1. Hɛ̃ se lɛlo kɔi mɛ ndo fa nda mɛ ayɔ ya, e landa litambwisi tɛ Yehova ndɛ.

 DA BƐ mɔ ya, mɔ gere ka yando kɔi. Akpale ti siɔni ndɛ̃ ndɛ̃ ndɛ̃ so gunda mɔ, akpale ni nga ma: asiɔ sa ti yando, azɔzɔ mɛ ndo du na siɔ ngɛngi, akɛkɛ ti siɔni mɛ ndo hɛ̃ ngã, nga na atɛ̃nɛ ti kotani mɛ ndo hɛ̃ mbɛtɔ. Zangangɔ kitɛ, mɔ na hɛ̃ngɔ sia kɔli mawoma na zo mɛ lo hĩnga yando ni nzɔ̃ni, lo hĩnga ndo mɛ siɔ lo da, wa lo ye nga tambwisangɔ mɔ ti nɛngɔ ya, mɔ si zangangɔ tengbingɔ na akpengba kpale ni! Lɛ gigi mɛ adu nga ma yando niko. Ni sĩ na aye ti siɔni ndɛ̃ ndɛ̃ ndɛ̃ mɛ alengbi ti gbɛ̃ngɔ dungɔ lɛ ngɛ̃́ tɛ e ti nyingɔ. Kanda e na zo kɔi ti lengbingɔ mɛ ndo tambwisa e, zo ni duYehova. Lo ndo tambwisa e ti nɛngɔ ya, ta siɔ lo asi na e ma, wa e si na ndo mɛ e ye gwengɔ da, ndo ni adu dungɔ lɛ ngɛ̃́ ti kaka ka gigi ti fãnani.

2. Yehova ndo tambwisa e ndɛ ngasia?

² Yehova ndo tambwisa e ngasia? Ti uzu, lo ndo li ni na lége ti Ngbangɔ mɛ adu tɛnɛ tɛ lo. Hãngɔ ni zingɔ lo ndo salela nga azi mɛ lo kpã ti nɛngɔ ya, ala tambwisa e. Na ndakisa, lo ndo salela “mbɛ ti mbilimbili nga ti kɔdɛ” so hɛ̃ngɔ e tɛ ti nyingɔ mɛ ndo za e ti nɛngɔ ya, e ndo mu ekateli ti ndara. (Mat. 24:45) Yehova ndo salela nga akɔli mɛ kpengbani na ya nyingɔ ti nɛngɔ ya, ala dɔ e na nɔ. Na ndakisa, awa bangɔ ndo kɛlɛkɛlɛ nga na abiazi ndo sa ngunu bɛ e, wa ala ndo hɛ̃ nga e andia mɛ alengbi ti zangɔ e na ngoi mɛ e tengbi na kpengba kpale. E ndo hɛ̃ Yehova sia kɔli mawoma na se mɛ lo ndo tambwisa e na ndenge ti nzɔ̃ni nvɛ̃ni na ya ngoi olo ti siɔni uzu ti nɛngɔ ya, nda gigi kɔ! Ni ndo za e ya, e ngbã lá kwɛ batangɔ mangbi tɛ e na Yehova, wa e ngbã nga lá kwɛ dɔngɔ nɔ na lége ti dungɔ lɛ ngɛ̃́.

