1. Ti nɛngɔ ya, e ti awakristo mɛ kpengbani na ya nyingɔ ko, ye mɛ elengbi ti lingɔ nɛ?

 E NDO kamwã na ndenge mɛ e ndo hũ nyingambi ndo mai, wa lo ndo ti kangba iɔ. Maingɔ niko ndo li mabere ta ali ye kɔi ma. Kanda se mɔ ye maingɔ na ya nyingɔ ko, ayɔ ya mɔ li kpengbani. b (1 Kɔr. 13:11; Aeb. 6:1) Ti nɛngɔ ya, mɔ kokisa mɔkanɔ tɛ mɔ ko, ayɔ ya mɔ du na mangbi ti kpengbani na Yehova. E ndo du nga na gwɛ̃ ti nyingɔ vurú tɛ lo ti nɛngɔ ya, e ti na seliye ti nyingɔ mɛ lo ndo sepala na ni, e li nga kpengbani e mai na ya kwa mɛ e ndo li, wa ni na lɛkɛngɔ e na kumba mɛ e na luangɔ na bi mɛ na gangɔ.​—Mas. 1:5.

2. Wangɔ mɛ elengbi ti luangɔ na ndo tɛnɛ mɛ kaya Ebandeli 1:27 nɛ, wa ye mɛ e na mandangɔ so ya tɛnɛ mɛ nɛ? (Ba nga limɔ.)

² Yehova lindó azi kɔli ná awali. (Di Ebandeli 1:27.) Ni du yangondo ya, ta akɔli ná awali na ngunu kwɛ kɔi ma, wa ala ɔngbi nga na ya kpale mɛndɛ̃. Na ndakisa, Yehova lindó kɔli ná wali ya, ala li kwa mɛ lo hɛ̃ ala, ayɔndó ya, ala du na seliye nga na ngunu mɛ na zangɔ ala ya, ala le kwa mɛ lo hɛ̃ ala na se ni. (Eb. 2:18) Na ya tɛnɛ mɛ, e na mandangɔ ye mɛ nyita wali kɔi mɛ palanga alengbi ti lingɔ ti nɛngɔ ya, lo ti wali mɛ kpengbani na ya nyingɔ. Na pɔsɔ ti gesi, e na mandangɔ ye mɛ nyita kɔli mɛ palanga alengbi ti lingɔ.

3-4. Aya wali lengbi ti luangɔ nzɔ̃ se lɛlo mɛ ala landa ka wa? (Ba nga limɔ.)

³ Ngbangɔ kambisa tɛnɛ tɛ awali gba mɛndó ala kpengbani na ya nyingɔ, wa ala ndo ye ngandó Yehova, ala li ngandó kwa hɛ̃ lo. (Ba kaya jw.org tɛnɛ mɛ bɛli ni tɛnɛ apa ya “Mateya nini tokoki kozwa epai ya basi oyo Biblia elobeli?”) Ala ndó na seliye mɛ bɛli tɛnɛ mɛ ndo tɛnɛ tɛnɛ ni,“ta ala ndo li ye mɛ ndo ɔ nyɔ kpɔ̃ ni na ya seliye tɛ la ma” ala nga “mbilimbili na ya akpale zu.” Kanda aya wali alengbi ti mandangɔ aye gba ka tɛ awali awakristo ti ya bombi mɛ ala ndo ye Yehova gba.

⁴ Ayata wali mɛ apalanga, ĩ hĩnga ayata wali mɛ kpengbani na nyingɔ mɛ ĩ lengbi ti landangɔ se lɛlo tɛ ala? Ba seliye tɛ ala ti nzɔ̃ni. Wa binga li mɔ na ndo se mɛ mɔ lengbi ti landangɔ seliye tɛ ala. Kaya paragrafɛ mɛ ge gesi ko, e na tɛnɛngɔ tɛnɛ na ndo seliye ti ngbondoni taa tɛ awali mɛ kpengbani na ya nyingɔ.

