambela tɛ lo ya: “Ee Yehova kɔnɔngɔ, ngunu, dɛ̃ngɔ, gonda nga na ndima alo ka tɛ mɔ, na lo mɛ ya aye zu mɛ ka ndozu nga ge sese adu tɛ mɔ.” Na gesi Davidi kɔnda sambela tɛ lo na tɛnɛngɔ hɛ̃ aya Izraɛlɛ ya: “Na olo ĩ zu ĩ gonda Yehova Nzapa tɛ ĩ.”​—1 Nt. 29:11, 20.

4. Yezo gondandó To lo ngasia?

⁴ Ngoi mɛndó Yezo ge lɛ sese ko, lo hɛ̃ndó To lo gonda na tɛnɛngɔ hɛ̃ azi ya, ngunu mɛ lo ndo le na kwa ti kpɛ̃nɛ ando lo ka tɛ Yehova. (Mar. 5:18-20) Yezo hɛ̃ ngandó To lo gonda na se mɛndó lo ndo tɛnɛ tɛnɛ tɛ lo hɛ̃ azi nga na se mɛndó lo ndo li na kpale tɛrɛ azi mɛndɛ̃. Lá kɔi, Yezo ndo fandó tɛnɛ ka sinagoga, wa ka popo tɛ azi mɛndó ndo ma lo ko, wali kɔi mɛndó siɔ nyingɔ ndo gia lo ali bulu 18 nga so ndo ko. Siɔ nyingɔ niko ngondó ngɔngɔ lo wa ta lo ndo kokandó yangɔ tɛrɛ lo ma, ni dundó kpale ti pɛnɔ nvɛ̃ni. Na vundu zu Yezo dɔndó dã na wali niko, wa lo pandó hɛ̃ lo na zungɔ na tɛrɛ zu ya: “Wali, mɔ na songɔ na ya ngã tɛ mɔ.” Lo kpã ngandó ti lo ka ndo lo wa mbala kɔi ngɔngɔ wali niko londó mbilimbili wa lo banda ngandó “gondangɔ Nzapa,” sãte tɛ lo ná ndima tɛ lo adirindó ti nzɔ̃ni. (Luka 13:10-13) Wali niko ndó na rɛzɔ̃ ti hɛ̃ngɔ Yehova gonda, wa elengbi nga ti lingɔ ngaso.

NDA MƐ E NDO HƐ̃ YEHOVA GONDA NƐ?

5. Ye mɛ ndo to e ya, e tɔndɔ Yehova nɛ?

⁵ E ndo hɛ̃ Yehova gonda na lo mɛ ya e ndo du na tɔndɔngɔ ti kpengbani na mbage tɛ lo. E na arɛzɔ̃ gba ti tɔndɔngɔ lo. Yehova du nvɛ̃ ngunu zu; wa ta ngunu tɛ lo na maka ma. (Nz. 96:4-7) Lo ndo fa ndara tɛ lo yangondo na ndo aye mɛ lo li. Lo la hɛ̃ e dungɔ lɛ ngɛ̃́ nga na aye mɛ ndo li ya e du na dungɔ lɛ ngɛ̃́. (Suma 4:11) Lo du mbilimbili. (Suma 15:4) Aye zu mɛ lo ndo li ndo longa, wa lo ndo kokisa akapa tɛ lo zu. (Yos. 23:14) Ta adu ye ti kamwangɔ ma, na bangɔ tɛnɛ mɛ prɔfeta Yirimia tɛnɛ na lo tɛ Yehova: “Na lo tɛ azi zu ti ndara ti kɔdɔrɔ nga na lo-lengɔ gbia tɛ ala zu ko, ta zo kɔi lengbi na mɔ ma”! (Yir. 10:6, 7) Biani e na aye gba mɛ alengbi ti tongɔ e ya e tɔndɔ To e ti ndozu. Lo na seliye ti nzɔ̃ni mɛ ndo li ya, e ye lo gba.

