Mɔ di mbalasi na seni nvɛ̃ni animɛro ti Linɔngi ti Sinzili ti bulu mɛ? Ba se du ya, mɔ lengbi ti hɛ̃ngɔ gbinya ti ahũnda mɛ:

Ye mɛ ayɔ ya, zo li ti nɛngɔ ya, lo gbinyangbi bingangɔ li tɛ lo ati fãnani nɛ? (Roma 12:2)

Ta lingɔ ni angbã bo na lingɔ anzɔ̃ ye ma. Kanda ayɔ ya, e ba kaya bɛ e nga na se du tɛ e, ti nɛngɔ ya, e hũ aye mɛ elengbi ti gbinyangbingɔ ti nɛngɔ ya, dungɔ lɛ ngɛ̃́ tɛ e amangbi na ndia tɛ Nzapa.​—w23.01 pajɛ 8-9.

Ngasia la elengbi ti dungɔ na bokatikati na ngoi mɛ e ndo hũ akpale mɛ ndo ɔ so lɛ gigi olo nɛ?

E ndo hũ ndenge mɛ akpale mɛ ndo ɔ ndɛ so lɛ gigi ndo kokisa aprofesi ti ya Ngbangɔ. Na nɛngɔ ya, e tɛnɛ na ndenge tɛ e ya, ni ndo kokisa aprofesi ti ya Ngbangɔ ko, na dungɔ nzɔ̃ni ya, e gi hĩngangɔ yɛ mɛ linɔ tɛ Yehova ndo tɛnɛ na ndo akpale ti ngaso. Ni na lingɔ ya, e bata mangbi, wa ta kangbi adu na popo tɛ e ma. (1 Kɔr. 1:10)​—w23.02 pajɛ 16.

Batisimɔ tɛ Yezo akɛsɛnɛ na tɛ ava lo na nɛ?

Ta ayɔndó ya, Yezo hɛ̃ tɛrɛ lo hɛ̃ Yehova nga ma se mɛ e ndo li na ni ma, na lo mɛ ya, adũndó lo kaya ndasewa tɛ azi ti kɔdɔrɔ mɛndó ahɛ̃ tɛrɛ la hɛ̃ Yehova. Ta ayɔndó ya, lo gbinya bɛ lo na lo ti siɔ kpale ma, na lo mɛ ya, lo dundó zo ti lengbingɔ.​—Aeb. 4:15; 1 Pet. 2:22.​—w23.03 pajɛ 5.

Ngasia la, elengbi ti zangɔ azi mɛndɛ̃ ya, ala hɛ̃ gbinya ka bombi nɛ?

Elengbi ti hɛ̃ngɔ gbinya ti ndununi ti nɛngɔ ya, azi mɛndɛ̃ alua lége ti tɛnɛngɔ tɛnɛ. Ta e hɛ̃ gbinya na ndo akpale zu mɛ atɛnɛ tɛnɛ ni kaya paragrafɛ e kɔi ma, lingɔ ngaso na zangɔ azi mɛndɛ̃ ya, ala du na aye mɛ ala lengbi ti hɛ̃ngɔ gbinya na ndoni.​—w23.04 pajɛ 23.

“Lége mɛ santo” mɛ atɛnɛ tɛnɛ ni kaya Yisaya 35:8 adu nɛ?

Adu lége ti yika yika mɛndó aya Izraɛlɛ aɔ ti da na ngoi mɛndó ala lo ka gbɛ ngba ka Babilɔnɛ so diringɔ ka Yerusalɛmɛ. Wa ndɛ na ngoi tɛ e mɛ? Abulu gba uzu ti 1919 ko, kwa ti lɛkɛngɔ lége abandó lingɔ tɛrɛ lo​—mabere kwa ti gbinyangbingɔ nga na singɔ na Ngbangɔ. Lége mɛ santo mɛ awa kwa tɛ Nzapa ndo nɔ nɔ ti da ali ya, ala li kaya paradizo ti nyingɔ mɛ na lingɔ ya, ala lua nzɔ̃ sulu kaya Lo-lengɔ Gbia.​—w23.05 pajɛ 15-19.

Masese shapitrɛ ti 9 ahɛ̃ awangɔ ndɛ̃ ndɛ̃ ndɛ̃ na ndo awali ti yika yika. Awali ni la ana?

