1. Ye mɛndó ato azi ti Babilɔnɛ ya, ala kamwa na Daniel nɛ?

 PRƆFETA Daniel dɛndó palanga na ngoi mɛndó agbɔ̃ lo agwe na lo ka gbɛ ngba ka Babilɔnɛ, ndo mɛndó yɔngɔrɔ ni na kɔdɔrɔ tɛ la. Azi ti babilɔnɛ akamwandó na Daniel gba, ala “hũndó aye mɛ azi ndo hũ na lɛ la”​—ala hũndó ya, lo du nzɔ̃ kɔli wa tɛrɛ lo ndó nzɔ̃ni nvɛ̃ni. Ala dandó bɛ la ya, lo lo kaya ndasewa kɔi ti ngenza. (1 Sam. 16:7) Ni la ala kpãndó lɛ la na ndo lo so hɛ̃ngɔ lo fɔrmasiɔ̃ ya, lo li kwa ti ndima kaya da tɛ gbia.​—Da. 1:3, 4, 6.

2. Yehova ndo bandó Daniel ngasia? (Ezekiele 14:14)

² Yehova ndo yendó Daniel mawoma, ta na lo ti dɛ̃ngɔ tɛ lo bere na lo ti ndo ti ndima mɛndó lo na ni ka da tɛ gbia ma, kanda na lo ti dungɔ lɛ ngɛ̃́ mɛndó palanga niko apɔna ni. Na ngoi mɛndó Yehova tɛnɛ tɛnɛ mɛ aba Daniel ndoni kɔi na awa kwa tɛ lo ti mbilimbili nga ma Noa ná Yobo ko, ngoi mɛndɛ̃ Daniel dɛndó nyingambi, lo ndó na bulu bere 20 gɛgɛrɛ, abɛse ngaso ko, Yehova hũndó ya, lo du mbilimbili nga ma ala, azi mɛndó ali kwa hɛ̃ lo na mbilimbili zu na ya abulu gba. (Eb. 5:32; 6:9, 10; Yobo 42:16, 17; di Ezekiele 14:14.) Wa Yehova ngbãndó lá kwɛ yengɔ Daniel na ya dungɔ lɛ ngɛ̃́ tɛ lo zu.​—Da. 10:11, 19.

3. Aye mɛ ndɛ e na mandangɔ nɛ?

³ Na ya tɛnɛ mɛ, e na mandangɔ aseliye sɛ mɛndó Daniel na ni mɛ ali ya, lo du ngbondoni ka lɛ Yehova. Ti uzu, e na kambisangɔ seliye niko kɔi kɔi nga na se mɛndó lo fa na seliye niko. Na gesi, e na bangɔ aye mɛndó aza Daniel ya, lo fa aseliye niko. Na ndani, e na hũngɔ se mɛ elengbi ti landangɔ se lɛlo tɛ lo. Abɛse du ya, e na tɛnɛngɔ tɛnɛ gba mɛ aba apalanga ko, e zu elengbi ti luangɔ awangɔ na ndo se lɛlo tɛ Daniel.

