1. Ye mɛ awa kwa tɛ Yehova mɛndɛ̃ ti mbilimbili ndo du na kitɛ ni nɛ?

 ADU ye ti wambangɔ bɛ hĩngangɔ ya, Yehova ndo ye azi tɛ lo zu mabere linɔ kɔi! Ngbangɔ tɛnɛ ya: “Yehova ndo sepala na azi tɛ lo.” (Nz. 149:4) Ngoi mɛndɛ̃ ambangani ndo ti na nzɛ̃ngɔ, wa ala ndo hũnda tɛrɛ ala na ndo ya ‘Yehova ndo sepala nvɛ̃ni na mbi?’ Ambanga awa kwa tɛ Yehova ti mbilimbili mɛ Ngbangɔ tɛnɛ tɛnɛ tɛ ala amangandó nzɛ̃ngɔ ti ngaso.​—1 Sam. 1:6-10; Yobo 29:2, 4; Nz. 51:11.

2. Zo mɛ Yehova ndo sepala na lo na?

² Ngbangɔ fa yangondo ya, Yehova lengbi ti yengɔ nga na fangɔ nzɔ̃ bɛ na azi mɛ azanga lengbingɔ. Lo lengbi ti lingɔ ni ngasia? Ayɔ ya, e fa loyengɔ na mbage tɛ Yezo wa e mu nga batisimɔ. (Yn. 3:16) Lingɔ ngaso, e na fangɔ yangondo ya, e gbinya bɛ e na ya siɔ kpale tɛ e, wa e ko nga kapa hɛ̃ Nzapa ya, e na lingɔ se bɛ lo. (Aw. 2:38; 3:19) Bɛ Yehova ndo de na ngoi mɛ e ndo li aye niko zu na se ni ti nɛngɔ ya, e ti akwa lo. Se e li zu ti nɛngɔ ya, e kokisa kapa tɛ e ti lingɔ kwa hɛ̃ Yehova ko, lo na yengɔ e, wa e nga na tingɔ akwa lo ti kpɔ̃ bɛ lo.​—Nz. 25:14.

3. Ahũnda taa mɛ e na tɛnɛngɔ tɛnɛ na ndoni nɛ?

³ Nda mɛ na ya ngoi mɛndɛ̃ azi mɛndɛ̃ ndo du na dangɔ bɛ ya, ta Nzapa ndo sepala na ala ma nɛ? Yehova ndo fa songo tɛ lo na azi ngasia? Wa ngasia la awakristo lengbi ti yengɔ na bɛ la kɔi ya, Nzapa ndo sepala na ala nɛ?

NDA MƐ AZI MƐNDƐ̃ NDO DU NA DANGƆ BƐ YA TA NZAPA NDO SEPALA NA ALA MA NƐ?

4-5. Se mɔ hũ ya ta mɔ na valɛrɛ ma, ye mɛ mɔ lengbi ti yengɔ lo ni nɛ?

⁴ Ambangani so popo tɛ e na ngoi mɛndó ala dɛ ayangambi ko, ala ndo hũndó ya ta ani na valɛrɛ gba ma. (Nz. 88:15) Nyita kɔli Adrián tɛnɛ ya: “Ngoi zu mbi ndo hũndó ya, ta mbi na valɛrɛ ma. Kɔi ti asambela mɛndó mbi ndo li uzu adu ya, ndasewa  tɛ mbi lua dungɔ lɛ ngɛ̃́ ka Paradizo, kanda mbi nvɛ̃ni mbi ndo hũ ndo ya, ta mbi lengbi ti nɛngɔ ya mbi li kai ma.” Tony, mɛndó ta lo mai kaya ndasewa tɛ Atɛmwɛ tɛ Yehova ma, apa ya: “Ta bɛ fãni kɔi mɛ awa dungɔ mbi apandó hɛ̃ mbi ya, ala ndo ye mbi bere ala ndo sepala na mbi ma. Ni lindó ya mbi ti na dangɔ bɛ ya, ta mbi na ye kɔi mɛ mbi lengbi ti lingɔ ti nɛngɔ ya mbi hɛ̃ ala dengɔ bɛ ma.”

