1-2. (a) Kpale mɛndó Polo tengbi na ni na ngoi mɛndó lo su mbeti hɛ̃ ayata ti Efɛzɛ nɛ? (b) E na hɛ̃ngɔ gbinya na ndo hũnda mɛ wa?

 NA NGOI mɛndó lo ka bɔlɔkɔ ka Roma ko, Polo yendó sangɔ ngunu bɛ ayata lo awakristo. Ta lo lengbindó ti gwengɔ bangɔ ala ma, ni la lo sundó mbeti to hɛ̃ la. Kɔi ti ambeti ni adu omɛndó lo su to hɛ̃ ayata ti Efɛzɛ, lo sundó ni na ya bulu 60 bere 61 N.E.​—Ef. 1:1; 4:1.

² Abulu bere 10 uzu ko, Polo lekisandó ngoi gba ka Efɛzɛ, ti hangɔ tɛnɛ nga na pangɔ nzɔ̃ pa, wa lo ndo ye ndó ayata gba. (Aw 19:1, 8-10; 20:20, 21) Lo yendó zangɔ ala ya, ala ngbã mbilimbili ka mbage tɛ Yehova. Nda mɛndó lo su mbeti to hɛ̃ awakristo mɛ ahĩni la na kpɔ̃ na lo mɛ aba mbingo ná vuru ndo nɛ? Wangɔ mɛ awakristo zu lengbi ti luangɔ na ndo mbeti tɛ Polo nɛ? Zia e ba agbinya ti ahũnda mɛ.

ALA LO KAYA MBINGO ASI NA YA VURU NDO

3. Tɛnɛ mɛndó Polo salela na ya mbeti tɛ lo hɛ̃ ayata ti Efɛzɛ nɛ?

³ Polo sundó mbeti to hɛ̃ awakristo ti Efɛzɛ ya: “Ĩ ndó na ya mbingo kanda ĩ na olo na ya vuru ndo.” (Ef. 5:8) Polo salela tɛnɛ mɛ ba mbingo ná vuru ndo so kambisangɔ tɛnɛ mɛ aɔngbi. Zia e ba nda mɛ Polo tɛnɛ ya, azi ti Efɛzɛ kaya “mbingo.”

4. Na lo nɛ la elengbi ti tɛnɛngɔ ya, azi ti Efɛzɛ ndó na ya mbingo na ya kpale mɛ ba sambela nɛ?

⁴ Sambela ti nvɛ̃nɛ. Uzu tɛ la tingɔ awakristo ko, azi ti Efɛzɛ ndó kaya sambela ti nvɛ̃nɛ. ndo na tepelo tɛ Artemis,  mɛndó azi ndo hũ ya, ni ɔ atepelo zu ti ngoi niko. Azi mɛndó ndo li sambela kaya tepelo ni ndo vɔrɔndó ngbilondo. Leta hɛ̃ndó lége ti lɛkɛngɔ nga na kangɔ tepelo tɛ Artemis mɛ ni hɛ̃ndó falanga gba. (Aw. 19:​23-27) Hãngɔ ni zingɔ, kɔdɔrɔ ni ko ahĩngangbindó na lo ti kwa ti maji mɛndó ala ndo li kai.​—Aw. 19:19.

5. Na lo nɛ la elengbi ti tɛnɛngɔ ya, azi ti Efɛzɛ ndó na ya mbingo na ya dɔngɔ nɔ tɛ ala nɛ?

⁵ Ala ndó na ya mbingo nga na dɔngɔ nɔ ti bí. Ahĩngandó azi ti Efɛzɛ na lo ti dɔngɔ nɔ tɛ la ti bí. Awele nga na ayenga ti sambela mɛndó ando li asĩndó na akpale ti siɔni. (Ef. 5:3) Ta azi ti kɔdɔrɔ niko di dɛndó na bingangɔ li ti nzɔ̃ni ma, tɛnɛ ni ko fa ya, ta ala nvɛ̃ni ndo hũndó ye ti siɔni “uzu ti mandangɔ ye mɛ nzɔ̃ni bere siɔ ni ma” wa ta azi ti Efɛzɛ ndo hĩngandó ya, ala na diringɔ na nyɔ la hɛ̃ Yehova ma.” (Ef. 4:17-19) Na lo ni la, Polo ndo hũndó la mabere azi mɛ kaya mbingo “wa ta ala lengbi ti luangɔ bɛta du mɛ Nzapa ndo hɛ̃ azi bɛ gbɔ ma.”

