TƐNƐ TI MANDANGƆ 5
BIA 108 Bolingo ya sembo ya Nzambe
Se mɛ elengbi ti luangɔ nzɔ̃ kpale na ndo songo tɛ Yehova
“Kristo agandó ge lɛ sese so songɔ awa lingɔ siɔ ye.”—1 TIM. 1:15.
NA NDUNU NI
Na ya tɛnɛ mɛ e na mandangɔ se mɛ e ndo lua nzɔ̃ kpale na ndo tɔ̃ngɔ nga na se mɛ elengbi ti hɛ̃ngɔ Yehova sia kɔli na lo ti songo tɛ lo.
1. Ye mɛ elengbi ti lingɔ ti hɛ̃ngɔ Yehova dengɔ bɛ nɛ?
DA BƐ mɔ ya, mɔ hɛ̃ zo kɔi mɛ mɔ ndo ye lo gba kado ti ngbondoni mɛ mɔ hũ ni ya, adu nzɔ̃ni na lo tɛ lo wa lo nga na salelangɔ ni. Mɔ na tingɔ na nzɛ̃ngɔ se du ya, zo niko mu kado ni, lo gwe bata kaya da wa ta lo ndo salela nga ni ma! Na mbage mɛndɛ̃ mɔ na sepalangɔ gba se du ya, lo mu kado niko ngbondoni wa lo ndo salela nga ni. Nda mɛ e hɛ̃ se lɛlo mɛ nɛ? Yehova tondó Nyi lo ya, lo kpi na lo tɛ e. Lo ndo du na dengɔ bɛ gba na ngoi mɛ lo ndo hũ e, e ndo hɛ̃ lo sia kɔli na lo ti kado ti ngbondoni nga na lo ti songo tɛ lo mɛndó to lo ya, lo hɛ̃ e tɔ̃ngɔ!—Yn. 3:16; Roma 5:7, 8.
2. Ye mɛ e na mandangɔ na ya tɛnɛ mɛ nɛ?
2 Ngoi mɛndɛ̃ yɛkɛ yɛkɛ, elengbi ti tingɔ na dangɔ bɛ ya, ta kado ti tɔ̃ngɔ dɛ ngbondoni na lo tɛ e ma. Kanda se du ya, ta e dɛ e hɛ̃ sia kɔli na lo ti kado ti tɔ̃ngɔ ma ko, ando li mabere ya, e mu kado niko wa e kpã ka ndo mɛ ta e dɛ e hũ bere e dɛ da bɛ e na ni ma. Ti nɛngɔ ya, ta e ti ngaso ma ko, ayɔ ya e ngbã lá kwɛ hɛ̃ngɔ sia kɔli na lo ti ye mɛ Nzapa ná Yezo li na lo tɛ e. Bɛli tɛnɛ mɛ na zangɔ e ya, e li ngaso. E na mandangɔ se mɛ elengbi ti luangɔ nzɔ̃ kpale na ndo tɔ̃ngɔ na olo nga na se mɛ elengbi ti luangɔ nzɔ̃ kpale na bi mɛ na gangɔ. E nga na mandangɔ se mɛ elengbi ti hɛ̃ngɔ sia kɔli hɛ̃ Yehova na lo ti songo tɛ lo na ngoi ti dangɔ bɛ na bi ti kwá tɛ Yezo.
SE MƐ ELENGBI TI LUANGƆ NZƆ̃ KPALE NA OLO
3. Lége kɔi mɛ e ndo lua na nzɔ̃ kpale na ndo tɔ̃ngɔ na olo nɛ?
3 Na olo ko, e ndo lua nzɔ̃ kpale gba na ndo kwá tɛ Yezo. Na ndakisa na lo ti tɔ̃ngɔ ko, Yehova ndo ka lɛ lo na ndo siɔ kpale tɛ e. Ta e ndo gbɔ̃ lo na ndo ngunu ya, lo ka lɛ lo na ndo siɔ kpale tɛ e ma. Kanda lo ye lingɔ ni. Wa sungɔ Nzembo hɛ̃ sia kɔli hɛ̃ Yehova na lo mɛ ya, lo ndo ka lɛ lo na ndo siɔ kpale tɛ lo, lo tɛnɛ ya : “Ee Yehova, mɔ du nzɔ̃ni sĩ, mɔ ndo du dã ti kangɔ lɛ mɔ na ndo siɔ kpale.”—Nz. 86:5; 103:3, 10-13.
