NA YA ando mɛndɛ̃ awa sungɔ Ngbangɔ adiri ndo tɛnɛ kɔi fãni gba. Nda mɛ ala lindó ngaso nɛ? Zia e ba aye taa mɛndó alengbi ti tongɔ ala ya, ala li ngaso:

Ngoi mɛndó asu na tɛnɛ ni. Ka Izraɛlɛ ti gã, ta azi gba ndó la na kopi ti ndia tɛ Moizɛ ma. Azi gba ndo mandó andia ni na ngoi mɛndó ndasewa ti Izraɛlɛ ndo gwe ka tepelo, wa ando di hɛ̃ ala andia ni. (Mib. 31:10-12) Na lo mɛ ya, ala ndo gwendó gba, wa ala ndo londó na gɛrɛ la pɛ ngoi yɔngɔrɔni ti mangɔ andia niko, ngoi mɛndɛ̃ ala ndo nzɛ̃ndó, wa ta ala ndo kpãndó likebi tɛ la na ndo ndia mɛndó ando di hɛ̃ la ma. (Neh. 8:2, 3, 7) Na ya ngoi ti ngaso, diringɔ ndo atɛnɛ ti ngbondoni ndo zandó ala ya, ta bɛ la li na ndia ni ma, wa ala ndo kpã ni na kwa. Diringɔ ndo atɛnɛ ti ngaso ndo zandó ala ya, ala hĩnga akpale gba na ndo ndia mɛndó Yehova hɛ̃ la.​—Le. 18:4-22; Mib. 5:1.

Se mɛndó asu na ni. Ambanga parti ti ya Ngbangɔ mɛ asu niko, adu abia​—na ndakisa mbeti ti Nzembo, Loyembo ya Salomo nga na Bileli. Ngoi mɛndɛ̃ abia ni ndo dirindó ndo kpale kɔi fãni gba ti zangɔ azi mɛ ndo ye abia ni ya, ala gbɔ̃ tɛnɛ ni ka li la. Na ndakisa Nzembo 115:​9-11 tɛnɛ ya: “Oo Izraɛlɛ, kpã bɛ mɔ na ndo Yehova​—Lo du wa zangɔ ala, nga vara tɛ ala. Oo ndasewa tɛ Aarona, ĩ kpã bɛ ĩ na ndo Yehova​—Lo du wa zangɔ ala, nga vara tɛ ala. Ĩ azi mɛ ĩ ndo kpɛ Yehova, ĩ kpã bɛ i na ndo Yehova​—Lo du wa zangɔ ala, nga vara tɛ ala.” Diringɔ ndo tɛnɛ mɛ fãni gba alengbindó ti zangɔ awa yengɔ bia ni ya, ta bɛ la li na tɛnɛ mɛ ti ngbondoni ma

Nda mɛndó asu na ni. Ngoi mɛndɛ̃ awa sungɔ Ngbangɔ adirindó ndo atɛnɛ mɛndɛ̃ fãni gba, na lo mɛ ya tɛnɛ ni dundó nvɛ̃ni ngbondoni. Na ndakisa, ngoi mɛndó Yehova hɛ̃ ndia ya, ta aya Izraɛlɛ atɛ mɛ̃nɛ ma ko, lo kambisa ndó ndani fãni gba hɛ̃ Moizɛ. Nzapa yendó fangɔ na ala yangondo ya, dungɔ lɛ ngɛ̃́ ti aye zu ti mi ndo lo kaya mɛ̃nɛ, wa mɛ̃nɛ ndo fa dungɔ lɛ ngɛ̃́. (Le. 17:11, 14) Abulu gba na gesi, ngoi mɛndó abiazi mɛ ndo du ka Yeruzalɛmɛ asu mbeti ti pangɔ hɛ̃ awakristo aye mɛ ayɔ ya, ala kɛ̃ ni ti nɛngɔ ya, ala hɛ̃ Nzapa dengɔ bɛ ko, ala di diri ndo kpale mɛ aba kɛ̃ngɔ tɛngɔ mɛ̃nɛ.​—Aw. 15:20, 29.

Abɛse du ya, Ngbangɔ ndo diri ndo tɛnɛ kɔi fãni gba ko, ta ni fa ya, Yehova ye ya, e gbɔ̃ tɛnɛ kɔi ti ya Ngbangɔ ka li e wa e ndo diri ndo ni ngoi zu ma. Yezo pandó ya: “Na ngoi mɛ ĩ ndo li sambela ko, ta ĩ diri ndo tɛnɛ kɔi fãni gba ma.” (Mat. 6:7) Na gesi lo kambisa aye ti ngbondoni mɛ elengbi ti lingɔ sambela na lo ni mɛ amangbi na dangɔ bɛ tɛ Nzapa. (Mat. 6:9-13) Ni la abɛse du ya, ta elengbi ti diringɔ ndo tɛnɛ kɔi fãni gba na ya sambela tɛ e ma ko, elengbi ti lingɔ sambela na lo ti aye niko fãni gba.​—Mat. 7:7-11.

Ta adundó sãnga la Yehova li ya, adiri ndo tɛnɛ mɛndɛ̃ kaya Ngbangɔ fãni gba ma. Adu ndenge kɔi mɛ Kota wa hangɔ e na lo ndo ha e na aye na lo ti nzɔ̃ kpale tɛ e nvɛ̃ni la.​—Yis. 48:17, 18.