6. Nda mɛ e ndo ye Yehova nɛ?

⁶ E ndo hɛ̃ Yehova gonda na lo mɛ ya e ndo ye lo gba. E ba ambanga aseliye tɛ Yehova mɛ ndo to e ya, e ye lo gba. Lo na bɛ ti vundu wa lo sĩ nga na songo ti bɛ. (Nz. 103:13; Yis. 49:15) Na ngoi ko la e tengbi na kpale mɛ ndo hɛ̃ e pɛnɔ ka bɛ e ko, lo ndo ma nga pɛnɔ ka bɛ lo. (Zek. 2: 8) Lo ndo za e ya, e hĩnga lo wa e ti nga akwa lo (Nz. 25:14; Aw. 17:27) Wa lo nga na zungɔ na tɛrɛ; “Lo ndo zu na tɛrɛ lo so bangɔ ndozu nga na lɛ sese, lo ndo ya zo mɛ zanga tina kaya butu.” (Nz. 113:6, 7) Nda mɛ ta elengbi ti yengɔ nga na gondangɔ Nzapa tɛ e ma nɛ?​—Nz. 86: 12.

7. Nzɔ̃ tangɔ li gɛrɛ mɛ e na ni nɛ?

⁷ E ndo hɛ̃ Yehova gonda na lo mɛ ya gwɛ̃ tɛ e du ya, azi mɛndɛ̃ hĩnga lo. Ta azi gba hĩnga mbilimbili mɛ aba Yehova ma. Na lo nɛ? Na lo mɛ ya Satana ndo tɛnɛ nvɛ̃nɛ na ili Yehova wa azi gba ndo ye nvɛ̃nɛ niko. (2 Kɔr. 4:4) ­Satana  ndo to azi gba hũ ya Yehova du siɔ zo, ta lo ndo ma vundu tɛ azi ma wa lo nga la ndo si na pɛnɔ ge lɛ gigi. Kanda e hĩnga mbilimbili mɛ aba Nzapa tɛ e! E na nzɔ̃ tangɔ li gɛrɛ ti zangɔ azi hĩnga ya, Nzapa du nvɛ̃ni nzɔ̃ni. (Yis. 43:10) Mbeti ti Nzembo 96 tɛnɛ tɛnɛ gba na omɛ aba gonda tɛ Yehova. Ngoi mɛ e ndo ba ambanga tɛnɛ mɛ asu kaya mbeti ti Nzembo wa e ndo gbɔ̃ nga li e na ndo se mɛ elengbi ti hɛ̃ngɔ Yehova gonda mɛ alengbi na lo.

NGASIA LA ELENGBI TI HƐ̃NGƆ YEHOVA GONDA MƐ ALENGBI NA LO NƐ?

8. Lége kɔi mɛ elengbi ti gondangɔ na Yehova nɛ? (Nzembo 96:1-3)

⁸ Di Nzembo 96:1-3. Elengbi ti gondangɔ Yehova na ngoi mɛ e ndo tɛnɛ tɛnɛ mɛ aba lo. Na ya vɛrse mɛ aili azi tɛ Yehova ya, ala ga “ye bia hɛ̃ Yehova,” ala “ gonda ili lo,” ala “pa nzɔ̃ pa ti Lo-lengɔ Gbia tɛ lo mɛ na songɔ na azi” wa ala “gonda ili lo na ya akɔdɔrɔ zu.” E na alége gba ti gondangɔ To e ti ndozu. Ta Ayuda ti mbilimbili nga na awakristo ti ngoi ti uzu ndo bingandó bɛ la na kambisangɔ hɛ̃ azi mɛndɛ̃ aye ti nzɔ̃ni mɛ Yehova li na lo tɛ ala nga na kambisangɔ ili lo ma (Da. 3:16-18; Aw. 4:29) Ngasia la elengbi nga ti lingɔ ngaso nɛ?

9-10. Ye mɛ mɔ manda na ndo kpale mɛndó asi na Angelena nɛ? (Ba nga limɔ.)