4. Yehova hɛ̃ndó tɔ̃ngɔ na lo tɛ ana? (Luka 5:32; 1 Timɔte 1:15)
4 Ambanga azi ndo da bɛ la ya, siɔ kpale mɛndó e li ko, ta Yehova lengbi ti kangɔ lɛ lo na ndoni ma. Biani, e zu e du awa siɔ kpale. Toma Polo kɔndó ndani ya, “ta alengbi bɛ ti ilingɔ mbi ya, mbi du toma ma.” Biani, lo di tɛnɛ ya: “Kanda na lo ti nzɔ̃ bɛ mɛ Nzapa ali hɛ̃ mbi, la mbi ti zo ngama se mɛ ĩ ndo hũ na mbi na olo.” (1 Kɔr. 15:9, 10) Ngoi mɛ e ndo gbinya bɛ e na ndo siɔ ye tɛ e ko, Yehova ndo ka lɛ lo na ndoni. Ngasia? Ta na lo mɛ ya elengbi na ni ma, kanda na lo mɛ ya, lo ndo ye e. Se du ya, mɔ ndo ma sɔngɔ bɛ na lo ti siɔ kpale tɛ mɔ ko, hĩnga ya, ta Yehova tondó tɔ̃ngɔ na lo tɛ anzɔ̃ azi ma, kanda na lo tɛ asiɔ azi mɛ lengbi ti gbinyangɔ bɛ la.—Di Luka 5:32; 1 Timɔte 1:15.
5. Zo kɔi so popo tɛ e lengbi ti tɛnɛngɔ ya, ni lengbi bo ti nɛngɔ ya, Yehova ka lɛ lo na ndo siɔ kpale tɛ ni? Kambisa.
5 Ta zo kɔi so popo tɛ e lengbi ti dungɔ na dangɔ bɛ ya, se du ya Yehova ndo ka lɛ lo na ndo siɔ kpale tɛ lo ko, ni du na lo mɛ ya, lo le kwa bulu gba hɛ̃ lo ma. Biani, Yehova ndo sepala na mbilimbili tɛ e. (Aeb. 6:10) Ta lo tondó Nyi lo ngama kado so futangɔ e na lo ti kpengba kwa mɛ e ndo li hɛ̃ lo ma. Se du ya, e ndo du na dangɔ bɛ ya, e lengbi bere Nzapa lengbi bo ti kangɔ lɛ lo na ndo siɔ kpale tɛ e ko, ngoi mɛndɛ̃ e ndo tɛnɛ ya, Kristo kpi bondó gɛgɛrɛ.—Galatia 2:21.
6. Nda mɛndó Polo le kwa kpengbani hɛ̃ Yehova nɛ?
6 Polo hĩngandó ya, ta ni lengbi ti luangɔ nzɔ̃ bɛ tɛ Yehova ma. Wa nda mɛndó lo ndo le kwa kpengbani hɛ̃ Yehova nɛ? Ta lo ndo lindó ngaso ti nɛngɔ ya, lo fa na Yehova ya ni lengbi ma, kanda lo ndo yendó hɛ̃ngɔ Yehova sia kɔli na lo ti nzɔ̃ bɛ tɛ lo. (Ef. 3:7) Ngama Polo, ayɔ ya e ngbã lá kwɛ lengɔ kwa na ge ge ge ta na lo ti luangɔ nzɔ̃ bɛ tɛ Yehova ma, kanda na lo ti hɛ̃ngɔ lo sia kɔli.
7. Lége mɛndɛ̃ mɛ elengbi ti luangɔ na tɔ̃ngɔ ndɛ nɛ? (Roma 5:1; Zaki 2:23)
7 Lége mɛndɛ̃ mɛ elengbi ti tɛnɛngɔ ya, e ndo lua nzɔ̃ kpale na ndo tɔ̃ngɔ na olo adu ya, elengbi ti dɔngɔ dã, nga na dungɔ na nzɔ̃ mangbi ná Yehova. a Ngama se mɛ mbalasi e manda na ni na ya tɛnɛ mɛ aɔ ko, ngoi ko la ando dũ e ko, ta elengbi bo mbala kɔi dungɔ na nzɔ̃ mangbi na Nzapa ma. Kanda na lo ti tɔ̃ngɔ ko, elengbi ti dungɔ na dengɔ bɛ nga na “nzɔ̃ mangbi ndoni kɔi na Nzapa” wa elengbi nga ti dɔngɔ dã na lo.—Di Roma 5:1; Zaki 2:23.
