1-2. Ngasia la, dungɔ lɛ ngɛ̃́ tɛ mɔ alengbi ti dungɔ nzɔ̃ni na pɛ batisimɔ tɛ mɔ nɛ?

 E NDO du na dengɔ bɛ na ngoi mɛ e ndo mu batisimɔ wa e ndo ti nga kɔi tɛ azi ti ndasewa tɛ Yehova. Ando du kota ndima na lo tɛ e tingɔ na mangbi ti nzɔ̃ni nga ti kpengbani na lo, e ndo ye na bɛ e kɔi tɛnɛ mɛndó Davidi tɛnɛ ya: “Dengɔ bɛ na zo ko la Yehova pɔna lo, lo benda nga lo ti nɛngɔ ya, lo du kaya lopango tɛ lo.”​—Nz. 65:4.

² Ta Yehova ndo zi lége ya, azi ti kilikili ali kaya ndasewa tɛ lo ma. Nga ma se mɛ e tɛnɛ na ni na pɔsɔ mɛ aɔ ko, lo ndo pɔna azi mɛ aye dungɔ na mangbi ti nzɔ̃ni na lo. (Zaki 4:8) Ngoi mɛ mɔ hɛ̃ tɛrɛ mɔ hɛ̃ Yehova wa mɔ mu nga batisimɔ ko, mɔ ndo dɔ dã na Yehova na ndenge kɔi mɛ ngbondoni. Na pɛ batisimɔ tɛ mɔ ko, mɔ na yengɔ na bɛ mɔ kɔi ya, “lo na sulungɔ mɔ tee mɛ ta mɔ di du na gwɛ̃ ti ye kɔi ma.”​—Mal. 3:10; Yir. 17:7, 8.

3. Wakristo mɛ hɛ̃ tɛrɛ lo wa lo mu nga batisimɔ wɛ, kota kumba mɛ lo ti na ni nɛ? (Mosakoli 5:4, 5)

³ Mungɔ batisimɔ adu ebandeli ti dungɔ lɛ ngɛ̃́ na ya kwa tɛ Yehova. Se mɔ mu batisimɔ wɛ ko, mɔ na yengɔ lingɔ zu mɛ mɔ lengbi ti lingɔ ti nɛngɔ ya, mɔ tɔndɔ kapa mɛ mɔ ko, abɛse loyengɔ tɛ mɔ atengbi na tara, bere kpengba kpale. (Di Mosakoli 5:4, 5.) Nga ma tɛ ava Yezo ko, mɔ na dungɔ dã ti landangɔ se lɛlo tɛ Yezo nga na batangɔ andia tɛ lo na mbilimbili se  alengbi. (Mat. 28:19, 20; 1 Pet. 2:21) Tɛnɛ mɛ na zangɔ e ti nɛngɔ ya, e li ni.

“NGBÃ LÁ KWƐ” LANDANGƆ YEZO ABƐSE NA YA TARA BERE KPENGBA KPALE

4. Ngasia la, ava Yezo lengbi ti yɔngɔ “kɛkɛ tɛ la ti pɛnɔ nɛ”? (Luka 9:23)

⁴ Hĩnga ya, na pɛ batisimɔ tɛ mɔ ko, mɔ na tengbingɔ na kpengba kpale na ya dungɔ lɛ ngɛ̃́ tɛ mɔ. Kanda Yezo tɛnɛndó yangondo hɛ̃ ava lo ya, ala yɔ “kɛkɛ ti pɛnɔ tɛ ala.” Wa lo tɛnɛndó ya, ala na yɔngɔ ni “bi zu.” (Di Luka 9:23.) Yezo yendó tɛnɛngɔ ya, ava lo na tengbingɔ na pɛnɔ bi zu? Ipɔ. Lo ye bondó tɛnɛngɔ ya, hãngɔ nzɔ̃ kpale mɛ ala na luangɔ ko, ala na tengbingɔ na akpengba kpale. Ambanga kpengba kpale ni lengbi ti hɛ̃ngɔ sɔngɔ bɛ kpengba ni.​—2 Tim. 3:12.

