1. Se e gbɔ̃ li e na ndo loyengɔ tɛ Abrahama ko, ahũnda mɛ elengbi ti hũndangɔ na tɛrɛ e nɛ?

 ABƐSE azi gba amandó pandɛ ti dungɔ lɛ ngɛ̃́ tɛ Abrahama ko, ta ala hĩnga akpale gba mɛ aba lo ma. Kanda ɔngbingɔ na ala, mɔ hĩnga akpale gba mɛ aba Abrahama. Na ndakisa, mɔ hĩnga ya Ngbangɔ pa ya, Abrahama du “to azi zu mɛ na loyengɔ.” (Roma 4:11, NWT) Ngoi mɛndɛ̃ mɔ lengbi ti hũndangɔ tɛrɛ mɔ na ndo ya, ‘Mbi lengbi ti dungɔ na loyengɔ ti kpengbani nga ma tɛ Abrahama?’ Ĩi, mɔ lengbi ti dungɔ na ni.

2. Nda mɛ mandangɔ se lɛlo tɛ Abrahama adu ngbondoni nɛ? (Zaki 2:22, 23)

² Lége kɔi mɛ mɔ lengbi ti tingɔ na loyengɔ ti kpengbani nga ma tɛ Abrahama adu na mandangɔ se lɛlo tɛ lo. Abrahama lindó aye zu mɛndó Nzapa yɔ ka ti lo, lo ziandó kɔdɔrɔ tɛ lo, lo dundó ka gbɛ da ti gofa abulu gba, wa lo yendó hɛ̃ngɔ nyi lo Yisaka mabere mbeka hɛ̃ Nzapa. Aye niko zu ndo fandó ya, lo na loyengɔ ti kpengbani nvɛ̃ni. Na lo ti loyengɔ nga na kwa tɛ Abrahama ko, Yehova yendó lo, wa lo tindó kwa Yehova. (Di Zaki 2:22, 23.) Gwɛ̃ tɛ Yehova du ya, e zu e du azi mɛ lo ndo ye e, wa e du nga akwa lo, abɛse mɔ nga. Na lo ni la, na lége ti Nyingɔ vurú tɛ lo, lo tondó toma Polo ná Yakobo ya, ala su se lɛlo ti nzɔ̃ni tɛ Abrahama kaya Ngbangɔ. Na ya tɛnɛ mɛ e na mandangɔ atɛnɛ ti ngbondoni mɛndó toma Polo ná Yakobo atɛnɛ na lo tɛ Abrahama kaya mbeti ti Roma shapitrɛ ti 4 nga na Zaki shapitrɛ ti 2. Ala zu sɛ atɛnɛ tɛnɛ mɛ ngbondoni na lo tɛ Abrahama.

3. Tɛnɛ tɛ toma Polo ná tɛ Yakobo alo kaya vɛrse ti nɛ?

³ Tɛnɛ tɛ toma Polo na tɛ Yakobo alo kaya mbeti ti Ebandeli  15:6 mɛ apa ya: “[Abrahama] fandó loyengɔ na mbage tɛ Nzapa, wa ailindó lo ya, lo du zo ti mbilimbili.” Kaya Ngbangɔ Yehova ndo mu zo ya, lo du zo ti mbilimbili bere zo mɛ azanga siɔ kpale na ngoi mɛ zo niko ndo li aye mɛ ndo hɛ̃ lo dengɔ bɛ. Adu nvɛ̃ni ye ti kamwangɔ ya, Nzapa ili zo ti zangangɔ lengbingɔ nga wa siɔ kpale ya, lo zo ti mbilimbili mɛ azanga siɔ lo! Mɔ nga na gwɛ̃ ya, Nzapa ili mɔ ya, mɔ du zo ti mbilimbili, wa lo lengbi ti lingɔ ni. Zia e ba nda mɛndó Yehova ili Abrahama ya, zo ti mbilimbili nga na aye mɛ elengbi ti lingɔ ti nɛngɔ ya, Nzapa mu nga e ya, e du azi ti mbilimbili.