8. Nda mɛ ayɔ ya, e ndo hɛ̃ sia kɔli hɛ̃ Yehova na lo ti nzɔ̃ tangɔ li gɛrɛ mɛ lo hɛ̃ e ti lingɔ sambe?
8 Lingɔ sambela hɛ̃ Yehova du ye ti ngbondoni mɛ na zangɔ e ya, e dɔ dã na lo wa e ti nga na nzɔ̃ mangbi na lo. Ta Yehova ndo ngbã bo na mangɔ sambela tɛ azi tɛ lo mɛ ala li ni ndoni kɔi na ngoi mɛ ala ka bombi ma, kanda lo ndo ma nga sambela tɛ zo kɔi kɔi na ngoi mɛ lo ndo li ni. Lingɔ sambela lengbi ti zungɔ na bɛ e wa ni lengbi nga ti hɛ̃ngɔ e siriri ti bingangɔ li, kanda ni du nzɔ̃ni ɔngɔ yɔrɔ mɛ zo ndo nyɔ na ngoi mɛ tɛrɛ lo ndo sɔ. Ni lengbi nga ti lingɔ ya, nzɔ̃ mangbi tɛ e na Nzapa ti kpengbani. (Nz. 65:2; Zaki 4:8; 1 Yn. 5:14) Ngoi mɛndó lo ge lɛ sese ko, Yezo ndo lindó sambela ngoi zu na lo mɛ ya, lo hĩnga ya Yehova ndo ma lo, wa sambela na lingɔ ya, lo du na nzɔ̃ mangbi na To lo. (Luka 5:16) E ndo hɛ̃ sia kɔli mawoma na lo mɛ ya, kwá tɛ Yezo li ya e ti akwa Yehova wa e ndo tɛnɛ nga tɛnɛ ná lo na lége ti sambela!
SE MƐ E NA LUANGƆ NZƆ̃ KPALE NA BI MƐ NA GANGƆ
9. Ngasia la awa vɔrɔngɔ Yehova ti mbilimbili na luangɔ nzɔ̃ kpale na ndo tɔ̃ngɔ na bi mɛ na gangɔ nɛ?
9 Ngasia la awa vɔrɔngɔ Yehova ti mbilimbili na luangɔ nzɔ̃ kpale na ndo tɔ̃ngɔ na bi mɛ na gangɔ nɛ? Yehova na hɛ̃ngɔ ala dungɔ lɛ ngɛ̃́ ti kaka. Azi gba ndo hũ ya, ta zo lengbi ti dungɔ na dungɔ lɛ ngɛ̃́ ti kaka ma, na lo mɛ ya, azi ndo kpili bulu zu. Kanda na ngoi mɛndó Yehova lɛkɛ azi ko, lo hɛ̃ndó ala nzɔ̃ dangɔ bɛ ti dungɔ na dungɔ lɛ ngɛ̃́ ti bwai na bwai. Se ta Adamu lindó siɔ kpale ma ko, ale ta zo kɔi so popo tɛ e tindó na dangɔ bɛ ya, lo na kpingɔ ma. Wa se du ya, ndɛ lo mɛ e ndo hũ ya, dungɔ lɛ ngɛ̃́ ti kaka adu ye ti kpɛ̃nɛ ko, ni du nga kwɛ kɔi na ye mɛndó Yehova futa ti nɛngɔ ya, lo hɛ̃ e nzɔ̃ dangɔ bɛ. Ye ni du kado tɛ ngbongi Nyi lo mɛ lo ndo ye gba.—Roma 8:32.
