1. Ngoi mɛ wa la, awakristo zu mɛ ahĩni ala na kpɔ̃ na gwengɔ ndozu wa?

 ALI ndɛ abulu gba, awa kwa tɛ Yehova ndo hũnda tɛrɛ la na ndo ya, ‘ngoi mɛ wa la, wakristo ti ndani mɛ ahĩni lo na kpɔ̃ ti nyingɔ na gwengɔ ndozu wa?’ Ndó gã, e ndo dandó bɛ e ya, ngoi mɛndɛ̃ ambanga awakristo mɛ ahĩni ala na kpɔ̃ na dungɔ kaya paradizo mɛ ge lɛ sese na ya ndunu ngoi na pɛ to ti Armagedona. Kanda kaya Linɔngi ti Sinzili ti 15/07/2013 e mandandó ya, uzu ti nɛngɔ ya, to ti Armagedona banda ko, awakristo zu mɛ ahĩni ala na kpɔ̃ ti nyingɔ mɛ ala dɛ ge lɛ sese na gwengɔ ndozu.​—Mat. 24:31.

2. Ahũnda mɛ azi mɛndɛ̃ ndo hũnda mɛ e na luangɔ gbinya ni so ya tɛnɛ mɛ nɛ?

² Kanda ambangani so popo tɛ e alengbi ti hũndangɔ ndo mɛ: Ye mɛ na singɔ na awakristo mɛ adu “angasã gbaga mɛndɛ̃” mɛ ala ndo vɔrɔ Yehova na mbilimbili ge lɛ sese na ngoi ti “kota pɛnɔ” nɛ? (Yn. 10:16; Mat. 24:21) Ndɛ lo mɛ ko, ambanga azi mɛ ka popo tɛ angasã gbaga ndo du na sɔngɔ bɛ, ala ndo hũ ya, ala na ngbãngɔ na bɛ ala, ta zo mɛ na zangɔ ala nga na tambwisangɔ ala na ngoi mɛ ayata mɛ ahĩni ala na kpɔ̃ na gwengɔ ndozu na dungɔ da ma. Zia e ba apandɛ sɛ ti ya Ngbangɔ mɛ alengbi ti tongɔ ala ya, ala du na bingangɔ li ti ngaso. Na gesi, e na bangɔ nda mɛ ayɔ ya, ta ala du na sɔngɔ bɛ ma.

YE MƐ TA NA SINGƆ NA ANGASÃ GBAGA MƐNDƐ̃ MA NƐ?

3-4. Dangɔ bɛ mɛ azi mɛndɛ̃ ndo du na ni nɛ, wa na lo nɛ?

³ Azi mɛndɛ̃ ndo da bɛ la ya, na ngoi mɛ gbanda ta ayata mɛ ahĩni ala na kpɔ̃ ti nyingɔ bere bombi tɛ Adonzi na dungɔ da ti tambwisa ala ma ko, angasã gbaga mɛndɛ̃ na ziangɔ vɔrɔngɔ Yehova. Ngoi mɛndɛ̃ apandɛ ti ya Ngbangɔ la ndo li ya, ala du na dangɔ bɛ ti ngaso. Zia e ba se lɛlo sɛ. Ti uzu e na tɛnɛngɔ tɛnɛ mɛ aba kota nganga nzapa Yehoyada. Lo ndó wa kwa tɛ  Nzapa ti mbilimbili. Lo ná ya lo Yehoshabate, abatandó palanga ti kɔli kɔi mɛ ili lo la Yohoashe, wa ala za ngandó lo ti nɛngɔ ya, lo ti gbia kɔi mɛ nzɔ̃ni nga ti mbilimbili. Ngoi zu mɛndó Yehoyada na dungɔ lɛ ngɛ̃́ ko, Yohoashe vɔrɔndó Yehova na mbilimbili wa lo li ngandó aye ti nzɔ̃ni. Kanda na pɛ kwá tɛ Yehoyada ko, Yohoashe bandandó lingɔ aye ti siɔni nvɛ̃ni. Lo mandó tɛnɛ tɛ asiɔ gbia, wa lo zia ngandó vɔrɔngɔ Yehova.​—2 Nt. 24:2, 15-19.