4. Ngasia la Daneil fandó ya, lo na ge ge ge nɛ? Hɛ̃ se lɛlo kɔi.

⁴ Ngoi mɛndɛ̃ azi ti ge ge ge ndo ma nga mbɛtɔ, kanda ta la ndo zia ya, ni gbanzi ala na lingɔ aye ti nzɔ̃ni ma. Daniel dundó palangɔ kɔi mɛ na ge ge ge gba. Zia e ba akpale sɛ mɛndó lo fa ya, lo na ge ge ge. Kpale ti uzu alindó tɛrɛ lo bulu sɛ na pɛ ngoi mɛ azi ti Babilɔnɛ agbɛ̃ Yerusalɛmɛ. Nebukadanezare gbia ti Babilɔnɛ ahũndó suma ti ngbilondo kɔi ti kpɛ̃nɛ nvɛ̃ni. Lo pandó ya, se ta Daniel ná azi ti ndara ti kɔdɔrɔ tɛ lo akambisa hɛ̃ lo nda suma mɛ lo hũ ma ko, lo na kpɔngɔ ala zu. (Da. 2:3-5) Ayɔndó ya, Daniel li iɔ; se ta so ma ko, azi gba na kpilingɔ. Lo “gwendó ka tɛ gbia, wa lo yɔndó ya, ahɛ̃ ni ngoi ti nɛngɔ ya, ni kambisa nda suma tɛ gbia.” (Da. 2:16) Ayɔndó ya, lo du na ge ge ge nga na loyengɔ ti nɛngɔ ya, lo li ye ti ngaso. Na lo nɛ? Na lo mɛ ya, ta Daniel dɛndó kambisa nda suma ti ngaso uzu ma. Lo yɔndó ka ti afɔ̃ lo taa mɛndó ando ili la ka Babilɔnɛ ya​—Shadrack, Meshack, ná Abedenego ya, “ala li sambela ti nɛngɔ ya, Nzapa ma vundu na lo ti suma niko.” (Da. 2:18) Yehova hɛ̃ndó gbinya ti sambela tɛ la. Na lége ti lisalisi tɛ Yehova ko, Daniel kambisandó nda suma tɛ Nebukadanezare. Ta Daniel ná afɔ̃ lo akpilindó ma.

5. Na ya kpale mɛndɛ̃ mɛndó Daniel fa ya, lo na ge ge ge nɛ?

⁵ Ngoi yakere na pɛ kambisangɔ nda suma ti ngbilondo ko, ge ge ge tɛ Daniel atindó na ya tara fãni mɛndɛ̃. Nebukadanezare di hũndó suma mɛndɛ̃ ti siɔni. Suma niko adundó suma ti kɛkɛ kɔi mɛ kotani. Na ge ge ge zu, Daniel kambisandó nda suma ni hɛ̃ gbia, abɛse ayɔndó ya, lo pa hɛ̃ gbia ya, lo na tingɔ wa nyingɔ, wa ta lo nga na diringɔ dungɔ gbia ma na pɛ nyi ngoi. (Da. 4:25) Gbia lengbindó ti hũngɔ Daniel mabere wa kula tɛ lo, wa lo hɛ̃ nga nyɔ ya, aho lo. Abɛse ngaso ko, Daniel kambisandó nda suma niko na ge ge ge zu.

6. Ngoi mɛndɛ̃, aye mɛndó aza Daniel ya, lo du na ge ge ge nɛ?

⁶ Ngoi mɛndɛ̃, aye mɛndó aza Daniel ya, lo du na ge ge ge na ya dungɔ lɛ ngɛ̃́ tɛ lo nɛ? Biani, na ngoi mɛndó Daniel dɛ nyingambi ko, lo landandó se lɛlo tɛ awa dũngɔ lo. Yehova hɛ̃ndó nyɔ hɛ̃ azi ti Izraɛlɛ ya, ala ha ayati la na andia tɛ Nzapa, ta kitɛ ma ya awa dũngɔ Daniel atɔndó ndia niko. (Mib. 6:6-9) Ta Daniel ngbã bondó na hĩngangɔ andia mabere andia Sui kɔi (10) ma, kanda lo hĩnga ngandó akpale ti  ngbondoni mabere aye mɛ aya Izraɛlɛ alengbi ti tɛngɔ nga na omɛ ta ala lengbi ti tɛngɔ ma. b (Le. 11:4-8; Da. 1:8, 11-13) Hãngɔ ni zingɔ, Daniel manda ngandó pandɛ ti dungɔ lɛ ngɛ̃́ tɛ azi tɛ Nzapa, wa lo hĩnga ngandó kpale mɛ asi na ala na ngoi mɛndó ala kɛ̃ tɔndɔngɔ Nzapa. (Da. 9:10, 11) Akpale mɛndó lo tengbi na ni na ya dungɔ lɛ ngɛ̃́ tɛ lo, alindó ya, Daniel ti na loyengɔ ti kpengbani ya, Yehova ná aangelo tɛ lo ti ngunu ndo za lo.​—Da. 2:19-24; 10:12, 18, 19.