6. Na lo nɛ la Polo su mbeti hɛ̃ azi ti Efɛzɛ ya, ala na olo ka ya “vuru ndo nɛ”?

⁶ Abɛse ngaso ko, ta azi ti Efɛzɛ zu la angbãndó kaya mbingo niko ma. Polo su ya “ĩ na olo na ya vuru ndo nga na nzɔ̃ mangbi na Nzapa.” (Ef. 5:8) Ala si kaya vuru ndo wa ala hĩnga mbilimbili ti ya Ngbangɔ. (Nz. 119:105) Azi ti Efɛzɛ ziandó sambela tɛ la ti nvɛ̃nɛ nga na dɔngɔ nɔ tɛ la ti siɔni. “Ala tindó awa landangɔ se lɛlo tɛ Nzapa, ala ndo lindó zu” ti vɔrɔngɔ Yehova nga na hɛ̃ngɔ lo dengɔ bɛ.​—Ef. 5:1.

7. Ngasia la kpale tɛ e du kwɛ kɔi na tɛ azi ti Efɛzɛ nɛ?

⁷ Uzu ti nɛngɔ ya, e ti awakristo ko, e ndó na ya dɔngɔ nɔ ti ya mbingo nga na ya sambela ti nvɛ̃nɛ. Azi mɛndɛ̃ so ya popo tɛ e ando lindó ayenga ti sambela ti nvɛ̃nɛ, ambanga ni ngandó na dɔngɔ nɔ ti siɔni. Kanda na ngoi mɛ e manda tɛnɛ tɛ Yehova na omɛ aba nzɔ̃ni ná siɔni ko, e gbinyangbi  dungɔ lɛ ngɛ̃́ tɛ e. E li ya, ni mangbi na andia tɛ Nzapa. Wa ni li ya, e lua anzɔ̃ kpale gba. (Yis. 48:17) Ndɛ e ndo tengbi na akpengba kpale ngoi zu. Elengbi ti dungɔ yɔngɔrɔni na mbingo mɛndó e zia ka pɛko e “wa e ngbã lá kwɛ na ya vuru ndo.” Ngasia la elengbi ti lingɔ ni nɛ?

KƐ̃ DUNGƆ NA YA MBINGO

8. Na bangɔ Efɛzɛ 5:​3-5, ye mɛndó yɔ ya azi ti Efɛzɛ ali zu ti ziangɔ ni nɛ?

⁸ Di Efɛzɛ 5:3-5. Ti nɛngɔ ya, awakristo ti Efɛzɛ akɛ̃ dungɔ na ya mbingo ko, ayɔndó ya ala ngbã lá kwɛ lingɔ ye mɛ bɛ Yehova ndo sepala na ni. Ta ala lengbi bondó ti ziangɔ aseliye ti bí ma, kanda ayɔ ngandó ya, ala zia atɛnɛ ti siɔni. Polo tɛnɛndó hɛ̃ azi ti Efɛzɛ ya, se ala ye luangɔ “kɔdɔrɔ Gbia tɛ kristo ná Nzapa” ko, ayɔ ya ala zia aseliye niko ti siɔ ni.

9. Na lo nɛ la ayɔ ya, e zia ye zu mɛ alengbi ti tongɔ e ya e li pite nɛ?

⁹ Ayɔ ya, e ngbã lá kwɛ kɛ̃ngɔ aye mɛ alengbi ti tongɔ e ya, “e li aye ti gbɛ mbingo.” (Ef. 5:11) Zo ko la na seliye ti bangɔ, mangɔ, nga na tɛnɛngɔ tɛnɛ ti siɔni ko, na dungɔ woni ya lo ti na ya siɔ kpale. (Eb. 3:6; Zaki 1:14, 15) Na ya kɔdɔrɔ kɔi ayata gba ali groupe kaya sitɛ ti tɛnɛngɔ tɛnɛ na azi ti nɛngɔ ya, ala ndo tɛnɛ tɛnɛ ka popo tɛ ala. Na ebandeli, gba ni ka popo tɛ la ndo tɛnɛndó tɛnɛ mɛ aba akpale ti nyingɔ, kanda yɛkɛ yɛkɛ ala bandandó tɛnɛngɔ tɛnɛ mɛ ta ndo hɛ̃ Yehova dengɔ bɛ ma, wa na gesi ala bandandó tɛnɛngɔ tɛnɛ mɛ aba bombingɔ tɛrɛ tɛ kɔli ná wali. So pɛ ni, azi gba so popo tɛ ala aye ya, dangɔ bɛ ni ko ti siɔni atondó ala ya, ala li pite.