10. Ye mɛ awakristo mɛ ahĩni la na kpɔ̃ ná ambanga awakristo mɛndɛ̃ ndo kũ na bi mɛ na gangɔ nɛ?
10 Abɛse du ya, e na luangɔ dungɔ lɛ ngɛ̃́ ti kaka na bi mɛ na gangɔ ko, gwɛ̃ tɛ Yehova du ya, e banda sepalangɔ na ni na olo. Awakristo mɛ hĩni la na kpɔ̃ na dungɔ na dengɔ bɛ ka ndozu na ngoi mɛ ala na lengɔ gbia ge ndo lɛ sese ndoni kɔi na Kristo. (Suma 20:6) Ambanga angãsa gbaga mɛndɛ̃ na dungɔ na dungɔ lɛ ngɛ̃́ ti bwai na bwai ka paradiso mɛ na dungɔ ge lɛ sese mɛ ta pɛnɔ ná tongɔ to na dungɔ da ma. (Suma 21:3, 4) Mɔ ka popo tɛ angãsa gbaga mɛ na nzɔ̃ dangɔ bɛ ti dungɔ na dungɔ lɛ ngɛ̃́ ti kaka ge lɛ sese? Ta ni du bo mbana gɛrɛ ti wawa mɛ na wambangɔ bɛ e ma! Kanda ni du nvɛ̃ni ye zu mɛndó alɛkɛ azi na lo ni, dungɔ lɛ ngɛ̃ ge lɛ sese na hɛ̃ngɔ e dengɔ bɛ mawoma.
11-12. Ambanga anzɔ̃ sulu ti paradizo mɛ elengbi ti kũngɔ ni nɛ? (Ba nga limɔ.)
11 Da bɛ mɔ na dungɔ lɛ ngɛ̃́ mɛ mɔ na dungɔ na ni ka paradiso mɛ na dungɔ ge lɛ sese. Ta zo kɔi na tɛnɛngɔ gbanda ya, tɛrɛ lo ndo sɔ bere lo na kpingɔ ma. (Yis. 25:8; 33:24) Yehova na hɛ̃ngɔ mɔ aye zu mɛ mɔ na gwɛ̃ ni. Aye mɛ mɔ ndo sepala lingɔ ni nɛ? Mɔ ye mandangɔ kpale gba na ndo asa bere ahu? Mɔ ye mandangɔ hĩngangɔ dɛngɔ miziki? Mɔ ye mandangɔ lɛkɛngɔ adɛsĩ? Ta kitɛ da ma ya, ka paradiso ko, e na dungɔ na gwɛ̃ tɛ azi mɛ hĩnga lɛkɛngɔ adesĩ nzɔ̃ni, nga na awa kĩngɔ da. Wa e nga na dungɔ na gwɛ̃ tɛ azi mɛ ndo lu yaka, awa tɔngɔ atɛ, awa lɛkɛngɔ awã, nga na awa lungɔ jardĩ wa ala ndo lɛkɛ nga ni. (Yis. 35:1; 65:21) Na ngoi mɛ mɔ na luangɔ dungɔ lɛ ngɛ̃́ ti bwai na bwai ko, mɔ na dungɔ na ngoi gba ti lingɔ aye zu mɛ mɔ na gwɛ̃ lingɔ ni.
12 Da bɛ mɔ na dengɔ bɛ mɛ e na dungɔ na ni na ngoi mɛ e na yambangɔ azi mɛ na songɔ! (Aw. 24:15) Da nga bɛ mɔ, na se mɛ mɔ na dungɔ na dengɔ bɛ ti mandangɔ aye gba na ndo Yehova nga na ndo aye gba mɛ lo li. (Nz. 104:24; Yis. 11:9) Wa omɛ aɔ ngbondoni du ya, e na dungɔ na nzɔ̃ tangɔ li gɛrɛ ti vɔrɔngɔ Yehova zangangɔ ya, e li siɔ kpale wa ta e nga na dungɔ na gwɛ̃ ya, aka lɛ na ndo siɔ kpale tɛ e ma! Ĩ ye gbiyangbingɔ nzɔ̃ sulu ti ngoi mɛ na gangɔ na “dengɔ bɛ ti pɛ ndunu ngoi mɛ sĩ na asiɔ kpale”? (Aeb. 11:25) Ta seni la ma! E na luangɔ anzɔ̃ sulu niko se du ya, e ndo gbanzi tɛrɛ e na akpale ti lɛ gigi olo. Ta bɛ mɔ li na ni ma ya, ta paradiso mɛ na dungɔ ge lɛ sese du bo nzɔ̃ dangɔ bɛ ti bi mɛ na gangɔ ma. Yɛkɛ yɛkɛ ni na tingɔ na seni. Ta ni lengbindó ti lingɔ tɛrɛ lo ma se du ya, ta Yehova yendó tɛrɛ e gba na hɛ̃ngɔ Nyi lo ngama kado na lo tɛ e ma!