5. Nda mɛ seliye ti zungɔ na tɛrɛ adu ngbondoni na lo tɛ wali wakristo mɛ kpengbani na ya nyingɔ nɛ?

⁵ Seliye ti zungɔ na tɛrɛ: Adu seliye ti ngbondoni tɛ awakristo mɛ kpengbani na ya nyingɔ. Se wali du na zungɔ na tɛrɛ ko, lo na dungɔ na mangbi ti nzɔ̃ni na Yehova nga na azi mɛndɛ̃. (Zk. 4:6) Na ndakisa, wali mɛ ndo ye Yehova, lo ndo pɔna na zungɔ na tɛrɛ zu tɔndɔngɔ ndia mɛ To lo ti ndozu kpã na omɛ aba lo-lengɔ gbia. (1 Kɔr. 11:3) Lo lengbi ti tɔndɔngɔ ndia niko kaya bombi nga kaya ndasewa mɛ lo ka da. c

6. Wangɔ mɛ aya wali lengbi ti luangɔ na ndo seliye ti zungɔ na tɛrɛ tɛ Rebeca nɛ?

⁶ E ba se lɛlo tɛ Rebeca. Lo dundó wali mɛ na ndara, na ya dungɔ lɛ ngɛ̃́ tɛ lo zu ko, lo mundó ekateli na ge ge ge zu, wa lo hĩnga ngandó ngoi, na se mɛ lo li na ye. (Eb. 24:58; 27:5-17) Kanda lo ndó na seliye ti tɔndɔngɔ ná zungɔ na tɛrɛ. (Eb. 24:17, 18, 65) Se du ya, na zungɔ na tɛrɛ zu mɔ tɔndɔ ebongiseli tɛ Yehova nga ma Rebeca, wa mɔ tɔndɔ azi mɛ Yehova hɛ̃ la kumba ti  tambwisangɔ kpale tɛ lo ko, mɔ na tingɔ na se lɛlo ti nzɔ̃ni na lo tɛ azi zu mɛ kaya ndasewa nga kaya bombi.

7. Ngasia la aya wali mɛ apalanga lengbi ti landangɔ se lɛlo ti bingɔ tɛrɛ tɛ Esther nɛ?

⁷ Seliye ti bingɔ tɛrɛ (bopɔlɔ): Ni du seliye mɛndɛ̃ mɛ wakristo mɛ kpengbani na ya nyingɔ ndo du na ni. Ngbangɔ tɛnɛ ya, ‘ndara ndo nɔ̃ nɔ̃ ndoni kɔi na bingɔ tɛrɛ (bopɔlɔ).’ (Mas. 11:2) Esther dundó wali mɛ ndo bi tɛrɛ lo, lo ngandó wa kwa tɛ Nzapa ti mbilimbili. Na lo mɛ ya, lo ndo bindó tɛrɛ lo ko, ta lo tindó na yakɛ na ngoi mɛndó lo ti ya gbia ma. Lo mandó wangɔ tɛ kuya lo Mordekai, wa lo tɔndɔ ngandó ni. (Est. 2:10, 20, 22) Mɔ lengbi nga ti dungɔ na bingɔ tɛrɛ se du ya, mɔ ndo hũnda wangɔ ti nzɔ̃ni ka tɛ azi mɛndɛ̃, wa mɔ ndo kpã nga ni na kwa.​—Tit. 2:​3-5.

8. Na bangɔ 1 Timɔte 2:9, 10, ngasia la seliye ti bingɔ tɛrɛ na zangɔ nyita wali kɔi ya, lo du na ndara ti pɔnangɔ bɔngɔ nga na lɛkɛngɔ tɛrɛ lo nɛ?

⁸ Esther fa ngandó seliye ti bingɔ tɛrɛ na ndenge mɛndɛ̃. Lo ndó “na nzɔ̃ tɛrɛ nvɛ̃ni mɛ alengbi ti bendangɔ likebi tɛ azi”; wa ta lo gindó ya, ni benda likebi tɛ azi ka ndo ni ma. (Est. 2:7, 15) Wangɔ mɛ aya wali mɛ awakristo lengbi ti luangɔ na ndo se lɛlo tɛ Esther nɛ? Kɔi ti wangɔ ni la atɛnɛ tɛnɛ ni kaya 1 Timɔte 2:9, 10. (Di.) Toma Polo hɛ̃ wangɔ hɛ̃ awali mɛ awakristo ya, ala yu bɔngɔ na se mɛ alengbi, nga na bingangɔ li ti nzɔ̃ni. Tɛnɛ ti Grɛkɛ mɛ atɛnɛ ni so ndo olo ndo fa ya, bɔngɔ tɛ awali mɛ awakristo alengbi ti hɛ̃ngɔ ndima, wa ala lengbi ti yungɔ ni na bangɔ ndenge mɛ azi mɛndɛ̃ ndo ma na tɛrɛ la. E na dengɔ bɛ gba na lo tɛ ĩ ayata wali mɛ ĩ ndo tɔndɔ wangɔ mɛ, wa ĩ ndo yu nga bɔngɔ na ndenge ti nzɔ̃ni!