4. Ye mɛ ndo gbanzi azi ya, ta ala du mbilimbili ma nɛ?

⁴ Na ya mbeti mɛndó lo to hɛ̃ azi ti Roma ko, Polo pandó ya, azi zu adu awa siɔ kpale. (Roma 3:23) Wa ngasia la Nzapa lengbi ti ilingɔ e ya, e du azi ti mbilimbili bere azi mɛ azanga siɔ kpale nɛ? So zangɔ awakristo zu ya, ala lua gbinya ti hũnda niko ko, Polo tɛnɛndó tɛnɛ ti se lɛlo tɛ Abrahama.

5. Nda mɛndó Yehova ili Abrahama ya, lo du zo ti mbilimbili nɛ? (Roma 4:2, 4)

⁵ Yehova ilindó Abrahama ya, zo ti mbilimbili na ngoi mɛndó lo ka kɔdɔrɔ ti Kanana. Nda mɛndó Yehova pa ya, Abrahama du zo ti mbilimbili nɛ? Na lo mɛ ya, Abrahama ndo tɔndɔndó na ndenge ti lengbingɔ andia tɛ Moizɛ? Ta seni la ma. (Roma 4:13) Ngoi mɛndó Yehova ili Abrahama ya, lo du zo ti mbilimbili ko, ta adɛndó hɛ̃ aya Izraɛlɛ ndia tɛ Moizɛ ma, abulu bere 400 na gesi la ahɛ̃ndó ndia niko. Wa nda mɛndó Nzapa ili Abrahama ya, zo ti mbilimbili nɛ? Na lo ti nzɔ̃ bɛ tɛ lo mɛ azanga maka ko, Yehova ilindó Abrahama ya, zo ti mbilimbili na lo ti loyengɔ tɛ lo.​—Di Roma 4:​2-4.

6. Nda mɛ Yehova lengbi ti ilingɔ azi ti zangangɔ lengbingɔ ya, ala du mbilimbili nɛ?

⁶ Polo tɛnɛ ya, se zo du na loyengɔ ka tɛ Nzapa ko, “Nzapa na mungɔ lo ya, lo [zo ti mbilimbili] na lo ti loyengɔ tɛ lo.” (Roma 4:5) Polo di tɛnɛ ya: “Se tɛnɛ mɛ Davidi atɛnɛ na lo tɛ azi mɛ ta Nzapa ndo ba kwa mɛ ala ndo li ma la. Kanda Nzapa ndomu ala ya, ala [du azi ti mbilimbili] ko, dengɔ bɛ ati na azi niko. Tɛnɛ mɛ ndo Davidi atɛnɛ lo mɛ: ‘Dengɔ bɛ ati na azi ko la Nzapa aka lɛ lo ndo asiɔ ye tɛ la, ahã nga siɔ ye tɛ la azi; dengɔ bɛ ati na azi ko la ta Nzapa akpã bɛ lo ndo asiɔ ye tɛ la ma.’” (Roma 4:6-8; Nz. 32:​1, 2) Nzapa ndo ka lɛlo bere lo ndo vĩ ndo siɔ kpale tɛ azi mɛ ndo du na loyengɔ ka tɛ lo. Lo ndo ka lɛlo na ndo siɔ kpale tɛ ala, wa ta lo ndo da bɛ lo na ni fãni mɛndɛ̃ ma. Lo ndo hũ azi niko nga ma azi mɛ ta ali siɔ ye kɔi ma, nga azi ti mbilimbili na lo ti loyengɔ tɛ ala.