Anzɔ̃ sulu ti paradizo mɛ mɔ ndo kũ ni na bɛ mɔ ndozu nɛ? (Ba paragrafɛ ti 11-12)
HƐ̃ YEHOVA SIA KƆLI NA LO TI SONGO TƐ LO
13. Ngasia la elengbi ti hɛ̃ngɔ sia kɔli hɛ̃ Yehova na lo ti songo tɛ lo nɛ? (2 Kɔrinto 6:1)
13 Ngasia la elengbi ti hɛ̃ngɔ Yehova sia kɔli na lo ti tɔ̃ngɔ nɛ? Na kpãngɔ kwa tɛ lo na ndo ti uzu na ya dungɔ lɛ ngɛ̃́ tɛ e. (Mat. 6:33) Na pɛni zu Yezo kpindó na lo tɛ azi zu ya “azi mɛ ndo du lɛ la ngɛ̃́ ko, ta ala du lɛ la ngɛ̃́ na lo tɛ ala nvɛ̃ni ma, kanda ale ala du lɛ la ngɛ̃́ na lo tɛ Kristo mɛndó akpi so la, aso nga so la.” (2 Kɔr. 5:15) Ta e ye zangangɔ nzɔ̃ bɛ mɛ Nzapa li na lo tɛ e ma.—Di 2 Kɔrinto 6:1.
14. Ngasia la elengbi ti fangɔ loyengɔ tɛ e na ndo andia tɛ Yehova nɛ?
14 Ye mɛ elengbi ti lingɔ ti nɛngɔ ya, e hɛ̃ Yehova sia kɔli na lo ti songo tɛ lo adu fangɔ loyengɔ na ndo andia tɛ lo. Ngasia? Ngoi mɛ e ye mungɔ aekateli na omɛ aba kalasi mɛ e ye lingɔ bere kwa mɛ e ye lingɔ ni ko, ayɔ ya e ba se du ya, gwɛ̃ tɛ Yehova na ndo kpale ni adu nɛ. (1 Kɔr. 10:31; 2 Kɔr. 5:7) Ngoi mɛ e ndo kpã loyengɔ tɛ e na kwa ko, ye ti ngbondoni na lingɔ tɛrɛ lo, loyengɔ tɛ e na mbage tɛ Yehova nga na nzɔ̃ mangbi tɛ e na mbage tɛ lo na tingɔ kpengbani fãni mɛndɛ̃. Nzɔ̃ dangɔ bɛ tɛ e nga na tingɔ kpengbani.—Roma 5:3-5; Zaki 2:21, 22.
15. Ngasia la elengbi ti fangɔ ya, e ndo hɛ̃ sia kɔli na ngoi ti dangɔ bɛ na bi ti kwá tɛ Yezo nɛ?
15 Ye mɛndɛ̃ mɛ elengbi ti lingɔ so hɛ̃ngɔ Yehova sia kɔli na lo ti songo tɛ lo, adu salelangɔ ngoi ti dangɔ bɛ na bi ti kwá tɛ Yezo so fangɔ na Yehova ya, e ndo hɛ̃ lo sia kɔli na lo ti tɔ̃ngɔ. Se e bɛ kpãngɔ prɔgramɛ ti dangɔ bɛ e na bi ti kwá tɛ Yezo katɛ ko, elengbi nga ti ilingɔ azi mɛndɛ̃ ya, ala gwe ndoni kɔi na e na bi niko. (1 Tim. 2:4) Kambisa hɛ̃ azi mɛ mɔ ili la na lá ti dangɔ bɛ na bi ti kwá tɛ Yezo ye mɛ na ɔngɔ kai. Mɔ lengbi nga ti fangɔ na ala kaya jw.org avideo mɛ bɛli tɛnɛ ni pa ya: Mpo na nini Yesu akufaki? Nga na bɛli tɛnɛ mɛ pa ya, Da bɛ mɔ na bi ti kwá tɛ Yezo. Abiazi lengbi nga ti ilingɔ ayata mɛ nzɛ̃ ya, ala ga da bɛ la na bi ti kwá tɛ Yezo. Da bɛ mɔ na dengɔ bɛ mɛ na dungɔ ka ndozu nga na ge lɛ sese se du ya, ambanga angãsa gbaga tɛ Yehova mɛndó gere adiri kaya gbágbá tɛ lo! (Luka 15:4-7) Na ngoi ti dangɔ bɛ na bi ti kwá tɛ Yezo ko, zia ya e mu ngoi ti barangɔ ta bo azi mɛ ga fãnani ma, kanda ala mɛ ali ngoi gba ta ala dɛ ga bombi ma. Elengbi nga ti tɛnɛngɔ hɛ̃ ala ya, ala du na gangɔ nzɔ̃ni!—Roma 12:13.
