1. Ngasia la awakwa tɛ Yehova ndo lɛkɛndó akpale na siɛklɛ ti uzu nɛ?

 NA NGOI mɛ Yehova ndo hɛ̃ azi tɛ lo kwa kɔi ko, lo ndo kũ ya ala li ni na seni. (1 Kɔr. 14:33) Na ndakisa gwɛ̃ tɛ Nzapa du ya afa nzɔ̃ pa na ndo lɛ gigi zu. (Mat. 24:14) Ni la, Yehova hɛ̃ Yezo kumba ti nɛngɔ ya, lo tambwisa kwa ni. Wa Yezo ndo ba kwa ni ti nɛngɔ ya, aɔ na seni. Na siɛklɛ ti uzu azindó abombi kaya akɔdɔrɔ ndɛ̃ ndɛ̃ ndɛ̃ wa akpãndó abiazi ti nɛngɔ ya, akpale zu aɔ na seni. (Aw. 14:23) Yeruzalɛmɛ dundó ndo mɛ abiazi ná atoma ndo dundó ka da, wa ala ndo mundó ekateli mɛndó ayɔ ya, abombi zu ndo tɔndɔ ni. (Aw. 15:2; 16:4) Na lo mɛ ya, ala ndo tɔndɔndó malako mɛ ala ndo lua ko, ni lindó ya “abombi ti kpengba ni na ya loyengɔ wa bi zu azi ndo ti bondó gba.”​—Aw. 16:5, NWT.

2. Bandangɔ na 1919, ngasia la Yehova tambwisa, wa lo ndo hɛ̃ nga awa kwa tɛ lo tɛ ti nyingɔ nɛ?

² Tee ndɛ, Yehova ndo lɛkɛ azi tɛ lo. Bandangɔ na 1919, Yezo ndo salela linɔ tɛ ayata kɔli mɛ ahĩni la na kpɔ̃ ti nyingɔ vurú ti nɛngɔ ya, ala lɛkɛ kwa ti fangɔ tɛnɛ wa ala hɛ̃ nga tɛ ti nyingɔ hɛ̃ ava lo. a (Luka 12:42) E ndo e hũ yangondo ya, Yehova ndo sulu kwa tɛ ala.​—Yis. 60:22; 65:13, 14.

3-4. (a) Hɛ̃ se lɛlo kɔi mɛ ndo fa ya, e ndo lua anzɔ̃ sulu na ya linɔ tɛ Nzapa. (b) Ye mɛ ndɛ e na mandangɔ nɛ?

 ³ Se ta e du ge ya linɔ mɛ ahĩnga lɛkɛngɔ kpale ma ko, ale ta e koka lingɔ kwa mɛ Yezo hɛ̃ e ma. (Mat. 28:19, 20) Da bɛ mɔ ya, ta ahɛ̃ bombi kɔi kɔi kumba ti teritwarɛ mɛ lo lengbi ti singɔ kwa ti fangɔ tɛnɛ ka da ma. Wa apa ya, zo na zo si na se bɛ lo, ni na dungɔ ngasia? Ni na lingɔ ya, awa fangɔ tɛnɛ afa tɛnɛ na ya teritwarɛ kɔi fãni gba, kanda ateritwarɛ mɛndɛ̃ na ngbãngɔ gɛgɛrɛ. Mɔ lengbi ti dangɔ bɛ mɔ na ndenge mɛndɛ̃ mɛ e ndo lua na anzɔ̃ sulu na ya linɔ tɛ Nzapa?

⁴ Nga ma se kondó Yezo lɛkɛ na ava lo na ngoi ti gã ko, lo ndo li nga ngaso ndɛ na ngoi tɛ e. Na ya tɛnɛ mɛ, e na tɛnɛngɔ tɛnɛ na ndo se lɛlo mɛndó Yezo zia hɛ̃ e, nga na se mɛ linɔ tɛ e ndo landa se lɛlo ni. Wa e nga na hũngɔ se mɛ elengbi ti fangɔ ya, e ndo kpã bɛ e na ndo linɔ tɛ Yehova.

