1. Ye mɛ ayɔ ya, apalanga ali ti nɛngɔ ya, ala longa nɛ?

 GBIA Davidi pandó hɛ̃ Salomo ya: “Du kpengbani, li ye nga ma tɛ kɔli.” (1 Ba. 2:1-3) Wangɔ niko adu ngbondoni ndɛ na lo tɛ awakristo zu mɛ aye landangɔ se lɛlo tɛ Yezo. Ti nɛngɔ ya, ala li ngaso ko, ayɔ ya, ala manda andia tɛ Nzapa, wa ala kpã awangɔ ni na kwa na ya dungɔ lɛ ngɛ̃́ tɛ la ti bi zu. (Luka 2:52) Nda mɛ adu ngbondoni ya, ayata kɔli mɛ apalanga ati kpengbani na ya nyingɔ nɛ?

2-3. Nda mɛ adu ngbondoni ya, ayata kɔli mɛ apalanga ati kpengbani na ya nyingɔ nɛ?

² Ayata kɔli ndo li akwa ti ngbondoni ka ndasewa nga ge ya bombi. Ta kitɛ da ma ya, ayata kɔli mɛ apalanga ndo gbɔ̃ li la na ndo kumba mɛ ala na dungɔ na ni na bi mɛ na gangɔ. Ngoi mɛndɛ̃ ala lengbi ti dungɔ na mɔkanɔ ti tingɔ awa sungɔ lége, awa zangɔ na kwa, bere abiazi ti ya bombi na bi mɛ na gangɔ. Bere lingɔ libala nga na dũngɔ ayangambi. (Ef. 6:4; 1 Tim. 3:1) Ti nɛngɔ ya, ala kokisa mɔkanɔ niko wa ala longa nga na ya ni ko, ayɔ ya, ala du awakristo mɛ kpengbani na ya nyingɔ. b

³ Ye mɛ na zangɔ mɔ ya, mɔ ti wakristo mɛ kpengbani na ya nyingɔ nɛ? Ayɔ ya, mɔ manda aseliye mɛndɛ̃ ti ngbondoni. Aye mɛ ayɔ ya, mɔ li ti nɛngɔ ya, mɔ lɛkɛ tɛrɛ mɔ na lo ti akumba mɛ mɔ na luangɔ na bi mɛ na gangɔ nga na lingɔ ni na seni nɛ?

4. Mɔ lengbi ti luangɔ ase lɛlo ti nzɔ̃ni ti landangɔ ka wa? (Ba nga limɔ.)

⁴ Pɔna se lɛlo ti nzɔ̃ni mɛ mɔ lengbi ti landangɔ. Ngbangɔ na ase lɛlo tɛ apalanga gba ti nzɔ̃ni mɛ ayɔ ya, e landa. Azi niko mɛ Ngbangɔ tɛnɛ tɛnɛ tɛ la ndo yendó Nzapa gba, wa ala lindó akumba gba so batangɔ azi tɛ lo. Mɔ lengbi nga ti luangɔ se lɛlo tɛ ayata kɔli ná ayata wali mɛ kpengbani na ya nyingɔ ka ndasewa nga kaya bombi mɛ mɔ ka da. (Aeb. 13:7) Wa Yezo du se lɛlo ti nzɔ̃ni nvɛ̃ni na lo tɛ mɔ. (1 Pet. 2:21) Na ngoi mɛ mɔ ndo manda se lɛlo tɛ ala ko, ba nvɛ̃ni na seni aseliye tɛ la ti nzɔ̃ni mɛ mɔ lengbi ti landangɔ. (Aeb. 12:1, 2) Wa na gesi mu ekateli ti landangɔ se lɛlo tɛ ala.