⁴ Ndakisa mɛndɛ̃ adu tɛ awakristo mɛndó na dungɔ lɛ ngɛ̃́ na pɛ ngoi tɛ atoma. Ka popo tɛ atoma zu ko, toma Yoanɛ ndó la zo ti ndani mɛ angbã na dungɔ lɛ ngɛ̃́, lo zandó awakristo ya, ala ngbã mbilimbili na mbage tɛ Yehova. (3 Yn. 4) Mabere atoma tɛ Yezo mɛndɛ̃ ko, Yoanɛ li ngandó kwa kpengbani ti batangɔ abombi na lo tɛ azi mɛ ndo ha lo ti nvɛ̃nɛ, nga na awa lingɔ aye ti siɔni. (1 Yn. 2:18; 2 Tɛs. 2:7) Na pɛ kwá tɛ Yoanɛ ko, awakristo gba atindó aaposta. Abulu yakere na gesi, hangɔ lo tɛ aaposta amundó ndo kaya bombi, wa ayata ti ya bombi ati ngandó na dɔngɔ nɔ ti siɔni.

5. Apandɛ mɛ sɛ afa ya, awakristo mɛ na ngbãngɔ ge lɛ sese na ziangɔ vɔrɔngɔ Yehova na ngoi mɛ ayata mɛ ahĩni la na kpɔ̃ na gwengɔ ndozu?

⁵ Apandɛ niko sɛ ti ya Ngbangɔ ndo fa ya, kpale ti ngaso nga na singɔ na angasã gbaga tɛ Kristo na ngoi mɛ awakristo mɛ ahĩni ala na kpɔ̃ ti nyingɔ na gwengɔ ndozu? Na ya ngoi niko ko, awakristo ti mbilimbili mɛ ge lɛ sese na bandangɔ lingɔ aye ti siɔni nga ma se mɛndó Yehoashe li na ni, bere ala na tingɔ na ya apostazi nga ma se mɛndó awakristo gba ti siɛklɛ ti sɛ ali na ni? Ipɔ! Elengbi ti yengɔ na bɛ e kɔi ya, ngoi mɛ gbanda awakristo mɛ ahĩni ala na kpɔ̃ na gwengɔ ndozu ko, angasã gbaga mɛndɛ̃ na ngbãngɔ lá kwɛ vɔrɔngɔ Yehova na mbilimbili, wa na batangɔ ala nzɔ̃ni na ya nyingɔ. Nda mɛ elengbi ti yengɔ lo ni nɛ?

AWA KWA TƐ YEHOVA NA NGBÃNGƆ LÁ KWƐ VƆRƆNGƆ LO NA SE MƐ BƐ LO NDO YE NA NI

6. Akpale taa mɛ e na mandangɔ ni na ndunu ni nɛ?

⁶ Nda mɛ elengbi ti yengɔ na bɛ e kɔi ya, ta sambela ti mbilimbili na gbɛ̃ngɔ bɛ fãni kɔi ma abɛse na ya ngoi ti siɔni mɛ ka gbɛlɛ e nɛ? Ngbangɔ kambisa ya, ngoi mɛ ndɛ e na ni aɔngbi madãma na ngoi tɛ aya Izraɛlɛ ti gã nga na ngoi tɛ awakristo ti siɛklɛ ti sɛ na pɛ kwá tɛ atoma tɛ Yezo. Zia e ba nvɛ̃ni na seni angoi niko taa: ti (1) ngoi tɛ aya Izraɛlɛ ti gã, ti (2) na pɛ kwá tɛ atoma, wa ti (3) Ngoi tɛ e adu ‘ngoi ti lingɔ ya, aye zu ati na seni.’​—Aw. 3:21.