7. Ye mɛndɛ̃ mɛndó aza Daniel ya, lo du na ge ge ge nɛ? (Ba nga limɔ.)

⁷ Daniel ndo mandandó aprɔfesi mɛ Nzapa hɛ̃, na ndakisa prɔfesi tɛ Yirimia. Na mandangɔ aprɔfesi, Daniel gbɔ̃ndó ndani ya, angbã yakere azi ti Izraɛlɛ asi ka gbɛ ngba ti Babilɔnɛ. (Da. 9:2) Daniel hũndó ya, aprɔfesi tɛ Yehova ndo ti ngoi zu na seni, ni lindó ya, lo kpã bɛ lo fãni mɛndɛ̃ gba na ndo Yehova. Azi ko la ndo kpã bɛ la zu na ndo Yehova ko, ala ndo du nga na ge ge ge mɛ kpengbani nvɛ̃ni. (Ba nga Roma 8:31, 32, 37-39.) Ye mɛndɛ̃ mɛ aɔ aye niko zu adu ya, Daniel ndo lindó sambela hɛ̃ To lo ti ndozu ngoi zu. (Da. 6:10) Lo ndo pandó siɔ kpale tɛ lo hɛ̃ Yehova, wa lo ndo kambisa ngandó se mɛ lo ndo ma na tɛrɛ lo hɛ̃ Lo. Wa Daniel ndo yɔ ngandó ya, lo za ni. (Da. 9:4, 5, 19) Daniel dundó zo ti zangangɔ lengbingɔ nga ma e, ta adũndó lo na seliye ti ge ge ge ma. Kanda lo lindó ya, seliye niko amai na lége ti mandangɔ tɛnɛ tɛ Nzapa, lingɔ sambela nga na kpãngɔ bɛ lo zu na ndo Yehova.

8. Ngasia la elengbi ti tingɔ na ge ge ge ti ngaso nɛ?

⁸ Ti nɛngɔ ya, e ti na ge ge ge, ye mɛ ayɔ ya, e li nɛ? Awa dũngɔ e alengbi ti sangɔ ngunu bɛ e ya, e du na ge ge ge, kanda abɛse ala adu azi ti ge ge ge ko, ta ala lengbi ti hɛ̃ngɔ e seliye niko mabere ndũ ye ma. Tingɔ na ge ge ge adu mabere mandangɔ kpɛngɔ na kamiɔ̃. Lége kɔi mɛ zo lengbi ti hĩngangɔ ni nzɔ̃ni adu na bangɔ na seni se mɛ wa hangɔ lo na kamiɔ̃ ndo kpɛ na ni, nga na landangɔ se lɛlo tɛ lo. Kwɛ kɔi, elengbi ti mandangɔ tingɔ na ge ge ge se e ba na seni nvɛ̃ni se lɛlo tɛ azi mɛ na seliye niko wa e landa nga ni. Na lo ni la, wangɔ mɛ e lua ka tɛ Daniel nɛ? Nga ma Daniel, ayɔ ya, e hĩnga Tɛnɛ tɛ Nzapa na seni. Elengbi ti lingɔ ya, mangbi tɛ e ná lo ati kpengbani se e ndo tɛnɛ tɛnɛ na lo ngoi zu, wa e ndo pa nga hɛ̃ lo se mɛ e ndo ma na tɛrɛ e. Ayɔ nga ya, e kpã bɛ e na ndo lo, e ye na bɛ e kɔi ya, lo na dungɔ ngoi zu dã ti zangɔ e. Wa ngoi mɛ loyengɔ tɛ e ati na ya tara ko, e nga na tingɔ na ge ge ge ti kpengbani.