16. Nda mɛ ayɔ ya, e hɛ̃ ti e gba na ya kwa ti fangɔ tɛnɛ na ngoi ti dangɔ bɛ na bi ti kwá tɛ Yezo nɛ?
16 Mɔ lengbi ti hɛ̃ngɔ tɛrɛ mɔ gba na ya kwa ti nyingɔ na ngoi ti dangɔ bɛ na bi ti kwá tɛ Yezo? Na lingɔ ngaso mɔ ndo fa yangondo ya, mɔ ndo hɛ̃ sia kɔli na lo ti aye zu mɛ Nzapa ná Kristo ndo li na lo tɛ e. Se du ya, mɔ ndo hɛ̃ tɛrɛ mɔ gba na ya kwa ti fangɔ tɛnɛ ko, mɔ na hũngɔ aye gba mɛ Yehova ndo li so zangɔ e, wa loyengɔ tɛ mɔ na mbage tɛ lo na tingɔ kpengbani. (1 Kɔr. 3:9) Ni la, ngbã lá kwɛ dingɔ Ngbangɔ na ngoi ti dangɔ bɛ na bi ti kwá tɛ Yezo mɛ asu ni kaya nyi Buku Dingɔ Ngbangɔ bi kɔi kɔi bere prɔgramɛ mɛ akpã kaya mbeti ti bombi Dungɔ lɛ ngɛ̃́ ná kwa tɛ awakristo mɛ e ndo li ni na ya pɔsɔ. Mɔ lengbi nga ti salelangɔ avɛrse niko ti ya Ngbangɔ kaya prɔgramɛ tɛ mɔ ti mandangɔ ye.
17. Ye mɛ ndo dɛ̃ na bɛ Yehova nɛ? (Ba nga Ãkadre “ Se mɛ elengbi ti hɛ̃ngɔ sia kɔli na lo ti songo tɛ Yehova.”)
17 Ngoi mɛndɛ̃ ta akpale ti ya dungɔ lɛ ngɛ̃́ tɛ mɔ na zingɔ lége ya, mɔ kpã na kwa aye zu mɛ e kambisa ni so ya tɛnɛ mɛ ma. Hĩnga ya, ta Yehova ndo haka ye mɛ mɔ ndo li ná aye mɛ azi mɛndɛ̃ ndo li ma, kanda lo ndo ba aye mɛ ndo lo ka bɛ mɔ. Lo ndo du na dengɔ bɛ na ngoi mɛ lo ndo hũ, mɔ ndo hɛ̃ lo sia kɔli ka gbɛ bɛ mɔ na lo ti kado ti ngbondoni mɛ lo hɛ̃ e mɛ adu tɔ̃ngɔ.—1 Sam. 16:7; Mar. 12:41-44.
18. Nda mɛ ayɔ ya, e hɛ̃ sia kɔli hɛ̃ Yehova Nzapa nga na Yezo Kristo nɛ?
18 Bo na lo ti tɔ̃ngɔ la, Nzapa ndo ka lɛ lo na ndo siɔ kpale, e ti na nzɔ̃ mangbi ná Yehova wa e ti nga na nzɔ̃ dangɔ bɛ ti dungɔ na dungɔ lɛ ngɛ̃́ ti kaka. Ni la, e ngbã lá kwɛ hɛ̃ngɔ Yehova sia kɔli na lo ti songo tɛ lo, ye mɛ ndo to lo ya, lo sulu e. (1 Yn. 4:19) Elengbi nga ti hɛ̃ngɔ Yezo sia kɔli na lo mɛ ya, lo ye e gba wa lo hɛ̃ nga dungɔ lɛ ngɛ̃́ tɛ lo na lo tɛ e!—Yn. 15:13.
BIA 154 Bolingo ekosuka te