7. Nda mɛ ta nzɔ̃ dangɔ bɛ tɛ aya Izraɛlɛ anzɛ̃ na ngoi mɛndó agbia ná azi mɛndɛ̃ apɔnandó lingɔ ye ti siɔni ma nɛ?

⁷ Ngoi tɛ aya Izraɛlɛ ti gã. Uzu ti lo kpingɔ ko, Moizɛ pandó hɛ̃ aya Izraɛlɛ ya: “Mbi hĩnga nzɔ̃ni ya, na pɛ kwá tɛ mbi ko, ĩ na lingɔ aye ti siɔni wa ĩ nga na ziangɔ lége mɛndó mbi tɛnɛ ya, ĩ landa.” (Mib. 31:29) Moizɛ tɛnɛ ngandó hɛ̃ aya Izraɛlɛ ya, se ala tɔmbɔgɔ ko, ala na gwengɔ ka gbɛ mbɛ. (Mib. 28:​35, 36) Tɛnɛ niko tindó na seni? Ĩi. Na ya siɛklɛ gba, agbia ti Izraɛlɛ apɔnandó lingɔ siɔ ye, wa aya Izraɛlɛ gba alandandó ala na vɔrɔngɔ anzapa ti nvɛ̃nɛ. Na lo ni ko, Yehova hɛ̃ndó tumbu hɛ̃ aya Izraɛlɛ, wa ta lo di zindó lége hɛ̃ agbia ti Izraɛlɛ ya, ala di le gbia ndo ala ma. (Ezk. 21:25-27) Kanda ngoi mɛndó aya Izraɛlɛ ti mbilimbili ahũ ya, tɛnɛ tɛ Nzapa ati na seni ko, ni lindó ya, ala ti na ge ge ge ti vɔrɔngɔ Yehova na mbilimbili.​—Yis. 55:​10, 11.

8. Elengbi ti kamwãngɔ na ndenge mɛndó bombi tɛ awakristo na siɛklɛ ti sɛ agbɛ̃ndó na ni? Kambisa.

⁸ Na pɛ kwá tɛ ava Yezo. Elengbi ti kamwangɔ na ndenge mɛndó bombi tɛ awakristo ti siɛklɛ ti sɛ agbɛ̃ na ni? Ta nvɛ̃ni ma. Yezo pandó ya, apostazi na mungɔ ndo. (Mat. 7:21-23; 13:24-30, 36-43) Toma Polo, Petro, ná Yoanɛ ayendó na bɛ la kɔi ya, tɛnɛ mɛndó Yezo pia tɛnɛ  abandandó tingɔ na seni na siɛklɛ ti uzu ti N.E. (2 Tɛs. 2:3, 7; 2 Pet. 2:1; 1 Yn. 2:18) Na ya siɛklɛ ti sɛ ti N.E. ko, bombi tɛ awakristo agbɛ̃ndó. Awakristo mɛndó ati aaposta atindó gba, wa ala lindó kaya Babilɔnɛ mɛ kota kɔdɔrɔ mɛ ndo le gbia na ndo asambela ti nvɛ̃nɛ ti lɛ gi gi zu. Prɔfesi mɛndó Yezo tɛnɛ tɛnɛ ni ati na se ni fãni mɛndɛ̃.

9. Ngasia la, ngoi mɛ e da aɔngbi na ngoi tɛ aya Izraɛlɛ ti gã nga na ngoi ti bombi tɛ awakristo ti siɛklɛ ti sɛ nɛ?

⁹ “Ngoi ti lingɔ ya, aye zu ati na seni.” Ngoi tɛ e akɛsɛnɛ na ngoi tɛ aya Izraɛlɛ ti gã nga na ngoi ti kota apostazi mɛndó ndo li tɛrɛ lo na ya siɛklɛ ti sɛ ti N.E. Ando ili ngoi mɛ e da ya nɛ? Na mɔmɛsɛnɔ, e ndo ili ngoi mɛ e da ya ‘ngoi ti ndani’ ti akpale ti siɔni ti ngoi olo. (2 Tim. 3:1) Kanda Ngbangɔ tɛnɛ nga tɛnɛ ti ngoi ti kpengbani nga ti dengɔ bɛ mɛ abanda bo na ngoi niko. Ngoi niko na gwengɔ tee na lá mɛ Lo-lengɔ Gbia tɛ Masiya na lingɔ ya, azi ati na tɛrɛ ti lengbingɔ, wa ni na gbinyangbingɔ lɛ sese mɛ ati paradizo. Ando ili ngoi niko ya, “ngoi ti lingɔ ya, aye zu ati na seni.” (Aw. 3:21) Ngoi niko bandandó na 1914. Ye mɛndó ali ya, ati na seni nɛ? Yezo tindó gbia ka ndozu. Ni la, Yehova di luandó gbia ti fãnani ti nɛngɔ ya, lo mu Lo-lengɔ gbia ka panda Davidi mɛ gbia ti mbilimbili. Kanda ta bo Lo-lengɔ Gbia kɔi la Yehova li ya, ati na seni ma. Nyi ngoi yakere na gesi Yehova diri lindó ya, sambela ti mbilimbili ati na seni! (Yis. 2:2-4; Ezk. 11:17-20) Sambela ti mbilimbili na gbɛ̃ngɔ fãni mɛndɛ̃?