5. Nzɔ̃ sulu mɛ Yezo kokapa ti hɛ̃ngɔ azi mɛ ndo hɛ̃ tɛrɛ la na ya kwa tɛ lo nɛ?

⁵ Ngoi mɛndɛ̃ mɔ ka mɔ tengbindó na botemeli tɛ azi ti ndasewa tɛ mɔ, bere mɔ zia akwa mɔ ti mi na lo ti hɛ̃ngɔ tɛrɛ mɔ na ya kwa ti Lo-lengɔ Gbia. (Mat. 6:33) Se du ngaso ko, hĩnga ya, Yehova hĩnga aye zu ko la mɔ ndo li na lo tɛ lo. (Aeb. 6:10) Ni la, mɔ lengbi ti yengɔ tɛnɛ tɛ Yezo mɛndó lo pa ya: “Mbi pa hɛ̃ ĩ ti beta tɛnɛ ya, se zo azia da tɛ lo, na ayata lo ti kɔli na ti wali, na to lo, na ta lo, na aya lo, bere nga ayaka tɛ lo na lo tɛ mbi, lo ɔ so hangɔ Nzɔ̃ Pa tɛ Nzapa ko, lo na luangɔ ada, na ayata lo ti kɔli na ti wali, na ata lo, na aya lo, na ayaka, fani ngbangbo kɔi aɔ ti ngoi olo e da. Ko azi nga na giangɔ bɛ lo, ko gbanda ngbĩi ko, lo lua du ti kaka.” (Mar. 10:29, 30) Anzɔ̃ sulu mɛ mɔ lua aɔ aye zu mɛndó mɔ zia.​—Nz. 37:4.

6. Nda mɛ ayɔ ya, mɔ ngbã lá kwɛ “tiringɔ to na gwɛ̃ ti tɛrɛ” na pɛ batisimɔ tɛ mɔ nɛ?

⁶ Na pɛ batisimɔ tɛ mɔ ko, na yɔngɔ ya mɔ tiri to na “asiɔ ye mɛ tɛrɛ zo ndodu na gwɛ̃ ti lingɔ ni.” (1 Yn. 2:16) Na lo mɛ ya, e du atara Adama ko, e bo azi ti zangangɔ lengbingɔ. Na ya ngoi mɛndɛ̃, mɔ lengbi ti mangɔ tɛrɛ mɔ nga ma se tɛ Toma Polo. Lo sundó ya: “Ge ya bɛ mbi nvɛni ko, bɛ mbi ndode na lo ti ndia tɛ Nzapa sĩ. Kanda mbi hũ ya, ge gbe tɛrɛ ko, gwɛ̃ ti lingɔ siɔ ye ndotiri to na dangɔ bɛ mɛ mbi na ni na ndo lingɔ nzɔ̃ ye. Gwɛ̃ ti lingɔ siɔ ye abi mbi mbɛ ti siɔ ye mɛ ge gbe tɛrɛ mbi.” (Roma 7:​22, 23) Ngoi mɛndɛ̃ mɔ lengbi ti mangɔ nzɛ̃ngɔ na ndombali seliye tɛ mɔ ti lingɔ siɔ kpale. Kanda se mɔ da bɛ mɔ na kapa mɛndó mɔ ko hɛ̃ Yehova na ngoi mɛndó mɔ hɛ̃ tɛrɛ mɔ hɛ̃ lo ko, ni na lingɔ ya, ekateli tɛ mɔ ti tiringɔ to na tara mɛ mɔ ndo tengbi na ni na tingɔ kpengbani. Ta kitɛ da ma ya, ngoi mɛ mɔ tengbi na tara ko, kapa mɛ mɔ ko ti hɛ̃ngɔ tɛrɛ mɔ hɛ̃ Yehova na lingɔ ya mɔ du na dungɔ lɛ ngɛ̃́ mɛ yapuni. Ngasia?