3. Akpale mɛ e na tɛnɛngɔ tɛnɛ na ndoni ndɛ nɛ?

³ Abɛse ngaso ko, ngoi mɛndɛ̃ ando du pɛnɔ na lo tɛ e landangɔ litambwisi tɛ Yehova, gba ni se du ya, ni lo ka tɛ azi ti zangangɔ  lengbingɔ. Na lo nɛ? Na lo mɛ ya, ngoi mɛndɛ̃ ndia mɛ ala ndo hɛ̃ ko, ta ando du omɛ e ndo ye bere omɛ e sepala na ni ma. Elengbi ti hũngɔ ya, litambwisi mɛ e ndo lua, ta ni du ti ndara ma, wa awangɔ mɛ ala ndo hɛ̃ e ko, ta ando lo ka tɛ Yehova ma. Na ya ngoi ti ngaso, na yɔngɔ ya, e du na loyengɔ ti kpengbani ya, Yehova la du zo mɛ ndo tambwisa azi tɛ lo, wa ngbãngɔ lá kwɛ landangɔ litambwisi tɛ lo ndo hɛ̃ e anzɔ̃ sulu gba. Ti nɛngɔ ya seliye tɛ e ti kpãngɔ bɛ ndo Yehova adi ti kpengbani ko, na ya tɛnɛ mɛ, e na bangɔ aye taa mɛ na zangɔ e. Ti (1) Se mɛndó Yehova tambwisa awa kwa tɛ lo na ngoi ti gã, ti (2) se mɛ lo ndo tambwisa na e ndɛ, wa ti (3) Se mɛ landangɔ litambwisi tɛ lo ndo hɛ̃ e anzɔ̃ sulu.

SE MƐNDÓ YEHOVA TAMBWISA NA NDASEWA TI IZRAƐLƐ

4-5. Ngasia la Yehova fandó ya ni kpã Moizɛ ti nɛngɔ ya, lo tambwisa aya Izraɛlɛ nɛ? (Ba limɔ ti koko mbeti.)

⁴ Yehova hɛ̃ndó Moizɛ kumba ti singɔ na aya Izraɛlɛ ka kɔdɔrɔ ti Ezipito. Wa lo fandó na aya Izraɛlɛ yangondo ya, lo ndo tambwisa ala na lége tɛ Moizɛ. Na ndakisa, lo salelandó da baba na lá, nga na ngbo ti wá na bi. (Kob. 13:21) Moizɛ landandó ngbo ti wá mɛndó ndo tambwisa lo ná aya Izraɛlɛ kaya gbengba tɛ mɛndó ya ni kangbi na sɛ. Aya Izraɛlɛ tindó na mbɛtɔ kpengbani na lo mɛ ya, kota tɛ ndó so gbɛlɛ la, wa ka pɛko la, asoda ti Ezipito ndó landandó ala. Ala tɛnɛndó mbala kɔi ya Moizɛ li siɔni na ndenge mɛndó lo tambwisa ala na lége ti tɛ. Kanda ta adundó ye ti siɔni ma. Yehova ndó la tambwisa Moizɛ ti nɛngɔ ya, lo gwe na azi tɛ lo ti lége niko. (Kob. 14:2) Nzapa sarandó ala na ndenge kɔi ti kpɛ̃nɛ nvɛ̃ni.​—Kob. 14:26-28.

⁵ Na ya abulu 40, Moizɛ ngbãndó lá kwɛ landangɔ ngbo ti da baba so tambwisangɔ na azi tɛ Nzapa ka bɛ nyama. a Na ya ngoi kɔi, Yehova kpãndó ngbo ti da baba nga na wá ka ndo gofa ti tandi (hema) ti nɛngɔ ya, aya Izraɛlɛ zu hũ ni. (Kob. 33:​7, 9, 10) Yehova ndo hɛ̃ndó Moizɛ ndia na lége ti ngbo niko, wa na gesi, Moizɛ ndo kambisandó ni hɛ̃ aya Izraɛlɛ. (Nz. 99:7) Aya Izraɛlɛ ndó na ye mɛ ndo fa na ala yangondo ya, Yehova ndo salela Moizɛ ti nɛngɔ ya, lo dɔ ala na nɔ.

6. Ye mɛndó aya Izraɛlɛ ali na omɛ aba litambwisi tɛ Yehova nɛ? (Mitángo 14:2, 10, 11)

⁶ Na vundu zu, aya Izraɛlɛ gba ahũndó ye niko mɛ ndo fandó ya, Yehova ndo salela Moizɛ so dɔngɔ ala na nɔ gɛgɛrɛ ka lɛ ala. (Di Mitángo 14:2, 10, 11.) Fãni gba, ala kɛ̃ndó kumba mɛ Moizɛ na ni. Ni lindó ya, ta linɔ tɛ aya Izraɛlɛ ti uzu ali ka kɔdɔrɔ ti kapa ma.​—Mit. 14:30.