10. Ngasia la Satana ndo gi lége ti andangɔ e nɛ ? (Efɛzɛ 5:6)

¹⁰ Gigi tɛ Satana ndo gi lége ti andangɔ e, e hũ ya ka tɛ Yehova ye ti vuruni ná ye ti bí kwɛ kɔi. (2 Pet. 2:19) Kanda ta ni du ye ti kamwangɔ ma! Ni du kɔi ti kɔdɛ mɛ Satana ndo salelandó bandangɔ gã ti tongɔ azi ya, ta ala ahĩnga kangbingɔ ye mɛ nzɔ̃ni na ye mɛ siɔni ma. (Yis. 5:20; 2 Kɔr. 4:4) Na ngoi mɛ afilmɛ, aemisiɔ̃, nga na asitɛ ti tɛnɛngɔ tɛnɛ gba ndo kambisa akpale mɛ aɔngbi na tɛnɛ ti mbilimbili tɛ Yehova ko, ta ni ndo kamwisa e ma! Ta Satana ndo to bo e, e hũ ya, seliye ti bí mɛ amu lɛ gigi zu adu siɔ ni ma, kanda lo ndo to nga e, e hũ ya ni ndo hɛ̃ dengɔ bɛ wa ta ndo si nga na siɔ kpale ma.​—Di Efɛzɛ 5:6.

11. Ngasia la kpale mɛndó Angela tengbi na ni afa nda mɛ kpãngɔ wangɔ mɛ kaya Efɛzɛ 5:7 ya ni du ngbondo ni nɛ? (Ba nga limɔ.)

¹¹ Satana ye tongɔ e ya, e ti akwa azi mɛ ta ala na zangɔ e ya, e tɔndɔ ndia tɛ Yehova ma. Ni la Polo kebisandó ayata ti Efɛzɛ ya: ‘Ta ĩ du na mangbi na ala ma,’ afa ya, azi mɛ ndo li aye mɛ bɛ Nzapa kɛ̃. (Ef. 5:7) Ni la ayɔ ya, e du na kpengba lɛ ɔngɔ awakristo ti Efɛzɛ, na lo mɛ ya ndɛ̃ lo mɛ ko e ndo lekisa ngoi ndoni kɔi na azi na ngoi mɛ e ndo du ndoni kɔi na ala nga na lége ti intɛrnɛtɛ. Angela, a mɛ ndo du ka Asie, lo hũndó se mɛ sitɛ ti tɛnɛngɔ na tɛnɛ alengbindó ti dungɔ siɔni. Lo tɛnɛ ya: “Ni na sɔ̃ kɔi mɛ alengbi ti gbengɔ bingangɔ li tɛ mɔ se ta mɔ du na kpengba lɛ ma. Ni lindó ya, mbi ti na akwa mɛ ta ala ndo tɔndɔ ndia ti ya Ngbangɔ ma wa ta mbi ndo hũ ngandó ni siɔni ma. Yɛkɛ yɛkɛ mbi bandandó  hũngɔ ya, dungɔ na dungɔ lɛ ngɛ̃́ mɛ ta ndo dɛ na bɛ Yehova ma ko ni du nzɔ̃ni. Ye ti nzɔ̃ni adu ya, na songɔ zu abiazi zandó Angela ya lo gbinyangbi dungɔ lɛ ngɛ̃́ tɛ lo. Lo tɛnɛ ya: “mbi ndo li ya, bingangɔ li tɛ mbi du gba na ndo kpale ti nyingɔ na se lɛ kpãngɔ lɛ mbi na ndo sitɛ ti tɛnɛngɔ tɛnɛ na azi.”