9. Wangɔ mɛ elengbi ti luangɔ na ndo se lɛlo tɛ Abigail nɛ?

⁹ Bingangɔ li ti nzɔ̃ni: Adu seliye mɛndɛ̃ mɛ awali awakristo zu mɛ kpengbani na ya nyingɔ alengbi ti dungɔ na ni. Bingangɔ li ti nzɔ̃ni alengbi na nɛ? Adu likoki ti hĩngangɔ ye mɛ nzɔ̃ni ná ye mɛ siɔni, wa pɔnangɔ lingɔ ye ti nzɔ̃ni. E ba se lɛlo tɛ Abigail. Kɔ lo mundó ekateli ti siɔni mɛndó alengbi ti singɔ na kpengba kpale na ndo azi zu mɛ ka ndasewa tɛ lo. Abigail lindó ye iɔ. Bingangɔ li tɛ lo ti nzɔ̃ni abatandó dungɔ lɛ ngɛ̃́ tɛ azi. (1 Sam. 25:​14-23, 32-35) Nzɔ̃ bingangɔ li alengbi nga ti zangɔ e ya, e hĩnga ngoi mɛ e tɛnɛ na tɛnɛ, nga na ngoi mɛ e du so kpɔ. Wa ni ndo za e ya, e da bɛ e na azi mɛndɛ̃ zangangɔ ya, e kpã bɛ la ndozu.—1 Tɛs. 4:11.

10-11. Ngasia la mɔ ná azi mɛndɛ̃ ĩ lengbi ti luangɔ nzɔ̃ kpale na lége ti dingɔ nga na sungɔ mbeti nzɔ̃ni nɛ? (Ba nga limɔ.)

¹⁰ Wali mɛ wakristo alengbi ti lingɔ ya, seliye tɛ lo ti nzɔ̃ni mai. Ambanga kwa mɛndɛ̃ mɛ wali manda na ngoi mɛndó lo dɛ nyingambi ko, alengbi ti zangɔ lo na ya dungɔ lɛ ngɛ̃́ tɛ lo zu. E ba ase lɛlo mɛ.

 ¹¹ Mandangɔ dingɔ mbeti nga na sungɔ na seni nvɛ̃ni. Kaya akutimɛ mɛndɛ̃ ko, ta azi ndo hũ ya, kwa ti mandangɔ dingɔ mbeti nga na sungɔ ni nzɔ̃ni adu ngbondoni na lo tɛ awali ma. Kanda ni du ngbondoni na lo tɛ awakristo zu ya, ala manda dingɔ nga na sungɔ mbeti na se ni. d (1 Tim. 4:13) Ta e zi lége ya, ye kɔi agbanzi e na mandangɔ dingɔ nga na sungɔ mbeti nzɔ̃ni ma. Se du ya, mɔ li ngaso ko, nzɔ̃ kpale mɛ mɔ na luangɔ nɛ? Kwa niko lengbi ti zangɔ mɔ ya, mɔ lua falanga mɛ mɔ na gwɛ̃ ni. Wa ni na dungɔ woni na lo tɛ mɔ, ti nɛngɔ ya, mɔ manda Ngbangɔ wa mɔ ha nga ni na azi mɛndɛ̃. Omɛ di du nzɔ̃ni gba, mɔ na dɔngɔ dã na Yehova na lége ti dingɔ tɛnɛ tɛ lo nga na gbɔ̃ngɔ li mɔ na ndo ni.​—Yos. 1:8; 1 Tim. 4:15.