7. Hɛ̃ se lɛlo tɛ azi mɛndó alanda litambwisi tɛ Yehova. (Mitángo 14:24) (Ba nga limɔ.)

⁷ Kanda, aya Izraɛlɛ mɛndɛ̃ landandó litambwisi tɛ Yehova. Na ndakisa, Yehova tɛnɛndó ya: “Caleb . . . ngbãndó lá kwɛ tɔndɔngɔ andia tɛ mbi na bɛ lo zu.” (Di Mitángo 14:24.) Nzapa hɛ̃ndó Caleb mbana gɛrɛ, lo hɛ̃ndó lo nzɔ̃ sese ti Kanana mɛndó lo na gwɛ̃ ni ti nɛngɔ ya, lo du da. (Yos. 14:​12-14) Linɔ tɛ aya Izraɛlɛ ti sɛ azia nzɔ̃ se lɛlo na omɛ aba landangɔ litambwisi tɛ Yehova. Na pɛ kwá tɛ Moizɛ ko, Yehova hɛ̃ndó Yosua kumba ti tambwisangɔ aya Izraɛlɛ, wa ala “tɔndɔndó lo na ya dungɔ lɛ ngɛ̃́ tɛ ala zu.” (Yos. 4:14) Ala luandó nzɔ̃ sulu tɛ Yehova na ndenge mɛ ala li ka kɔdɔrɔ mɛndó lo ko kapa ni hɛ̃ ala.​—Yos. 21:43, 44.

8. Kambisa se mɛndó Yehova tambwisa na azi tɛ lo na ngoi tɛ agbia. (Ba nga limɔ.)

⁸ Abulu gba na gesi, Yehova hɛ̃ndó awa fangɔ ngbanga kumba ti tambwisangɔ azi tɛ lo. Na pɛ  ni, na ngoi tɛ agbia, Yehova kpãndó aprɔfeta ti nɛngɔ ya, ala tambwisa azi tɛ lo. Agbia ti mbilimbili landandó awangɔ tɛ aprɔfeta. Na ndakisa, na zungɔ na tɛrɛ zu, gbia Davidi yendó lonzingɔ mɛndó prɔfeta Nathan lonzi na lo. (2 Sam. 12:7, 13; 1 Nt. 17:3, 4) Gbia Yehoshafate landandó litambwisi tɛ prɔfeta Yahaziele, wa lo sandó ngunu bɛ azi ti Yuda ya “ala kpã bɛ la na ndo prɔfeta tɛ [Nzapa].” (2 Nt. 20:​14, 15, 20) Na ngoi mɛndó gbia Ezekiasi na pɛnɔ ko, lo hũndandó lisalisi ka tɛ prɔfeta Yisaya. (Yis. 37:​1-6) Ngoi zu mɛndó agbia ndo landa litambwisi tɛ Yehova ko, lo ndo sulundó azi mɛ ala ndo lɛ gbia ndo la, wa lo ndo bata ngandó ala. (2 Nt. 20:29, 30; 32:22) Alengbindó ti dungɔ wɔni ka tɛ ala zu hĩngangɔ ya, Yehova ndo salela aprɔfeta ti nɛngɔ ya, lo tambwisa azi tɛ lo. Kanda agbia ná aya Izraɛlɛ gba akɛ̃ndó mangɔ aprɔfeta tɛ Yehova.—Yir. 35:12-15.