12. Ye mɛ alengbi ti zangɔ e ya, e tɔndɔ atɛnɛ mɛ Yehova tɛnɛ na omɛ aba nzɔ̃ni na siɔni nɛ?

¹² Ayɔ ya e kɛ̃ siɔ dangɔ bɛ ti gigi olo mɛ ndo hũ ya, ta pite du siɔni ma kanda e hĩnga ya, ni du siɔni. (Ef. 4:19, 20) Hũnda tɛrɛ mɔ na ndo mɛ: ‘mbi ndo li zu ti kɛ̃ngɔ lekisangɔ ngoi ndoni kɔi na afɔ̃ mbi ti kalasi, bere afɔ̃ mbi ti kwa mɛ ta ala ndo tɔndɔ ndia ti mbilimbili tɛ Yehova ma? Mbi ndo tɔndɔ na seni ndia tɛ Yehova abese azi mɛndɛ̃ ndo hũ ya, mbi du wa kakulu lo?’ Nga ma se mɛ mbeti ti 2 Timɔte 2:20-22 atɛnɛ na ni, ayɔ nga ya e du na kpengba lɛ na ngoi mɛ e ndo pɔna ayata ti ya bombi ya, ala ti akwa e. Ta bɛ e li na ni ma ya, ta ambɛni ka popo tɛ ala lengbi ti zangɔ e ya, e ngbã mbilimbili na ya kwa tɛ Yehova ma.

NƆ NƆ “NGA MA NYINGAMBI TI VURU NDO”

13. “Ngbãngɔ lá kwɛ nɔngɔ nɔ nga ma ayangambi ti vuru ndo” alengbi na nɛ? (Efɛzɛ 5:7-9)

¹³ Ta Polo ngbã bondó sangɔ ngunu bɛ awakristo ti Efɛzɛ ya ala kɛ̃ mbingo ma, kanda “ala ngbã lá kwɛ nɔngɔ nɔ nga ma ayangambi ti vuru ndo.” (Di Efɛzɛ 5:​7-9.) Tɛnɛ niko lengbi na nɛ? Lo ye tɛnɛngɔ ya, e ngbã lá kwɛ dungɔ na aseliye tɛ abɛta awakristo. Lége kɔi ti lingɔ ni adu dingɔ nga na gbɔ̃ngɔ li e na ndo Ngbangɔ ná ambeti tɛ e. Ni du ngbondoni ya e kpã likebi tɛ e na ndo se lɛlo nga na hangɔ lo tɛ Yezo kristo, “mɛ lo du vuru ndo ti lɛ gigi zu.”—Yn. 8:12; Mas. 6:23.

14. Ngasia la nyingɔ vurú lengbi ti zangɔ e nɛ?

¹⁴ E nga na gwɛ̃ ti nyingɔ vurú tɛ Nzapa ti nɛngɔ ya, aza e “e ngbã lá kwɛ nɔngɔ nɔ nga ma ayangambi ti vuru ndo.” Na lo nɛ ? Na lo mɛ ya dungɔ vuruni na ya gi gi olo ti bí ko, ta du woni ma. (1 Tɛs. 4:3-5, 7, 8)  Nyingɔ vurú lengbi ti zangɔ e ya, e kɛ̃ dangɔ bɛ ti gigi olo, hangɔ lo ti filozofi, ná aye mɛndɛ̃ mɛ ta amangbi na tɛnɛ tɛ Nzapa ma. Ni lengbi nga ti zangɔ e ya, e fa alɛ mabere “mbilimbili, nzɔ̃ bɛ nga na dungɔ lɛ ngɛ̃́ mɛ amangbi na mbilimbili.”​—Ef. 5:9.

15. Elengbi ti luangɔ nyingɔ vurú ngasia? (Efɛzɛ 5:​19, 20)

¹⁵ Lége kɔi mɛ elengbi ti luangɔ na nyingɔ vurú adu na yɔngɔ ni na ya sambela. Yezo tɛnɛndó ya: “Yehova na hɛ̃ngɔ nyingɔ vurú tɛ lo hɛ̃ azi mɛ ndo yɔ ni.” (Luka 11:13) E ndo lua nga nyingɔ vurú na ngoi mɛ e ndo gonda Yehova ndoni kɔi ka bombi. (Di Efɛzɛ 5:19, 20.) Nyingɔ vurú tɛ lo na zangɔ e ya, e du na dungɔ lɛ ngɛ̃́ mɛ ndo hɛ̃ Lo dengɔ bɛ.