7. Ngasia la, hɛ̃ngɔ tɛrɛ na ya kwa tɛ Yehova na zangɔ mɔ ya, mɔ ngbã lá kwɛ mbilimbili na mbage tɛ lo nɛ?

⁷ Ngoi mɛ mɔ hɛ̃ tɛrɛ mɔ hɛ̃ Yehova ko, mɔ kɛ̃ tɛrɛ mɔ. Afa ya mɔ kɛ̃ agwɛ̃ ti tɛrɛ nga na amikanɔ mɛ ta bɛ Yehova ndo ye ma. (Mat. 16:24) Ngoi mɛ mɔ na tengbingɔ na tara ko, ta mɔ na dungɔ na gwɛ̃ ya, mɔ mu ngoi gba ti nɛngɔ ya, mɔ gbɔ̃ li mɔ na ndo ye mɛ ayɔ ya mɔ li ma. Na lo mɛ ya, mɔ mu ekateli ti ye mɛ ayɔ ya mɔ li wɛ, afa ya ngbãngɔ mbilimbili ka tɛ Yehova. Mɔ na ngbãngɔ lá kwɛ mungɔ ekateli ti hɛ̃ngɔ Yehova dengɔ bɛ, se mɔ li ngaso ko, mɔ na dungɔ mabere Yobo. Abɛse lo tengbindó na atara ti kpengbani ko, lo tɛnɛndó ya: “Ta ni na ziangɔ mbilimbili tɛ ni ma!”​—Yb. 27:5.

8. Ngasia la gbɔ̃ngɔ li na ndo sambela mɛndó mɔ li ti hɛ̃ngɔ tɛrɛ hɛ̃ Yehova na zangɔ mɔ ya, mɔ nwɔ atara nɛ?

⁸ Se mɔ gbɔ̃ li mɔ na ndo sambela mɛndó mɔ li ti hɛ̃ngɔ tɛrɛ mɔ hɛ̃ Yehova ko, mɔ na luangɔ ngunu ti nɛngɔ ya, mɔ gbe bɛ mɔ na ya tara. Na ndakisa, mɔ na bandangɔ lulangɔ kɔ fɔ̃ mɔ bere ya fɔ̃ mɔ? Ipɔ! Na lo mɛ ya, mɔ kondó  kapa hɛ̃ Yehova ya, ta mɔ na lingɔ aye ti ngaso ma. Ni na lingɔ ya, mɔ kpɛ agwɛ̃ ti tɛrɛ uzu ti nɛngɔ ya ni lua sisa ka bɛ mɔ. Ta mɔ na nɔngɔ nɔ “na lége” tɛ “asiɔ azi ma.”​—Mas. 4:14, 15.

9. Ngasia la, gbɔ̃ngɔ li mɔ na ndo sambela mɛndó mɔ li hɛ̃ Yehova na ngoi ti hɛ̃ngɔ tɛrɛ mɔ hɛ̃ lo, na zangɔ mɔ ya, mɔ kpã kwa tɛ lo na ndo ti uzu nɛ?

⁹ Ye mɛ mɔ na lingɔ sɛ zo hɛ̃ mɔ kwa kɔi mɛ na bandangɔ gbanzingɔ mɔ ya, ta mɔ gwe abombi zu ma nɛ? Mɔ hĩnga ye mɛ mɔ na lingɔ. Uzu ti nɛngɔ ya, ahɛ̃ mɔ akwa ti ngaso ko, mɔ mundó ekateli ti kɛ̃ngɔ akwa zu mɛ na gbanzingɔ mɔ na gwengɔ abombi. Ta mɔ na hũndangɔ tɛrɛ mɔ na ndo bere ekateli mɛ mɔ na mungɔ na dungɔ ti siɔni ma. Se mɔ gbɔ̃ li mɔ na ndo ye mɛndó Yezo ndo li ti hɛ̃ngɔ To lo dengɔ bɛ ko, na zangɔ mɔ ya, mɔ zia lingɔ ye mɛ bɛ Nzapa ndo kɛ̃.​—Mat. 4:10; Yn. 8:29.

10. Ngasia la, Yehova na zangɔ mɔ na pɛ batisimɔ tɛ mɔ ti nɛngɔ ya, “mɔ ngbã lá kwɛ landangɔ” Yezo nɛ?

¹⁰ Tengbingɔ na kpengba kpale ná tara ahɛ̃ mɔ lége ti fangɔ ya, mɔ mu ekateli ti “landangɔ” Yezo. Se mɔ li ngaso ko, mɔ na yengɔ na bɛ mɔ kɔi ya, Yehova na zangɔ mɔ. Ngbangɔ pa ya: “Nzapa du mbilimbili ta lo na ziangɔ ya, tara ni akondo bɛ ĩ ma, ngoi mɛ ĩ tengbi na tara ko, Nzapa na lɛkɛngɔ lége ti nɛngɔ ya, ĩ si ti da wa ĩ ti nga na likoki ti nɛngɔ ya, ĩ gbe bɛ ĩ na ya tara ni.”​—1 Kɔr. 10:13.