SE MƐNDÓ YEHOVA TAMBWISA NA AWAKRISTO TI SIƐKLƐ TI UZU

9. Azi mɛndó Yehova salela ala ti nɛngɔ ya, lo tambwisa awakristo na siɛklɛ ti uzu na? (Ba nga limɔ.)

⁹ Na siɛklɛ ti uzu ti ngoi tɛ e, Yehova kpãndó bombi tɛ awakristo. Lo tambwisandó awakristo na ngoi niko ngasia? Lo kpãndó Yezo gbia ti bombi. (Ef. 5:23) Kanda ta Yezo ndo tɛnɛndó tɛnɛ na zo kɔi kɔi mɛ ati wakristo so pangɔ hɛ̃ lo aye mɛ lo lengbi ti lingɔ ma. Lo salelandó atoma nga na abiazi mɛndó ndo du ka Yeruzalɛmɛ ti nɛngɔ ya, ala tambwisa bombi. (Aw. 15:​1, 2) Wa akpãndó abiazi ti nɛngɔ ya, ala tambwisa akpale kaya abombi kɔi kɔi.​—1 Tɛs. 5:12; Tito 1:5.

10. (a) Ye mɛndó awakristo ti siɛklɛ ti uzu ndo li na ngoi mɛndó ala ndo lua litambwisi nɛ? (Awa Pangɔ Kwa 15:​30, 31) (b) Na ngoi ti gã, nda mɛ azi mɛndɛ̃ akɛ̃ndó mangɔ azi mɛ Yehova kpã ala ti nɛngɔ ya, atambwisa ala nɛ? (Ba Ãkadre “ Nda mɛ azi mɛndɛ̃ akɛ̃ndó litambwisi ti yangondo.”)

¹⁰ Ye mɛndó awakristo ti siɛklɛ ti uzu ndo li na ngoi mɛndó ala ndo lua litambwisi niko nɛ? Awakristo gba ndo landandó na bɛ la kɔi malako mɛndó ala ndo lua. Ni la, ala ‘mandó dengɔ bɛ gba na lo ti tɛnɛ ti sangɔ ngunu bɛ mɛndó ala lua.’ (Di Awa Pangɔ Kwa 15:30, 31.) Wa ngasia la Yehova ndo tambwisa azi tɛ lo ndɛ na ngoi tɛ e nɛ?

SE MƐ YEHOVA NDO TAMBWISA NA E NDƐ

11. Hɛ̃ se lɛlo kɔi mɛ ndo fa ya, Yehova ndo tambwisa azi mɛ ndo dɔ linɔ tɛ lo na nɔ ndɛ.

¹¹ Tee ndɛ na ngoi tɛ e, Yehova ndo dɔ azi tɛ lo na nɔ, lo ndo li ni na lége ti tɛnɛ tɛ lo Ngbangɔ  nga na lége tɛ Nyi lo Yezo mɛ lo kpã lo gbia ti bombi. E ndo hũ aye mɛ ndo fa ya, Yehova ndo salela azi ti nɛngɔ ya, ala tambwisa linɔ tɛ lo ndɛ? Ĩi. Zia e ba ambanga gbinyangbingɔ ti kpale mɛndó ali tɛrɛ lo na bulu ti 1800. Nyita Charles Taze Russell ndoni kɔi ná akwa lo, agbɔ̃ndó ndani ya, 1914 na dungɔ bulu kɔi ti ngbondoni na omɛ aba Lo-lengɔ Gbia tɛ Nzapa. (Da. 4:25, 26) Ala hĩngandó ni na lége ti mandangɔ aprɔfesi ti ya Ngbangɔ. Yehova ndo tambwisandó ala ti nɛngɔ ya, ala gbɔ̃ nda tɛnɛ ti ya Ngbangɔ? Ĩi, lo ndo tambwisandó ala. Na 1914, akpale mɛndó ali tɛrɛ lo ge lɛ gigi afandó yangondo ya, Lo-lengɔ Gbia tɛ Nzapa abanda lingɔ kwa wɛ. Ngoi mɛndó to ti uzu ti ndo lɛ gigi zu abanda ko, akpale ndɛ̃ ndɛ̃ ndɛ̃ nga ma, ngã, yengingɔ ti sese, nga na zangangɔ tɛ ti tɛngɔ asindó na gesi. (Luka 21:​10, 11) Ta kitɛ da ma ya, Yehova salelandó awakristo niko ti mbilimbili ti nɛngɔ ya, ala za azi tɛ lo.