5. (a) Ngasia la mɔ lengbi ti tingɔ na likoki ti gbɔ̃ngɔ li mɔ na ndo aye nɛ? (b) Wa nda mɛ ni du ngbondoni na lo tɛ apalanga nɛ? (Nzembo 119:9)

⁵ Ti na “likoki . . . ti gbɔ̃ngɔ li mɔ na ndo aye.” (Mas. 3:21) Zo mɛ na kɔdɛ ti hĩngangɔ ndo ko, ta lo ndo li aye na ndo kpɛ ma, lo ndo gbɔ̃ li lo na seni na ndo aye zu uzu ti lo lingɔ ni. Na lo ni la, li kpengbani ti nɛngɔ ya, mɔ ti na seliye niko, wa mɔ bata nga ni. Na ndombali nɛ? Na lo mɛ ya, lɛ gigi mɛ asĩ na apalanga mɛ ndo landa dangɔ bɛ tɛ la nvɛ̃ni bere ala ndo li aye na landangɔ gwɛ̃ tɛ la. (Mas. 7:7; 29:11) Atelevisiɔ̃, avideo nga na asitɛ ti internet alengbi nga ti gbɛ̃ngɔ bingangɔ li tɛ mɔ. Wa ngasia la mɔ lengbi ti tingɔ na likoki ti gbɔ̃ngɔ li mɔ na ndo aye nɛ? Manda andia ti ya Ngbangɔ wa gbɔ̃ li mɔ ndo anzɔ̃ kpale mɛ ni ndo hɛ̃ se zo landa ni. Na gesi salela aye mɛ mɔ manda so mungɔ ekateli mɛ na hɛ̃ngɔ Yehova dengɔ bɛ. (Di Nzembo 119:9.) Se mɔ manda lingɔ aye na ndenge ti ngaso ko, ni na zangɔ mɔ ya, mɔ ti wakristo mɛ kpengbani na ya nyingɔ. (Mas. 2:11, 12; Aeb. 5:14) Ba se mɛ dungɔ na likoki ti gbɔ̃ngɔ li alengbi ti zangɔ mɔ na ya akpale mɛ sɛ: ti (1) seliye tɛ mɔ na mbage tɛ ayata wali, wa ti (2) omɛ aba se ti lɛkɛngɔ na tɛrɛ mɔ.

6. Ngasia la kɔdɛ ti gbɔ̃ngɔ li na ndo ye na zangɔ apalanga ya, ala tɔndɔ ayata wali nɛ?

⁶ Nyita kɔli mɛ amanda gbɔ̃ngɔ li lo nga ma tɛ Yehova ko, lo ndo du na tɔndɔngɔ na lo tɛ ayata wali. Ka popo tɛ akwa nyita kɔli mɛ palanga ko, ta adu siɔni ya, ayata wali du ka da ma.  Kanda likoki ti gbɔ̃ngɔ li na zangɔ nyita kɔli mɛ palanga ya, ta lo tɛnɛ, lo su bere lo li ye kɔi mɛ na fangɔ ya, lo ndo ye nyita wali kanda ta lo na dangɔ bɛ ti lingɔ libala na lo ma, lo na lingɔ ngaso se du ya, lo na dangɔ bɛ ti lingɔ libala na lo. (1 Tim. 5:1, 2) Se du ya, lo ná nyita wali kɔi aye lingɔ libala ko, lo na batangɔ ndima tɛ lo na kɛ̃ngɔ singɔ fãna na nyita wali ni ka ndo mɛ na lingɔ ya, ala ngbã bo ala sɛ zangangɔ ayata mɛndɛ̃.​—1 Kɔr. 6:18.