SE MƐ ELENGBI TI NGBÃNGƆ LÁ KWƐ LANDANGƆ YEZO

11. Se ti nzɔ̃ni mɛ mɔ lengbi ti ngbãngɔ lá kwɛ landangɔ Yezo adu nɛ? (Ba nga limɔ.)

¹¹ Yezo ndo lendó kwa tɛ Yehova na ge ge ge, wa lo ndo dɔ ngandó dã na lo na lége ti sambela. (Luka 6:12) Kɔi ti aye ti nzɔ̃ni mɛ mɔ lengbi ti lingɔ ti nɛngɔ ya mɔ ngbã lá kwɛ landangɔ Yezo na pɛ batisimɔ tɛ mɔ, adu dungɔ na mɔmɛsɛnɔ  ti lingɔ aye mɛ na lingɔ ya, mɔ dɔ dã na Yehova. Ngbangɔ pa ya: “Abɛ nga sia ko, lége tɛ Nzapa mɛ ndo e ndo ɔ ti da, ngbĩi e si na ni na olo ko, é ngbã bo na ɔngɔ ti da.” (Fil. 3:16) Ngoi gba, e ndo ma pandɛ tɛ ayata mɛ ala hɛ̃ tɛrɛ la gba na ya kwa tɛ Nzapa, ngoi mɛndɛ̃ ala li kalasi tɛ awa fangɔ tɛnɛ ti Lo-lengɔ Gbia bere ala gwe ka ndo mɛ gwɛ̃ tɛ awa fangɔ tɛnɛ da gba. Se mɔ kpã mɔkanɔ ti ngaso ko, ta mɔ binga bɛ mɔ na lingɔ ni ma. Awa kwa tɛ Yehova ndo du na gwɛ̃ ya, kwa ti fangɔ tɛnɛ mai. (Aw. 16:9) Kanda ye mɛ mɔ li se du ya, ta mɔ na likoki ti lingɔ ni na olo ma nɛ? Ta mɔ hũ ya, azi ko la alonga lingɔ kwa ni ko, ala ɔ mɔ ma. Ni du ngbondoni ya, mɔ ngbã lá kwɛ gbengɔ bɛ mɔ. (Mat. 10:22) Ta bɛ mɔ li na ni ma ya, ngoi mɛ mɔ ndo li kwa hɛ̃ Yehova na makoki mɛ mɔ na ni ko, mɔ ndo hɛ̃ lo dengɔ bɛ. Ni du se ti nzɔ̃ni ti lingɔ ti nɛngɔ ya, mɔ ngbã lá kwɛ landangɔ Yezo na pɛ batisimɔ tɛ mɔ.​—Nz. 26:1.

12-13. Ye mɛ mɔ lengbi ti lingɔ se mɔ hũ ya, ge ge ge tɛ mɔ banda zungɔ nɛ? (1 Kɔrinto 9:16, 17) (Ba nga Ãkadre “ Ngbã lá kwɛ kpɛngɔ kpɛ.”)

¹² Ye mɛ mɔ lengbi ti lingɔ se mɔ hũ ya, ta mɔ ndo li sambela mɛ ndo lo ka gbɛ bɛ mɔ, bere ta mɔ dɛ sepala na kwa ti fangɔ tɛnɛ nga ma se mɛndó mɔ ndo sepala na ni uzu ma nɛ? Wa se mɔ hũ ya, ta mɔ dɛ sepala na dingɔ Ngbangɔ nga ma se mɛndó mɔ ndo li na ni uzu ma nɛ? Se kpale ti ngaso si na mɔ na pɛ batisimɔ tɛ mɔ ko, ta mɔ hũ ya, mɔ zanga nyingɔ tɛ Nzapa ma. Mɔ du zo ti zangangɔ lengbingɔ, ngoi mɛndɛ̃, se mɛ mɔ ndo ma na tɛrɛ mɔ alengbi ti gbinyangbingɔ. Se ge ge ge tɛ mɔ banda zungɔ ko, gbɔ̃ li mɔ na ndo se lɛlo tɛ Toma Polo. Abɛse lo ndo lindó kpengbani ti landangɔ se lɛlo tɛ Yezo ko, Polo hĩngandó ya, ngoi mɛndɛ̃ ta lo ndo lua ngunu ti lingɔ aye mɛ lo na gwɛ̃ ti lingɔ ni ma. (Di 1 Kɔrinto 9:16, 17.) Lo tɛnɛ  ya: “Se ta mbi li ni na songo tɛ mbi nvɛ̃ni ma ko, kwa ti ngbondoni mɛ ahɛ̃ mbi bo da lá kwɛ.” Na tɛnɛ mɛndɛ̃, Polo mundó ekateli ti lingɔ kwa ti fangɔ tɛnɛ na bangɔ ngunu mɛndó lo na ni na ngoi niko.