12-13. Ebongiseli mɛndó amu tɛrɛ lo na ngoi ti to ti sɛ ti lɛ gigi zu so lɛkɛngɔ kwa ti hangɔ nga na fangɔ tɛnɛ nɛ?

¹² E gbɔ̃ li e na ndo kpale mɛndó ali tɛrɛ lo na ngoi ti to ti sɛ ti ndo lɛ gigi zu. Na pɛ mandangɔ tɛnɛ mɛ kaya mbeti ti Suma 17:8 ko, ayata kɔli mɛ ndo ba kwa ka kota biro tɛ e agbɔ̃ndó ndani ya, ta to niko la na lingɔ ya, Armagedona abanda ma, kanda ni na hɛ̃ngɔ nyi ngoi ti siriri mɛ na zingɔ lége ya, kwa ti pangɔ nzɔ̃ pa ali tɛrɛ lo. Na lo ni la, linɔ tɛ Yehova sindó na kalasi ti Galaad mɛ adu Université biblique de la Société Watchtower na ya ngoi ti to, azi ndo hũndó ya, ta ni lengbi ti lingɔ tɛrɛ lo ma. Ala sindó na kalasi ni ti hɛ̃ngɔ fɔrmasiɔ̃ hɛ̃ amisiɔnɛrɛ, afa ya, awakristo mɛ na hɛ̃ngɔ ala kumba ti hangɔ nga fangɔ tɛnɛ na ya ando ndɛ̃ ndɛ̃ ndɛ̃ na ndo lɛ gigi zu. Atondó ambanga amisiɔnɛrɛ ni kaya akɔdɔrɔ mɛndɛ̃ abɛse na ngoi ti to. Na gesi, Bombi tɛ Andozi kpãndó ebongiseli ti mandangɔ kwa ti fangɔ tɛnɛ mɛ ando ilindó ni ya, Mandangɔ kwa ti Lo-lengɔ Gbia b ti nɛngɔ ya, ayata zu ti ya bombi alua fɔrmasiɔ̃ na omɛ aba fangɔ tɛnɛ nzɔ̃ni.

¹³ Ndɛ lo mɛ ko, e hũ yangondo ya, Yehova ndo tambwisa azi tɛ lo na ngoi ti pɛnɔ. Bandangɔ na to ti sɛ ti ndo lɛ gigi zu, nyi siriri mɛ ndɛ na ya akɔdɔrɔ gba ti ndo lɛ gigi ahɛ̃ lége hɛ̃ awa kwa tɛ Yehova ya, ala li kwa ti fangɔ tɛnɛ. Ni li ya, azi gba ahĩnga Yehova, avɔrɔ lo, wa awa kwa tɛ lo ndo li kwa ti fangɔ tɛnɛ na ndo lɛ sese zu.