⁹ E ba kpale mɛndó si na nyita wali Angelena, a mɛ ndo du ka Etats-Unis. Na ge ge ge zu lo kambisandó ili Yehova hɛ̃ azi ka ndo mɛ lo ndo li na kwa. Ngama zo mɛ banda kwa fãnani, ailindó Angelena ka reniɔ̃ kɔi ti kwa, wa ayɔndó ka ti lo ya lo kambisa kpale ti dungɔ lɛ ngɛ̃́ tɛ lo hɛ̃ afɔ̃ lo ti kwa. Angelena lɛkɛ afoto mɛ ndo fa dungɔ lɛ ngɛ̃́ ti dengɔ bɛ mɛ lo lua ngama dungɔ Tɛmwɛ tɛ Yehova ti nɛngɔ ya ni fa na ala. Kanda bo na ngoi mɛ lo ga banda kambisangɔ kpale ti ya dungɔ lɛ ngɛ̃́ tɛ lo hɛ̃ afɔ̃ lo ko, fɔ̃ lo kɔi lo ndozu, lo banda fangɔ tɛrɛ lo ka gbɛlɛ afɔ̃ lo ya, akã ngandó ni kaya ndasewa tɛ Atɛmwɛ tɛ Yehova. Wa lo banda tɛnɛngɔ siɔni na ili Atɛmwɛ tɛ Yehova. Angelena tɛnɛ ya: “Bɛ mbi banda sɔ̃ngɔ kpengbani wa mbi banda hũndangɔ tɛrɛ mbi na ndo ya, ‘mbi lengbi ti zingɔ lége ya zo mɛndɛ̃ le nvɛ̃nɛ na ili Yehova hɛ̃ mbi? Bere mbi la lengbi ti pangɔ ili Yehova hɛ̃ngɔ lo?’”

¹⁰ Angelena li sambela iɔ ka gbɛ bɛ lo wa lo banda kambisangɔ hɛ̃ lo na zungɔ na tɛrɛ zu ya: “dungɔ lɛ ngɛ̃́ tɛ mbi ná mɔ kwɛ kɔi. Adũ ngandó mbi ka ndasewa tɛ Atɛmwɛ tɛ Yehova,  wa tee dɛ mbi dɛ bo Tɛmwɛ tɛ Yehova.” Lo mandó mbɛtɔ abɛse ngaso ko, Angelena batandó siriri tɛ lo wa lo fa ngandó afoto ti nzɔ̃ni mɛndó lo gbɔ̃ na ngoi mɛndó lo ndo le akwa ti nyingɔ ndoni kɔi ná ayata, wa na gesi lo kambisa loyengɔ tɛ lo na ndenge ti nzɔ̃ni hɛ̃ la. (1 Pet. 3:15) Ye mɛndó asi na pɛni nɛ? Na ngoi mɛ Angelena onzi tɛnɛngɔ tɛnɛ ko, fɔ̃ lo niko akai so kpɔ, wa lo di pa ya tee ndɛ lo ndo da bɛ lo na akpale ti nzɔ̃ni mɛndó lo ndo hũ ka tɛ Atɛmwɛ tɛ Yehova na ngoi mɛndó, lo dɛ gwe bombi ndoni kɔi na ala. Angelena tɛnɛ ya: “Adu nzɔ̃ni tɛnɛngɔ ili Yehova hɛ̃ azi. Adu kota ndima tɛnɛngɔ mbilimbili mɛ aba ili lo”. E nga e na kota ndima ti lingɔ kpale mɛ ndo dɛ̃ na bɛ Yehova, nga gondangɔ lo na ngoi mɛ azi mɛndɛ̃ ndo tɛnɛ siɔni na ili lo.

11. Ngasia la awa vɔrɔngɔ Yehova ti mbilimbili na ngoi ti gã landandó wangɔ mɛ kaya Nzembo 96:8 nɛ?

¹¹ Nzembo 96:8 Elengbi ti gondangɔ Yehova na aye tɛ e ti ngbondoni. (Di.) Bandangɔndó gã awa kwa tɛ Yehova ti mbilimbili ndo gondandó lo na aye tɛ la ti mi. (Mas. 3:9) Na ndakisa, aya Izraɛlɛ hɛ̃ndó aye ti nɛngɔ ya, akĩ wa abata nga na tepelo. (2 Ba. 12:4, 5; 1 Nt. 29:3-9) Na songo zu ava Yezo hɛ̃ndó aye tɛ la ti “ngbondoni” so zangɔ lo ná atoma tɛ lo. (Luka 8:1-3) Ngbangɔ pa ya, ayata kɔli ná ayata wali mɛ ndo du ka kɔdɔrɔ mɛndɛ̃ atondó falanga hɛ̃ ayata mɛ ndo hũ pɛnɔ na lo ti gwɛ̃. (Aw 11:27-29) Ndɛ lo mɛ ko, elengbi nga ti gondangɔ Yehova na aye tɛ e ti ngbondoni.

