Toma Polo sundó mbeti hɛ̃ Timɔte mɛ biazo ya: “Na ili Nzapa, na ili Yezo Kristo nga na ili aangelo mɛ ndo Nzapa pɔna la ko, mbi gbɔ̃ gɛrɛ mɔ sĩ nvɛ̃ni ya, mɔ tɔndɔ tɛnɛ ko la mbi tɛnɛ hɛ̃ mɔ. Ta mɔ pia mɔ kɛ̃ tɛnɛ tɛ zo mɛ avɔ̃ to tɛrɛ lo ka tɛ mɔ, bere mɔ pia mɔ ye tɛnɛ tɛ lo ma. Ta mɔ ye zo kɔi, ko mɔ dɔ zo mɛndɛ̃ mɔ zia ma.”​—1 Tim. 5:21.

Ti uzu ni na zangɔ e ya, e hĩnga aangelo, e hĩnga nga grupɛ tɛ aangelo mɛ atɛnɛ tɛnɛ tɛ la. Adu yangondo ya, ta ala du azi 144 000 ma. Na ngoi mɛndó Toma Polo su mbeti olo hɛ̃ Timɔte ko, ta songɔ kwá tɛ awakristo mɛ ahĩni la na kpɔ̃ ti nyingɔ ti nɛngɔ ya, ala na gwengɔ ndozu dɛndó banda ma. Ta atoma ná awakristo mɛ ahĩni la na kpɔ̃ ti nyingɔ dɛndó ti na tɛrɛ ti nyingɔ ngama “aangelo mɛ apɔna la” ma, ni la ta ala lengbindó ti dungɔ na dangɔ bɛ ya adu ala ma.​—1 Kɔr. 15:50-54; 1 Tɛs. 4:13-17; 1 Yn. 3:2.

Hãngɔ ni zingɔ, ta “aangelo [mɛndó] apɔna la” alengbi ti dungɔ aangelo mɛndó akɛ̃ mangɔ nyɔ Nzapa na ngoi ti kpengba ngu tɛ Noa ma. Aangelo mɛndó apɔna dungɔ ka mbage tɛ Satana atindó ademo nga awa temelangɔ Yezo. (Eb. 6:2; Luka 8:30, 31; 2 Pet. 2:4) Na bi mɛ na gangɔ na gbɔ̃nɔngɔ ala sangɔ kaya du ti mbingo mɛ ala na lingɔ bulu 1 000, wa na pɛni na kpɔngɔ ala ndoni kɔi na ademo ti bwai.​—Yudɛ 6; Suma 20:1-3, 10.

“Aangelo mɛ apɔna la” mɛ Polo tɛnɛ tɛnɛ tɛ la alengbi ti dungɔ aangelo mɛ ndo du ka ndozu mɛ ala ndo hɛ̃ ti la hɛ̃ “Nzapa ná Yezo,” atɛnɛ nga tɛnɛ tɛ la kaya avɛrse mɛndɛ̃ ti ya Ngbangɔ.

Aangelo ti mbilimbili adu miliɔ̃ gba. (Aeb. 12:22, 23) Alengbi ti dungɔ ya, ta Yehova ndo hɛ̃ aangelo zu kwa lɛ ni kɔi ma. (Suma 14:​17, 18) Na ndakisa Yehova hɛ̃ndó angelo kɔi nyɔ ya, lo kpɔ asoda ti Asiri 185 000. (2 Ba. 19:35) Ambanga aangelo na kumba ti “hɛ̃ngɔ ti la so longisangɔ Lo-lengɔ Gbia tɛ [Yezo] nga na kpɔngɔ azi zu mɛ ndo to azi mɛndɛ̃ ya, ala li siɔ lo nga na awa lingɔ siɔ kpale.” (Mat. 13:39-41) Ambanga ni na “bombingɔ awakristo mɛ ahĩni la na kpɔ̃ ti nyingɔ” ka ndozu. (Mat. 24:31) Wa ambanga ni na kumba ti ‘dɔngɔ e na nɔ na ya akpale zu.’​—Nz. 91:11; Mat. 18:10; ba nga Mat. 4:11; Luka 22:43.

“Aangelo mɛ apɔna la” mɛ atɛnɛ tɛnɛ tɛ la kaya 1 Timɔte 5:21 alengbi ti dungɔ aangelo mɛ na kumba ti zangɔ azi tɛ Nzapa. Na ya tɛnɛ mɛ Toma Polo hɛ̃ wangɔ ti ndara hɛ̃ abiazi, wa ayɔ nga ya ayata ti ya bombi ahɛ̃ la ndima. Ale abiazi li kwa tɛ la na mbilimbili nga na “zangangɔ pɔnangɔ lɛ, wa ta ala du nga na siɔ dangɔ bɛ” na ndo ayata ma. Ni fa ya, ta ala lengbi ti mungɔ ekateli na ndo kpɛ bere fangɔ ngbanga na pɔnangɔ lɛ ma. Rɛsɔ̃ ti ngbondoni mɛ alengbi ti tongɔ e ya e landa wangɔ mɛ Polo su na lége ti nyingɔ vurú du ya, ando pɔna abiazi na “ili Nzapa ná Yezo nga na aangelo mɛ apɔna la.” Ambanga aangelo mɛndɛ̃ na kwa ti batangɔ bombi, batangɔ azi ti ya bombi, tambwisangɔ kwa ti fangɔ tɛnɛ, nga na kambisangɔ hɛ̃ Yehova kpale mɛ ala ndo hũ.​—Mat. 18:10; Suma 14:6.