10. (a) Tɛnɛ mɛ Ngbangɔ tɛnɛ na omɛ aba sambela ti mbilimbili na ngoi tɛ e nɛ? (Yisaya 54:17) (b) Nda mɛ tɛnɛ ti prɔfesi niko ali ya, e kpã bɛ e na ndo ni nɛ?

¹⁰ Di Yisaya 54:17. Binga li mɔ na ndo prɔfesi niko: “Ta anwa ti to kɔi mɛ alɛkɛ ti tiringɔ mɔ na to na longangɔ ma”! Tɛnɛ niko mɛ asu ni na lége ti nyingɔ vurú tɛ Nzapa ndo ti na seni ndɛ. Tɛnɛ mɛ alanda ndo sa nga ngunu bɛ e ndɛ: “Yehova na hangɔ ayati mɔ zu na ye, wa ayati mɔ na tingɔ na siriri gba. Mɔ na dɔngɔ longɔ kpengbani na ya mbilimbili . . . Ta mɔ na kpɛngɔ ye kɔi ma, ta ye kɔi nga na hɛ̃ngɔ mɔ mbɛtɔ ma, na lo mɛ ya, ta ni na dɔngɔ dã na mɔ ma.” (Yisaya 54:13, 14) Abɛse Satana mɛ “nzapa ti akpale ti ngoi olo” ko, ta lo lengbi ti gbanzingɔ kwa mɛ awa kwa tɛ Yehova ndo li ti nɛngɔ ya, ala ha azi na kpale mɛ aba Yehova ma. (2 Kɔr. 4:4) Ando lɛkɛ sambela ti vuruni ti nɛngɔ ya, ati na seni, wa ta ye kɔi na gbɛ̃ngɔ ni fãni mɛndɛ̃ ma. Ni na ngbãngɔ ti bwai na bwai. Ta nwa ti to kɔi mɛ alɛkɛ ni so lingɔ e siɔni na longangɔ ma!

 YE MƐ NA SINGƆ NƐ?

11. Ngoi mɛ awakristo mɛ ahĩni ala na kpɔ̃ ti nyingɔ na gwengɔ ndozu ko, ye mɛ ato e, e ye ya, ta Nzapa na ziangɔ butu butu tɛ azi ma nɛ?

¹¹ Akpale mɛ na lingɔ tɛrɛ lo na ngoi mɛ awakristo mɛ ahĩni la na kpɔ̃ na gwengɔ ndozu nɛ? Ta bɛ mɔ li na ni ma ya, Yezo la du wa batangɔ e angasã gbaga tɛ lo. Lo du gbia ti bombi tɛ awakristo. Yezo tɛnɛndó yangondo ya: ‘Ĩ na Gbia bo kɔi, Kristo.’ (Mat. 23:10) Yezo mɛ ndo le Gbia na olo ka ndozu, lo na ngbãngɔ bo lá kwɛ batangɔ ava lo ti mbilimbili. Na lége ti litambwisi tɛ Yezo ko, ta awakristo mɛ na dungɔ ge lɛ sese na dungɔ na mbɛtɔ ti ye kɔi ma. Ti tɛnɛngɔ bɛta tɛnɛ ko, ta e hĩnga akpale gba na ndo se mɛ Kristo na tambwisangɔ ava lo na ya ngoi niko ma. Ni la, zia e ba ambanga se lɛlo mɛ Ngbangɔ tɛnɛ tɛnɛ ni mɛ alengbi ti tongɔ e ya, e ye lo ni.