¹³ Ni la, ta mɔ zia ya, tɛrɛ ti zangangɔ lengbingɔ amu ekateli na pɛnda mɔ ma. Wa mu ekateli ti lingɔ aye mɛ nzɔ̃ni abɛse ta mɔ na gwɛ̃ ti lingɔ ni ma. Kwa tɛ mɔ lengbi ti tongɔ mɔ ya, mɔ li aye ti nzɔ̃ni. Mɔmɛsɛnɔ tɛ mɔ ti nyingɔ na zangɔ mɔ ya, mɔ ngbã lá kwɛ landangɔ Yezo na pɛ batisimɔ tɛ mɔ. Se ayata kɔli ná ayata wali hũ gbengɔ bɛ tɛ mɔ na ya kwa tɛ Yehova ko, ni na sangɔ ngunu bɛ ala.​—1 Tɛs. 5:11.

“NGBÃ LÁ KWƐ BANGƆ TƐRƐ MƆ”

14. Aye mɛ mɔ lengbi ti bangɔ ni ngoi zu nɛ , wa na lo nɛ? (2 Kɔrinto 13:5)

¹⁴ Na dungɔ ngbondoni ya, na pɛ batisimɔ tɛ mɔ ko, mɔ ngbã lá kwɛ bangɔ aseliye tɛ mɔ. (Di 2 Kɔrinto 13:5.) Ngoi zu, ndo ba dungɔ lɛ ngɛ̃́ tɛ mɔ na se ni, mɔmɛsɛnɔ tɛ mɔ ti lingɔ sambela ngoi zu, dingɔ Ngbangɔ, gwengɔ abombi zu, nga na hɛ̃ngɔ ti mɔ na ya kwa ti fangɔ tɛnɛ. Gi hĩngangɔ aye mɛ mɔ li ti nɛngɔ ya, akpale tɛ mɔ zu ti nyingɔ aɔ na se ni. Na ndakisa hũnda tɛrɛ mɔ na ando olo: ‘Mbi lengbi ti kambisangɔ hɛ̃ azi mɛndɛ̃ akpale ti ngbondoni ti ya Ngbangɔ? Ngasia la, mbi lengbi ti lingɔ ya, kwa tɛ mbi ti fangɔ tɛnɛ ati nzɔ̃ni nɛ? Sambela tɛ mbi ndo du ti mbilimbili wa ndo fa ya, mbi ndo kambisa tɛnɛ mɛ ka bɛ mbi zu hɛ̃ Yehova? Mbi ndo gwe abombi zu? Ngasia la, mbi lengbi ti fangɔ ya, mbi ndo lɛkɛ wa mbi ndo hɛ̃ nga agbinya ka bombi nɛ?’

15-16. Wangɔ mɛ mɔ lua na omɛ aba ngbãngɔ mbilimbili na ya tara nɛ?

¹⁵ Ni du nzɔ̃ni ya, mɔ gi hĩngangɔ anzɛ̃ngɔ tɛ mɔ. Nyita Robert akambisa nga tɛnɛ ti ngaso lo tɛnɛ ya: “Ngoi mɛndó lo na bulu bere 20 ko, lo luandó kwa kɔi mɛ ndo mu ngoi tɛ lo gba. Lo tɛnɛ ya, lá kɔi ndó ko, na pɛ kwa wali kɔi mɛ fɔ̃ mbi ti kwa ailindó mbi kaya da tɛ lo. Wa lo pandó hɛ̃ mbi ya, e na lo e du e kɔi na bɛ e wa e ‘lekisa nga ngoi ti nzɔ̃ni.’ Na ebandeli mbi yɔ bondó pardon ka tɛ lo kanda ta mbi kambisandó nda pardon ni yangondo mbi hɛ̃ lo ma, na gesi mbi kɛ̃ndó wa mbi kambisandó hɛ̃ lo nda mɛ mbi kɛ̃ na ni.” Robert nwɔ̃ndó tara niko, ni du ye ti hɛ̃ngɔ gonda. Lo tɛnɛ ya: “Ta mbi kɛ̃ndó lo yangondo nga ma se mɛndó Yozefɛ kɛ̃ na lo hɛ̃ ya Potifar ma. (Eb. 39:7-9) Ni la mbi kamwãndó mawoma na ndenge mɛ atindó pɛnɔ ka tɛ mbi ya, mbi kɛ̃ kpale yangondo. Kpale niko azandó mbi, mbi hũ ye mɛ ayɔ ya mbi li ti nɛngɔ ya, mangbi tɛ mbi na Yehova ati kpengbani.”

