Adũndó mbi na 1927 ka yakere gbata ti Chicago Illinois mɛ ka États-Unis. Tata ná mama dũndó e ayangambi kũ, Jetha, Don, mbi, Karl, nga na Joy. E zu e yendó hɛ̃ngɔ ti e na ya kwa tɛ Yehova. Jetha gwendó kalasi ti sɛ ti Gileadɛ na 1943. Don, Karl, na Joy agwendó Bethel ti Brooklyn mɛ ka États-Unis na 1944, 1947, ná 1951. Se lɛlo tɛ la ná tɛ awa dũngɔ mbi ti nzɔ̃ni asandó ngunu bɛ mbi na ya kwa tɛ Yehova.

To mbi ná ta mbi ndo dindó Ngbangɔ tɛnɛ tɛ Nzapa mɛndó ala ndo ye wa ala ha ngandó na e ayati la ya, e ye nga lo. Ta azi ti sambela dɛndó tɔndɔ tata ma na lo mɛ ya, lo lindó kwa ti soda ka Europe na ngoi ti to ti uzu ti lɛ gigi zu. Mama tɛ mbi hɛ̃ndó sia kɔli hɛ̃ Nzapa na lo mɛ ya lo batandó to mbi ka lɛ to tee lo diri yada, Mama tɛ mbi tɛnɛndó ya: “Karl, e gwe sambela ngama semɛndó e ndo li na ni gã.” To mbi di tɛnɛ ya: “E na ĩ e gwe ndoni kɔi mɛ ta mbi na lingɔ sambela ni ma.” Mama hũnda lo ya: “Na lo nɛ?” Lo hɛ̃ndó gbinya ya: “Ngoi mɛndó e ka lɛ to ko, agbia ti sambela mɛndó kaya sambela kɔi sulundó linɔ tɛ asoda sɛ, tɛ e ná tɛ awa kula tɛ e nga na anwa ti to tɛ e! Nzapa ndó ka popo tɛrɛ grupɛ tɛ asoda niko sɛ?”

Ngoi mɛndó Mama tɛ mbi ka da sambela ko, Atɛmwɛ tɛ Yehova gandó ka da tɛ e. Ala hɛ̃ndó tata tɛ mbi mbeti mɛ ndo manda na azi Ngbangɔ mɛ bɛli tɛnɛ ni pa ya La lumière, ni na volimɛ sɛ wa ala tɛnɛ ngandó tɛnɛ na ndo mbeti ti Suma. To mbi sepalandó na ni wa lo mu ngandó ambeti niko. Ngoi mɛndó mama tɛ mbi hũ ambeti niko ko, lo bandandó dingɔ ni. Bi kɔindó ko, lo hũ asu mɛsajɛ ka lɛ zulunalo mɛ ando ili azi mɛ ye madangɔ Ngbangɔ ya ala ga manda mbeti mɛ bɛli ni pa ya, La Lumière. Wa lo ye ngandó gwengɔ. Ngoi mɛndó lo si kai ko, wali kɔi mɛ bange zindó nyɔ da hɛ̃ lo. Wa lo ngandó na mbeti kɔi so ti lo, ni la mama tɛ mbi hũndandó lo ya, “Ĩ ndo manda mbeti mɛ so ndo olo?” Bange niko tɛnɛ ya, “ĩĩ ga ge.” Pɔsɔ ti pɛni mama tɛ mbi mu e ayangambi ya, e gwe ndoni kɔi na lo, wa na pɛni e bandandó gwengɔ ngoi zu.

Ka bombi, wa tambwisangɔ lisolo yɔ ka ti mbi ya, mbi di mbeti ti Nzembo 144:15 mɛ ndo tɛnɛ ya, azi ko la ndo vɔrɔ Yehova ko, ala na dengɔ bɛ, mbi kamwandó  na tɛnɛ niko. Tɛnɛ ti avɛrse sɛ kamwisa ngandó mbi, na ndakisa 1 Timɔte 1:11, tɛnɛ ya Yehova “du Nzapa ti dengɔ bɛ” wa Efɛzɛ 5:1 atɛnɛ nga ya: “e ti azi mɛ ndo landa se lɛlo tɛ Nzapa.” Mbi hũ ya mbi lengbi ti dungɔ na dengɔ bɛ na lo ti aye mɛ mbi lengbi ti lingɔ na lo tɛ wa lingɔ mbi, wa mbi hɛ̃ nga lo sia kɔli na lo ti nzɔ̃ tangɔ li gɛrɛ mɛ lo hɛ̃ mbi, ti hĩngangɔ mbilimbili mɛ ni du ngbondoni na ya dungɔ lɛ ngɛ̃́ tɛ mbi.