9. Anzɔ̃ kpale mɛ dungɔ na ge ge ge ndo hɛ̃ e nɛ?

⁹ Se e du na seliye ti ge ge ge ko, e na luangɔ anzɔ̃ kpale gba. Zia e ba kpale mɛndó nyita Ben atengbi na ni. Lo ndo lindó kalasi ka Allemagne, ka kalasi azi zu ndo yendó ya, aye zu mɛ ge lɛ sese asi na bɛ lo, wa ala ndo hũndó ya, Ngbangɔ ndo tɛnɛ nvɛ̃nɛ na ndenge mɛ ni pa ya, Nzapa la li aye zu. Lá kɔi Ben luandó lége ti kambisangɔ nda loyengɔ tɛ lo hɛ̃ afɔ̃ lo ti kalasi, lo kambisandó nda mɛ lo ndo ye ya, Nzapa la li aye zu. Na ge ge ge zu, lo kambisandó aye mɛ ndo to lo ya, lo du na loyengɔ ti ngaso. Nzɔ̃ kpale mɛndó lo lua nɛ? Ben tɛnɛ ya, “Wa hangɔ e na mbeti alandandó mbi na seni nvɛ̃ni, kutu lo mundó kopi ti aye mɛndó mbi salela so kambisangɔ na nda loyengɔ tɛ mbi, wa lo pa ngandó ya, afɔ̃ mbi zu ti kalasi ali nga ngaso.” Ye mɛndó afɔ̃ Ben ti kalasi ali nɛ? Ben tɛnɛ ya, “Gba ka popo tɛ la amandó tɛnɛ mɛ mbi ndo tɛnɛ na seni, wa ala pandó ya, ala ndo sepala na mbi gba nvɛ̃ni.” Nga ma se mɛ se lɛlo tɛ Ben afa na ni, azi ti ge ge ge ndo lua tɔndɔngɔ na mbage tɛ azi mɛndɛ̃. Ala lengbi nga ti zangɔ azi mɛndɛ̃ ya, ala li ge ya sambela ti mbilimbili tɛ  Yehova. Ti biani ko, e na aye gba mɛ alengbi ti tongɔ e ya, e du na ge ge ge.

10. Dungɔ mbilimbili alengbi na nɛ?

¹⁰ Kaya Ngbangɔ, tɛnɛ ti Ebré mɛ agbinyangbi na “mbilimbili,” bere “songo ti mbilimbili,” ando fa songo ti kpengbani nga na yengɔ mɛ Nzapa ndo ye na azi tɛ lo. Ni ndo fa nga songo ná yengbingɔ mɛ ndo du na popo tɛ awa kwa tɛ Nzapa. (2 Samwele 9:6, 7) Mbilimbili tɛ e alengbi ti tingɔ kpengbani na pɛ angoi gba. Zia e ba se mɛndó ni du biani na lo tɛ Daniel.

11. Na ngoi mɛndó lo ti bange, ngasia la Daniel fandó ya, lo du mbilimbili nɛ? (Ba limɔ ti koko mbeti.)

¹¹ Na ya dungɔ lɛ ngɛ̃́ tɛ lo zu, Daniel tengbindó na akpale gba mɛ akpã mbilimbili tɛ lo na ya tara. Kanda lo tengbindó na kpengba kpale kɔi ti siɔni nvɛ̃ni na ngoi mɛndó lo ti na bulu 90. Na ngoi niko ndó ko, azi ti Medɛ ná Pɛrsɛ amundó Babilɔnɛ wa Darius ndó la ndo le gbia. Ambanga azi mɛndɛ̃ mɛndó ndo le kwa ka da tɛ gbia Darius akɛ̃ndó tɛrɛ Daniel mawoma, ta ala ndo tɔndɔ ngandó Nzapa tɛ lo ma. Ni la, ala gbendó lingɔ ti hongɔ Daniel. Ala tondó gbia ya, lo kpã ndia kɔi mɛ na lingɔ ya, Daniel pɔna ngbãngɔ mbilimbili na mbage tɛ Nzapa bere na mbage tɛ gbia. Ye mɛndó ayɔ ya, Daniel li so fangɔ ya, lo du mbilimbili na mbage tɛ gbia, adundó ya, lo li aye nga ma azi mɛndɛ̃, wa lo zia vɔrɔngɔ Yehova na pɛ bi 30. Daniel pɔnandó ngbãngɔ mbilimbili na mbage tɛ Yehova. Ni lindó ya, abi lo kaya du tɛ ambata. Kanda Yehova hɛ̃ndó Daniel mbana gɛrɛ na lo ti mbilimbili tɛ lo na ndenge mɛndó lo so na Daniel ka yanga ambata. (Da. 6:12-15, 20-22) Ngasia la elengbi ti ngbãngɔ mbilimbili na mbage tɛ Yehava nga ma Daniel nɛ?