7. Ngasia la likoki ti gbɔ̃ngɔ li na ndo ye na zangɔ ayata kɔli mɛ apalanga na omɛ aba lɛkɛngɔ tɛrɛ la nɛ?

⁷ Ndenge mɛndɛ̃ mɛ nyita kɔli mɛ palanga na fangɔ ya, lo na likoki ti gbɔ̃ngɔ li na omɛ aba se ti lɛkɛngɔ tɛrɛ lo. Azi gba mɛ ndo yu amɔdɛlɛ ti bɔngɔ wa ala ndo li nga apiblisite ni ko, ta ala ndo tɔndɔ Yehova ma, wa ngoi mɛndɛ̃ ala nga na dungɔ lɛ ngɛ̃́ ti bí. Elengbi ti hũngɔ seliye tɛ la na lége ti bɔngɔ mɛ ala ndo yu, mɛ ndo gbɔ̃ tɛrɛ la kpengbani bere ndo li ya, kɔli si mabere wali. Na ngoi mɛ lo ye pɔnangɔ bɔngɔ mɛ lo na yungɔ ko, nyita kɔli mɛ palanga mɛ kpengbani na ya nyingɔ na landangɔ andia ti ya Ngbangɔ nga na se lɛlo ti nzɔ̃ni tɛ ayata ti ya bombi. Lingɔ ngaso na fangɔ ya, lo ndo mai na ya nyingɔ. Lo lengbi ti hũndangɔ tɛrɛ lo na ndo mɛ: ‘Abɔngɔ mɛ mbi ndo yu ando fa ya, mbi na bingangɔ li ti vuruni, wa mbi ndo tɔndɔ nga dangɔ bɛ tɛ azi mɛndɛ̃? Ngoi mɛ azi ndo hũ bɔngɔ mɛ mbi ndo yu ando du woni ya, ala hĩnga ya, mbi du wa kwa tɛ Nzapa?’ (1 Kɔr. 10:31-33; Tito 2:6) Nyita kɔli ti palanga mɛ na kɔdɛ ti hĩngangɔ ndo ko, ayata ti ya bombi na hɛ̃ngɔ lo ndima, wa Yehova nga na hɛ̃ngɔ lo ndima.

8. Ngasia la nyita kɔli mɛ palanga alengbi ti tingɔ zo mɛ alengbi ti kpãngɔ bɛ ndo lo nɛ?

⁸ Du zo mɛ alengbi ti kpãngɔ bɛ na ndo lo. Nyita kɔli ti palanga mɛ ndo kpã bɛ ndo lo ko, lo ndo li kumba zu mɛ ahɛ̃ lo na seni nvɛ̃ni. (Luka 16:10) Zia e ba se lɛlo tɛ Yezo. Ta lo ndo mundó kumba tɛ lo na wele ma. Kanda lo lindó kwa zu mɛ Yehova hɛ̃ lo na seni nvɛ̃ni, abɛse na ngoi mɛ lingɔ ni adundó pɛnɔ na lo tɛ lo. Songo mɛndó lo na ni na lo tɛ azi, nga na lo tɛ ava lo atondó lo ya, lo hɛ̃ dungɔ lɛ ngɛ̃́ tɛ lo na lo tɛ ala. (Yn. 13:1) Li kwa kpengbani so kokisangɔ kumba mɛ ahɛ̃ mɔ ti nɛngɔ ya, mɔ landa se lɛlo tɛ Yezo. Se du ya, ta mɔ hĩnga se ti lingɔ ni ma ko, du na zungɔ na tɛrɛ wa hũnda wangɔ ka tɛ ayata mɛ kpengbani na ya nyingɔ. Ta mɔ li bo ya, zia mbi li ma. (Roma 12:11) Na se lɛ lingɔ ngaso ko, onzi kwa mɛ ahɛ̃ mɔ, li ni “na lo tɛ Yehova, kanda ta na lo tɛ azi ma.” (Kɔl. 3:23) Ti pangɔ bɛta tɛnɛ ko, ta mɔ du zo ti lengbingɔ ma, ni la du na zungɔ na tɛrɛ wa ndo ye yungɔ ndo tɛ mɔ.​—Mas. 11:2.