LINƆ TƐ E NDO LANDA SE LƐLO TƐ YEZO

5. Kɔi ti aye mɛ alengbi ti tongɔ e, e tɛnɛ ya linɔ tɛ Yehova ndo landa se lɛlo tɛ Yezo nɛ? (Yoanɛ 8:28)

⁵ Yezo mandandó ka tɛ To lo se ti lingɔ na kpale nga na se ti tɛnɛngɔ na tɛnɛ. Linɔ tɛ Yehova ndo landa se lɛlo tɛ Yezo na salelangɔ Ngbangɔ ti zangɔ e ya, e hĩnga ye mɛ nzɔ̃ni ná ye mɛ siɔni wa ni ndo tambwisa nga dungɔ lɛ ngɛ̃́ tɛ e. (Di Yoanɛ 8:28; 2 Tim. 3:16, 17) Ni ndo hɛ̃ e wangɔ ngoi zu ya, e di wa e kpã nga na kwa akpale mɛ e ndo di na ya tɛnɛ tɛ Nzapa. Nzɔ̃ kpale mɛ e ndo lua na landangɔ wangɔ niko nɛ?

6. Di kɔi ti anzɔ̃ kpale mɛ e ndo lua na ngoi mɛ e ndo manda Ngbangɔ.

⁶ E ndo lua anzɔ̃ kpale niko gba na ngoi mɛ e ndo salela ambeti tɛ e mɛ ndo kambisa atɛnɛ ti ya Ngbangɔ. Na ndakisa, e ndo ti na likoki ti hakangɔ tɛnɛ mɛ Ngbangɔ ndo tɛnɛ nga na andia mɛ linɔ tɛ e ndo hɛ̃. Na ngoi mɛ e ndo hũ ya andia mɛ e ndo lua ndo lo kaya Ngbangɔ ko, ni ndo to e ya, e kpã bɛ e gba na ndo linɔ tɛ Yehova.​—Roma 12:2.

7. Tɛnɛ mɛndó Yezo fa nɛ, wa ngasia la linɔ tɛ Yehova ndo landa se lɛlo tɛ lo nɛ?

⁷ Yezo pandó “Nzɔ̃ pa mɛ aba Lo-lengɔ Gbia tɛ Nzapa.” (Luka 4:43, 44) Wa lo hɛ̃ ngandó ava lo kumba ti pangɔ nzɔ̃ pa mɛ aba Lo-lengɔ Gbia ni. (Luka 9:1, 2; 10:8, 9) Ndɛ lo mɛ ko, azi zu mɛ ge ya linɔ tɛ Yehova na kumba ti pangɔ nzɔ̃ pa ti Lo-lengɔ Gbia abɛse ala ndo du ka wa bere ala na kumba ni nɛ.

8. Nzɔ̃ tangɔ li gɛrɛ mɛ e na ni nɛ?

⁸ E na nzɔ̃ tangɔ li gɛrɛ ti pangɔ hɛ̃ azi mɛndɛ̃ kpale mɛ aba Lo-lengɔ Gbia tɛ Nzapa! Kanda ta azi zu la na nzɔ̃ tangɔ li gɛrɛ niko ma. Na ndakisa, na ngoi mɛndó Yezo ge lɛ sese ko, ta lo hɛ̃ndó asiɔ nyingɔ lége ya, ala ha tɛnɛ na ili lo ma. (Luka 4:41) Ndɛ lo mɛ ko, uzu ti nɛngɔ ya, zo ti kɔi tɛ awa fangɔ tɛnɛ ge ya linɔ tɛ Yehova ko, ayɔ ya, lo du na dungɔ lɛ ngɛ̃́ mɛ ndo hɛ̃ Yehova dengɔ bɛ. E ndo fa ya, e ndo sepala na nzɔ̃ tangɔ li gɛrɛ mɛ e na ni ti fangɔ tɛnɛ na ndo zu se e ndo li zu ti lingɔ ni na bangɔ makoki tɛ e. E na landangɔ se lɛlo tɛ Yezo se e li zu ti hangɔ nga na pangɔ hɛ̃ azi mbilimbili.—Mat. 13:​3, 23; 1 Kɔr. 3:6.