12. Aye mɛndó aza Daniel ya, lo ngbã mbilimbili na mbage tɛ Yehova nɛ?

¹² Nga ma se mɛ fale e tɛnɛ na ni uzu, dungɔ mbilimbili ndo lo na ndo songo ti kpengbani mɛ zo na ni na mbage tɛ Yehova. Daniel ngbãndó mbilimbili ka tɛ Yehova na lo mɛ ya, lo ndo yendó To lo ti ndozu mawoma. Daniel tindó na songo ti ngaso na lo mɛ ya, lo ndo gbɔ̃ndó li lo na ndo songo tɛ Yehova, nga na se mɛndó Yehova ndo fa na songo ni. (Da. 9:4) Daniel gbɔ̃ ngandó li lo na ndo anzɔ̃ ye zu mɛndó Yehova li tɛrɛ lo nga na azi tɛ lo, wa lo ndo hɛ̃ndó Yehova sia kɔli gba na lo ni.​—Da. 2:20-23; 9:15, 16.

13. (a) Akpengba kpale mɛ apalanga ndo tengbi na ni mɛ ando kpã mbilimbili tɛ la na ya tara nɛ? Hɛ̃ se lɛlo kɔi. (Ba nga limɔ.) (b) Na bangɔ video, se ahũnda mɔ ya, Atɛmwɛ tɛ Yehova ndo ba kpale ti bombingɔ tɛrɛ tɛ kɔli ná kɔli bere wali ná wali ngasia, tɛnɛ mɛ mɔ na tɛnɛngɔ nɛ?

 ¹³ Nga ma Daniel apalanga gba ndo du ndoni kɔi na azi mɛ ta ala ndo tɔndɔ Nzapa ná ndia tɛ lo ma. Azi ti ngaso alengbi ti kɛ̃ngɔ tɛrɛ azi zu mɛ ndo kpɛ Nzapa. Ambanga ni mɛndɛ̃ ndo to apalanga na ndo ngunu ya, ala gbɛ̃ mbilimbili tɛ la na mbage tɛ Yehova. Na ndakisa, ba kpale mɛndó asi na palanga kɔi mɛ ili lo la Graeme mɛ ndo du ka Australie. Lo tengbindó na kpengba kpale na ngoi mɛndó lo banda kalasi ka sɛgɔndɛrɛ. Wa hangɔ ala na mbeti ahũndandó ala ya, se fɔ̃ la kɔi ti kalasi atɛnɛ ya, lo ndo bombi tɛrɛ lo na fɔ̃ lo kɔli bere ná fɔ̃ lo wali, ye mɛ ala na lingɔ nɛ? Na gesi prɔfɛsɛrɛ niko pandó hɛ̃ la ya, awa kalasi zu mɛ ahũ ya, bombingɔ tɛrɛ tɛ kɔli ná kɔli bere wali ná wali, ta adu siɔni ma ko, ala lo ka ndo kɔti; wa ala mɛ ta ala ye ni ma ko, ala lo ka ndo ga. Graeme tɛnɛ ya, “awa kalasi zu alondó ka ndo kɔti so fangɔ ya, ala ye tɛnɛ ni, bo mbi ná fɔ̃ mbi mɛndɛ̃ mɛ nga Tɛmwɛ tɛ Yehova la e ngbãndó ka ndo ga.” Wa akpale mɛndó ali tɛrɛ lo na gesi akpãndó mbilimbili tɛ Graeme na ya tara. Lo tɛnɛ ya, “Na ya ngoi kɔi mobimba ti kalasi, afɔ̃ e nga na wa hangɔ e na mbeti ahéndó e, wa ala ndo gulu ngandó e. Mbi lindó kpengbani ti kambisangɔ loyengɔ tɛ mbi hɛ̃ la na ndenge ti nzɔ̃ni zangangɔ ya, mbi ma ngɔnzɔ, kanda ta ala yendó mangɔ mbi ma.” Graeme mandó tɛrɛ lo ngasia? Lo tɛnɛ ya, “Ta mbi mandó dengɔ bɛ na ngoi mɛndó afɔ̃ mbi ti kalasi ndo gulu mbi ma, kanda mbi mandó dengɔ bɛ gba na hĩngangɔ ya, mbi ngbã mbilimbili ka tɛ Yehova, wa mbi kambisa loyengɔ tɛ mbi hɛ̃ azi mɛndɛ̃.” c