⁵ Se du ya, ngoi mɛndɛ̃ e ndo ma tɛrɛ e ya, ta e na valɛrɛ ma ko, e hĩnga ya Yehova ndo benda e na ndenge tɛ lo nvɛ̃ni. (Yn. 6:44) Lo ndo hũ ge tɛ e aseliye ti nzɔ̃ni mɛ ta e nvɛ̃ni e ndo hũ ni ma, wa lo hĩnga nga bɛ e. (1 Sam. 16:7; 2 Nt. 6:30) Elengbi ti kpãngɔ bɛ e na ndo tɛnɛ mɛ lo ndo tɛnɛ na lo tɛ e ya, e du ngbondoni ka lɛ lo.​—1 Yn. 3:19, 20.

6. Dangɔ bɛ mɛndó Polo na ni na ndo siɔ kpale mɛndó lo li uzu nɛ?

⁶ Ambangani so popo tɛ e, uzu ti nɛngɔ ya ala hĩnga mbilimbili ko, azi mɛndɛ̃ lindó ye ti siɔ ni tɛrɛ ala mɛ tee ndɛ kpale ni de gia ala. (1 Pet. 4:3) Azi mɛndɛ̃ mɛndó ali kwa hɛ̃ Yehova na mbilimbili zu alengbi nga ti tingɔ na nzɛ̃ngɔ. Wa mɔ, ngoi mɛndɛ̃ mɔ ndo da bɛ mɔ ya, bɛ Yehova li na mɔ? Se du ngaso ko, hĩnga ya awa kwa tɛ Yehova mɛndɛ̃ ti mbilimbili na ngoi ti gã amangandó tɛrɛ ala ngaso. Na ndakisa, toma Polo ndo mandó tɛrɛ lo ya ta ni na tina ma na lo mɛ ya, lo du zo ti zangangɔ lengbingɔ. (Roma 7:24) Biani, Polo ziandó siɔ kpale tɛ lo wa lo mu ngandó batisimɔ. Lo tɛnɛ ndó na lo tɛ lo ya “mbi du ndangba tɛ awa pangɔ kwa tɛ Yezo zu” nga “zo ti uzu” ti lingɔ siɔ kpale.​—1 Kɔr. 15:9; 1 Tim. 1:15.

7. Ye mɛ elengbi ti batangɔ kaya bingangɔ li tɛ e na ndo asiɔ kpale mɛndó e li uzu nɛ?

⁷ To e ti ndozu ko kapa hɛ̃ e ya, se e gbinya bɛ e ko, lo na kangɔ lɛ lo na ndo siɔ kpale tɛ e. (Nz. 86:5) Se e ma vundu ti siɔ kpale tɛ e, wa e zia nga lingɔ ni ko e na yengɔ na bɛ e kɔi ya, Yehova na kangɔ lɛ lo na ndoni.​—Kɔl. 2:13.

8-9. Ngasia la mɔ lengbi ti nwɔngɔ dangɔ bɛ mɛ mɔ ndo du na ni ya, ta mɔ lengbi ti lingɔ ye kɔi mɛ na hɛ̃ngɔ Yehova dengɔ bɛ ma nɛ?

⁸ E zu, e ndo du na gwɛ̃ ti lingɔ kwa hɛ̃ Yehova na ngunu tɛ e zu. Abɛse ngaso ko, azi mɛndɛ̃ ndo hũ ya, ta ala na ye kɔi mɛ ala lengbi ti lingɔ ti nɛngɔ ya Nzapa sepala na ala ma. Nyita wali Amanda tɛnɛ ya: “Mbi ndo hũndó ya, hɛ̃ngɔ Yehova aye ti ngbondoni, alengbi na lingɔ aye gba na ya kwa tɛ lo. Ngoi gba, mbi ndo gindó lége ti lingɔ aye mɛ aɔ makoki tɛ mbi. Wa se ta mbi koka lingɔ akpale niko ma ko, mbi ndo dandó bɛ mbi ya, Yehova ndo ma sɔngɔ bɛ gba na lo tɛ mbi, wa mbi ndo ma ngandó sɔngɔ bɛ.”