7. Nda mɛ elengbi ti tɛnɛngɔ ya, azi mɛndó ali kwa hɛ̃ Nzapa na ngoi ti gã adu azi ti mbilimbili nɛ?

⁷ Abɛse du ya, Nzapa ilindó Abrahama, Davidi nga na awa kwa tɛ lo mɛndɛ̃ ya, azi ti mbilimbili ko, ala bondó awa lingɔ siɔ kpale. Kanda na lo ti loyengɔ tɛ ala ko, Yehova hũndó ala mabere azi mɛ azanga siɔ kpale, gba ni na ngoi mɛndó lo ndo haka ala na azi mɛ ta ndo vɔrɔ lo ma. (Ef. 2:12) Nga ma se mɛ Polo tɛnɛ na ni yangondo na ya mbeti tɛ lo ko, loyengɔ adu ngbondoni nvɛ̃ni ti nɛngɔ ya, e du akwa Nzapa. Abrahama ná Davidi adundó akwa Yehova na lo mɛ ya, ala ndó na loyengɔ na mbage tɛ lo. Elengbi nga ti tingɔ akwa Yehova na lo ti loyengɔ tɛ e.

8-9. Dangɔ bɛ ti siɔni mɛ azi mɛndɛ̃ na ni na ndo tɛnɛ tɛ Polo ná Yakobo nɛ, wa na lo nɛ?

⁸ Na ya abulu gba, agbia ti asambela ndo ha atɛnɛ ndɛ̃ ndɛ̃ ndɛ̃ na ndo kpale mɛ aba fangɔ loyengɔ na lége ti kwa. Ambanga agbia ti sambela gba ndo pa ya, ye mɛ ayɔ ya zo li so luangɔ songɔ kwá adu bo yengɔ lo tɛ Yezo Kristo. Ngoi mɛndɛ̃ mɔ ka mɔ mandó ala ndo tɛnɛ  tɛnɛ mɛ “Ĩ ye lo tɛ Yezo, wa ĩ na songɔ kwá.” Ambanga ni ndo tɛnɛ ya, Polo tɛnɛndó ngaso na ngoi mɛndó lo pa ya: “Ta Nzapa ndo ba kwa mɛ ala ndo li ma. Kanda Nzapa ndomu ala ya, ala [azi ti mbilimbili].” (Roma 4:6) Hãngɔ ni zingɔ ambanga ni ndo tɛnɛ ya, zo na luangɔ songɔ kwá se lo li ambanga aye ti sambela mabere gwengɔ bangɔ ndo ti sambela mɛ ala ndo hũ ya, ni du santo (pèlerinages) nga na lingɔ ambanga aye mɛ sambela ndo yɔ ya, ala li. Ngoi mɛndɛ̃ ala ndo di mbeti ti Zaki 2:24 mɛ apa ya, “Ta Nzapa ndomu zo ya, lo [du mbilimbili] na lo ti loyengɔ tɛ lo kɔi ma.”

⁹ Na lo ti akpale niko sɛ ko, ambanga azi mɛ ndo kambisa nda Ngbangɔ ndo da bɛ la ya, Polo ná Yakobo atɛnɛ tɛnɛ mɛ aɔngbi na omɛ aba aye mɛ zo li ti nɛngɔ ya, Nzapa ye lo. Na bangɔ dangɔ bɛ tɛ agbia mɛndɛ̃ ti sambela ko, Polo ndo yendó ya, se zo du bo na loyengɔ ko, alengbi, Nzapa na yengɔ lo, kanda Yakobo ndo ye tɛ lo ndó ya, ta loyengɔ kɔi alengbi ma, kwa mɛ zo ndo li la, adu ngbondoni ti nɛngɔ ya Nzapa ye lo. Prɔfɛsɛrɛ kɔi mɛ ndo ha akpale ti sambela apa ya: “Ta Yakobo gbɔ̃ndó nda mɛ Polo tɛnɛ ya, ta dungɔ na loyengɔ kɔi alengbi ti lingɔ ya, zo du mbilimbili ma, wa ta Yakobo yendó dangɔ bɛ niko tɛ Polo ma.” Yehova ndó la ato Polo ná Yakobo ya, ala su atɛnɛ mɛ na lége ti Nyingɔ vurú tɛ lo. (2 Tim. 3:16) Ni la, ndenge ti woni ti kambisangɔ na tɛnɛ mɛndó ala sɛ atɛnɛ da. Ayɔ ya, e ba na seni ambanga atɛnɛ mɛndó ala tɛnɛ uzu nga na pɛ tɛnɛ mɛ aba loyengɔ.