 ¹⁶ Ni lengbi ti dungɔ ngbondoni ya, mɔ nvɛ̃ni mɔ ba akpale tɛ mɔ nga ma se mɛndó Robert li na ni. Ngoi mɛ mɔ ndo nwɔ atara ko, hũnda tɛrɛ mɔ na ndo mɛ, ‘Ti nɛngɔ ya mbi kɛ̃ lo ko, ni mu ngoi kɛ̃?’ Se mɔ hũ ya ayɔ ya, mɔ lɛkɛ kpale kɔi ngaso ko, ta mɔ nzɛ̃ ma. Du na dengɔ bɛ na ndenge mɛ mɔ hĩnga nzɛ̃ngɔ tɛ mɔ. Li sambela hɛ̃ Yehova na lo ti nzɛ̃ngɔ tɛ mɔ, wa gi lingɔ ye mɛ na hɛ̃ngɔ lo dengɔ bɛ.​—Nz. 139:23, 24.

17. Ngasia la nyita Robert hɛ̃ndó ili Yehova gonda nɛ?

¹⁷ E na awangɔ mɛndɛ̃ mɛ elengbi ti luangɔ na ya kpale mɛndó Robert tengbi na ni. Lo di tɛnɛ ya: “Na pɛ kɛ̃ngɔ invitasiɔ̃ tɛ fɔ̃ mbi niko ko, lo pandó hɛ̃ mbi ya, ‘Mɔ nwɔ tara!’ Mbi hũndandó lo ya, mɔ ye tɛnɛngɔ ya nɛ? Lo gbinyandó hɛ̃ mbi ya, Tɛmwɛ tɛ Yehova kɔi ti gã pandó hɛ̃ mbi ya, apalanga zu mɛ Atɛmwɛ tɛ Yehova ndo li siɔ kpale na gbɛ mbingo. Wa lo tɛnɛndó hɛ̃ mbi ya, mbi yendó tarangɔ tɛnɛ niko ka ndo mɔ. Mbi hũ ya, mbi na dengɔ bɛ na ndenge mɛ mbi hɛ̃ ili Yehova gonda.”

18. Ye mɛ mɔ mu ekateli ti lingɔ ni na pɛ batisimɔ tɛ mɔ nɛ? (Ba nga Ãkadre “ Abɛli tɛnɛ mɛ mɔ na sepalangɔ na ni.”)

¹⁸ Ngoi mɛ mɔ hɛ̃ tɛrɛ mɔ hɛ̃ Yehova wa mɔ mu nga batisimɔ ko, mɔ ye fangɔ ya, mɔ na gwɛ̃ ti hɛ̃ngɔ ili Yehova gonda abɛse na ya kpale ni nɛ. Wa mɔ lengbi ti yengɔ na bɛ mɔ kɔi ya, Yehova hĩnga kpengba kpale ná tara mɛ mɔ ndo tengbi na ni nga na ndenge mɛ mɔ ndo nwɔ na ni. Lo na sulungɔ ge ge ge ko mɔ ndo li ti nɛngɔ ya, mɔ ngbã mbilimbili. Mɔ lengbi ti kpãngɔ bɛ mɔ ya, na lége ti nyingɔ vurú tɛ lo ko, mɔ lengbi ti luangɔ ngunu ti lingɔ ni. (Luka 11:​11-13) Na lége ti lisalisi tɛ Yehova, mɔ na ngbãngɔ lá kwɛ landangɔ Yezo na pɛ batisimɔ tɛ mɔ.