NA BI kwa taa, bi nzɛ ti 18/01/2023, apandó tɛnɛ kɔi ti ngbondoni kaya jw.org. Ni pandó ya, apɔna nyita Gage Fleegle ná Jeffrey Winder ti nɛngɔ ya, ala li kaya Bombi tɛ Adonzi tɛ Atɛmwɛ tɛ Yehova. Ayata niko zu sɛ ali kwa hɛ̃ Yehova na mbilimbili zu na ya abulu gba.

Awa dũngɔ nyita Fleegle adu awa vɔrɔngɔ Yehova, ala za lo ya, lo hĩnga mbilimbili. Lo mai kaya kɔdɔrɔ ti Pennsylvania mɛ ka États-Unis. Na ngoi mɛndó lo dɛ palanga ko, ndasewa tɛ la dirindó kaya kɔdɔrɔ kɔi ti yakere mɛndó na gwɛ̃ tɛ awa fangɔ tɛnɛ gba. Nyi ngoi yakere, lo mundó batisimɔ na bi nzɛ ti 20/11/1988.

Awa dũngɔ nyita Fleegle ndo sandó ngunu bɛ lo ya, lo li kwa ti ngoi zu. Ala ndo yambandó awa bangɔ ndo kɛlɛ kɛlɛ nga na ayata mɛ ndo li kwa ka béthel kaya da tɛ la, wa nyita Fleegle ndo hũndó dengɔ bɛ mɛ ayata niko na ni. Nyi ngoi yakere na pɛ batisimɔ tɛ lo ko, lo bandandó lingɔ kwa tɛ wa sungɔ lége na 01/09/1989. Abulu sɛ na gesi, lo kokisandó mɔkanɔ mɛ lo kpã na ngoi mɛndó lo na bulu 12 ti lingɔ kwa ka béthel. Lo bandandó lingɔ kwa ka béthel na nzɛ ti 10/1991.

Ka béthel nyita Fleegle lindó kwa ka ndo ti kpongɔ abɔngɔ abulu mwambe, na gesi atondó lo ka departɛma ti kwa. Na ya ngoi niko, lo lindó kwa kaya bombi ti yanga ti Rusie na pɛ abulu yakere. Na 2006 lo lindó libala na nyita wali Nadia, ala zu sɛ abandandó lingɔ kwa ndoni kɔi ka béthel. Ala lindó ka bombi ti yanga ti portugais abulu ɔngɔ 10, wa ala hɛ̃ ngandó ti la kaya bombi ti espagnole. Na pɛ lingɔ abulu gba ka Departɛma ti kwa ko, atondó nyita Fleegle ka Komite ti hangɔ tɛnɛ, na gesi ka Komite ti filiale. Na nzɛ ti taa 2022 apɔnandó lo ya, lo du wa zangɔ na kwa ka Bombi tɛ Adonzi.

 Nyita Winder maindó ka Murrieta ti Californie mɛ ka États-Unis. Awa dũngɔ lo azandó lo ya, lo hĩnga mbilimbili, wa lo mundó batisimɔ na bi nzɛ ti 29/03/1986. Na gesi lo mundó ekateli ti lingɔ kwa tɛ wa sungɔ lége ti pɛ ndunu ngoi. Lo sepalandó na kwa ni mayama, ni la lo yendó lingɔ ni ngoi zu. Na pɛ lingɔ anzɛ gba nga ma wa sungɔ lége ti pɛ ndunu ngoi ko, lo bandandó lingɔ kwa ti wa sungɔ lége ti ngoi zu na 01/10/1986.

Na ngoi mɛndó lo dɛ nyingambi yakere, nyita Winder ndo gwendó ba ayata lo sɛ mɛndó ndo le kwa ka béthel na ngoi niko. Ni lindó ya, lo ti na gwɛ̃ ti lingɔ kwa ka béthel. Wa na nzɛ ti 05/1990 ailindó lo ka béthel ti Wallkill.

Ka béthel, nyita Winder lindó kwa ka ndo ndɛ̃ ndɛ̃ ndɛ̃. Na ndakisa ka departɛma ti mbongɔ yada, departɛma mɛ aba lungɔ le tɛ, nga ka biro ti Béthel. Lo dundó na ya lo Angela na 1997, wa tee ndɛ ala ndo li kwa ndoni kɔi ka béthel. Na 2014 atondó ala ka béthel ti Warwick, kai nyita Winder lindó kwa ka ndo mɛ aba kwa ti kĩngɔ ada ti biro ti kotani tɛ Atɛmwɛ tɛ Yehova. Na 2016 adirindó na ala ka Centre d’enseignement des Témoins de Jéhovah ka Patterson, wa kai ahɛ̃ndó nyita Winder kwa ka ndo ti Audio/Video. Abulu siɔ na gesi, adirindó na ala fãni mɛndɛ̃ ka Warwick, wa ahɛ̃ndó nyita Winder kumba ti lingɔ kwa ka biro mɛ ndo ba kpale tɛ ayata mɛ ndo li kwa ka béthel. Na nzɛ ti Taa 2022 apɔnandó lo ya, lo ti wa zangɔ na kwa ka Bombi tɛ Adonzi.

E ndo li sambela ya, Yehova sulu “akɔli niko mɛ ala du tisa” na lo tɛ e, ngoi zu mɛ ala ndo li kwa kpengbani na lo ti Lo-lengɔ Gbia.​—Ef. 4:8.