12. Ngasia la Yehova batandó azi tɛ lo (a) na pɛ kwá tɛ Moizɛ nɛ? (b) Na ngoi mɛndó Eliya lua kumba mɛndɛ̃ nɛ? (Ba nga limɔ.)

¹² Moizɛ kpindó uzu ti nɛngɔ ya, aya Izraɛlɛ ali kaya kɔdɔrɔ ti kapa. Ye mɛndó si na awa kwa tɛ Nzapa nɛ? Yehova ziandó zangɔ azi ti Izraɛlɛ na ngoi mɛ Moizɛ mɛ wa kwa tɛ lo ti mbilimbili kpi? Ipɔ. Na ngoi mɛndó ala ndo ngbã mbilimbili ko, Yehova ndo kokisandó gwɛ̃ tɛ ala. Uzu ti nɛngɔ ya, Moizɛ kpi ko, Yehova tɛnɛndó hɛ̃ lo ya, lo hɛ̃ Yosua fɔrmasiɔ̃ ti nɛngɔ ya, lo tambwisa aya Izraɛlɛ. Moizɛ hɛ̃ndó Yosua fɔrmasiɔ̃ na ya abulu gba. (Kob. 33:11; Mib. 34:9) Hãngɔ ni zingɔ Yehova kpã ngandó akɔli mɛndɛ̃ ti kpengbani ti nɛngɔ ya, ala tabwisa azi tɛ lo, na ndakisa lo kpãndó agbia tɛ azi koto, agbia tɛ azi ngbangbo, agbia tɛ azi sui kũ, abɛse nga tɛ azi sui kɔi. (Mib. 1:15) Ala ndo batandó awa kwa tɛ Nzapa na se ti nzɔ̃ni nvɛ̃ni. Se lɛlo tɛ Eliya afa ni yangondo, lo lindó kwa kpengbani na ya abulu gba ti zangɔ aya Izraɛlɛ ya, ala vɔrɔ Yehova na mbilimbili. Kanda Yehova hɛ̃ndó lo kumba mɛndɛ̃ ti fãnani, wa lo tondó lo ka sudi ti Yuda. (2 Ba. 2:1; 2 Nt. 21:12) Lo ziandó azi mɛ kaya lo-lengɔ gbia ti ndasewa sui kɔi ti Izraɛlɛ na bɛ la? Ipɔ. Eliya ahɛ̃ndó Elisha fɔrmasiɔ̃ na ya abulu gba nvɛ̃ni. Hãngɔ ni zingɔ, ngoi mɛndɛ̃ ando hɛ̃ ngandó “aya prɔfeta” mɛ so ndoko fɔrmasiɔ̃. (2 Ba. 2:7) Afa ya, akɔli ti mbilimbili ndó da gba ti nɛngɔ ya, ala li kwa ti zangɔ nga ti tambwisangɔ azi tɛ Nzapa. Azi ndo lindó se bɛ Yehova ngoi zu, wa Yehova ndo bata ngandó awa kwa tɛ lo ti mbilimbili.