12. Ngasia la tisa mɛ e ndo hɛ̃ lengbi ti gondangɔ Yehova nɛ? (Ba nga limɔ.)

¹² E ba kpale kɔi mɛ ndo fa ya, atisa tɛ e ndo hɛ̃ Yehova gonda. Rapɔrt kɔi ti 2020 atɛnɛ tɛnɛ ti kpale kɔi mɛ kpengbani mɛndó ali tɛrɛ lo ka Zimbabwe. Amiliɔ̃ tɛ azi tengbindó na gwɛ̃ abɛse nga nyita wali mɛ ili lo la Prisca. Prisca ngbã bondó lá kwɛ fangɔ tɛnɛ na bi kwa taa nga na bi kwa kũ. Abɛse na zongo, afɔ̃ lo ti kartie ndo e ndó lo na lo mɛ ya lo pɔnandó lingɔ kwa ti fangɔ tɛnɛ, na se lɛ lungɔ yaka. Ala ndo tɛnɛndó hɛ̃ lo ya, “mɔ na kpingɔ gwɛ̃.” Prisca yendó na bɛ lo kɔi ya, ta “Yehova ndo zia awa kwa tɛ lo bɛ gbɔ ma.” Ngoi yakere so pɛni lo luandó aye mɛ linɔ tɛ e to hɛ̃ lo. Atisa mɛ e ndo hɛ̃ ndo za ti nɛngɔ ya, ahɛ̃ ayata aye ti mi na ngoi mɛ ala ndo tengbi na pɛnɔ. Afɔ̃ Prisca ti kartie kamwandó nvɛ̃ni wa ala pandó hɛ̃ lo ya, “Ta Nzapa zia mɔ bɛ yakere ma wa e ye mandangɔ kpale gba na ndo lo.” Azi mbalambala ka popo tɛ afɔ̃ lo ti kartie abandandó gwengɔ bombi.

13. Ngasia la dɔngɔ nɔ tɛ e lengbi ti hɛ̃ngɔ Yehova gonda nɛ? (Nzembo 96:9)

¹³ Di Nzembo 96:9. Dɔngɔ nɔ tɛ e lengbi ti hɛ̃ngɔ Yehova gonda. Ayɔndó ya, anganga nzapa ndo gbɔ̃ ngu wa ala du vuruni uzu ti la lingɔ kwa hɛ̃ Yehova ka tepelo. (Kob. 40:30-32) Biani, elengbi ti dungɔ vuruni na lɛkɛngɔ tɛrɛ e, kanda omɛ aɔ ngbondoni adu ya, e kɛ̃ aye zu mɛ Yehova ndo kɛ̃. (Nz. 24:3, 4; 1 Pet. 1:15, 16) Ngbangɔ pa ya, e li kpengbani e “zia ngbina du ná ngbina seliye tɛ e” mɛ afa bingangɔ li nga na dɔngɔ nɔ ti bí, wa e mu “du ti fãnani” mɛ afa bingangɔ li nga na dɔngɔ nɔ mɛ amangbi na seliye tɛ Yehova. (Kɔl. 3:9, 10) Na lége ti lisalisi tɛ Yehova abɛse azi mɛ na dɔngɔ nɔ ti siɔni nga awa kakulu lo ko, ala lengbi ti ­gbinyangbingɔ nga tingɔ na se du ti fãna ni.