12. Ngasia la Masese 31:26 alengbi ti zangɔ mɔ ya, mɔ hĩnga tɛnɛngɔ tɛnɛ nzɔ̃ni nɛ?

¹² Manda se ti nzɔ̃ni ti tɛnɛngɔ tɛnɛ na azi. Ni du ngbondoni ya, wakristo ahĩnga tɛnɛngɔ tɛnɛ na ndenge ti nzɔ̃ni na azi mɛndɛ̃. Na lo ni ko, Yakobo hɛ̃ e wangɔ ti nzɔ̃ ni, lo tɛnɛ ya: “Ale zo kɔi kɔi ama tɛnɛ tɛ afɔ̃ lo hiɔ, kanda ta lo tɛnɛ tɛnɛ hiɔ hiɔ ma.” (Zaki 1:19) Mangɔ tɛnɛ mɛ zo mɛndɛ̃ ndo tɛnɛ na likebi zu, adu fangɔ songo na lo, ‘mangɔ nga tɛrɛ nga ma se mɛ lo ndo ma na tɛrɛ lo.’ (1 Pet. 3:8) Se ta mɔ hĩnga na seni tɛnɛ mɛ zo tɛnɛ bere se mɛ lo ndo ma na tɛrɛ lo ma ko, hũnda lo ya, lo kambisa ni hɛ̃ mɔ na ndenge ti nzɔ̃ni. Uzu ti mɔ tɛnɛngɔ tɛnɛ ko, mu ngoi ti nɛngɔ ya, mɔ binga li mɔ. (Mas. 15:28, ftn.) Hũnda tɛrɛ mɔ na ndo mɛ: ‘Tɛnɛ mɛ mbi ga tɛ adu biani, wa alengbi nga ti zangɔ zo? Ni fa se ti nzɔ̃ni ti tɔndɔngɔ zo bere ni fa songo?’ Lua wangɔ ka tɛ ayata wali mɛ ndo mando na seni, wa ala ndo tɛnɛ nga tɛnɛ na songo. (Di Masese 31:26.) Ma na likebi zu se mɛ ala ndo tɛnɛ na tɛnɛ. Se mɔ manda ye na seni ko, ni nga na dungɔ woni ya, mɔ ti kwa azi mɛndɛ̃, wa mɔ du nga na siriri na ala.

13. Wangɔ mɛ mɔ lengbi ti luangɔ na omɛ aba lɛkɛngɔ ya da nɛ? (Ba nga limɔ.)

¹³ Manda lɛkɛngɔ ya da. Kaya akɔdɔrɔ gba, awali la ndo li ambanga kwa gba kaya da. Mama tɛ mɔ bere nyita wali kɔi mɛ na makoki alengbi ti zangɔ mɔ ti nɛngɔ ya, mɔ manda kwa ti ngbondoni. Nyita wali Cindy tɛnɛ ya: “Kado ti nzɔ̃ni mɛ mama tɛ mbi zia hɛ̃ mbi adu ya, lo ha na mbi dengɔ bɛ mɛ zo ndo lua na lo ti ge ge ge mɛ lo ndo li. Mandangɔ kwa mabere, tɔngɔ ye, lɛkɛngɔ ya da, fũngɔ bɔngɔ bere vɔ̃ngɔ ye ka ngere, ni za mbi na ya dungɔ lɛ ngɛ̃́ tɛ mbi wa ni li nga ya, mbi hĩnga akwa mɛndɛ̃ gba na ya kwa tɛ Yehova. Mama tɛ mbi ha ngandó mbi na dungɔ na songo, ni hɛ̃ndó mbi lége ya, mbi ti na mangbi na ayata kɔli ná ayata wali ti nzɔ̃ni mɛndó mbi landa se lɛlo tɛ ala.” (Mas. 31:15, 21, 22) Wali kɔi mɛ lo hĩnga kwa nzɔ̃ni lo nga na songo ko, lo du nzɔ̃ sulu na lo tɛ azi zu ti ndasewa nga na ti ya bombi.​—Mas. 31:13, 17, 27; Aw. 16:15.

14. Wangɔ mɛ mɔ lua na ndo se lɛlo tɛ Crystal nɛ, wa ye mɛ ayɔ ya mɔ li nɛ?

 ¹⁴ Hĩngangɔ kwa. Ni du ngbondoni ya, awakristo zu amanda lingɔ kwa. (Fil. 4:11) Nyita wali Crystal tɛnɛ ya: “Awa dũngɔ mbi agwendó landa mbeti mɛ mbi ndo manda ka lycée ti nɛngɔ ya, mbi hĩnga lingɔ ye na seni. Ala sandó ngunu bɛ mbi ya, mbi landa fɔrmasiɔ̃.” To mbi sandó ngunu bɛ mbi ya, mbi li fɔrmasiɔ̃ ti comptabilite, ye mɛndó aza mbi gba na gesi la. Hãngɔ lingɔ kalasi ti yɔngɔrɔni mɛ alengbi ti zangɔ zo ya lo lua kwa zingɔ ko, ayɔ nga ya e manda salelangɔ falanga mɛ e ndo lua na se ni ti nɛngɔ ya, ta e li adepãsɛ gba ma. (Mas. 31:16, 18) E kpã kpale ti nyingɔ na ndo ti uzu na ya dungɔ lɛ ngɛ̃́ tɛ e, ni la ta e ti anyongo kiri kiri ma, wa e sepala bo na yakere mɛ e na ni.​—1 Tim. 6:8.