14. Aye mɛ alengbi ti zangɔ e ya, e ngbã mbilimbili ka tɛ Yehova nɛ?

¹⁴ Elengbi ti ngbãngɔ mbilimbili ka tɛ Yehova se du ya, nga ma Daniel e ti na songo ti kpengbani na lo tɛ lo. Wa e na lingɔ ya, songo ni amai se du ya, e manda hĩngangɔ aseliye tɛ Yehova. Na ndakisa, elengbi ti mandangɔ aye mɛ Lo li. (Roma 1:20) Se mɔ ye tingɔ na songo nga na tɔndɔngɔ gba na lo tɛ Yehova ko, di abɛli tɛnɛ mɛ: “Ebimá kaka yango moko?” bere ba avideo. Mɔ lengbi nga ti dingɔ ambanga aye mɛndɛ̃ kaya nyi buku La vie a-t-elle été créée ? nga na Cinq questions à se poser sur l’origine de la vie. Nyita wali Esther mɛ lo du zo ti Danemark atɛnɛ ngaso na lo ti ambeti niko: “Se mɛ akambisa na akpale adu nzɔ̃ni nvɛ̃ni. Ta nyi buku niko ndo pa hɛ̃ zo ye mɛ lo lengbi ti yengɔ lo ni ma; ni kambisa akpale zu yangondo, wa zo na zo la na pɔnangɔ aye mɛ lo ye lo ni.” Ben mɛ fale e tɛnɛ tɛnɛ tɛ lo uzu atɛnɛ ya: “Ambeti niko adu aye mɛ ndo li ya, loyengo tɛ mbi ati kpengbani. Ni to mbi, mbi ye ya, Nzapa la ali aye zu.” Se mɔ manda ambeti niko ko, ngoi mɛndɛ̃ mɔ na yengɔ tɛnɛ mɛ Ngbangɔ tɛ nɛ ya: “Oo [Yehova] . . . Nzapa tɛ e, azi alengbi ti gondangɔ mɔ, tɔndɔngɔ mɔ. Ala lengbi nga ti yengɔ ya, mɔ lombe. Ta sanga ma, mɔ li ye kwɛ zu.”​—Suma 4:11. d