14. Nda mɛ elengbi ti kpãngɔ bɛ e na ndo andia mɛ linɔ tɛ Yehova nga na abiazi ndo hɛ̃ e nɛ? (Suma 2:1) (Ba nga limɔ.)

 ¹⁴ Kwɛ kɔi ndɛ, ayata ti ya Bombi tɛ Andozi ndo gi litambwisi tɛ Yezo ngoi zu. Ala ndo kpã lɛ la na ndo malako mɛ ala ndo hɛ̃ ni hɛ̃ ayata kɔli ti nɛngɔ ya, amangbi na dangɔ bɛ tɛ To ala ti ndozu. Wa ala ndo hɛ̃ malako ni hɛ̃ ayata ti ya bombi na lége tɛ awa bangɔ ndo kɛlɛ kɛlɛ ná abiazi ti ya bombi. c Ayata mɛ ahĩni ala na kpɔ̃ mɛ ala ndo li kwa tɛ Abiazi ti ya bombi ko, Yezo ‘gbɔ̃ ala na kɔti ti lo.’ (Di Suma 2:1.) Ta kitɛ da ma, abiazi zu adu azi ti zangangɔ lengbi mɛ ala ndo yundo. Na ya ngoi mɛndɛ̃ Moizɛ, Yosua, nga na atoma ayu ngandó ndo. (Mat. 20:12; Yos. 9:14, 15; Roma 3:23) Yezo ndo tambwisa mbɛ ti mbilimbili nga na abiazi mɛndɛ̃ mɛ lo kpã ala, wa lo na lingɔ ni “ngoi zu, nga ka sese awɛ na ni.” (Mat. 28:20) E na aye gba mɛ alengbi ti tongɔ e ya, e kpã bɛ e zu na ndo amalako mɛ lo ndo hɛ̃ e na lége tɛ azi mɛ lo kpã ala ti nɛngɔ ya, ala tambwisa e.

E NDO LUA ANZƆ̃ SULU NA NGOI MƐ E NDO LANDA LITAMBWISI TƐ YEHOVA NGOI ZU

15-16. Wangɔ mɛ elengbi ti luangɔ ka tɛ azi mɛndó alanda litambwisi tɛ Yehova nɛ?

¹⁵ Se e ndo landa litambwisi tɛ Yehova ngoi zu ko, e na luangɔ anzɔ̃ sulu badangɔ ndɛ. E mu se lɛlo tɛ Andy ná Robyn mɛndó ala kpã wangɔ tɛ mbɛ ti mbilimbili nga ti kɔdɛ na kwa, wa ala gbinyangbindó akpale so tingɔ na dungɔ lɛ ngɛ̃́ ti yapuni. (Mat. 6:22) Ni hɛ̃ndó ala lége ti hɛ̃ngɔ ti la na ya kwa ti kĩngɔ ada ti Lo-lengɔ Gbia. Robyn tɛnɛ ya: “E ndo la langɔ kaya da mɛ yakere, wa ngoi mɛndɛ̃ ta ni na ndo ti tɔngɔ na tɛ ma. Wa ayɔngandó ya mbi tɛkɛ (bere mbi ka) aye mɛ mbi ndo li ni na kwa ti gbɔ̃ngɔ afoto abɛse du ya, ni dundó aye mɛ mbi ndo ye ni mawoma. Mbi tondó to na lo ni. Kanda, nga ma tɛ Sara mɛ ya Abrahama ko, mbi mundó ekateli ti bangɔ aye mɛ ka gbɛlɛ mbi kanda ta aye mɛndó mbi zia na gesi ma.” (Aeb. 11:15) Anzɔ̃ kpale mɛndó Andy ná Robyn lua na ndenge mɛ ala pɔna dungɔ lɛ ngɛ̃́ ti ngaso nɛ? Robyn tɛnɛ ya: “E na dengɔ bɛ na lo mɛ ya, e hĩnga ya, e ndo hɛ̃ Yehova aye ti nzɔ̃ni mɛ e na ni. Na ngoi mɛ e ndo li kumba mɛ linɔ tɛ Yehova ndo hɛ̃ e ko, ni ndo li ya e hũ se mɛ dungɔ lɛ ngɛ̃́ na dungɔ da ka gigi ti fãnani.” Andy yendó tɛnɛ ni, lo tɛnɛ ya: “E na dengɔ bɛ na lo mɛ ya, e ndo hɛ̃ ngoi tɛ e nga na ngunu tɛ e na ya kwa tɛ Yehova.”