13. Ye mɛ Yehova ko kapa ni hɛ̃ e mɛ kaya Aebreo 13:5b nɛ? (Ba nga limɔ.)

¹³ Na lége ti ndakisa mɛ ko, mɔ da bɛ mɔ ya nɛ, ye mɛ na lingɔ tɛrɛ lo na ngoi mɛ awakristo zu mɛ ahĩni ala na kpɔ̃ ti nyingɔ na gwengɔ  ndozu nɛ? Ta e na gwɛ̃ ti hũndangɔ ndo niko ma. Ngbangɔ tɛnɛ tɛnɛ kɔi ti mbilimbili mɛ ndo li ya, e kpã bɛ e ndo lo: Ta Yehova na ziangɔ azi tɛ lo ge lɛ sese ma. (Di Aebreo 13:5b.) Nga ma Moizɛ ná Eliya, linɔ tɛ awakristo mɛ ahĩni ala na kpɔ̃ mɛ ala ndo tambwisa kwa tɛ e ndɛ ko, ala hĩnga nzɔ̃ni nda mɛ adu ngbondoni hɛ̃ngɔ azi mɛndɛ̃ fɔrmasiɔ̃. Ali ndɛ abulu gba, ayata mɛ ndo li kwa ka Bombi tɛ Adonzi ndo hɛ̃ fɔrmasiɔ̃ hɛ̃ ambanga ayata kɔli mɛ ka popo tɛ angasã gbaga mɛndɛ̃ ti nɛngɔ ya, ala tambwisa linɔ tɛ e. Na ndakisa, ala lɛkɛ akalasi gba ti nɛngɔ ya, ala hɛ̃ abiazi, awa bangɔ ndo kɛlɛ kɛlɛ, ayata mɛ kaya kɔmite ti filial, awa bangɔ kwa ti béthel nga na akpale mɛndɛ̃ fɔrmasiɔ̃. Bombi tɛ Adonzi ndo hɛ̃ awa zangɔ ala na kwa fɔrmasiɔ̃ na omɛ aba komite ndɛ̃ ndɛ̃ ndɛ̃ mɛ Bombi tɛ Adonzi na ni. Ayata niko ndo kokisa na olo akumba ti kpengbani ge ya linɔ tɛ Yehova. Ala lua fɔrmasiɔ̃ ti nzɔ̃ni ti nɛngɔ ya, ala ngbã lá kwɛ batangɔ angasã gbaga tɛ Kristo.

14. Atɛnɛ ti ngbondoni mɛ e manda so ya tɛnɛ mɛ nɛ?

¹⁴ Ba akpale ti ngbondoni mɛ e manda na ya tɛnɛ mɛ: Ngoi mɛ gbanda awakristo zu mɛ ahĩni ala na kpɔ̃ ti nyingɔ na gwengɔ ndozu nyi ngoi yakere uzu ti nɛngɔ ya, nda kota pɛnɔ akɔ ko, azi tɛ Yehova mɛ ge lɛ sese na ngbãngɔ bo lá kwɛ vɔrɔngɔ lo na mbilimbili. Na lége ti litambwisi tɛ Yezo Kristo ko, ta ye kɔi na gbɛ̃ngɔ sambela ti vuruni ma, ni na ngbãngɔ se mɛ ni da. Ti biani, e hĩnga ya, na ngoi niko gbanda ko, linɔ tɛ agbia ti gigi zu mɛ Ngbangɔ ndo ili ala ya, Gɔge ti Magɔge na bingɔ to tɛrɛ e. (Ezk. 38:18-20) Kanda ta to niko ti ndunu ngoi na longangɔ ma, ta ni nga na gbanzingɔ awa kwa tɛ Yehova na vɔrɔngɔ lo ma. Lo na songɔ na ala! Kaya suma kɔi mɛndó toma Yoanɛ hũ ko, lo hũndó “butu butu” tɛ awakristo mɛndɛ̃. Apandó hɛ̃ Yoanɛ ya, “butu butu” tɛ azi niko alo “kaya kota pɛnɔ.” (Suma 7:9, 14) Ti biani Yehova na batangɔ ala, ta ye kɔi na singɔ na ala ma!

15-16. Na bangɔ mbeti ti Suma 17:14, ye mɛ ava Yezo mɛ ahĩni ala na kpɔ̃ na lingɔ na ngoi ti to ti Armagedona nɛ, wa nda mɛ ni du tɛnɛ ti sangɔ ngunu bɛ nɛ?