15. Ndenge mɛndɛ̃ mɛ elengbi ti tingɔ na mangbi ti kpengbani na Yehova nɛ?

¹⁵ Ndenge mɛndɛ̃ mɛ elengbi ti tingɔ na mangbi ti kpengbani ná Yehova adu na mandangɔ na seni nvɛ̃ni dungɔ lɛ ngɛ̃́ tɛ Yezo. Nyita wali kɔi mɛ palanga mɛ ili lo la Samira, mɛ ndo du ka Allemagne alindó ni. Lo tɛnɛ ya: “Mbi hĩnga Yehova nzɔ̃ni nvɛ̃ni na lége tɛ Yezo.” Na ngoi mɛndó lo dɛ nyingambi ko, Samira ndo hũndó ya, ta Yehova lengbi ti mangɔ vundu bere sɔngɔ bɛ ma. Kanda lo gbɔ̃ndó nda se mɛ Yezo ndo ma na tɛrɛ lo. Lo tɛnɛ ya, “Mbi ndo ye Yezo gba na lo mɛ ya, lo ndo yendó ayangambi.”  Na mandangɔ akpale gba na ndo Yezo ko, songo tɛ lo na lo tɛ Yehova ati kpengbani nvɛ̃ni. Na lo nɛ? Lo pa ya: “Yɛkɛ yɛkɛ, mbi bandandó gbɔ̃ngɔ ndani ya, Yezo ndo landa se lɛlo tɛ To lo na ndenge ti lengbingɔ nvɛ̃ni. Ala du kwɛ kɔi. Mbi gbɔ̃ ngandó ndani ya, adu na lo ni la Yehova tondó Yezo ge lɛ sese, ti nɛngɔ ya, azi ahĩnga lo nzɔ̃ni nvɛ̃ni.” (Yn. 14:9) Se mɔ ye ya mangbi tɛ mɔ ná Yehova ati kpengbani, nda mɛ ta mɔ lengbi ti mungɔ ngoi ti mandangɔ akpale zu mɛ aba Yezo ma nɛ? Se mɔ li ni ko, mɔ na tingɔ na songo nga na mbilimbili ti kpengbani na mbage tɛ Yehova.

16. Anzɔ̃ kpale mɛ dungɔ mbilimbili ndo hɛ̃ zo nɛ? (Nzembo 18:25; Mika 6:8)

¹⁶ Dungɔ mbilimbili ndo li ya, zo du na abɛta kwa mɛ nga mbilimbili na mbage tɛ lo, wa mangbi tɛ ala ndo ti kpengbani. (Ruta 1:14-17) Hãngɔ ni zingɔ, azi ko la ndo du mbilimbili na mbage tɛ Yehova ko, ala ndo du na siriri ti bɛ. Na lo nɛ? Na lo mɛ ya, Yehova ko kapa ya, ni na dungɔ mbilimbili na mbage tɛ azi mɛ adu mbilimbili ka tɛ ni. (Di Nzembo 18:25; Mika 6:8.) Binga li mɔ ĩ​—abɛse du ya, e du azi gɛgɛrɛ, ta elengbi na wa lingɔ ndozu na sese ma ko, lo ye ya, e du na mangbi ti kpengbani na ni! Wa se e ná Yehova e du na mangbi ti ngaso ko, ta pɛnɔ, kpengba kpale, tara, bere kwá alengbi ti kangbingɔ popo tɛ e ná lo ma. (Da. 12:13; Luka 20:37, 38; Roma 8:38, 39) Adu nvɛ̃ni ngbondoni ya, e landa se lɛlo tɛ Daniel wa e ngbã mbilimbili ka tɛ Yehova!

17-18. Awangɔ mɛndɛ̃ mɛ elengbi ti luangɔ ka tɛ Daniel nɛ?

¹⁷ Na ya tɛnɛ mɛ, e manda bo aseliye sɛ tɛ Daniel. Kanda e na akpale gba mɛ elengbi ti mandangɔ na ndo se lɛlo tɛ lo. Na ndakisa, Yehova hɛ̃ndó Daniel asuma ti kpɛ̃nɛ nvɛ̃ni, wa lo hɛ̃ ngandó lo kɔdɛ ti kambisangɔ nda aprɔfesi. Gba ti aprɔfesi ni atindó na seni wɛ. Ambanga aprɔfesi ni akambisa akpale mɛ aba bi mɛ na gangɔ mɛ na gbinyangbingɔ dungɔ lɛ ngɛ̃́ tɛ azi zu mɛ ge lɛ sese.

¹⁸ Na pɔsɔ ti gesi, e na mandangɔ aprɔfesi sɛ mɛndó Daniel su. Gbɔ̃ngɔ nda aprɔfesi niko alengbi ti zangɔ ayangambi nga na akangba ya, ala mu ekateli ti ndara bandangɔ ndɛ. Ni lengbi nga ti sangɔ ngunu bɛ e ya, e du na ge ge ge, wa e ngbã nga mbilimbili na mbage tɛ Yehova uzu ti nɛngɔ ya, e tengbi na kota pɛnɔ mɛ angbã yakere ga.