10. “Kwa” mɛndó Polo ndo tɛnɛ tɛnɛ na lo ni nɛ? (Roma 3:21, 28) (Ba nga limɔ.)

¹⁰ “Kwa” mɛndó Polo tɛnɛ tɛnɛ na lo ni mɛ kaya Roma 3 ná 4 nɛ? Lo ndo tɛnɛndó tɛnɛ ti ‘kwa mɛ aba tɔndɔngɔ ndia’ tɛ Moizɛ mɛndó ahɛ̃ azi ti Izraɛlɛ ka ndo ngomba ti Sinai. (Di Roma 3:​21, 28.) Alengbi ti dungɔ ya, na ngoi  tɛ Polo ko, ambanga awakristo ti yuda ndo hũndó ya, ayɔ ya ala ndo tɔndɔ bo ndia tɛ Moizɛ nga na akpale mɛndó ni ndo yɔ. Na lo ni la, Polo hɛ̃ndó se lɛlo tɛ Abrahama ti fangɔ ya, ta Nzapa ndo mu zo ya, lo du mbilimbili na lo ti “tɔndɔngɔ ndia tɛ Moizɛ” nga na akwa mɛ ni ndo yɔ ma, kanda na lo ti loyengɔ tɛ lo na mbage tɛ Nzapa. Hĩngangɔ ni adu ye ti sangɔ ngunu bɛ na lo mɛ ya, afa ya se e du na loyengɔ na mbage tɛ Yehova nga ná Yezo ko, ni lengbi ti lingɔ ya, Nzapa ye e.

11. “Kwa” mɛndó Yakobo tɛnɛ tɛnɛ na lo ni nɛ?

¹¹ Kanda “kwa” mɛ Zaki shapitrɛ ti 2 tɛnɛ tɛnɛ ni ko, ta ni du kwɛ kɔi na ye mɛ ndia tɛ ayuda ndo yɔ ma. Yakobo ndo tɛnɛ tɛnɛ ti kwa mɛ awakristo ndo li na ya dungɔ lɛ ngɛ̃́ tɛ la ti bi kɔi kɔi. Kwa niko la ndo fa bere wakristo na bɛta loyengɔ ka tɛ Nzapa bere ta lo na ni ma. Zia e ba se lɛlo sɛ mɛ Yakobo hɛ̃.

12. Ngasia la Yakobo kambisa mangbi mɛ na popo ti loyengɔ ná kwa mɛ zo ndo li nɛ? (Ba nga limɔ.)

¹² Na ya ndakisa tɛ lo ti uzu ko, Yakobo tɛnɛ ya, ale ta awakristo ndo pɔna lɛ azi ma, ala ndo li kpale tɛrɛ azi zu kwɛ kɔi. Lo kambisa ni yangondo na hɛ̃ngɔ se lɛlo tɛ zo kɔi mɛndó ali kpale tɛrɛ zo mɛ wa ngenza na songo, wa lo li kakulu lo tɛrɛ wa yɛrɛ. Yakobo tɛnɛ ya, zo ti ngaso lengbi ti dangɔ bɛ lo ya, ni na loyengɔ na mbage tɛ Nzapa, kanda kwa tɛ lo ndo fa yangondo ya, ta lo na loyengɔ ma. (Zaki 2:​1-5, 9) Yakobo di hɛ̃ se lɛlo mɛndɛ̃, lo tɛnɛ tɛnɛ tɛ zo kɔi mɛ ahũ ‘nyita kɔli bere nyita wali kɔi azanga tɛ ti tɛngɔ nga na bɔngɔ ti yungɔ’ kanda ta lo li ye kɔi so zangɔ lo ma. Abɛse zo niko lengbi ti pangɔ ya ni na loyengɔ ko, kwa tɛ lo ndo fa yangondo ya, ta lo na loyengɔ bɛ yakere ma. Nga ma se mɛ Yakobo su na ni, “se zo nɛ ya, ni ye lo tɛ Nzapa kanda ta lo ndo li nzɔ̃ ye ma ko, . . . lo yengɔ tɛ lo adu gɛgɛrɛ.”​—Zaki 2:14-17.