14. Ye mɛ mɔ manda na ndo se lɛlo tɛ Jack nɛ? (Ba nga limɔ.)

¹⁴ E ba se lɛlo tɛ Jack, lo ndó wa kakulu lo nga siɔ zo nvɛ̃ni, wa ando ilindó lo ya, demo. Na lo ti kakulu lo tɛ lo ko, ahɛ̃ndó Jack tumbu ti lingɔ bɔlɔkɔ tee ka kwá tɛ lo. Kanda ngoi mɛndó Jack ndo kũ bi ti kwá tɛ lo ko, nyita kɔli kɔi mɛndó ndo ba ndo azi mɛ ka bɔlɔkɔ ahũndandó lo ya, ni manda na lo Ngbangɔ; wa Jack bandandó mandangɔ Ngbangɔ. Abɛse Jack ndó na dɔngɔ nɔ ti siɔni uzu ko, lo ziandó akpale niko zu wa lo kokisandó masengami ti mungɔ batisimɔ. Abɛse du ya Jack lindó kpale ti siɔni gba ko, lo gbinyandó bɛ lo wa lo mu ngandó batisimɔ lo ti Tɛmwɛ tɛ Yehova. Jack gbinyangbindó dungɔ lɛ ngɛ̃́ tɛ lo, ni la na lá mɛndó aye hongɔ lo ko, asoda tondó to wa ala pandó hɛ̃ lo ya mɔ gwe nzɔ̃ni, polisie kɔi mɛndó ndo le kwa ka bɔlɔkɔ niko tɛnɛ ya: “Jack ndó wa kakulu lo mɛ ɔ azi ti bɔlɔkɔ zu, kanda na olo lo ti nzɔ̃ zo,” pɔsɔ kɔi na pɛ hongɔ Jack ko, ayata kɔli mɛndó ndo tambwisa bombi ka da bɔlɔkɔ tengbindó na wa bɔlɔkɔ kɔi mɛ adu fãni tɛ lo ti uzu ti gwengɔ bombi. Ye mɛ ato lo ya lo gwe bombi nɛ? Lo kamwandó hũngɔ se mɛ Jack gbinyangbi na dɔngɔ nɔ tɛ lo. Wa lo ye ngandó hĩngangɔ ye mɛ lo li ti nɛngɔ ya lo ti wa kwa tɛ Yehova, biani dɔngɔ nɔ tɛ e lengbi ti hɛ̃ngɔ To e ti ndozu gonda!​—1 Pet. 2:12.

NGASIA LA YEHOVA NA HƐ̃NGƆ ILI LO NDIMA NA BI MƐ NA GANGƆ NƐ?

15. Ngasia la Yehova na hɛ̃ngɔ ili lo gonda na bi mɛ na gangɔ nɛ? (Nzembo 96:10-13)

¹⁵ Di Nzembo 96:10-13. Vɛrse ti Nzembo 96 pa ya, Yehova du wa fangɔ ngbanga ti mbilimbili  nga Gbia. Ngasia la lo na hɛ̃ngɔ ili lo ndima na bi mɛ na gangɔ nɛ? Lo na lingɔ ni na lége ti fangɔ ngbanga tɛ lo. Angbã yakere lo hɛ̃ tumbu hɛ̃ Babilɔnɛ mɛ kota kɔdɔrɔ na lo ti nvɛ̃nɛ mɛ lo ndo tɛnɛ na ili lo. (Suma 17:5, 16; 19:1, 2) Azi mɛndɛ̃ mɛ na hũngɔ gbɛ̃ngɔ ti Babilɔnɛ mɛ kota kɔdɔrɔ ko, ngoi mɛndɛ̃ ala lengbi ti gangɔ tãngɔ e kaya sambela ti mbilimbili. Na gesi na ngoi ti to ti armagedone, Yehova na gbɛ̃ngɔ akpale zu mɛ Satana si na ni, wa lo nga na hongɔ azi zu ko la ndo temela ili lo, kanda ngoi gba azi ko la ndo ye lo wa ala ndo tɔndɔ nga lo ala na dungɔ na kota ndima ti hɛ̃ngɔ lo gonda. (Mar. 8:38; 2 Tɛs. 1:6-10). Na pɛ tara ti ndani mɛ na lingɔ ya, Lo-lengɔ Gbia ti bulu koto tɛ Yezo Kristo banda ko, Yehova na hɛ̃ngɔ nvɛ̃ni ili lo gonda (Suma 20:7-10) Na ya ngoi niko ko,“ lɛ sese na sĩngɔ na hĩngangɔ ndo ti gondangɔ na ili Yehova ngama se mɛ ngu ndo sĩ na tɛ.”​—Hab. 2:14.

16. Ye mɛ mɔ mu ekateli ti lingɔ nɛ? (Ba nga limɔ.)

¹⁶ Ngama se mɛ e lo ti hũngɔ na ni, azi zu mɛ na dungɔ lɛ ngɛ̃́ na hɛ̃ngɔ Yehova gonda mɛ alengbi na ili lo! Kanda, uzu ti nɛngɔ ya bi niko lengbi ko, elengbi ti lingɔ kpengbani ya, e gonda Nzapa tɛ e na ya kpale zu mɛ e ndo tengbi na ni. Wa ni na zangɔ e ya, e kpã lɛ e na ndo kumba ti ngbondoni mɛ e na ni. Bombi tɛ adonzi pɔna Nzembo 96:8 ngama bɛli tɛnɛ tɛ e ti bulu 2025 mɛ pa ya: “Ĩ hɛ̃ Yehova ndima mɛ alengbi na ili lo.”