Bombi mɛndó mbi ka da ni 32 kilomɛtrɛ na Chicago. Ni la e ndo gwendó bombi ni wa mbi tindó na hĩngangɔ ndo ti ya Ngbangɔ gba. Mbi ndo da na bɛ mbi, lá kɔindó ko, nyita mɛ ndo tambwisa lisolo tɛnɛ hɛ̃ Jetha ya, lo hɛ̃ gbinya. Ngoi ko mbi ma ko, mbi tɛnɛ ya: ‘Mbi hĩnga. Ale mbi ya ti mbi ti hɛ̃ngɔ gbinya ni.’ Mbi banda nga lɛkɛngɔ tɛrɛ mbi ti nɛngɔ ya, mbi hɛ̃ gbinya. Omɛ ɔ ngbondoni gba, mbi maindó na ya nyingɔ ngama tɛ ayata mbi ti kɔli ná wali. Wa mbi mu ngandó batisimɔ na 1941.

Mbi ndo da bɛ mbi na kota bombi mɛndó e li na 1942 ka Cleveland mɛ ka Ohio. Akɔdɔrɔ ɔngɔ 50 ti États-Unis landandó kota bombi ni na lége ti Intɛrnɛt. Ayata lindó ya, ndasewa tɛ e du ka gbɛ yakere da mɛ “kaya kota gbata” ti Caravane mɛndó so dã na ndo mɛ alɛkɛ na kota bombi ni. Na ngoi ti to ti sɛ ti lɛ gigi zu, alindó akpale ti siɔni tɛrɛ Atɛmwɛ tɛ Yehova, wa ala tengbi ngandó na botemeli ti kpengbani nvɛ̃ni. Na ndɔ mbi hũ linɔ tɛ ayata kɔli akpã kamiɔ̃ tɛ la so ya kã, wa wá ni ndo za so gigi. Ala zu hũndó nzɔ̃ni ya, zo kɔi kɔi ma kaya kamiɔ̃ ti nɛngɔ ya, lo bata ni na bi. Se ala ma gbɛgɔ̃ azi yakere ko, ala ndo sɔ̃ wá ti kamiɔ̃ ti nɛngɔ ya, aho lɛ awa kula na bi wa ala sɔ̃ nga ngbonga ti kamiɔ̃. Ayata mɛndɛ̃ lengbindó ti lingɔ iɔ ti nɛngɔ ya ala za afɔ̃ la. Ni la mbi tɛnɛ ya, awa kwa tɛ Yehova lɛkɛ tɛrɛ la na ya kpale zu, na siriri zu mbi landó wa ta kpale kɔi ti siɔni sindó na e ma.

Abulu mɛndɛ̃ so pɛni ngoi mɛ mbi da bɛ mbi na kpale mɛndó ɔ ka kota bombi niko ko, mbi hũ ya ta bɛ mama ndo sɔndó ma wa ta mbɛtɔ ndo gbɔ̃ ngandó lo ma. Lo kpãndó bɛ lo zu na ndo Yehova ná linɔ tɛ lo. Ta bɛ mbi na lingɔ na se lɛlo tɛ lo ti nzɔ̃ni ma.