15-16. Ngasia la, ayata wali mɛ amɔdo ndo manda kpale ka tɛ azi mɛndɛ̃ nɛ? (Marko 10:29, 30)

¹⁵ Se du ya, mɔ ti na seliye ti nyingɔ mɛ, Yehova ndo ye, wa mɔ hĩnga nga akwa gba ko, mɔ na tingɔ na makoki ti kokisangɔ kumba mɛ mɔ na luangɔ na gesi nzɔ̃ni, zia e tɛnɛ tɛnɛ ti aye mɛ mɔ lengbi ti lingɔ.

¹⁶ Mɔ lengbi ti ngbãngɔ mɔdo na ya ngoi kɔi ngaso. Na mangbingɔ na tɛnɛ tɛ Yezo ko, awali mɛndɛ̃ ndo pɔna tɛ la dungɔ mɔdo, abɛse du ya, dungɔ mɔdo adu siɔni na kutimɛ ti kɔdɔrɔ tɛ ala. (Mat. 19:10-12) Ambanga ni lengbi ti ngbãngɔ mɔdo na ndombali akpale ndɛ̃ ndɛ̃ ndɛ̃. Hĩnga ya, ta Yehova ná Yezo alengbi ti hũngɔ mɔ ya, mɔ zanga valɛrɛ ka lɛ la na lo mɛ ya, mɔ du mɔdo ma. Na ya gigi zu ko, awali mɛ amɔdo ndo le kwa ti nzɔ̃ni mɛ ndo dũ nzɔ̃ le kaya abombi. Songo tɛ ala ná kwa tɛ ala ti nzɔ̃ni na lo tɛ azi mɛndɛ̃, ndo to awali mɛ awakristo ya, ala ti ayata wali nga amama ti nyingɔ na lo tɛ azi gba.​—Di Marko 10:29, 30; 1 Tim. 5:2.

17. Ngasia la nyita wali mɛ dɛ palanga alengbi ti lɛkɛngɔ tɛrɛ lo bandangɔ ndɛ ti nɛngɔ ya, lo li kwa tɛ wa sungɔ lége nɛ?

¹⁷ Mɔ lengbi ti lingɔ kwa ti wa sungɔ lége. Ayata wali mɛ awakristo adu ngbondoni na ya kwa ti fangɔ tɛnɛ. (Nz. 68:11) Mɔ lengbi ti lɛkɛngɔ ngoi tɛ mɔ bandangɔ ndɛ ti nɛngɔ ya, mɔ banda kwa tɛ wa sungɔ lége? Mɔ lengbi ti lingɔ kwa mabere wa sungɔ lége, lingɔ kwa ka ndo ti kĩngɔ da ti Lo-lengɔ Gbia, bere ka Bethel. Li sambela na lo ti mɔkanɔ mɛ mɔ kpã. Hũnda azi mɛ ali ngandó kwa niko uzu, wa mɔ na hĩngangɔ ye mɛ mɔ lengbi ti lingɔ ti nɛngɔ ya, mɔ kokisa mɔkanɔ tɛ mɔ. Li plan kɔi mɛ mɔ na kokisangɔ ni.  Se mɔ ti wa sungɔ lége ko, ni na hɛ̃ngɔ mɔ lége ya, mɔ le kwa gba na ya ebongiseli tɛ Yehova.

18. Nda mɛ nyita wali lengbi ti pɔnangɔ kɔli mɛ lo du na ni nzɔ̃ni nɛ? (Ba nga limɔ.)

¹⁸ Ngoi mɛndɛ̃ mɔ lengbi ti pɔnangɔ lingɔ libala. Aseliye nga na akwa mɛ e tɛnɛ tɛnɛ ni na ya tɛnɛ mɛ na zangɔ mɔ ti nɛngɔ ya, mɔ ti wali mɛ ahĩnga kwa nzɔ̃ni. Se du ya, mɔ ti na gwɛ̃ ti lingɔ libala ko, mɔ lengbi ti pɔnangɔ kɔli bere wali na ndenge ti nzɔ̃ni. Adu ekateli ti ngbondoni mɛ mɔ na mungɔ na ya dungɔ lɛ ngɛ̃́ tɛ mɔ. Ta bɛ mɔ li na ni ma ya, mɔ na yengɔ tɔndɔngɔ ndia tɛ kɔ mɔ. (Roma 7:2; Ef. 5:23, 33) Ni la, hũnda tɛrɛ mɔ na ndo mɛ: ‘Lo du kpengbani na nyingɔ? Lo ndo kpã kpale ti nyingɔ na ndo ti uzu na ya dungɔ lɛ ngɛ̃́ tɛ lo? Lo ndo mu ekateli ti ndara? Lo hĩnga yungɔ ndo tɛ lo? Lo ndo tɔndɔ awali? Lo na dungɔ kpengbani ti batangɔ mbi na ya nyingɔ, na ya mi, nga na ya bingangɔ li? Lo ndo kokisa akumba tɛ lo na seni? Na ndakisa akumba mɛ lo na ni kaya bombi nɛ, wa lo ndo kokisa ni ngasia?’ (Luka 16:10; 1 Tim. 5:8) Ni la, se mɔ ye luangɔ kɔli ti nzɔ̃ni mɛ na makoki ko, ayɔ ya, mɔ du nga wali mɛ na seliye ti nzɔ̃ni.