Mbeti ti Masese ndo tɛnɛ tɛnɛ tɛ “wali ti bubulu” mɛ lo ndo ili azi ya, ala ga ka tɛ lo, se azi aye gwengɔ ka tɛ lo ko, lo na tongɔ ala kaya “du ti kwá.” Kanda “wali ti ndara” ndo ili azi ya, ala ga ka tɛ lo, se ala gwe ka tɛ lo ko, ala na mungɔ “lége ti kɔdɛ” nga na dungɔ lɛ ngɛ̃́. (Masese 9:1, 6, 13, 18)​—w23.06 pajɛ 22-24.

Ngasia la Yehova fandó ya, lo du zo ti zungɔ na tɛrɛ, wa ta lo wa kakulu lo ma na ndo kpale tɛ Lota nɛ?

Yehova hɛ̃ndó nyɔ hɛ̃ Lota ya, lo si kaya kɔdɔrɔ ti Sodome, wa lo kpɛ lo gwe ka ndo hɔtɔ. Ngoi mɛndó Lota yɔ ka ti Yehova ya, ni gwe ka kɔdɔrɔ ti Zoar ko, Nzapa yendó dangɔ bɛ tɛ lo.​—w23.07 pajɛ 21.

Ye mɛ wali lengbi ti lingɔ se du ya, kɔ lo ndo ba pɔrnografi nɛ?

Ale ta bɛ lo li na ni ma ya, ta adu fotɛ tɛ lo ma. Ayɔ ya lo kpã lɛ lo na ndo mangbi tɛ lo na Nzapa na dingɔ nga na gbɔ̃ngɔ li lo na ndo pandɛ tɛ awali mɛ Ngbangɔ tɛnɛ tɛnɛ tɛ la mɛndó ala tengbi na akpale ti pɛnɔ, wa ni na zangɔ lo. Lo lengbi nga ti zangɔ kɔ lo ya, lo kpɛ akpale niko.​—w23.08 pajɛ 14-17.

Na ngoi mɛ azi mɛndɛ̃ atɛnɛ siɔni na lo ti loyengɔ tɛ e, ngasia la kɔdɛ ti hĩngangɔ ndo na zangɔ e ya, e li ye na wo bɛ nɛ?

Elengbi ti hũngɔ hũnda bere tɛnɛ ti siɔni mɛ azi mɛndɛ̃ ndo tɛnɛ nga ma ye mɛ na zangɔ e ya, e hĩnga dangɔ bɛ tɛ azi mɛndɛ̃ bere ye mɛ ala ndo ye lo ni, abɛse tɛnɛ tɛ la ndo fa mabere ala ye pangɔ e na pa. Ni na zangɔ e ya, e hɛ̃ gbinya na ndenge ti nzɔ̃ni.​—w23.09 pajɛ 17.

Wangɔ mɛ elengbi ti luangɔ ka tɛ Maria na omɛ aba luangɔ ngunu nɛ?

Na ngoi mɛndó apa hɛ̃ lo ya, lo na dũngɔ Masiya ko, Maria gindó wangɔ ka tɛ azi mɛndɛ̃. Angelo Gabriel ná Elizabɛtɛ ahɛ̃ndó Maria awangɔ mɛ ahɛ̃ lo ngunu. Elengbi nga ti luangɔ ngunu ka tɛ ayata e awakristo.​—w23.10 pajɛ 15.

Yehova lengbi ti hɛ̃ngɔ gbinya ti sambela tɛ e ngasia?

Lo ko kapa ya, ni na hɛ̃ngɔ gbinya ti sambela tɛ e se amangbi na dangɔ bɛ tɛ lo. (Yir. 29:12) Lo lengbi ti hɛ̃ngɔ gbinya ti sambela tɛ e na ndenge mɛndɛ̃ mɛ ta e da bɛ e ma, kanda lo na ngbãngɔ lá kwɛ ti zangɔ e.​—w23.11 pajɛ 21-22.

Roma 5:2 atɛnɛ tɛnɛ ti “nzɔ̃ dangɔ bɛ,” nda mɛ adi tɛnɛ tɛnɛ ni kaya vɛrse ti 4 nɛ?

Se zo ma nzɔ̃ pa ko, lo ndo ti na nzɔ̃ dangɔ bɛ ti luangɔ dungɔ lɛ ngɛ̃́ ti kaka ge lɛ sese. Kanda ngoi mɛ lo tengbi na tara, lo gbe bɛ lo na ya ni, wa Nzapa asulu lo ko, nzɔ̃ dangɔ bɛ tɛ lo na tingɔ kpengbani nvɛ̃ni.​—w23.12 pajɛ 12-13.