Uzu ti kota bombi niko ko, mama tɛ mbi tindó wa sungɔ lége ti ngoi zu. Lo kpãndó lɛ lo gba ka ndo diskur mɛ aba lengɔ kwa ti ngoi zu. Ka talége ngoi mɛ e ndo diri ya da ko lo tɛnɛ hɛ̃ e ya, “ta mbi na ziangɔ kwa tɛ mbi ti wa sungɔ lége ti ngoi zu ma, wa ta mbi nga na bombingɔ ni na kwa ti ya da ma.” Lo hũndandó e ya bere elengbi ti zangɔ ni. Wa e yendó, ni la lo hɛ̃ndó zo kɔi kɔi shambrɛ kɔi bere sɛ ti lɛkɛngɔ uzu ti nɛngɔ ya e nyɔ ti. Uzu ti e gwengɔ kalasi ko, lo ndo ba ya da ti hĩngangɔ bere e lɛkɛ ni nzɔ̃ni uzu ti lo gwengɔ kwa ti fangɔ tɛnɛ. Lo dundó wali mɛ lo ndo hɛ̃ tɛrɛ lo na kwa gba wa ta lo ziandó kokisangɔ gwɛ̃ tɛ e ayati lo ma. Ngoi mɛ e ndo gwe ti tɛngɔ ye na midi nga na pɛ kalasi ko, lo ndo lindó zu mɛ lo lengbi ti lingɔ na lo tɛ e. Lo zandó e ya, e hĩnga kwa mɛ awa sungɔ lége ti ngoi zu ndo li.

Mbi bandandó kwa tɛ wa sungɔ lége ti ngoi zu na bulu 16. Abɛse ta tata tɛ mbi dɛndó ti Tɛmwɛ tɛ Yehova ma ko, lo ndo bandó mbi na ngoi mɛ tɛrɛ mbi ndo sɔ. Ndɔ kɔindó ko, mbi tɛnɛndó hɛ̃ lo ya, abɛse ge ge ge zu mɛ mbi li ko, ta mbi lua zo kɔi mɛ aye mandangɔ Ngbangɔ ma. Na pɛ nyi ngoi, mbi hũndandó to mbi ya, “mɔ ye ya e ná mɔ e manda Ngbangɔ?” Lo gbɔ̃ndó li lo na ndo hũnda niko na pɛ nyi ngoi, “wa lo yendó mandangɔ Ngbangɔ.” Ti biani zo  ti uzu mɛndó mbi banda mandangɔ lo na Ngbangɔ adundó tata tɛ mbi. Ni dundó ndima na lo tɛ mbi!

E bandandó mandangɔ mbeti mɛ bɛli ni ndo pa ya, “La vérité vous affranchira.” Ngoi mɛ e ndo manda Ngbangɔ ndoni kɔi na lo na pɛ angoi ko, mbi ga gbɔ̃ ndani ya, tata tɛ mbi ndo za mbi ti nɛngɔ ya, mbi hĩnga se ti nzɔ̃ni ti mandangɔ Ngbangɔ nga na hangɔ na azi mɛndɛ̃. Na ndakisa, ndɔ kɔi na ngoi mɛ e na lo e ndo manda Ngbangɔ ko, lo di paragrafɛ kɔi wa lo tɛnɛ ya: “Mbi hĩnga tɛnɛ mɛ mbeti mɛ ye tɛnɛngɔ. Kanda ngasia la mɔ hĩnga ya, mbeti mɛ ndo tɛnɛ mbilimbili nɛ?” Ta mbi lɛkɛndó gbinya mɛ mbi na hɛ̃ngɔ na ndo hũnda niko ma, ni la mbi tɛnɛndó hɛ̃ lo ya “Ta mbi na hɛ̃ngɔ mɔ gbinya niko ndɛ ma, ngoi mɛ e na mandangɔ ye na gesi la mbi na hɛ̃ngɔ mɔ gbinya ni.” Wa mbi li ngandó ngaso. Mbi luandó vɛrse mɛ aba tɛnɛ niko wa e tɛnɛ ngandó tɛnɛ na ndoni. So pɛni mbi lindó bolukiluki ti nɛngɔ ya mbi hɛ̃ lo gbinya ti nzɔ̃ni, ni zandó mbi ya mbi banda mandangɔ Ngbangɔ na seni wa ni za ngandó tata tɛ mbi. Lo kpãndó aye mɛ lo ndo manda na kwa na ya dungɔ lɛ ngɛ̃́ tɛ lo. Wa lo mu ngandó batisimɔ na 1952.