⁹ Ngasia la elengbi ti nwɔngɔ dangɔ bɛ ti mangɔ tɛrɛ e ya, ta e na ye kɔi mɛ elengbi ti lingɔ so hɛ̃ngɔ Yehova dengɔ bɛ ma nɛ? E hĩnga ya, ta Yehova du wa kakulu lo ma, kanda lo du wa nzɔ̃ bɛ. Ta Lo ndo yɔ ge ti e ya, e li ye mɛ aɔ ngunu tɛ e ma. Na lo ni ko, gbɔ̃ li mɔ na ndo se lɛlo tɛ azi mɛ Ngbangɔ tɛnɛ tɛnɛ tɛ ala mɛndó ala li kwa hɛ̃ Yehova na mbilimbili na ya dungɔ lɛ ngɛ̃́ tɛ ala zu. Zia e ba se lɛlo tɛ Polo. Lo fandó ge ge ge na ya dungɔ lɛ ngɛ̃́ tɛ lo, wa lo ndo lindó avuayajɛ ti akilomɛtrɛ gba so zingɔ abombi. Ngoi mɛndó dungɔ lɛ ngɛ̃́ tɛ Polo gbinyangbi wa ta lo ndo kokandó lingɔ kwa ti pangɔ nzɔ̃ pa nga ma se mɛndó lo mɛsɛnɛ na ni ma ko, lo dandó bɛ lo ya ta bɛ Yehova ndo sepala na ni ma? Ipɔ. Lo ngbãndó lá kwɛ lingɔ ye na bangɔ makoki tɛ lo wa Yehova ndo sepalandó na lo. (Aw. 28:30, 31) Kwɛ kɔi, kwa mɛ e ndo li hɛ̃ Yehova alengbi ti gbinyangbingɔ na ya angoi mɛndɛ̃. Kanda ye ti ngbondoni ka tɛ Yehova du ye mɛ ndo to e ya, e li kwa hɛ̃ lo. Zia e ba na olo se mɛ Yehova ndo fa ya, lo ndo sepala na kwa mɛ e ndo li hɛ̃ lo.

 SE MƐ YEHOVA NDO FA YA, LO NDO SEPALA NA E

10. Ngasia la elengbi ti “mangɔ” tɛnɛ mɛ Yehova ndo tɛnɛ ya ni ndo sepala na e nɛ? (Yoanɛ 16:27)

¹⁰ Lo hɛ̃ e Ngbangɔ. Yehova ndo gi lége ti fangɔ na azi tɛ lo ya, lo ndo ye ala wa lo ndo sepala nga na ala. Ngbangɔ kambisa ya, Yehova tɛnɛndó fãni sɛ hɛ̃ Nyi lo Yezo ya, ni ndo ye lo. (Mat. 3:17; 17:5) Mɔ lengbi nga ti yengɔ na bɛ mɔ kɔi ya, Yehova ndo sepala na mɔ? Ta Yehova ndo tɛnɛ hɛ̃ e na nyɔ lo ngama tɛ Yezo ya, lo ndo ye e bere lo ndo sepala na e ma, kanda lo ndo tɛnɛ ni na lége ti Ngbangɔ. E lengbi ti “mangɔ” legɔ̃ Yehova mɛ ndo tɛnɛ ya lo ndo sepala na e, se e ndo di atɛnɛ tɛ Yezo mɛ kaya aevanzilɛ. (Di Yoanɛ 16:27.) Yezo landandó seliye tɛ To lo na ndenge ti lengbingɔ. Ni la, na ngoi mɛ e ndo gbɔ̃ li e na ndo se mɛndó Yezo fa songo hɛ̃ ava lo abɛse ala dundó azi ti zangangɔ lengbingɔ ko, ni lengbi ti zangɔ e, e hũ se mɛ Yehova ndo sepala na e.​—Yn. 15:9, 15.

11. Nda mɛ ta tengbingɔ na pɛnɔ afa ya, Yehova zia sepalangɔ na e ma nɛ? (Zaki 1:12)

¹¹ Lo ndo hɛ̃ e aye mɛ e na gwɛ̃ ni. Yehova ye zangɔ e na lége ti hɛ̃ngɔ e aye mɛ e na gwɛ̃ ni. Kanda ngoi mɛndɛ̃, Yehova ndo zi lége ya ye ti siɔni asi na e, ni du ngandó ngaso na lo tɛ Yobo. (Yobo 1:8-11) Ta tengbingɔ na kpengba kpale fa ya, Nzapa zia sepalangɔ na e ma. kanda, ni du lége mɛ mɔ lengbi ti fangɔ ya, mɔ ndo ye lo wa mɔ ndo kpã nga bɛ mɔ na ndo lo. (Di Zaki 1:12.) Wa se mɔ gbe bɛ mɔ na ndo ni ko, mɔ na hũngɔ se mɛ lo ndo ye e nga na se mɛ lo ndo ye zangɔ e.