9. Ngasia la linɔ tɛ Nzapa ndo li ya, azi hĩnga ili Nzapa nɛ?

⁹ Yezo lindó ya azi hĩnga ili Nzapa. Na ya sambela mɛndó Yezo li hɛ̃ To lo ti ndozu ko, lo pandó ya: “Mbi li ya, ala hĩnga ili mɔ.” (Yn. 17:26) Linɔ tɛ Yehova ndo landa se lɛlo tɛ Yezo na ngoi mɛ ala ndo li zu ti nɛngɔ ya, azi hĩnga ili Nzapa. Ngbangɔ Libongoli ya mokili ya sika adiri na ili Yehova nga ma se mɛndó asu na ni uzu. Ndɛ lo mɛ ko, agbinyangbi Ngbangɔ ni na yanga ɔngɔ 270. Se mɔ ba apandisɛ A4 ná A5 ko, mɔ na mandangɔ aye gba mɛ aba se mɛ adiri na ili Nzapa kaya Ngbangɔ ni. Wa  apandisɛ C ti ya Ngbangɔ akambisa akpale gba ya, elengbi ti luangɔ ili Nzapa fãni 237 kaya fãna Ngbangɔ.

10. Wangɔ mɛ mɔ lua na ndo tɛnɛ tɛ nyita wali mɛ ndo du ka Birmanie nɛ?

¹⁰ Nga ma Yezo e ye zangɔ azi gba ya, ala hĩnga ili Nzapa se alengbi. Na ngoi mɛ wali kɔi mɛ ndo du ka Birmanie mɛ na bulu 67 amandandó ya, Nzapa na ila ko, lo tondó to wa lo tɛnɛ ya: “Adu fãni ti uzu na ya dungɔ lɛ ngɛ̃́ tɛ mbi. . . . Hĩngangɔ ya ili Nzapa la Yehova. Mɔ ha mbi na ye kɔi ti ngbondoni mɛndó ta mbi dɛ mbi manda ni ma.” Nga ma se mɛ se lɛlo tɛ nyita mɛ afa na ni, ngoi mɛ azi ndo hĩnga ili Nzapa ko, ala ndo gbinyangbi nvɛ̃ni dungɔ lɛ ngɛ̃́ tɛ ala.

NGBÃ LÁ KWƐ FANGƆ YA, MƆ NDO KPÃ BƐ MƆ NA NDO LINƆ TƐ E

11. Ngasia la abiazi lengbi ti fangɔ ya, ala ndo kpã bɛ la na ndo linɔ tɛ Yehova nɛ? (Ba nga limɔ.)

¹¹ Ngasia la abiazi lengbi ti fangɔ ya, ala ndo kpã bɛ ala na ndo linɔ tɛ Yehova nɛ? Na ngoi mɛ linɔ tɛ Yehova ndo hɛ̃ abiazi malako ko, ayɔ ya ala di ni na seni, wa ala li zu ti kpãngɔ ni na kwa. Na ndakisa, ta ala ndo lua bo malako na lo ti hangɔ nga na lingɔ sambela ka bombi ma, kanda ala ndo lua nga malako na se ti batangɔ angasã gbaga tɛ Kristo. Se abiazi li zu ti kpãngɔ na kwa malako mɛ linɔ tɛ Nzapa ndo hɛ̃ ala ko, ayata kɔli ná ayata wali ndo hũ ya, Yehova ndo ye ala wa lo ye nga batangɔ ala.

12. (a) Nda mɛ elengbi ti mangɔ azi mɛ ndo tambwisa e nɛ? (Aebreo 13:7, 17) (b) Nda mɛ ayɔ ya, e kpã lɛ e na ndo aseliye ti nzɔ̃ni tɛ ayata mɛ ndo tambwisa e nɛ?

¹² Na ngoi mɛ e ndo lua malako na lége tɛ abiazi ko, ayɔ ya e landa ni na seni. Se e li ngaso ko, ni na lingɔ ya kwa tɛ ala ati yapuni. Ngbangɔ sa ngunu bɛ e ya, e tɔndɔ wa e zu nga na tɛrɛ e ka tɛ azi mɛ ndo tambwisa e. (Di Aebreo 13:7, 17.) Kanda ngoi mɛndɛ̃ ando du pɛnɔ lingɔ ni. Na lo nɛ? Na lo mɛ ya ala du azi ti zangangɔ lengbingɔ. Ni la, se e ndo kpã lɛ e gba na ndo yungɔ ndo tɛ ala na se lɛ kpãngɔ lɛ e na ndo seliye tɛ ala ti nzɔ̃ni ko, ni na lingɔ ya, e hũ la mabere awa kula tɛ e. E ye tɛnɛngɔ ya nɛ? Se e ti na bingangɔ li ti siɔni na ndo abiazi ko, e nga na tingɔ na bingangɔ li ti siɔni na ndo linɔ tɛ Yehova. Wa ngasia la elengbi ti hĩngangɔ nga kɛ̃ngɔ tɛnɛ ti nvɛ̃nɛ mɛ awa kula tɛ e ndo pa na lo ti linɔ tɛ e nɛ?