Ngoi mɛndó mbi na bulu 17 la mbi si kaya da tɛ e. Na ya ngoi nikondó la, Jetha a ti misiɔnɛrɛ, wa Don lindó Bethel. Ala zu sɛ ndo yendó kumba tɛ la, wa ni sandó ngunu bɛ mbi. Ni la mbi kũndó ya, Yehova nvɛ̃ni mu ekateli ti fangɔ mbi na ndo mɛ mbi lengbi ti lengɔ na kwa hɛ̃ lo. Ye mɛndó li tɛrɛ lo so pɛni nɛ? Ailindó mbi ka Bethel na 1946.

Na pɛ bulu gba mbi luandó akumba ndɛ̃ ndɛ̃ ndɛ̃ ka Bethel, wa mbi manda ngandó aye ti fãnani gba nvɛ̃ni. Ni la, na ya bulu 75 mɛndó mbi li ka Bethel ko, ahandó mbi na kwa ti singɔ na ambeti nga na lingɔ kwa ti comptabilité. Mbi manda ngandó vɔ̃ngɔ aye mɛ e na gwɛ̃ ni ge Bethel nga na tongɔ aye mɛ ngbondoni ka kɔdɔrɔ mɛndɛ̃. Omɛ ɔ zu mbi ndo sepalandó na tɛ ti nyingɔ mɛndó e lua na lége ti sambela ti ndãtu ka Bethel nga na adiskur mɛndɛ̃ mɛndó tɛnɛ ni ndo lo kaya Ngbangɔ.

Mbi manda ngandó akpale mɛndɛ̃ gba ka ti ngambi mbi Karl mɛndó ga ka Bethel na 1947. Lo ndó wa mandangɔ nga wa hangɔ tɛnɛ ti ya Ngbangɔ na seni nvɛ̃ni. La kɔindó ko mbi hũnda lo ya, lo za mbi na kumba kɔi mɛ ahɛ̃ mbi ya mbi li. Mbi kambisandó mbi hɛ̃ Karl ya, mbi na ambeti gba kanda ta mbi hĩnga salelangɔ ni ma. Lo zandó mbi na hũndangɔ ndo mɛ, “Joel bɛli tɛnɛ ti diskur tɛ mɔ du nɛ?” Mbi gbɔ̃ndó nda tɛnɛ mɛ lo ye tɛnɛngɔ iɔ nvɛ̃ni, lo tɛnɛ ya, ayɔ ya mɔ salela ambeti mɛ mɔ na ni wa mɔ zia nga mbangani. Ta bɛ mbi na lingɔ na wangɔ nikondó ma.

Ti nɛngɔ ya mɔ du na dengɔ bɛ gba ge Bethel ko, ayɔ ya mɔ hɛ̃ tɛrɛ mɔ gba na ya kwa ti fangɔ tɛnɛ mɔ lengbi nga ti tengbingɔ na akpale ti sangɔ ngunu  bɛ gba. Kɔi ti aye ni mɛ mbi ndo da bɛ mbi na ni nzɔ̃ni alindó tɛrɛ lo na ndɔ ka Bronx mɛ ka New York. Mbi ná nyita kɔli kɔi e ilindó wali kɔi mɛndó ye zangɔ e na Linɔngi ti Sinzili ná Lamuka! E fa tɛrɛ e na lo na tɛnɛngɔ tɛnɛ mɛ, “na ndɔ mɛ e ndo za azi na tɛnɛ ti ngbondoni mɛ kaya Ngbangɔ.” Wa lo gbinya hɛ̃ e ya, “se du tɛnɛ ti Ngbangɔ ko, ĩ ga ge.” E di wa e na lo e tɛnɛ tɛnɛ ti Ngbangɔ mɛ aba Lo-lengɔ gbia nga na gigi ti fãnani. Ni kamwisandó lo wa lo ili ngandó ayata lo gba ya, ala ga e ná ala e tɛnɛ tɛnɛ na pɔsɔ ti pɛni. Lo ná azi ti ndasewa tɛ lo tindó awa kwa tɛ Yehova ti mbilimbili.

