Mɔ hĩngandó ni uzu?
Nda mɛ azi mɛndó ta ala aya Izraɛlɛ ma atindó asoda tɛ gbia Davidi nɛ?
KA POPO tɛ asoda tɛ gbia Davidi ko, azi mɛndɛ̃ ta ala dundó azi ti Izraɛlɛ ma, na ndakisa: Zeleke zo ti Amone, Uriya zo Hitite, na Yitima zo ti Moabe. a (1 Nt. 11:39, 41, 46) “Azi ti Kerete, Perete ná azi ti Gate” ngandó ka popo tɛ asoda tɛ Davidi. (2 Sam. 15:18) Ngoi mɛndɛ̃ azi ti kerete ná Perete adundó azi ti ndasewa ti Filistia. (Ezk. 25:16) Wa azi ti Gate adundó azi mɛ ndo du kaya gbata ti Filistia mɛ ka Gate.—Yos. 13:2, 3; 1 Sam. 6:17, 18.
Nda mɛndó Davidi su ili azi mɛ ta ala du aya Izraɛlɛ ma na popo tɛ asoda tɛ lo nɛ? Na lo mɛ ya, lo yendó na bɛ lo kɔi ya, ala dundó mbilimbili na mbage tɛ lo, nga na mbage tɛ Yehova. Na ndakisa, diksiɔnɛrɛ kɔi mɛ ndo kambisa tɛnɛ ti ya Ngbangɔ atɛnɛ ya: “Azi ti Kerete ná ti Perete ngbãndó mbilimbili na mbage tɛ Davidi na ngoi mɛndó lo tengbi na kpengba kpale na ya lo-lengɔ gbia tɛ lo.” Ala fandó mbilimbili tɛ ala ngasia? “Ngoi mɛndó akɔli ti Izraɛlɛ zu asundola Davidi wa ala landa Sheba mɛ zo ti mobulu ko, azi ti Kerete ná ti Perete ngbãndó so gunda Davidi, ala za ngandó lo ti nɛngɔ ya, lo toma azi ti Sheba. (2 Sam. 20:1, 2, 7) Wa na ya ngoi mɛndɛ̃, Adoniya nyi gbia Davidi ayendó kpatangɔ lo-lengɔ gbia ka ti to lo. Kanda azi ti Kerete ná azi ti Perete di fandó mbilimbili fãni mɛndɛ̃ na Davidi, wa ala zandó ti nɛngɔ ya, akpã Salomo gbia, na lo mɛ ya Yehova ndó la pɔna lo ya lo du gbia na pɛnda to lo.—1 Ba. 1:24-27, 38, 39.
Zo mɛndɛ̃ mɛndó ta lo zo ti Izraɛlɛ ma mɛndó lo fa nga mbilimbili na mbage tɛ Davidi adu Itai zo ti Gate. Itai ná azi tɛ lo 600 azandó gbia Davidi na ngoi mɛndó nyi lo Abisalome tɔmbɔgɔ na ndo lo, wa lo li ngandó ya, aya Izraɛlɛ alanda lo. Davidi tɛnɛndó hɛ̃ Itai ya, na lo mɛ ya ta lo du zo ti Izraɛlɛ ma ko, ta yɔ ya lo tiri to na mbage tɛ lo ma. Kanda Itai tɛnɛndó ya: “Hũngɔ ya Yehova na dungɔ lɛ ngɛ̃́, wa gbia tɛ mbi nga na dungɔ lɛ ngɛ̃́ ko, mbi na landangɔ mɔ ndo zu ko la mɔ na gwengɔ da, abɛse ayɔ ya, mbi kpi bere mbi so!”—2 Sam. 15:6, 18-21.
Itai ná gbia Davidi ndo tɛnɛndó tɛnɛ na dengɔ bɛ
Abɛse du ya ta azi ti Kerete, Perete, nga na azi ti Gate adundó aya Izraɛlɛ ma ko, ala hĩngandó ya, Yehova du Nzapa ti mbilimbili, wa lo hĩni nga Davidi na kpɔ̃ ti nyingɔ. Davidi ndó na dengɔ bɛ ti luangɔ azi ti mbilimbili ka gunda lo!
a Ndia tɛ Nzapa mɛ kaya mbeti ti Kolimbola Mibeko 23:3-6 agbanzindó azi ti Amone ná azi ti Moabe ya, ta ala li kaya bombi tɛ aya Izraɛlɛ ma. Ngoi mɛndɛ̃ tɛnɛ niko ndo fa tingɔ kɔi tɛ azi ti ndasewa tɛ aya Izraɛlɛ, nga lingɔ ye kwɛ kɔi na azi ti ndasewa ni. Ta ndia niko gbanzindó azi mɛndɛ̃ ya, ala zia lingɔ kaya popo tɛrɛ azi tɛ Nzapa bere dungɔ ndoni kɔi na ala ma. Ba Étude perspicace des Écritures, volume 1, pajɛ 100.