9. Nda mɛ ayɔ ya, ayata kɔli mɛ apalanga amanda lingɔ kwa nɛ?

⁹ Ti nɛngɔ ya, mɔ ti wakristo mɛ kpengbani na ya nyingɔ ko, ayɔ ya, mɔ manda lingɔ aye mɛndɛ̃. Ni na zangɔ mɔ ya, mɔ ye kumba mɛ na hɛ̃ngɔ mɔ ge ya bombi, mɔ li kwa mɛ na zangɔ mɔ ya, mɔ kokisa gwɛ̃ ti ndasewa tɛ mɔ, wa mɔ du na mangbi ti nzɔ̃ni na azi mɛndɛ̃. Zia e ba  aye taa mɛ adu ngbondoni ya, mɔ hĩnga lingɔ ni.

10-11. Ngasia la nyita kɔli mɛ palanga na luangɔ nzɔ̃ kpale se lo hĩnga dingɔ nga na sungɔ mbeti nɛ, wa ngasia la ni nga na zangɔ bombi nɛ? (Nzembo 1:1-3) (Ba nga limɔ.)

¹⁰ Manda dingɔ nga na sungɔ mbeti na seni. Ngbangɔ tɛnɛ ya, zo ko la ndo di tɛnɛ tɛ Nzapa, wa lo ndo gbɔ̃ nga li lo na ndo ni ko, lo na dungɔ na dengɔ bɛ, wa akpale tɛ lo na nɔngɔ nɔ na seni. (Di Nzembo 1:1-3.) Na dingɔ Ngbangɔ bi zu ko, mɔ na hĩngangɔ se mɛ Yehova ndo ba na kpale, ni nga na zangɔ mɔ ya, mɔ binga li mɔ na ndenge ti nzɔ̃ni wa mɔ kpã nga awangɔ ni na kwa na ya dungɔ lɛ ngɛ̃́ tɛ mɔ. (Mas. 1:3, 4) Bombi ndo du na gwɛ̃ tɛ ayata kɔli ti ngaso. Na lo nɛ?

¹¹ Ayata kɔli ná ayata wali na gwɛ̃ tɛ azi mɛ na makoki mɛ ahĩnga hangɔ nga na hɛ̃ngɔ awangɔ ti ya Ngbangɔ na ndenge ti nzɔ̃ni nvɛ̃ni. (Tito 1:9) Se mɔ hĩnga dingɔ nga na sungɔ mbeti na seni ko, mɔ na dungɔ na makoki ti lingɔ adiskur nga na hɛ̃ngɔ agbinya mɛ na sangɔ ngunu bɛ ayata. Mɔ nga na dungɔ na makoki ti sungɔ awangɔ mɛ mɔ lua na ngoi ti mandangɔ Ngbangɔ tɛ mɔ, na ngoi ti diskur ti bombi bere ka kota bombi. Aye mɛ mɔ nvɛ̃ni mɔ su na zangɔ mɔ ya, mɔ ti na loyengɔ ti kpengbani, wa mɔ sa nga ngunu bɛ azi mɛndɛ̃.

12. Ye mɛ na zangɔ mɔ ya, mɔ hĩnga se ti nzɔ̃ni ti tɛnɛngɔ tɛnɛ na azi mɛndɛ̃ nɛ?

¹² Manda tɛnɛngɔ tɛnɛ na azi na ndenge ti nzɔ̃ni. Ayɔ ya, nyita kɔli mɛ wakristo ahĩnga tɛnɛngɔ tɛnɛ na ndenge ti nzɔ̃ni. Zo mɛ ndo tɛnɛ tɛnɛ na ndenge ti nzɔ̃ni na azi mɛndɛ̃ ko, lo ndo ma, wa lo ndo kpã nga tɛrɛ lo na ndo tɛ ala. (Mas. 20:5) Lo lengbi ti hĩngangɔ kpale mɛ zo tengbi na ni na mangɔ legɔ̃ mɛ lo ndo tɛnɛ na tɛnɛ, bangɔ yangba lɛ lo, bere aye mɛ lo ndo li. Se du ya, ta mɔ ndo lekisa ngoi ndoni kɔi na azi ma ko, ta mɔ na tingɔ na aseliye niko ma. Se du ya, mɔ ndo salela ngoi zu atɛlɛfɔnɛ so tɛnɛngɔ tɛnɛ na azi na lége ti mesajɛ bere email ko, na dungɔ pɛnɔ ya, mɔ ti na makoki ti tɛnɛngɔ tɛnɛ na ndenge ti nzɔ̃ni na ala. Ni la, ndo gi lége ti tɛnɛngɔ tɛnɛ na azi mɛndɛ̃.​—2 Yn. 12.