Mbi gindó wali mɛ e ná lo e li libala na pɛ bulu 10 wa na gesi mbi luandó wali ti nzɔ̃ni. Ye mɛndó za mbi ti nɛngɔ ya mbi lua wali niko ti nzɔ̃ni nɛ? Mbi lindó sambela gba na lo ni, ‘ye mɛndó mbi ye lingɔ na pɛ lingɔ libala nɛ?’

Na 1953 e lindó kota bombi kɔi ka Yankee Stadium, wa mbi tengbindó na nyita wali Mary Aniol. Jetha ná Mary gwendó kalasi ti sɛ ti Giliadɛ, wa ala zu sɛ ndo lendó kwa ti misiɔnɛrɛ so ndo kɔi. Na dengɔ bɛ zu, Mary kambisa hɛ̃ e se mɛ lo li na kwa tɛ lo ti misiɔnɛrɛ ka Caraibe nga ná azi mɛ lo ha na ala Ngbangɔ na ya bulu mɛndó ɔ. Ngoi mɛ e hĩngangbi tɛrɛ e ko, e ga e hũ ya, e zu sɛ ndó na mɔkanɔ ti nyingɔ kwɛ kɔi. Songo tɛ e maindó wa e lindó libala na 04/1955. Mary fandó na ndenge gba ya, lo du likabo mɛ Yehova hɛ̃ mbi, wa lo du nga se lɛlo ti nzɔ̃ni mɛ alengbi ti landangɔ. Lo ndó na dengɔ bɛ na ya akwa zu mɛndó ando hɛ̃ lo. Lo ndo lindó kwa kpengbani nga na mbilimbili zu na lo tɛ azi mɛndɛ̃, wa ngoi zu, lo ndo kpãndó kpale ti Lo-lengɔ gbia na ndo ti uzu na ya dungɔ lɛ ngɛ̃́ tɛ lo. (Mat. 6:33) E lindó kwa tɛ awa bangɔ ndo kɛlɛ kɛlɛ bulu taa wa na 1958 ailindó e zu sɛ ya e ga e le kwa ka Bethel.

Mbi mandandó kpale gba ka tɛ Mary. Na ebandeli ti libala tɛ e ko, e mundó ekateli ti dingɔ Ngbangɔ ndoni kɔi wa e tɛnɛ ngandó tɛnɛ na ndo avɛrse 15 na ngoi niko. So popo tɛrɛ e se zo kɔi di vɛrse kɔi ko, e kambisa ni, wa e tɛnɛ nga se mɛ elengbi ti kpãngɔ ni na kwa na ya dungɔ lɛ ngɛ̃́ tɛ e. Ngoi gba Mary ndo tɛnɛndó tɛnɛ ti aye mɛ lo manda ka Gileade ná kaya kwa tɛ lo ti misiɔnɛrɛ hɛ̃ mbi. Aye mɛndó mbi manda ka tɛ lo za mbi ya, mbi hĩnga lingɔ diskur nzɔ̃ni, mbi hĩnga nga se ti nzɔ̃ni ti sangɔ ngunu bɛ ayata wali.—Mas. 25:11.

Mary nzɔ̃ ya mbi kpindó na 2013. Mbi na gwɛ̃ ti hũngɔ yambi Mary kaya gigi ti fãnani! Na ya ngoi niko ko, mbi mundó ekateli ti ngbãngɔ lá kwɛ mandangɔ ye nga na kpãngɔ bɛ mbi zu na ndo Yehova. (Mas. 3:5, 6) Mbi luandó aye sɛ wambangɔ bɛ ná dengɔ bɛ, na ngoi mɛndó mbi ndo binga li mbi na ndo aye mɛ azi tɛ Yehova na lingɔ ka gigi ti fãnani. Mbala kɔi ni wambandó bɛ mbi wa mbi ti ngandó na dengɔ bɛ hĩngangɔ ye mɛ azi tɛ Yehova na lingɔ kaya gigi ti fãnani. Ni yɔ bo ya, e manda aye ti fãnani ka tɛ kota wa hangɔ ye nga na ndo lo! Ti biani mbi na hɛ̃ngɔ lo sia wali gba na ndo aye zu mɛndó lo li ti hangɔ mbi na ye tee ndɛ nga na aye gba mɛ lo li tɛrɛ mbi nga na songo mɛ ta maka ni da ma.