TA MƆ ZIA YA AZI MƐNDƐ̃ AGBANZI MƆ NA KPÃNGƆ BƐ MƆ NA NDO LINƆ TƐ NZAPA MA

13. Ngasia la awa kula tɛ Nzapa ndo gi lége ti gbɛ̃ngɔ ndima ti linɔ tɛ lo nɛ?

¹³ Awa kula tɛ Nzapa ndo gi lége ti gbinyangbingɔ aye ti nzɔ̃ni na ya linɔ tɛ Yehova na ndenge ti siɔni. E mu ndakisa kɔi, Ngbangɔ tɛnɛ hɛ̃ e ya, Yehova ye ya, e du vuruni na ya mi, na ya bingangɔ li nga na ya nyingɔ. Lo tɛnɛ ya, azi zu ko la ndo nɔ nɔ na lége ti bí wa ala kɛ̃ nga gbinyangɔ bɛ la ko, ayɔ ya abi la gigi. (1 Kɔr. 5:11-13; 6:9, 10) Lingɔ ngaso ndo fa ya, e ndo tɔndɔ ndia ti ya Ngbangɔ. Landangɔ ndia ni ndo li ya, awa kula tɛ e tɛnɛ ya, ta e ndo ye azi ma, e ndo fa ngbanga e bi li la wa ta e ndo hɛ̃ nga ala lége ya, ala li ye mɛ bɛ la ye ma.

14. Anvɛ̃nɛ mɛ azi ndo le na lo ti linɔ tɛ Nzapa ando lo ka tɛ na?

¹⁴ Hĩnga na seni azi mɛ adu awa kula ti linɔ tɛ e.  Satana la du zo mɛ ndo si na anvɛ̃nɛ zu mɛ azi ndo tɛnɛ na ndo linɔ tɛ e. Ta bɛ e li na ni ma ya, lo la lo du “to nvɛ̃nɛ.” (Yn. 8:44, NWT; Eb. 3:1-5) Ayɔ ya, e lɛkɛ tɛrɛ e na lo ti nvɛ̃nɛ mɛ Satana ná azi tɛ lo na salelangɔ ti nɛngɔ ya, ala le na ndo linɔ tɛ Yehova. Ni li ngandó tɛrɛ lo ngaso na siɛklɛ ti uzu.

15. Ye mɛndó agbia ti sambela ali na Yezo ná ava lo nɛ?

¹⁵ Na siɛklɛ ti uzu, azi mɛndó ka mbage tɛ Satana alendó nvɛ̃nɛ na ndo Yezo mɛ Nyi Nzapa  mɛ na tɛrɛ ti lengbingɔ nga na ngunu ti lingɔ aye ti kpɛ̃nɛ. Na ndakisa, agbia ti sambela ndo tɛnɛndó ya, ‘gbia tɛ ademo’ la ndo hɛ̃ Yezo ngunu ti tomangɔ na asiɔ nyingɔ. (Mar 3:22) Na ngoi ti sambisangɔ Yezo ko, agbia ti sambela ni karandó lo tɛrɛ lo, wa ala tondó azi ya ala gɔngɔ lo ka ndo kɛkɛ wa lo kpi. (Mat. 27:20) Na pɛni, ngoi mɛndó ava Yezo ndo pa nzɔ̃ pa ko, awa kula “ndo tondó azi” ya, agwe hɛ̃ ala pɛnɔ. (Aw. 14:2, 19) Nga ma se mɛ Linɔngi ti Sinzili ti 1/12/1998 akambisa tɛnɛ mɛ kaya Awa Pangɔ Kwa 14:2 ya: “Azi mɛndó ahɛ̃ ti la hɛ̃ Satana akɛ̃ndó mangɔ tɛnɛ ti nzɔ̃ pa mɛndó azi ti Yuda ndo pa, wa ala to ngandó azi mɛndɛ̃ ya, ala tɛnɛ tɛnɛ ti siɔni na ili awakristo, ala kɛ̃ nga mangɔ ala wa bɛ la sĩ nga na ala.”