13. Ye mɛndɛ̃ mɛ ayɔ ya nyita kɔli mɛ palanga manda nɛ? (1 Timɔte 5:8) (Ba nga limɔ.)

¹³ Manda gingɔ falanga so kokisangɔ na gwɛ̃ tɛ mɔ nvɛ̃ni. Nyita kɔli mɛ kpengbani ndo du na makoki ti kokisangɔ gwɛ̃ tɛ lo nga na gwɛ̃ tɛ azi ti ndasewa tɛ lo. (Di 1 Timɔte 5:8.) Na ya akɔdɔrɔ mɛndɛ̃, ayangambi ndo manda lingɔ kwa ka tɛ awa dũngɔ ala bere ka tɛ azi mɛndɛ̃ ti ndasewa tɛ la. Kaya akɔdɔrɔ mɛndɛ̃ ayangambi ndo manda lingɔ akwa ka kalasi. Abɛse du ya, mɔ manda lingɔ ye kɔi ka wa ko, adu ngbondoni ya, mɔ hĩnga lingɔ aye mɛ na zangɔ mɔ ya, mɔ lua kwa. (Aw. 18:2, 3; 20:34; Ef. 4:28) Ndo li kwa kpengbani tee ka ndani, azi mɛndɛ̃ na  hũngɔ ni wa ala na hɛ̃ngɔ mɔ ndima na lo ti kwa tɛ mɔ. Se mɔ li ngaso ko, na dungɔ woni ya, mɔ lua kwa ti lingɔ, wa mɔ lua nga falanga. Aseliye nga na makoki mɛ mɔ na tingɔ na ni adu nga ngbondoni na lo tɛ nyita kɔli mɛ wakristo na lo mɛ ya, ni na zangɔ mɔ ya, mɔ li akumba mɛndɛ̃ kaya bombi. Zia e ba ambanga kumba ni.

14. Ngasia la nyita kɔli mɛ palanga alengbi ti lɛkɛngɔ tɛrɛ lo so lingɔ kwa ti ngoi zu nɛ?

¹⁴ Kwa ti ngoi zu. Ayata gba mɛ kpengbani na ya nyingɔ abandandó lingɔ kwa ti ngoi zu na ngoi mɛ ala dɛndó apalanga. Lingɔ kwa tɛ wa sungɔ lége ndo za apalanga ya, ala hĩnga se ti dungɔ du na azi ndɛ̃ ndɛ̃ ndɛ̃. Ni ndo za nga ala ya, ala hĩnga se ti gingɔ falanga nga na salalengɔ ni na ndenge ti nzɔ̃ni. (Fil. 4:11-13) Ndenge ti nzɔ̃ni adu na bandangɔ na kwa tɛ wa sungɔ lége ti pɛ ndunu ngoi. Azi gba ndo li kwa tɛ awa sungɔ lége ti pɛ ndunu ngoi na pɛ ngoi yɔngɔrɔ ni, ni ndo za ala ya, ala li kwa tɛ awa sungɔ lége ti ngoi zu. So popo tɛrɛ la, ambangani ndo li kwa ti kĩngɔ ada ti Lo-lengɔ gbia nga awa lingɔ kwa ka bethel.