12. Wangɔ mɛ elengbi ti luangɔ ka tɛ nyita Dmitri nɛ?

¹² E mũ se lɛlo tɛ nyita Dmitri mɛ ndo du ka Asie. Kwa tɛ lo wɛ wa na pɛ anzɛ gba ta lo di dɛndó na kwa ti lingɔ ma. Na gesi lo mundó ekateli ti hɛ̃ngɔ tɛrɛ lo gba na ya kwa ti fangɔ tɛnɛ so fangɔ ya, lo ndo kpã bɛ lo ndo Yehova. Na pɛ anzɛ gba, ta lo luandó kwa mɛndɛ̃ ma. Na gesi, tɛrɛ lo sondó wa lo ningandó na ngã ni pɛ angoi gba. Lo bandandó tingɔ na kitɛ ka bɛ lo na lo ti kumba mɛ lo na ni ti dungɔ to ti ndasewa, wa lo banda ngandó hũngɔ ya ta Yehova dɛ sepala na ni ma. Na ndɔ kɔi, nyi lo ti wali sundó hɛ̃ lo ka lɛ papier tɛnɛ ti Yisaya 30:15 mɛ ndo pa ya: “Ĩ na dungɔ na ngunu se ĩ du so kpɔ wa ĩ kpã bɛ ĩ na ndo mbi.” Lo gwendó na mbeti ni hɛ̃ to lo, wa lo pandó hɛ̃ lo ya, “Tata, se mɔ ma tɛrɛ mɔ siɔni ko, mɔ lengbi ti dangɔ bɛ mɔ na ndo tɛnɛ ti vɛrse mɛ.” Dmitri gbɔ̃ndó ndani ya, na lége ti lisalisi tɛ Yehova,  ndasewa tɛ lo ndo luandó tɛ ti tɛngɔ, bɔngɔ ti yungɔ, nga na da mɛ alengbi ti nɛngɔ ya ala ndo la da. Lo tɛnɛ ya, “Ye mɛndó mbi lengbi ti lingɔ” adu ya “mbi du so kpɔ wa mbi ngbã lá kwɛ kpãngɔ bɛ mbi ka tɛ Nzapa tɛ mbi.” Se du ya, mɔ tengbi nga na kpale ti ngaso ko, mɔ lengbi ti yengɔ na bɛ mɔ kɔi ya, Yehova ndo ma sɔngɔ bɛ na lo tɛ mɔ wa lo na zangɔ mɔ ya mɔ gbe bɛ mɔ.

13. Yehova ndo salela ana ti nɛngɔ ya lo fa na e ya lo ndo sepala na e nɛ, wa na lo nɛ?

¹³ Lo hɛ̃ e ayata kɔli ná ayata wali. Yehova ndo salela ayata kɔli ná ayata wali so fangɔ ya lo ndo sepala na e. Na ndakisa, lo lengbi ti salelangɔ azi mɛndɛ̃ ti nɛngɔ ya, ala tɛnɛ tɛnɛ mɛ asa ngunu bɛ e na ngoi mɛ alengbi. Nyita wali kɔi mɛ ndo du ka Asie, lo hũndó kpale ni na ngoi mɛndó lo ti na nzɛ̃ngɔ ti kpengbani nvɛ̃ni. Kwa tɛ lo wɛndó wa lo gãndó ngã kɔi ti kpengbani. Na gesi, kɔ lo lindó siɔ kpale mɛ kotani wa ahãndó kumba ti biazo ti lo. Lo tɛnɛ ya, “Ta mbi hĩngandó nda mɛ kpale ni li tɛrɛ lo ngaso ma, ngoi mɛndɛ̃ mbi ndo dandó na bɛ mbi ya, mbi li siɔ kpale kɔi mɛ kotani mɛ ni lindó ya, ta Yehova di sepala na mbi ma.” Ye mɛndó lo li nɛ? Lo kambisa ya, “Mbi tɛnɛndó tɛnɛ na abiazi ti ya bombi wa ala za ngandó mbi, mbi hĩnga ya, Yehova ndo ye mbi lá kwɛ.” Na gesi, lo yɔndó lisalisi ka ti Yehova. Lo tɛnɛ ya, “Lá kɔi ngaso, mbi luandó mbeti tɛ ayata kɔli ná ayata wali ti ya bombi, ngoi mɛ mbi di mbeti ni mɛndó na tɛnɛ ti wambangɔ bɛ ko, mbi hũndó ya Yehova hɛ̃ gbinya ti sambela tɛ mbi.” Ti biani, Yehova ndo fa ya lo ndo sepala na e na lége ti atɛnɛ ti wambangɔ bɛ mɛ e ndo lua ni na lége tɛ ayata.​—Nz. 10:17.