16. Se e ma apandɛ ti nvɛ̃nɛ na ndo linɔ tɛ e, ye mɛ ayɔ ya e da bɛ e na ni nɛ?

¹⁶ Ta Satana ziandó handangɔ awakristo na ngoi ti uzu ma. Tee ndɛ ko, lo ndo handa “azi ti lɛ sese zu.” (Suma 12:9) Se mɔ ndo ma apandɛ ti nvɛ̃nɛ na ndo linɔ tɛ e nga na ndo azi mɛ ndo tambwisa e ko, binga li mɔ na ndo pɛnɔ mɛndó Yezo ná ava lo hũ na siɛklɛ ti uzu. Ndɛ lo mɛ, e ndo hũ tɛnɛ mendó Ngbangɔ tɛnɛ ya, azi na tɛmɛlangɔ awa vɔrɔngɔ Yehova wa ala nga na tɛnɛngɔ tɛnɛ ti nvɛ̃nɛ na ili ala. (Mat. 5:11, 12) Kanda ta e na ziangɔ ya apandɛ ti nvɛ̃nɛ niko anzɛ̃ na e ma, se du ya, e ndo gi hĩngangɔ azi mɛ ndo si na nvɛ̃nɛ ni wa e kɛ̃ nga ni mbala kɔi. Ngasia la elengbi ti batangɔ tɛrɛ e na ya tɛnɛ niko ti nvɛ̃nɛ nɛ?

17. Ye mɛ elengbi ti lingɔ ti nɛngɔ ya e kɛ̃ apandɛ ti nvɛ̃nɛ nɛ? (2 Timɔte 1:13) (Ba nga Ãkadre “ Ye mɛ elengbi ti lingɔ ti nɛngɔ ya e kɛ̃ apandɛ ti nvɛ̃nɛ.”)

¹⁷ Kɛ̃ apandɛ̃ ti nvɛ̃nɛ. Toma Polo hɛ̃ e awangɔ ti yangondo na ndo aye mɛ elengbi ti lingɔ se du ya, e ma atɛnɛ ti nvɛ̃nɛ. Lo tɛnɛndó hɛ̃ Timɔte ya ‘lo pa hɛ̃ azi mɛndɛ̃ ya [. . .] ala zia  kpãngɔ bɛ la na ndo apandɛ ti nvɛ̃nɛ’ wa lo panga hɛ̃ la ya, ‘ĩ kɛ̃ apandɛ ti nvɛ̃nɛ.’ (1 Tim. 1:3, 4; 4:7) Bebe lengbi ti mungɔ ye ti bí ka bɛ sese wa lo kpã ni ka yanga lo, kanda ta kangba lengbi ti lingɔ ngaso ma, na lo mɛ ya, lo hĩnga ya ni na giangɔ lo bere ni na hɛ̃ngɔ lo ngã. E ndo e kɛ̃ apandɛ̃ ti nvɛ̃nɛ na lo mɛ ya, e hĩnga ndo mɛ ni ndo lo da. E ndo ye “atɛnɛ mɛ ndo dũ ale” ti mbilimbili.​—Di 2 Timɔte 1:13.

18. Ngasia la elengbi ti fangɔ ya, e ndo kpã bɛ e na ndo linɔ tɛ Yehova nɛ?

¹⁸ E manda aye taa ti ngbondoni mɛ ndo fa ya, linɔ tɛ Nzapa ndo landa se lɛlo tɛ Yezo. Na ngoi mɛ mɔ ndo manda Ngbangɔ ko, su aye mɛndɛ̃ mɛ ndo fa ya, linɔ tɛ Nzapa ndo landa se lɛlo tɛ Yezo. Ndo za azi mɛndɛ̃ ti ya bombi tɛ mɔ ti nɛngɔ ya, ala kpã bɛ la gba na ndo linɔ tɛ Nzapa. Ngbã lá kwɛ kpãngɔ bɛ mɔ na ndo lo nga na vɔrɔngɔ lo na mbilimbili zu. Wa ngbã ka ya linɔ tɛ lo na lo mɛ ya, lo ndo salela ni ti kokisangɔ na dangɔ bɛ tɛ lo. (Nz. 37:28) Zia ya, e zu e ngbã lá kwɛ yengɔ nzɔ̃ tangɔ li gɛrɛ mɛ e na ni ti dungɔ kaya ndasewa tɛ azi tɛ Yehova mɛ na songo nga na mbilimbili.