13. Yakobo hɛ̃ndó se lɛlo tɛ na, na omɛ aba dungɔ na loyengɔ nga na fangɔ ni na lége ti kwa nɛ? (Zaki 2:25, 26)

 ¹³ Yakobo tɛnɛ tɛnɛ tɛ Rahaba so hɛ̃ngɔ se lɛlo tɛ zo mɛndó afa na lége ti kwa tɛ lo ya, ni na bɛta loyengɔ. (Di Zaki 2:25, 26.) Lo mandó pandɛ tɛ Yehova, wa lo ndó na loyengɔ ya, Yehova la ndo za aya Izraɛlɛ. (Yos. 2:9-11) Lo fandó loyengɔ tɛ lo na lége ti kwa​—lo batandó aya Izraɛlɛ sɛ na ngoi mɛndó dungɔ lɛ ngɛ̃́ tɛ ala ati na ya kaka. Ni lindó ya, wali niko mɛ zo ti siɔ kpale, mɛ ta lo nga zo ti ndasewa tɛ aya Izraɛlɛ ma ko, Nzapa mundó lo ya, lo du mbilimbili nga ma se tɛ Abrahama. Ta Rahaba ná Abrahama ahĩngandó ndia tɛ Moizɛ ma. Se lɛlo tɛ ala ndo fa nda mɛ adu ngbondoni ya, e fa na lége ti kwa tɛ e ya, e na loyengɔ.

14. Nda mɛ elengbi ti tɛnɛngɔ ya, ta Polo ná Yakobo atɛnɛ atɛnɛ sɛ mɛ aɔngbi ma nɛ?

¹⁴ Polo ná Yakobo tɛnɛndó tɛnɛ mɛ aba loyengɔ ná kwá, na ya akpale sɛ mɛ akɛsɛnɛ. Polo yendó tɛnɛngɔ hɛ̃ awakristo ti Yuda ya, ta tɔndɔngɔ bo andia tɛ Moizɛ nga na kwa mɛ ni ndo yɔ la na lingɔ ya, Yehova ye ala ma, kanda Yakobo kambisandó yangondo nda mɛ adu ngbondoni ya, awakristo zu afa loyengɔ tɛ ala na lége ti kwa, na lingɔ ye ti nzɔ̃ni tɛrɛ azi mɛndɛ̃.