¹⁶ Anzɔ̃ sulu mɛndɛ̃ mɛ e ndo lua na ngoi mɛ e ndo landa litambwisi tɛ Yehova ngoi zu nɛ? Na  pɛ onzingɔ kalasi tɛ lo ti sɛgɔ̃dɛrɛ ko, Marcia kpãndó na kwa wangɔ mɛ aba dungɔ na mikanɔ ti nyingɔ, na gesi lo tindó wa fangɔ tɛnɛ ti ngoi zu. (Mat. 6:33; Roma 12:11) Lo tɛnɛ ya: “Ahɛ̃ndó mbi bursɛ ti lingɔ kalasi ka univɛrsite na pɛ abulu siɔ. Kanda mbi yendó landangɔ mɔkano tɛ mbi ti nyingɔ. Ni la, mbi yendó lingɔ fɔrmasiɔ̃ ti kwa kɔi mɛ na hɛ̃ngɔ mbi lége ya, mbi kokisa kpale tɛ mbi ti nyingɔ. Ni du kɔi ti ekateli ti nzɔ̃ni mɛndó mbi mu. Mbi na olo na dengɔ bɛ na ya kwa tɛ mbi ti fangɔ tɛnɛ ti ngoi zu, wa na lo mɛ ya, kwa tɛ mbi ti mi ndo hɛ̃ mbi ngoi gba ko, mbi ndo hɛ̃ ti mbi ka Bethel nga na lingɔ aye mɛndɛ̃ ti nzɔ̃ni hɛ̃ Yehova.”

17. Anzɔ̃ sulu mɛndɛ̃ mɛ e ndo lua na ngoi mɛ e ndo ngbã lá kwɛ landangɔ litambwisi tɛ Yehova nɛ? (Yisaya 48:​17, 18)

¹⁷ Na ya ngoi mɛndɛ̃, e ndo lua awangɔ mɛ ndo bata e na omɛ aba dungɔ na gwɛ̃ ti aye ti mi gba, nga kɛ̃ngɔ aye mɛ alengbi ti tongɔ e ya, ta e tɔndɔ ndia tɛ Nzapa ma. Landangɔ litambwisi tɛ Yehova na ya kpale niko, ando hɛ̃ nga e anzɔ̃ kpale gba. E ndo du na bingangɔ li ti vuruni, wa ta e ndo tengbi na akpengba kpale gba ma. (1 Tim. 6:9, 10) Ni na lingɔ ya, e ngbã lá kwɛ vɔrɔngɔ Yehova na bɛ e zu, wa e na dungɔ na bɛta dengɔ bɛ nga na siriri ti bɛ.​—Di Yisaya 48:17, 18.

18. Nda mɛ mɔ mu ekateli ti ngbãngɔ lá kwɛ landangɔ litambwisi tɛ Yehova nɛ?

¹⁸ Ta kitɛ da ma ya, Yehova na ngbãngɔ lá kwɛ salelangɔ azi ti nɛngɔ ya, ala tambwisa e na ngoi ti kota pɛnɔ nga na gbɛ Lo-lengɔ gbia ti bulu koto. (Nz. 45:16) E na ngbãngɔ lá kwɛ landangɔ litambwisi niko abɛse na ngoi mɛ na yɔngɔ ya, e li aye mɛ ta e sepala na ni ma? Na dungɔ woni ya, e landa litambwisi ni se du ya, bandangɔ ndɛ e ndo landa na bɛ e kɔi andia mɛ Yehova ndo hɛ̃ e. Na lo ni la, e ngbã la kwɛ landangɔ litambwisi tɛ Yehova, nga na omɛ lo ndo hɛ̃ ni na lége tɛ azi mɛ lo kpã ala ya, ala bata e. (Yis. 32:​1, 2; Aeb. 13:17) Zia ya, e landa litambwisi tɛ Yehova na lo mɛ ya, e na aye gba mɛ ndo li ya, e kpã bɛ e zu na ndo lo, lo ndo dɔ e na nɔ na lége ti nzɔ̃ni ti nɛngɔ ya, ta e tengbi na siɔ lo mɛ na gbɛ̃ngɔ kpale tɛ e ti nyingɔ ma. Lo na tambwisangɔ e tee ka e lua dungɔ lɛ ngɛ̃́ ti bwai na bwai ka gigi ti fãnani.