14. Lége mɛndɛ̃ mɛ Yehova ndo fa ya lo ndo sepala na e nɛ, wa na lo nɛ?

¹⁴ Yehova ndo fa nga ya, lo ndo sepala na e na ngoi mɛ lo ndo salela ayata ti nɛngɔ ya, ala hɛ̃ e awangɔ mɛ e na gwɛ̃ ni. Na ndakisa, na  siɛklɛ ti uzu, na lége ti nyingɔ vurú, Yehova salelandó toma Polo ti nɛngɔ ya lo su ambeti 14 so tongɔ ni hɛ̃ ayata. Ambanga ambeti ni sĩndó na tɛnɛ ti songo nga ti wambangɔ bɛ. Nda mɛndó Yehova salela nyingɔ vurú so zangɔ Polo ya, lo su awangɔ niko nɛ? Na lo mɛ ya Yehova du nzɔ̃ To ko, lo ndo hɛ̃ disiplinɛ hɛ̃ ayati lo mɛ “lo ndo ye ala.” (Mas. 3:​11, 12) Ni la, na ngoi mɛ e ndo lua awangɔ mɛ ndo lo kaya Ngbangɔ ko, ni ndo fa na e yangondo ya, ta bɛ Yehova li na e ma. (Aeb. 12:6) Aye mɛndɛ̃ mɛ ndo fa ya, Yehova ndo sepala na e nɛ?

AYE MƐNDƐ̃ MƐ NDO FA YA YEHOVA NDO SEPELA NA E

15. Yehova ndo hɛ̃ nyingɔ vurú tɛ lo hɛ̃ ana, wa na lo nɛ la elengbi ti yengɔ dangɔ bɛ niko nɛ?

¹⁵ Yehova ndo hɛ̃ e nyingɔ vurú tɛ lo so fangɔ ya, Lo ndo sepala na e. (Mat. 12:18) Hũnda tɛrɛ mɔ na ndo mɛ, ‘Mbi ndo fa aseliye mɛ ndo fa ale ti nyingɔ na ya dungɔ lɛ ngɛ̃́ tɛ mbi?’ Mbi ndo hũ ya, mbi ndo fa yɔngɔrɔ bɛ na azi mɛndɛ̃ ɔngɔ omɛndó mbi na ni uzu ti nɛngɔ ya, mbi hĩnga Yehova? Ni la, se mɔ ngbã lá kwɛ mandangɔ se ti fangɔ songo ti le ti nyingɔ ko, mɔ na yengɔ na bɛ mɔ kɔi ya Yehova na ngbãngɔ lá kwɛ yengɔ mɔ!​—Ba ãkadre “ Ale ti nyingɔ du . . .”

16. Azi mɛ Yehova hɛ̃ la kumba ti pangɔ nzɔ̃ pa na, wa ni li ya mɔ ma tɛrɛ mɔ ngasia? (1 Tɛsalonikɛ 2:4)

¹⁶ Yehova ndo ye hɛ̃ngɔ kumba ti pangɔ nzɔ̃ pa hɛ̃ azi mɛ lo ndo sepala na ala. (Di 1 Tɛsalonikɛ 2:4.) Ba nzɔ̃ kpale mɛ nyita Jocelyn lua na ngoi mɛndó lo pa nzɔ̃ pa hɛ̃ zo mɛndɛ̃. Lá kɔi ndó ko, nyita Jocelyn zingɔ na nzɛ̃ngɔ mɛ kpengbani. Lo tɛnɛ ya “Mbi mandó tɛrɛ mbi ya, ta mbi na ye kɔi ti hɛ̃ngɔ Yehova ma. Kanda, mbindó wa sungɔ lége ti ngoi zu wa bi niko dundó bi ti kwa tɛ mbi. Ni la, Mbi lindó sambela uzu ti nɛngɔ ya, mbi si kwa ti fangɔ tɛnɛ.” Na ndãtu niko ko, Jocelyn tengbindó na Mary mɛndó na nzɔ̃ bɛ wa lo ye ngandó mandangɔ Ngbangɔ. Nyi nzɛ yakere na gesi Mary tɛnɛ ya, mbi ndo lindó sambela hɛ̃ Nzapa ya lo za mbi wa bo na ngoi nikondó la Jocelyn ga gɔngɔ nyɔ da. Lo gbɔ̃ndó li lo na ndo tɛnɛ ni wa Jocelyn pa ya, “Mbi mandó tɛrɛ mbi mabere Yehova ndo pa hɛ̃ mbi ya, ‘Mbi ye mɔ.’” E hĩnga ya, ta azi zu la na yengɔ tɛnɛ tɛ e na ya kwa ti pangɔ nzɔ̃ pa ma. Kanda elengbi ti yengɔ na bɛ e kɔi ya, bɛ Yehova ndo de na ngoi mɛ e ndo li zu ti nɛngɔ ya, e pa nzɔ̃ pa hɛ̃ azi mɛndɛ̃.