15. Ambanga akwa mɛ elengbi ti lingɔ so fangɔ loyengɔ tɛ e nɛ? (Ba nga limɔ.)

¹⁵ Ta Yehova yɔ ka ti e ya, e li aye kwɛ kɔi na omɛndó Abrahama li ti nɛngɔ ya, e du azi ti mbilimbili ka tɛ lo ma. Elengbi ti fangɔ loyengɔ tɛ e na lége ti aye ndɛ̃ ndɛ̃ ndɛ̃ nga na akwa mɛ e ndo li. Na ndakisa, elengbi ti yambangɔ azi ti fãnani mɛ aga bombi, zangɔ ayata kɔli ná ayata wali mɛ ati na ya kpengba kpale, lingɔ nzɔ̃ kpale tɛrɛ azi ti ndasewa tɛ e, ni du aye mɛ Nzapa ndo ye, wa lo nga na sulungɔ e. (Roma 15:7; 1 Tim. 5:4, 8; 1 Yn. 3:18) Lége kɔi ti ngbondoni mɛ elengbi ti fangɔ ya, e na loyengɔ ka tɛ  Nzapa adu na hɛ̃ngɔ tɛrɛ e na ge ge ge na ya kwa ti fangɔ tɛnɛ. (1 Tim. 4:16) E zu elengbi ti fangɔ na lége ti kwa tɛ e ya, e na loyengɔ ya, akapa tɛ Yehova na tingɔ na seni, wa se tɛ lo ti lingɔ kpale la adu mbilimbili. Se e li ngaso ko, elengbi ti yengɔ na bɛ e kɔi ya, Yehova na mungɔ e ya, e du azi ti mbilimbili wa e nga na tingɔ akwa lo.

16. Nzɔ̃ dangɔ bɛ mɛndó Abrahama na ni nɛ, wa nda mɛ kpãngɔ bɛ na ndo loyengɔ ni adundó ngbondoni nɛ?

¹⁶ Roma shapitrɛ ti 4 akambisa wangɔ mɛndɛ̃ ti ngbondoni mɛ elengbi ti luangɔ ka tɛ Abrahama: kpãngɔ lɛ e na ndo nzɔ̃ dangɔ bɛ tɛ e. Yehova kondó kapa hɛ̃ Abrahama ya, “andasewa gba ti lɛ sese” na luangɔ nzɔ̃ sulu ti ndo lo. Binga li mɔ na ndo nzɔ̃ dangɔ bɛ ti ngaso mɛndó Abrahama na ni! (Eb. 12:3; 15:5; 17:4; Roma 4:17) Abɛse ngaso ko, tee ka la Abrahama ti na bulu 100 wa ya lo Sara na bulu 90 ko, ta ala dɛ dũndó nyi ma. Na bangɔ dangɔ bɛ tɛ azi ko, ta Abrahama ná Sara alengbindó ti dũngɔ nyi ma. Ni dundó kpengba kpale na lo tɛ Abrahama. Kanda ‘Na lo ti loyengɔ, lo tindó na nzɔ̃ dangɔ bɛ ya, ni na tingɔ kotara azi ti ndasewa gba.’ (Roma 4:18, 19) Wa ye mɛndó Abrahama na loyengɔ na lo ni atindó na seni. Lo dũndó Yisaka nyingambi mɛndó lo ndo kũ na bɛ lo kɔi.​—Roma 4:​20-22.

17. Ngasia la e hĩnga ya, Yehova lengbi ti mungɔ e nga ma azi ti mbilimbili nga akwa lo nɛ?

¹⁷ Nzapa lengbi ti yengɔ e nga na mungɔ e mabere azi ti mbilimbili nga akwa lo nga ma tɛ Abrahama. Ni la adu tɛnɛ mɛndó Polo ye tɛnɛngɔ na ngoi mɛndó lo pa ya: “Tɛnɛ mɛ asu kaya buku tɛ Nzapa ya, ‘Nzapa amu ndo Abrahama ka lɛ lo ya, lo [du zo ti mbilimbili]’ ko, ta asu ni bo na lo tɛ [Abrahama] kɔi ma. Kanda asu nga ni na lo tɛ e mɛ Nzapa amu e ka lɛ lo ya, e du abɛta azi, e mɛ e ye lo tɛ lo mɛndó lo so Gbia tɛ e Yezo Kristo na pɛ kwá.” (Roma 4:23, 24) Nga ma Abrahama, ayɔ ya, e fa loyengɔ tɛ e na lége ti kwa tɛ e, wa e kpã bɛ e zu na ndo Yehova ya, lo na kokisangɔ akapa tɛ lo. Polo di tɛnɛ tɛnɛ ti nzɔ̃ dangɔ bɛ tɛ e kaya Roma shapitrɛ ti 5, e na mandangɔ ni na pɔsɔ ti gesi.