16. Ye mɛ alengbi ti zangɔ e ya, e mu ekateli na ndara nɛ? (Efɛzɛ 5:10, 17)

¹⁶ Se e ye mungɔ ekateli kɔi mɛ ngbondoni ko, ayɔ ya e gi hĩngangɔ dangɔ bɛ tɛ Yehova wa “e li ye na mangbi na bangɔ dangɔ bɛ ni.” (Di Efɛzɛ 5:10, 17.) Na ngoi mɛ e ndo gi awangɔ ti ya Ngbangɔ na ndo kpale tɛ e ko, e ndo gi hĩngangɔ dangɔ bɛ tɛ Nzapa na lo ni. Wa se e landa dangɔ bɛ niko e na mungɔ nga ekateli ti nzɔ̃ni.

17. Ngasia la elengbi ti salelangɔ ngoi tɛ e nzɔ̃ni nɛ? (Efɛzɛ 5:15, 16) (Ba nga limɔ.)

¹⁷ Polo hɛ̃ ngandó wangɔ hɛ̃ ayata ti Efɛzɛ ya, ala salela ngoi tɛ la na ndara. (Di Efɛzɛ 5:15, 16.) Gwɛ̃ tɛ Satana mɛ “wa kula” tɛ e du ya, e hɛ̃ tɛrɛ e na ya kwa ti gi gi olo, wa ta e lua ngoi e hɛ̃ tɛrɛ gba na ya kwa tɛ Nzapa ma. (1 Yn. 5:19) Ni na dungɔ woni ya, wakristo kpã akpale tɛ lo ti mi mabere, lingɔ kalasi ná kwa tɛ lo na ndo ti uzu ti kwa tɛ Yehova. Se adu ngaso ko afa ya, lo ndo landa dangɔ bɛ ti gi gi olo. Ti tɛnɛngɔ bɛta tɛnɛ ko, ta aye niko du siɔni ma, kanda ta ni lengbi ti dungɔ na ndo ti  uzu na ya dungɔ lɛ ngɛ̃́ tɛ e ma. Ti nɛngɔ ya “e nɔ nɔ nga ma ayangambi ti vuru ndo” ko, ayɔ ya “e salela ngoi tɛ e na ndenge ti nzɔ̃ni” so lingɔ aye mɛ ngbondoni.

18. Ye mɛndó Donald li ti nɛngɔ ya, lo salela ngoi tɛ lo nzɔ̃ni nɛ?

¹⁸ Ndo gi lége ti hɛ̃ngɔ tɛrɛ mɔ gba na ya kwa tɛ Yehova. Ye mɛndó Donald mɛ ndo du ka Afrika ti Sud ali la. Lo pa ya: “Mbi bandó kpale ti dungɔ lɛ ngɛ̃́ tɛ mbi, wa mbi vɔrɔndó Yehova ya lo za mbi, mbi hɛ̃ tɛrɛ mbi gba na ya kwa ti fangɔ tɛnɛ. Mbi li ndó sambela ya, mbi lua kwa mɛ lengbi ti hɛ̃ngɔ mbi ngoi gba mbi li na kwa ti fangɔ tɛnɛ. Na lisalisi tɛ Yehova mbi luandó kwa kɔi ti nzɔ̃ni. Ni la, mbi ná ya mbi e bandandó lingɔ kwa ti ngoi zu ndoni kɔi.”

19. Elengbi ti ngbãngɔ lá kwɛ “dɔngɔ nɔ nga ma ayangambi ti vuru ndo” ngasia?

¹⁹ Mbeti mɛndó Polo su to hɛ̃ awakristo ti Efɛzɛ ko, azandó ala ya, ala le kwa hɛ̃ Yehova na se ni. Wangɔ niko lengbi nga ti zangɔ e. Nga ma se mɛ e lo ti mandangɔ na ni ko, ni lengbi ti zangɔ e ya, e pɔna awele nga na akwa e na ndara. Ni lengbi ti zangɔ e ya, e ngbã lá kwɛ na ya vuru ndo nga na ya mbilimbili na landangɔ prɔgramɛ tɛ e ti mandangɔ Ngbangɔ bi zu. Wa ni du ngbondoni ya, e gi nyingɔ vurú tɛ Nzapa mɛ lengbi ti zangɔ e ya, e ti na seliye ti nzɔ̃ni. Se e kpã tɛnɛ mɛndó Polo su na kwa na ya dungɔ lɛ ngɛ̃́ tɛ e ko, ni lengbi ti zangɔ e ya, e mu ekateli ti ndara na landangɔ dangɔ bɛ tɛ Yehova. E na dungɔ na likoki ti kpɛngɔ mbingo ti gi gi olo, wa e na ngbãngɔ kaya vuru ndo!