¹⁵ Kanda azi mɛndɛ̃ ndo hũnda tɛrɛ ala na ndo ya: ‘Wa na lo tɛ awakristo mɛ ahĩni ala na  kpɔ̃ mɛ? Na pɛ gwengɔ ndozu ye mɛ awakristo mɛ ahĩni ala na kpɔ̃ ti nyingɔ na lingɔ nɛ?’ Ngbangɔ hɛ̃ gbinya ti hũnda niko mbala kɔi. Ni tɛnɛ ya, agbia ti politikɛ ti gigi mɛ “na bingɔ to tɛrɛ Nyi ngasã gbaga.” Ti biani ta ala na nwɔngɔ lo ma. E di ngaso mɛ: “Nyi ngasã Gbaga na nwɔngɔ ala.” Wa azi mɛ na zangɔ lo na? Vɛrse ni hɛ̃ gbinya ngaso, adu azi mɛ “aili ala,” “apɔna ala,” wa ala nga “mbilimbili.” (Di Suma 17:14.) Azi niko adu ana? Adu awakristo mɛ ahĩni la na kpɔ̃ mɛ aso kwá! Afa ya, ngoi mɛ wakristo ti ndani mɛ ahĩni lo na kpɔ̃ na gwengɔ ndozu uzu ti nɛngɔ ya, nda kota pɛnɔ akɔ ko, kwa ti uzu mɛ lo na lingɔ adu ti tiringɔ to. Kumba kɔi mɛ ngbondoni nvɛ̃ni! Ambanga awakristo mɛ ahĩni ala na kpɔ̃ ti nyingɔ adundó akpengba awa tiringɔ to uzu ti la tingɔ Atɛmwɛ tɛ Yehova. Ambangani alindó kwa tɛ asoda. Kanda na gesi ala ti abɛta awakristo, wa ala manda nga se ti dungɔ du na siriri na azi mɛndɛ̃. (Gal. 5:22; 2 Tɛs. 3:16) Ala zia ato zu ti mi. Kanda na pɛ gwengɔ ndozu ko, ala na lingɔ kwa ka tɔ̃nda Yezo ná aangelo tɛ lo, wa ala na tiringɔ to ti ndani na awa kula tɛ Nzapa.

¹⁶ Binga li mɔ ĩ. Ge lɛ sese ko, ambanga ni ti abange bere ala nzɛ̃. Kanda ngoi mɛ ala na songo ti luangɔ dungɔ lɛ ngɛ̃́ ka ndozu ko, ala na tingɔ azi mɛ na tɛrɛ ti nyingɔ, ala na tingɔ na ngunu wa ta ala nga na kpingɔ ma, ala na tiringɔ to ka tɔ̃nda Gbia tɛ la Yezo Kristo mɛ wa nwɔngɔ to. Na pɛ to ti Armagedona ko, ala na lingɔ kwa ndoni kɔi na Yezo ti zangɔ azi ya, ala ti na tɛrɛ ti lengbingɔ. Ta kitɛ da ma ya, ala na lingɔ aye ti nzɔ̃ni gba na lo tɛ ayata kɔli ná ayata wali mɛ ala ndo ye la mawoma mɛ ge lɛ sese ɔngɔ omɛndó ala lengbi ti lingɔ na ngoi mɛndó ala dɛ ge lɛ sese nga ma azi ti zangangɔ lengbingɔ!

17. E hĩnga ngasia ya, awa kwa tɛ Nzapa zu na dungɔ na siriri na ngoi ti to ti Armagedona nɛ?

¹⁷ Mɔ kaya popo tɛ angasã gbaga mɛndɛ̃? Wa ye mɛ mɔ na dungɔ na gwɛ̃ ti lingɔ na ngoi mɛ to ti kpengbani ti Armagedona na bandangɔ nɛ? Ni du woni: Kpã bo bɛ mɔ na ndo Yehova ná linɔ tɛ lo. Ni lengbi na nɛ? Ngbangɔ tɛnɛ tɛnɛ ni na ndenge ti wambangɔ bɛ ya: “Li kaya shambrɛ tɛ mɔ, wa vĩ nyɔ da ka pɛko mɔ. Ɔndɛ tɛrɛ mɔ na pɛ nyi ngoi tee mɛ ngɔnzɔ tɛ lo aɔ.” (Yis. 26:20) Azi mɛ ndo vɔrɔ Nzapa na mbilimbili zu mɛ ka ndozu ná omɛ ge lɛ sese na dungɔ na siriri na ngoi niko. Mabere toma Polo ko, e na loyengɔ ya, ‘ta aguvɛrnema, ta aye ti ngoi olo, bere aye ti ngoi mɛ gangɔ . . . na gbanzingɔ Nzapa ya, lo ye e ma.’ (Roma 8:38, 39) Bi zu, ndo da bɛ mɔ na tɛnɛ mɛ: Yehova ndo ye mɔ, wa ta lo na ziangɔ mɔ bɛ fãni kɔi ma!