15-16. Ngasia la nyita kɔli mɛ palanga alengbi ti kokisangɔ masengami ti tingɔ wa zangɔ na kwa bere biazo kaya bombi tɛ lo nɛ?

¹⁵ Dungɔ wa zangɔ na kwa bere biazo ti ya bombi. Adu ngbondoni ya, ayata kɔli adu na mɔkano ti kokisangɔ masengami ti lingɔ kwa hɛ̃ ayata kɔli ná ayata wali ti ya bombi nga ma abiazi. Ngbangɔ tɛnɛ ya, azi mɛ na “gwɛ̃’’ ti lingɔ kwa tɛ abiazi ko, ala ye “lingɔ nzɔ̃ kwa.” (1 Tim. 3:1) Uzu ti lo tingɔ biazo ko, ayɔ ya, nyita kɔli kokisa masengami ti tingɔ wa zangɔ na kwa. Awa zangɔ na kwa ndo hɛ̃ ti la hɛ̃ abiazi na ya akpale gba ti ya bombi. Abiazi ná awa zangɔ na kwa ndo li kwa na zungɔ na tɛrɛ zu na lo tɛ ayata, wa ala ndo hɛ̃ ti la na ge ge ge zu na ya kwa ti fangɔ tɛnɛ. Ayata kɔli alengbi ti kokisangɔ masengami ti tingɔ awa zangɔ na kwa abɛse ta ala dɛ ti na bulu 20 ma. Wa nyita mɛ wa zangɔ na kwa mɛ na makoki alengbi ti tingɔ biazo ti ya bombi abɛse ta lo dɛ ti na bulu 25 ma.

¹⁶ Ngasia la mɔ lengbi ti kokisangɔ masengami ti lingɔ akwa niko nɛ? Ngbangɔ kambisa aseliye mɛ ayɔ ya, mɔ du na ni. Hĩnga ya, andia niko mɛ alo kaya Ngbangɔ adu uzu na lo ti songɔ mɛ mɔ na ni na lo tɛ Yehova, na lo tɛ azi ti ndasewa tɛ mɔ, nga na lo tɛ ayata ti ya bombi. (1 Tim. 3:​1-13; Tito 1:​6-9; 1 Pet. 5:​2, 3) Li kpengbani ti gbɔ̃ngɔ nda seliye ni kɔi kɔi. Li sambela hɛ̃ Yehova ti nɛngɔ ya, lo za mɔ, mɔ ti na seliye niko. c

17. Ngasia la nyita kɔli mɛ palanga alengbi ti lɛkɛngɔ tɛrɛ lo bandangɔ ndɛ so tingɔ kɔli ti nzɔ̃ni ti libala nga nzɔ̃ gbia ti ndasewa nɛ? (Ba nga limɔ.)

 ¹⁷ Dungɔ gbia ti ndasewa. Nga ma se mɛndó Yezo pa na ni, ambanga awakristo mɛ akɔli ndo ye ngbãngɔ amɔdo. (Mat. 19:12) Kanda se mɔ pɔna lingɔ libala ko, mɔ na tingɔ na kumba mɛndɛ̃ ti fãnani nga ma kɔ wali nga gbia ti ndasewa. (1 Kɔr. 11:3) Yehova ye ya, kɔli ti ndasewa aye ya lo, wa lo kokisa nga agwɛ̃ tɛ lo ti mi nga ti nyingɔ. (Ef. 5:​28, 29) Aseliye mɛ e tɛnɛ tɛnɛ na lo ni, mabere tingɔ na kɔdɛ ti hĩngangɔ ndo, tɔndɔngɔ ayata wali, hĩngangɔ se ti tɛnɛngɔ tɛnɛ na azi, na zangɔ mɔ ya, mɔ du kɔli ti nzɔ̃ni ti libala nga nzɔ̃ gbia ti ndasewa. Se mɔ li ngaso ko, mɔ na lɛkɛngɔ tɛrɛ mɔ so kokisangɔ kumba tɛ mɔ nga ma kɔ wali nga gbia ti ndasewa.