17. Ye mɛ mɔ manda na ndo se lɛlo tɛ Vicky na omɛ aba gbɔ̃ngɔ li mɔ na ndo tɔ̃ngɔ nɛ? (Nzembo 5:12)

 ¹⁷ Tɔ̃ngɔ du ngbondoni na lo tɛ azi mɛ Yehova ndo ye ala. (1 Tim. 2:5, 6) Ye mɛ elengbi ti lingɔ se e du na kitɛ ka bɛ e ya, ta Yehova ndo sepala na e ma abɛse e na loyengɔ na ndo tɔ̃ngɔ wa e mu nga batisimɔ nɛ? Hĩnga ya, ta ayɔ ya e kpã bɛ e ngoi zu na ndo se mɛ e ndo ma na tɛrɛ e ma, kanda elengbi ti kpãngɔ bɛ e na ndo Yehova. Lo ndo hũ azi mɛ ndo fa loyengɔ na mbage ti tɔ̃ngɔ ya, ala du mbilimbili ka lɛ lo wa lo ko nga kapa ya, lo na sulungɔ ala. (Di Nzembo 5:12; Roma 3:26) Gbɔ̃ li mɔ na ndo se mɛndó tɔ̃ngɔ aza nyita Vicky. La kɔi, na pɛ gbɔ̃ngɔ li lo na ndo ye mɛ tɔ̃ngɔ li na lo tɛ lo ko, lo pa ya: “Yehova gbendó bɛ lo na lo tɛ mbi na pɛ angoi gba. . . . Kanda mbi ndo pandó hɛ̃ Yehova ngoi zu ya: ‘Ta songo tɛ mɔ mɛ zanga maka ziandó mbi ma. Nyi mɔ hɛ̃ndó dungɔ lɛ ngɛ̃́ tɛ lo so vĩngɔ siɔ kpale tɛ mbi.’” Gbɔ̃ngɔ li lo na ndo anzɔ̃ ye mɛ tɔ̃ngɔ li na lo tɛ lo ko, ni lindó ya lo banda mangɔ tɛrɛ lo ya, Yehova ndo ye lo. Kwɛ kɔi, elengbi nga ti mangɔ tɛrɛ e ya, Yehova ndo ye e wa lo ndo sepala nga na e se e ndo gbɔ̃ li e na ndo tɔ̃ngɔ.

18. Ye mɛ elengbi ti yengɔ na bɛ e kɔi se e ngbã lá kwɛ yengɔ To e ti ndozu nɛ?

¹⁸ Abɛse mɔ ndo li zu ti nɛngɔ ya, mɔ kpã na kwa akpale mɛ e lo ti mandangɔ ko, Ngoi mɛndɛ̃ mɔ lengbi ti nzɛ̃ngɔ nga hũndangɔ tɛrɛ mɔ na ndo ya, bere Yehova ndo sepala na mɔ. Se adu ngaso ko hĩnga ya, bɛ Yehova ndo sepala na “azi ko la ndo ngbã lá kwɛ yengɔ lo.” (Zaki 1:12) Na lo ni la, ngbã lá kwɛ dã na lo wa ndo gi ngoi zu aye mɛ ndo fa ya, lo ndo ye e. Ngoi zu, ndo bata kaya bingangɔ li tɛ mɔ ya, ta Yehova “ndo du yɔngɔrɔ ni na kɔi kɔi tɛ e ma.”​—Aw. 17:27.