19. Nda mɛ zangɔ akɔli adu kwa mɛ ndo hɛ̃ awali ndima gba nɛ?

¹⁹ Ngbangɔ tɛnɛ tɛnɛ tɛ wali ti nzɔ̃ni ya “lo ndo za” kɔ lo wa “lo ndo hɛ̃ nga lo ti.” (Eb. 2:18) Se lo li ngaso ko, afa ya ta lo na ndima ma? Ipɔ! Salisangɔ akɔla adu kwa mɛ ndo hɛ̃ awali ndima gba. Ta bɛ mɔ li na ni ma ya, Ngbangɔ ndo ili Yehova ya, “wa zangɔ.” (Nz. 54:4; Aeb. 13:6) Na ndakisa, na ngoi mɛ lo ndo mu ekateli na lo ti ndasewa ko, wali ná kɔli ndo du na mangbi ti nɛngɔ ya, kpale nɔ̃ nɔ̃ na seni. Lo ndo li zu mɛ lo lengbi ti lingɔ so zangɔ azi mɛndɛ̃ ya, ala hũ seliye ti nzɔ̃ni tɛ kɔ lo. (Mas. 31:11, 12; 1 Tim. 3:11) Mɔ lengbi na olo ti lɛkɛngɔ tɛrɛ mɔ ti nɛngɔ ya mɔ du wali mɛ ndo li songo tɛrɛ Yehova nga na zangɔ azi mɛndɛ̃ ti ndasewa ná ti ya bombi ya, ala ti kpengbani.

20. Se lɛlo ti nzɔ̃ni mɛ wali lengbi ti ziangɔ ka ndasewa tɛ lo nɛ?

²⁰ Mɔ lengbi ti tingɔ ta ayangambi. Na pɛ lingɔ libala ko, mɔ ná kɔ mɔ na tingɔ na bingangɔ li ya, ĩ dũ ayangambi. (Nz. 127:3) Ni la, adu nzɔ̃ni ya, ĩ binga li ĩ na ndo ye mɛ ĩ lengbi ti lingɔ ti nɛngɔ ya, ĩ du ayangambi. Aseliye ná akwa mɛ e tɛnɛ tɛnɛ ni so ya tɛnɛ mɛ na zangɔ ĩ se ĩ ti awali bere akɔli ti libala. Se du ya, mɔ ndo ye azi, mɔ ndo du na songo, nga na yɔngɔrɔ bɛ ko, mɔ na zangɔ azi ti ndasewa tɛ mɔ ya, ala du na dengɔ bɛ, wa ayangambi tɛ mɔ na hũngɔ ya, ĩ ndo bata ala, ĩ ndo ye nga ala.​—Mas. 24:3.

21. E ndo ma tɛrɛ e nga ngasia na lo tɛ ayata wali nɛ, wa na lo nɛ? (Ba limɔ ti koko mbeti.)

²¹ Ayata wali e ndo ye ĩ, na lo ti ye zu ko la ĩ ndo li na lo tɛ Yehova nga na azi mɛndɛ̃. (Aeb. 6:10) Ĩ ndo li kwa kpengbani ti nɛngɔ ya, ĩ ti na seliye ti nyingɔ, ĩ hĩnga lengɔ kwa nzɔ̃ni, ni na batangɔ dungɔ lɛ ngɛ̃́ tɛ ĩ nga na tɛ azi mɛ so gunda ĩ, wa ni nga na lɛkɛngɔ ĩ na lo ti kota kumba mɛ ĩ na luangɔ na bi mɛ na gangɔ. Ĩ du ngbondoni na ya linɔ tɛ Yehova!