18. Ngasia la nyita kɔli mɛ palanga alengbi ti lɛkɛngɔ tɛrɛ lo so tingɔ to ti ndasewa nɛ?

¹⁸ To ti ndasewa. Na pɛ dungɔ na wali ko, ngoi mɛndɛ̃ mɔ na tingɔ to ti ndasewa. Awangɔ mɛ mɔ lengbi ti luangɔ ka tɛ Yehova na omɛ aba dungɔ nzɔ̃ to nɛ? Mɔ lengbi ti luangɔ awangɔ gba. (Ef. 6:4) Na ndakisa, Yehova pandó yangondo hɛ̃ nyi lo Yezo ya, ni ndo ye lo. (Mat. 3:17) Se mɔ ti to ti ndasewa ko, li kpengbani ya, mɔ ndo pa hɛ̃ ayati mɔ ngoi zu ya, mɔ ndo ye ala. Ndo hɛ̃ ala sia kɔli ngoi zu na lo ti aye ti nzɔ̃ni mɛ ala ndo li. Ato ayangambi mɛ ndo landa se lɛlo tɛ Yehova ko, ala ndo za ayati la ya, ala ti awakristo mɛ kpengbani na ya nyingɔ. Mɔ lengbi ti mandangɔ tingɔ na seliye niko se mɔ banda na olo lingɔ aye na songo tɛrɛ azi ti ndasewa tɛ mɔ, fangɔ songo na ayata ti ya bombi nga na hɛ̃ngɔ ala sia kɔli. (Yn. 15:9) Ni na zangɔ mɔ ya, mɔ li kumba mɛ gbanda ngoi mɛndɛ̃ mɔ na tingɔ na ni nga ma kɔli bere to ti ndasewa. Wa mɔ na dungɔ ngbondoni ka tɛ Yehova, ka ndasewa tɛ mɔ nga kaya bombi.

19-20. Aye mɛ na zangɔ ayata kɔli mɛ apalanga ya, ala ti kpengbani na ya nyingɔ nɛ? (Ba nga limɔ ti koko mbeti.)

¹⁹ Ayata kɔli mɛ apalanga, ta ĩ na tingɔ ayata mɛ kpengbani na ya nyingɔ na ndenge ti kpɛ̃nɛ ma, na yɔngɔ ya, ĩ du na ge ge ge. Ĩ li kpengbani ĩ pɔna se lɛlo ti nzɔ̃ni mɛ ĩ na landangɔ, ĩ ti na kɔdɛ ti hĩngangɔ ndo, ĩ hĩnga tɛnɛngɔ tɛnɛ na azi, ĩ manda lingɔ aye mɛndɛ̃, wa ĩ lɛkɛ tɛrɛ ĩ na lo ti kumba mɛ gbanda ĩ na luangɔ na bi mɛ na gangɔ.

²⁰ Ngoi mɛndɛ̃ mɔ lengbi ti hũngɔ ya, aye zu mɛ atɛnɛ tɛnɛ ni so ya mbeti mɛ aɔ ndoni. Kanda mɔ lengbi ti lingɔ ni. Ta bɛ mɔ li na ni ma ya, Yehova dã ti zangɔ mɔ. (Yis. 41:10, 13) Hãngɔ ni zingɔ, ayata ti ya bombi nga na zangɔ mɔ. Se mɔ mai wa mɔ ti wakristo mɛ kpengbani na ya nyingɔ ko, mɔ na dungɔ na bɛta dungɔ lɛ ngɛ̃́ ti dengɔ bɛ. E ndo ye ĩ ayata mɛ apalanga mawoma! Zia ya, Yehova sulu ĩ na ngoi mɛ ĩ ndo li kpengbani ti tingɔ kpengbani na ya nyingɔ.​—Mas. 22:4.